A re Tumišeng Leina la Jehofa re le Gotee

“Xodišang Morêna xotee le nna, re phaxamišê ’ina l’axwe rè le mmôxô.”—PSALME 34:3.

1. Ke mohlala ofe o mobotse woo Jesu a o beilego nakong ya bodiredi bja gagwe bja lefaseng?

BOŠEGONG bja Nisani 14, 33 C.E., Jesu le baapostola ba gagwe ba ile ba opelela Jehofa ditumišo ba le gotee ka phapošing ya ka godimo ya ngwako kua Jerusalema. (Mateo 26:30) E be e le ka lekga la mafelelo Jesu a dira seo le baapostola ba gagwe. Lega go le bjalo, e be e le mo go swanetšego gore a fetše seboka sa gagwe le bona ka tsela yeo. Go tloga mathomong a bodiredi bja gagwe bja lefaseng go fihla mafelelong, Jesu o ile a reta Tatagwe gomme a šoma ka mafolofolo go dira gore leina la Gagwe le tsebje. (Mateo 4:10; 6:9; 22:37, 38; Johane 12:28; 17:6) Ka baka leo, o ile a dira taletšo e borutho yeo e dirilwego ke mopsalme ya gore: “Xodišang Morêna xotee le nna re phaxamišê ’ina l’axwe rè le mmôxô.” (Psalme 34:3) A mohlala o mobotse gakaakang woo re swanetšego go o latela!

2, 3. (a) Re tseba bjang gore Psalme 34 e na le molaetša wa boporofeta? (b) Ke’ng seo re tlago go se ahla-ahla sehlogong se le se se latelago?

² Diiri tše mmalwa ka morago ga go opela dikopelo tša tumišo le Jesu, moapostola Johane o ile a bona tiragalo e fapanego kudu. O bone Mong wa gagwe le disenyi tše pedi ba bolawa dikoteng tša tlhokofatšo. Bahlabani ba Roma ba ile ba roba maoto a disenyi tše pedi e le gore di hwe ka pela. Lega go le bjalo, Johane o bega gore bahlabani bao ga se ba roba maoto a Jesu. Ge bahlabani ba be ba e-tla go Jesu, o be a šetše a hwile. Ka Ebangeding ya gagwe, Johane o hlalositše gore se e be e le go phethagatšwa ga karolo e nngwe ya Psalme 34 e rego: “Ga go lerapo la gagwe le le tlago go robja.”—Johane 19:32-36; Psalme 34:20, Septuagint.

³ Psalme 34 e na le dintlha tše dingwe tše dintši tše di kgahlišago Bakriste. Ka baka leo, sehlogong se le se se latelago, re tla hlahloba maemo ao go ona Dafida a ngwadilego psalme ye gomme ra hlahloba dikagare tše di kgothatšago tša psalme ye ka boyona.

Ge Dafida a be a Tšhabela Saulo

4. (a) Ke ka baka la’ng Dafida a ile a tlotšwa gore e be kgoši ya nakong e tlago ya Isiraele? (b) Ke ka baka la’ng Saulo a ile a ‘rata Dafida gagolo’?

⁴ Ge Dafida e be e sa le yo monyenyane, Saulo e be e le kgoši ya Isiraele. Lega go le bjalo, Saulo o ile a se kwe gomme Jehofa a se sa hlwa a mo amogela. Ka baka leo, moporofeta Samuele o mmoditše gore: “Lehono Morêna ó xaxotše boxoši bya Isiraele mo xo wene, a bo neêla wa xeno e a Xo phalaxo.” (1 Samuele 15:28) Ka morago, Jehofa o ile a hlahla Samuele gore a tlotše Dafida, morwa wa mafelelo wa Isai, gore e be kgoši e latelago ya Isiraele. Ka nako yeo, Kgoši Saulo yo a bego a amogilwe moya wa Modimo o ile a gateletšega. Dafida, seopedi seo se nago le bokgoni, o ile a tlišwa Gibea gore a opelele kgoši ye, gomme mmino wa Dafida o ile wa lapološa Saulo, yo a ilego “a mo rata xa-xolo.”—1 Samuele 16:11, 13, 21, 23.

5. Ke ka baka la’ng Saulo a ile a se sa rata Dafida, gomme Dafida o ile a gapeletšega go dira’ng?

⁵ Ge nako e dutše e e-ya, Jehofa o ile a ipontšha a e-na le Dafida. Jehofa o ile a mo thuša go fenya nkgwete ya Mofilisita e lego Goliata gomme a thekga Dafida ge a be a retwa kua Isiraele ka baka la bokgoni bja gagwe go tša ntwa. Lega go le bjalo, Saulo o ile a ba le lehufa ge Jehofa a šegofatša Dafida gomme a thoma go mo hloya. Ka makga a mabedi ge Dafida a be a bapala  harepa ya gagwe pele ga Saulo, kgoši ye e ile ya mo foša ka lerumo. Ka makga ao a mabedi, Dafida o ile a kgona go phema lerumo leo. Ge Saulo a be a leka go mmolaya ka lekga la boraro, Dafida, e lego kgoši ya Isiraele ya nakong e tlago o ile a lemoga gore o swanetše go tšhaba e le go šireletša bophelo bja gagwe. Mafelelong, ka baka la maiteko a Saulo ao a tšwelago pele a gore a mo sware le go mmolaya, Dafida o ile a ikemišetša go tsoma botšhabelo ka ntle ga tikologo ya Isiraele.—1 Samuele 18:11; 19:9, 10.

6. Ke ka baka la’ng Saulo a ile a laela gore badudi ba Nobe ba bolawe?

⁶ Ge Dafida a be a le tseleng yeo e yago mollwaneng wa Isiraele, o ile a ema nageng ya Nobe moo go bego go e-na le tabarenakele ya Jehofa. Go bonagala Dafida a be a sepela le sehlopha sa masogana ao a bego a mo šireleditše ge a be a tšhaba, gomme Dafida o ile a hweletša yena le masogana ao dilapološi. Saulo o ile a kwa gore moperisita yo a phagamego o neile Dafida le masogana ao a sepelago le ona dijo le lerumo leo Dafida a bego a le tšere ge a se na go bolaya Goliata. A galefile, Saulo o ile a laela gore badudi ba naga ka moka ba bolawe go akaretša le baperisita ba 85.—1 Samuele 21:1, 2; 22:12, 13, 18, 19; Mateo 12:3, 4.

Go Phonyokga Lehu Gape

7. Ke ka baka la’ng Gathe e be e le lefelo le kotsi leo Dafida a bego a ka iphihla go lona?

⁷ Ge a tloga Nobe, Dafida o ile a tšhabela lefelong le le lego dikhilomithara tše ka bago tše 40 ka bodikela tikologong ya Bafilisita gomme a kgopela tšhireletšo go Kgoši Akise lefelong la gabo Goliata, e lego Gathe. Mohlomongwe Dafida o be a nagana gore Saulo a ka se ye go mo tsoma Gathe. Lega go le bjalo, nakwana ka morago, bahlanka ba kgoši ya kua Gathe ba ile ba lemoga Dafida. Ge Dafida a be a e-kwa gore o lemogilwe, “a boifa Akise kxoši ya Gathe xa-xolo.”—1 Samuele 21:10-12.

8. (a) Psalme 56 e re botša’ng mabapi le phihlelo ya Dafida kua Gathe? (b) Dafida o ile a phonyokga lehu bjang ka lešobana la nalete?

⁸ Ke moka, Bafilisita ba ile ba swara Dafida. E ka ba e be e le ka nako ye mo Dafida a ilego a  hlama psalme e tšwago pelong yeo go yona a ilego a lopa Jehofa ka gore: “Mexôkxô ya-ka e bolokê sebyaneng sa xaxo.” (Psalme 56:8 le mantšu a ketapele) Ka baka leo, o ile a bontšha go holofela ga gagwe gore Jehofa a ka se ke a lebala manyami a gagwe eupša o tla mo hlokomela ka lerato le go mo šireletša. Le gona Dafida o ile a loga leano la go gakantšha kgoši ya Bafilisita. O ile a ikgafiša. Ge a bona se, Kgoši Akise o ile a omanya bahlanka ba gagwe ka ge ba ile ba tliša monna wa “sexáfa” pele ga gagwe. Go molaleng gore Jehofa o ile a thekga leano la Dafida. Dafida o ile a rakwa nageng yeo, ya ba e le gona ge a phonyokgile lehu gape ka lešobana la nalete.—1 Samuele 21:13-15.

9, 10. Ke ka baka la’ng Dafida a ile a ngwala Psalme 34, le gona Dafida a ka ba a be a naganne ka’ng ge a be a hlama psalme ye?

⁹ Beibele ga e bolele ge e ba bathekgi ba Dafida ba ile ba tšhabela Gathe le yena goba ge e ba ba ile ba tšwela pele ba mo letile metsaneng ya kgaufsi ya Isiraele. Go sa šetšwe gore boemo ke bofe, ba swanetše go ba ba ile ba thabela go ba gotee gape ge Dafida a be a ba begela kamoo Jehofa a mo phološitšego ka gona. Tiragalo yeo e bile motheo wa Psalme 34, go etša ge mantšu a ketapele a bontšha. Ditemaneng tše šupago tša mathomo tša psalme ye, Dafida o reta Modimo ka ge a ile a mo phološa gomme o laletša bathekgi ba gagwe gore ba mo tlatše ge a tumiša Jehofa bjalo ka Mophološi yo Mogolo wa batho ba Gagwe.—Psalme 34:3, 4, 7.

¹⁰ Dafida le banna ba gagwe ba ile ba hwetša lefelo la tšhireletšego ka leweng la Adulama lefelong la dithaba la Isiraele, dikhilomithara tše e ka bago tše 15 ka bohlabela bja Gathe. Gona moo, Baisiraele bao ba bego ba sa kgotsofatšwe ke maemo ka tlase ga pušo ya Kgoši Saulo ba ile ba thoma go tla le go ba tlatša. (1 Samuele 22:1, 2) Dafida a ka ba a be a naganne ka bona ge a be a hlama mantšu a lego go Psalme 34:8-22. Dikgopotšo tše di lego ditemaneng tšeo le tšona di bohlokwa go rena lehono, le gona re tla holwa e le ruri ke go hlahloba ka mo go tseneletšego psalme ye yeo e kgahlišago.

Na Kganyogo ya Gago e Kgolo e Swana le ya Dafida?

11, 12. Re na le mabaka afe ao a re dirago gore re rete Jehofa ka mehla?

¹¹ “A nkê ke rêtê Morêna mehla yohle, ’me molomo wa-ka o dulê ò na le sefela s’axwe.” (Psalme 34:1) Ka ge Dafida a be a phela bjalo ka molahlwa, a ka ba a be a tshwenyegile ka dilo tše dintši tše di bonagalago, eupša bjalo ka ge mantšu a a bontšha, dipelaelo tša gagwe tša letšatši le letšatši ga se tša ka tša fokotša boikemišetšo bja gagwe bja go hlankela Jehofa. Ruri wo ke mohlala o mobotse go rena ge re lebeletšane le mathata! Go sa šetšwe gore re sekolong, re mošomong, re na le Bakriste-gotee goba re bodireding bja phatlalatša, kganyogo ya rena e kgolo e swanetše go ba go tumiša Jehofa. Nagana feela ka mabaka a mantši ao re nago le ona a go dira bjalo! Ka mohlala, selo seo re ka se hwetšago le go se thabela tlholong e botse ya Jehofa ga se fele. Le gona ela hloko seo a se fihleletšego ka karolo ya lefaseng ya mokgatlo wa gagwe! Jehofa o dirišitše batho bao ba botegago ka tsela e matla mehleng ya rena gaešita le ge ba sa phethagala. Mediro ya Modimo e fapana bjang le ya batho bao lefase le ba dirago medimo? Na ga o dumelelane le Dafida, yo gape a ngwadilego gore: “Xo medimo xa xo mo-ka-Wêna, xa xo se-ka-tirô-tš’axo”?—Psalme 86:8.

¹² Ka go swana le Dafida, re ikwa re tutueletšega go reta Jehofa ka mehla ka baka la mediro ya gagwe ye e sa bapišwego. Go oketša moo, re thabišwa ke go tseba gore Mmušo wa Modimo ga bjale o ka diatleng tša Mojabohwa wa sa ruri wa Dafida e lego Jesu Kriste. (Kutollo 11:15) Se se bolela gore bofelo bja tshepedišo ye ya dilo bo kgaufsi. Bokamoso bjo bo sa felego bja batho ba fetago dikete tše milione bo kotsing. Le ka mohla ga gwa ka gwa ba le go nyakega mo gokaakaa ga gore ba bangwe ba botšwe ka Mmušo wa Modimo le seo o tla se direlago batho kgaufsinyane le go ba thuša go reta Jehofa gotee le rena. Ka kgonthe, selo seo re se etišago pele bophelong e swanetše go ba go diriša sebaka se sengwe le se sengwe go kgothaletša  ba bangwe go amogela “ditaba tše tše dibotse” pele maloba e e-ba maabane.—Mateo 24:14.

13. (a) Dafida o ile a reta mang, gomme ke batho ba mohuta ofe bao ba ilego ba kgongwa ke seo? (b) Ba boleta ba gogelega bjang phuthegong ya Bokriste lehono?

¹³ “Môya wa-ka o fadiša Yêna Morêna; babôtlana ba tlo di kwa ’me ba thaba.” (Psalme 34:2) Mo Dafida ga se a ka a ikgantšha ka dilo le ge e le dife tšeo a di fihleletšego. Ka mohlala, ga se a ikgantšha mabapi le kamoo a ilego a gakantšha kgoši ya Gathe. O ile a lemoga gore Jehofa o mo šireleditše ge a be a le kua Gathe le gore o phonyokgile ka thušo ya Jehofa. (Diema 21:1) Lega go le bjalo, Dafida ga se a ka a itheta, eupša o ile a reta Jehofa. Ba boleta ba ile ga gogelega go Jehofa ka baka la se. Jesu le yena o ile a tumiša leina la Jehofa ka mehla, gomme se se ile sa gogela batho bao ba ikokobeditšego le bao ba sa rutegago go Yena. Lehono, ba boleta ba ditšhaba tšohle ba gogelega ka phuthegong ya ditšhaba-tšhaba ya Bakriste ba tloditšwego, yeo Jesu e lego Hlogo ya yona. (Bakolose 1:18) Dipelo tša batho ba bjalo ba boleta di a tutueletšega ge ba e-kwa leina la Modimo le tagafatšwa ke bahlanka ba gagwe bao ba ikokobeditšego le ge ba e-kwa molaetša wa Beibele, wo moya wa Modimo o ba thušago go o kwešiša.—Johane 6:44; Ditiro 16:14.

Diboka di Matlafatša Tumelo ya Rena

14. (a) Na Dafida o be a kgotsofatšwa ke go reta Jehofa ka sephiring feela? (b) Jesu o ile a bea mohlala ofe mabapi le diboka tša borapedi?

¹⁴ “Xodišang Morêna xotee le nna, re phaxamišê ’ina l’axwe rè le mmôxô.” (Psalme 34:3) Dafida o be a sa kgotsofatšwe ke go tumiša Jehofa feela ka sephiring. Ka lerato o ile a laletša bagwera ba gagwe gore ba mo tlatše go tumišeng leina la Modimo. Ka mo go swanago, Jesu Kriste, Dafida yo Mogolo, o ile a thabela go reta Jehofa phatlalatša—sinagogeng ya lefelong leo, menyanyeng tempeleng ya Modimo kua Jerusalema le ge a be a e-na le balatedi ba gagwe. (Luka 2:49; 4:16-19; 10:21; Johane 18:20) Ruri ke tokelo e thabišago go latela mohlala wa Jesu ka go tumiša Jehofa nako le nako ge go kgonega re le gotee le badumedi-gotee, kudu-kudu gona bjale ka ge re “bona letšatši le batamela”!—Baheberu 10:24, 25.

15. (a) Phihlelo ya Dafida e kgomile banna ba gagwe bjang? (b) Go ba gona dibokeng go re hola bjang?

¹⁵ “Morêna mola kè mo nyaka ó nkwile, a mphološa mo xo tšohle tše ke bexo ke di šia.” (Psalme 34:4) Phihlelo ye e be e le bohlokwa go Dafida. Ka baka leo, o ile a tšwela pele ka gore: “Mmôtlana šó, a bitša Morêna, a mo kwa, a mo phološa mo mahlomoleng a xaxwe ohle.” (Psalme 34:6) Ge re e-na le badumedi-gotee le  rena, re na le dibaka tše dintši tša go laodiša diphihlelo tše di kgothatšago tša kamoo Jehofa a re thušitšego ka gona go kgotlelela maemo a thata. Se se matlafatša tumelo ya badumedi-gotee, go fo swana le ge dipolelo tša Dafida di ile tša matlafatša tumelo ya bathekgi ba gagwe. Boemong bja Dafida, bagwera ba gagwe ba ile ba ‘lebelela Jehofa ba wa pelo; difahlego tša bona tša se šegame.’ (Psalme 34:5) Gaešita le ge ba be ba tšhabela Kgoši Saulo, ga se ba ka ba lewa ke dihlong. Ba be ba holofela gore Modimo o be a thekga Dafida, gomme difahlego tša bona di be di phadima. Ka mo go swanago, batho bao ba sa tšwago go thabela gotee le bao ba bilego Bakriste ba therešo ka nako e telele ba lebelela Jehofa gore a ba thekge. Ka ge ba ile ba bona ge a ba thuša, difahlego tša bona tše di phadimago di bonagatša boikemišetšo bja bona bja go nyaka go dula ba botega.

Thabela Thušo ya Barongwa

16. Jehofa o dirišitše barongwa ba gagwe bjang gore ba re namolele?

¹⁶ “Morongwa wa Morêna ó xoraxorêla ba ba mmoifaxo; ó a ba namolêla.” (Psalme 34:7) Dafida ga se a ka a lebelela go namolelwa ke Jehofa e le selo seo se ka diragalelago yena feela. Ke therešo gore Dafida e be e le motlotšwa wa Jehofa, kgoši ya Isiraele ya nakong e tlago; eupša o be a tseba gore Jehofa o diriša barongwa ba gagwe go hlokomela barapedi ba gagwe ka moka bao ba botegago, go sa šetšwe gore ba tumile goba ga se ba tuma. Mehleng ya rena, barapedi ba therešo ba ile ba bona tšhireletšo yeo Jehofa a e neago. Kua Nazi ya Jeremane—gotee le kua Angola, Malawi, Mozambique le dinageng tše dingwe tše dintši—bao ba lego matleng a taolo ba ile ba thoma lesolo la go fediša Dihlatse tša Jehofa. Maiteko a bona a ile a folotša. Go e na le moo, batho ba Jehofa dinageng tšeo ba tšwela pele ba ata ge ba dutše ba tumiša leina la Modimo ba le gotee. Ka baka la’ng? Ka gobane Jehofa o diriša barongwa ba gagwe ba bakgethwa go šireletša le go hlahla batho ba gagwe.—Baheberu 1:14.

17. Barongwa ba Modimo ba re thuša bjang?

¹⁷ Go oketša moo, barongwa ba Jehofa ba ka tsena ditaba gare e le gore motho le ge e le ofe yo a ka kgopišago ba bangwe a ka tlošwa gare ga batho ba Jehofa. (Mateo 13:41; 18:6, 10) Le gona gaešita le ge re ka ba re sa lemoge ka nako yeo, barongwa ba tloša mapheko ao a ka šitišanago le tirelo ya rena go Modimo, gomme ba re šireletša dilong tšeo di ka beago tswalano ya rena le Jehofa kotsing. Se bohlokwa kudu ke gore ba re hlahla modirong wa go tsebatša “ditaba tše dibotse tša ka mo go sa felego” go batho bohle, go akaretša le bao ba lego mafelong ao modiro wa boboledi o dirwago ka tlase ga maemo a kotsi. (Kutollo 14:6) Bohlatse bja thušo ya barongwa bo boletšwe gantši dipukung tše di theilwego Beibeleng tše di gatišitšwego ke Dihlatse tša Jehofa. * Diphihlelo tše bjalo ke tše dintši kudu gore di ka lebelelwa ka go hlokomologwa e le tšeo di itiragalelago.

18. (a) Go nyakega’ng go rena gore barongwa ba tšwele pele ba re thuša? (b) Ke’ng seo se tlago go ahla-ahlwa sehlogong se se latelago?

¹⁸ E le gore re tšwele pele re hlahlwa le go šireletšwa ke barongwa, re swanetše go tšwela pele re tumiša leina la Jehofa gaešita le ge re lebeletšane le kganetšo. Gopola gore Morongwa wa Modimo o goragorela feela ‘ba ba boifago Jehofa.’ Seo se ra gore’ng? Go boifa Modimo ke’ng, gona re ka go hlagolela bjang? Ke ka baka la’ng Modimo yo lerato a nyaka gore re mmoife? Dipotšišo tše di tla ahla-ahlwa sehlogong se se latelago.

[Mongwalo wa ka tlase]

O be o tla Araba Bjang?

• Dafida o ile a kgotlelela diteko dife ge e sa le lesogana?

• Go swana le Dafida, ke’ng seo re kgomegilego kudu ka sona?

• Re lebelela diboka tša Bokriste bjang?

• Jehofa o diriša barongwa ba gagwe bjang gore ba re thuše?

[Dipotšišo tša Thuto]

[Mmapa go letlakala 21]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Rama

Gathe

Tsikilaga

Gibea

Jerusalema

Adulama

Kegila

Heburone

Sifi

Horeša

Maoni

Nobe

Betlelehema

Engedi

Karamele

Lewatle la Letswai

[Mothopo]

Map: Based on maps copyrighted by Pictorial Archive (Near Eastern History) Est. and Survey of Israel

[Seswantšho go letlakala 21]

Gaešita le ge a be a phela e le motšhabi, Dafida o ile a tumiša leina la Jehofa

[Seswantšho go letlakala 23]

Tumelo ya rena e a matlafala ge re theeditše diphihlelo tše di kgothatšago tšeo di laodišwago dipokanong tša rena tša Bokriste