Ekiša Botho bja Jehofa

JEHOFA MODIMO o phala bohle e bile ke mohlala o mobotse kudu wa go bontšha ba bangwe botho ka ditsela tše dintši, gaešita le bao ba sa lebogego le ba kgopo, e le ge a ba kgothaletša gore ba itshole. (Luka 6:35) Ka lehlakoreng le lengwe, Bakriste ka tlase ga joko e botho ya Kriste ba kgothaletšwa go apara botho le go hlagolela dienywa tša moya wa Modimo, tšeo di akaretšago botho. (Bagalatia 5:22; Bakolose 3:12) Ka tsela ye, ba iponagatša e le badiredi ba Modimo.—2 Bakorinthe 6:4-6.

Botho bjo Lerato bja Jehofa

Botho bjo lerato ke seka se se rategago sa Jehofa Modimo le seo a se thabelago, gomme se bonagala ditseleng ka moka tšeo a dirišanago le bahlanka ba gagwe ka tšona. (Psalme 36:7) Ge nkabe go se bjalo, nkabe e be e le kgale ba hwile. (Dillo tša Jeremia 3:22) Ka baka leo, Moše o ile a lopela Baisiraele ba marabele motheong wa leina le legolo la Jehofa le ka gobane Ke Modimo wa botho bjo lerato.—Numeri 14:13-19.

Mangwalo a bontšha gore botho bjo lerato bja Jehofa, goba lerato le le sa kwanantšhego, bo bonagatšwa ka ditsela tše di fapa-fapanego le ka tlase ga maemo a fapa-fapanego—ka ditiro tša phološo le tšhireletšo, e le tšhireletšego le polokego e bile e le selo seo se tlišago kimologo mathateng. (Psalme 6:4; 31:16, 21; 40:11) Bao Modimo a ba kgethilego ba thušwa ke bjona.—Psalme 44:26.

Nakong ya go gola ga setšhaba sa Isiraele le ka morago ga moo, botho bjo lerato bja Jehofa bjo bo tswalanago le kgwerano ya gagwe di ile tša tšwela pele di godišwa. (Ekisodo 15:13) Bo ile bja bontšhwa Dafida, go etša ge bo ile bja bontšhwa Esera le bao ba bego ba e-na le yena. (2 Samuele 7:15; Esera 7:28; 9:9) Ge a thekga kgwerano ya mmušo ye e dirilwego le Dafida, Jehofa o ile a tšwela pele a bonagatša botho bja gagwe bjo lerato gaešita le ka morago ga ge Jesu a hwile, ka gobane O ile a tsoša “mmotegi” yo ka go phethagatša boporofeta bjo: “Ke tla le fa botho bjo lerato bjo botegago bjo bo holofeditšwego Dafida.”—Ditiro 13:34, 35; Jesaya 55:3.

Ke botho bjo bjo lerato bja Jehofa bjo bo gogelago batho go yena. (Jeremia 31:3) Ba leboga Jehofa bakeng sa botho bja gagwe bjo lerato, ba a mo reta le go mo tumiša ka baka la bjona e bile ba botša ba bangwe ka bjona. Ka kgonthe, botho bjo bjo lerato bja Modimo bo bjalo ka tsela e kgahlišago yeo go ka sepelwago go yona.—Psalme 25:10.

Gantši seka se se sebotse sa Jehofa, e lego botho bja gagwe bjo lerato, se tswalanywa le dika tše dingwe tše dibotse kudu—kgaugelo ya Modimo, kwelobohloko, therešo, tebalelo, toka, khutšo, kahlolo le toko.—Ekisodo 34:6; Nehemia 9:17; Psalme 85:10.

Botho bjo bo sa Swanelago bja Modimo

Ponagatšo e kgethegilego ya botho bjo bo sa swanelago bja Modimo go batho ka kakaretšo, e be e le go lokollwa ka topollo bokgobeng ka madi a Morwa yo a rategago wa Jehofa, e lego Jesu Kriste. (Baefeso 1:7) Ka botho bjo bjo bo sa swanelago, Modimo o phološa batho ba mehuta yohle. (Tito 2:11) Ka baka leo, go nea mabaka ga Paulo le go hlalosa ga gagwe go a kwagala, ge a re: “Bjale ge e ba e le ka botho bjo bo sa swanelago, ga e sa hlwa e le ka baka la mediro; go sego bjalo, botho bjo bo sa swanelago ga e sa le botho bjo bo sa swanelago.”—Baroma 11:6.

Go feta mongwadi le ge e ofe, Paulo o boletše ka botho bjo bo sa swanelago bja Modimo—ka  makga a fetago 90 ka mangwalong a gagwe a 14. Paulo o be a e-na le mabaka a kwagalago a go gatelela botho bjo bo sa swanelago bja Jehofa, ka gobane pele e be e le “morogaki le motlaiši le motho wa mereba.” O hlalosa gore: “Lega go le bjalo, ke gaugetšwe, gobane ke be ke sa tsebe gomme ke dirile ka go hloka tumelo. Eupša botho bjo bo sa swanelago bja Morena wa rena bo ile bja ata ka go fetišiša gotee le tumelo le lerato leo le lego go Kriste Jesu.” (1 Timotheo 1:13, 14) Paulo ga se a ka a nyatša botho bjoo bjo bo sa swanelago, go etša ge ba bangwe ka bošilo ba dirile, eupša ka lethabo o ile a bo amogela ka tebogo gomme a kgothaletša ba bangwe bao le bona ba bo amogelago gore ‘ba se ke ba lahlegelwa ke morero wa bjona.’—Ditiro 20:24.

Botho bjo Lerato bja Batho

Go na le maemo a mantši ka Beibeleng mo batho ba ilego ba bontšha ba bangwe botho bjo lerato. Ka mohlala, Sara o ile a bontšha monna wa gagwe lerato le bjalo le sa kwanantšhego ge ba be ba le tikologong ya manaba, a mo šireletša ka go bolela gore ke kgaetšedi ya gagwe. (Genesi 20:13) Jakobo o ile a kgopela Josefa gore a mmontšhe botho ka go mo holofetša gore a ka se ke a mmoloka Egipita. (Genesi 47:29; 50:12, 13) Rahaba o ile a kgopela gore Baisiraele ba mmontšhe botho bjo lerato ka go phološa lapa labo, go etša ge le yena a ile a swara dihlodi tša Isiraele ka tsela yeo. (Jošua 2:12, 13) Boase o ile a reta Ruthe ge a ile a bo bonagatša. (Ruthe 3:10) Jonathane o ile a kgopela Dafida gore a mmontšhe bjona, a bo bontšhe gape le lapa labo.—1 Samuele 20:14, 15.

Maikemišetšo le maemo ao a tutueletšago batho go bontšha botho goba botho bjo lerato a fapana kudu. Ditiro tše di dirwago go sa letelwa tša botho di ka bonagatša moya wo motho a nago le wona wa go amogela baeng goba go ba le pelo e borutho, lega go le bjalo ga go nape go bontšha gore motho o boifa Modimo. (Bapiša le Ditiro 27:1, 3; 28:1, 2.) Tabeng ya monna yo mongwe yo a dulago motseng wa Bethele, botho bjo a ilego a bo bontšhwa ruri e be e le bja go direlwa ditiro tše dibotse tšeo go bego go letetšwe gore le yena a tle a di dire. (Baahlodi 1:22-25) Ka dinako tše dingwe, ditiro tša botho bjo lerato di be di kgopelwa go batho bao ba ilego ba direlwa ditiro tše dibotse, mohlomongwe ka baka la go ba tlalelong ga motho yo a kgopelago. (Genesi 40:12-15) Eupša ka dinako tše dingwe batho ba paletšwe ke go swara batho ba bangwe ka botho bjo lerato bjoo bona ba kilego ba ba swara ka bjona.—Genesi 40:23.

Go etša ge seema se bontšha, batho ba bantši ba ka bolela gore ba na le botho bjo lerato, eupša ke ba mmalwa bao ba bo bontšhago ka potego. (Diema 20:6) Saulo le Dafida ba ile ba gopola botho bjo lerato bjo ba ilego ba bo bontšhwa ke batho ba bangwe, gomme go bonagala eka dikgoši tše tša Isiraele di ile tša tuma ka tsela e itšego ka botho bjo lerato, mohlomongwe ge di bapetšwa le babuši ba boheitene. (1 Samuele 15:6, 7; 2 Samuel 2:5, 6; 1 Dikxoši 20:31) Lega go le bjalo, go bonagatša ga Dafida botho bjo lerato go ile gwa fedišwa ke ge a be a naganelwa gore o bo bontšha ka maikemišetšo a mabe.—2 Samuele 10:2-4.

Bao ba dumago go amogelwa ke Modimo ba swanetše “xo rata botho” gomme ba “diranê ka botho le ka kxauxêlô.” (Mika 6:8; Sakaria 7:9) Bjalo ka ge seema se bolela, ‘motho o kgahliša ka botho bjo lerato,’ gomme bo mo tlišetša meputso e megolo. (Diema 19:22; 11:17) Modimo o ile a gopola le go thabela botho bjo lerato bjo bo ilego bja bontšhwa nakong ya ge setšhaba sa Isiraele se sa tšwa go kgethwa. (Jeremia 2:2) Eupša ge se be se e-ba “byalo ka mouwane xe xo e-sa, [se] etša phoka e tloxaxo xe le hlaba,” Jehofa ga se a ka a thaba, ka gobane o ile a re, “se se kaxo nkxahla ké leratô, xa se didimo.”—Hosea 6:4, 6.

Isiraele e ile ya kgalemelwa ka baka la go hloka ga yona botho bjo lerato, kgalemelo ka boyona e be le botho bjo lerato bjo Modimo a bego a bo bontšha. (Hosea 4:1) Setšhaba seo gape se ile sa kgothaletšwa gore se boele go Modimo ka go bontšha botho bjo lerato le toko. (Hosea 12:6) Dika tše bjalo di swanetše go bonagatšwa ka dinako tšohle gore motho a amogelwe ke Modimo le batho.—Jobo 6:14.