Mohlala wa Potego

NELMA yo a šomago bjalo ka molokiši wa meriri kua Cruzeiro do Sul, Brazil, morago bjale o ile a lebeletšana le teko ya potego ya gagwe ya Bokriste. Ge mafula a be a hlasetše tikologo ya gabo, Nelma o ile a amogela diaparo tšeo a di neilwego e le mpho ke yo mongwe wa bao a ba lokišago meriri. Ge a dutše a beakanya diaparo tšeo, o ile a hwetša tšhelete ya go lekana diranta tše 7 400 ka dipotleng tša a mangwe a marokgo.

Tšhelete yeo Nelma a e hweditšego e be e lekana le mogolo wa gagwe wa dikgwedi tše e ka bago tše šupago gomme o be a e hloka e le ka kgonthe. Ntlo ya gagwe e be e sentšwe ke mafula gomme tatagwe le bana babo ba be ba lahlegetšwe ke dilo tša bona tše dintši. Ka tšhelete yeo, o be a ka fetša go lokiša ntlo ya gagwe a ba a šalelwa ke e nngwe yeo a bego a ka thuša ba leloko ka yona. Lega go le bjalo, letswalo la Nelma leo le tlwaeditšwego ka Beibele ga se la ka la mo dumelela go ipolokela tšhelete yeo.—Baheberu 13:18.

Letšatšing le le latetšego, o ile a ya mošomong e sa le ka pela, pele ga dinako tše di tlwaelegilego tša kgwebo gomme a ikgokaganya le mosadi wa kgwebo yoo a neetšego ka diaparo tšeo. Nelma o ile a mo leboga bakeng sa diaparo eupša a oketša ka gore o be a ka se kgone go itšeela seo a se hweditšego ka gare ga tšona. Mosadi o ile a thabišwa kudu ke go amogela tšhelete yeo. O be a e beetše ka thoko bakeng sa go tlo lefa bašomi ba gagwe. Mosadi yo wa kgwebo o itše: “Potego ke selo seo o se hwetšago ka sewelo kudu.”

Ke therešo gore ba bangwe ba ka nagana gore go ba yo a botegago ga go bohlokwa le gatee. Lega go le bjalo, potego ke seka seo se lebelelwago e le se bohlokwa kudu ke bao ba katanelago go thabiša Modimo wa therešo, Jehofa. (Baefeso 4:25, 28) Nelma o itše: “Ge nkabe ke ile ka dira se se fapanego, ke be nka se lale ke robetše.”