Phihlelo

Go Letela Mmušo wo e Sego “Karolo ya Lefase le”

KA GE GO ANEGA NIKOLAI GUTSULYAK

Ka matšatši le mašego a 41, ke be ke kgakgetšwe ka gare ga bagolegwa bao ba bego ba fetogela balaodi ba kgolego. Kapejana ke ile ka tsošwa ke modumo wa kanono. Mašole a ile a šwahlela ka kampeng ya kgolego ka dikoloi tša ntwa gomme a hlasela bagolegwa. Bophelo bja-ka bo be bo le kotsing e kgolo.

GO TLILE bjang gore ke be boemong bjo? E re ke hlalose. Tiragalo ye e diragetše ka 1954. Ka nako yeo ke be ke e-na le nywaga e 30. Go swana le Dihlatse tše dintši tša Jehofa tšeo di dulago mmušong wa Soviet, ke ile ka golegwa ka ge ke be ke le moema-gare ditabeng tša dipolitiki le ka ge ke be ke boledišana le batho ba bangwe ka Mmušo wa Modimo. Sehlopha sa rena sa bagolegwa ba Dihlatse se be se bopša ke banna ba 46 le basadi ba 34. Re be re golegilwe kampeng yeo go bego go šongwa go yona yeo e lego kgaufsi le motse wa Kengir ka bogareng bja Kazakhstan. Moo re be re phela gare ga bagolegwa ba bangwe ba dikete.

Joseph Stalin, moetapele wa Soviet Union, o be a hwile ngwageng wa pele ga woo. Bagolegwa ba bantši ba be ba holofela gore mmušo o mofsa wa Moscow o be o tla theetša dingongorego tša bona mabapi le maemo a sa kgahlišego a kgolego. Bagolegwa ka go se kgotsofale ba ile ba thoma bofetogedi ka yona nako yeo. Nakong ya dikgoga-kgogano, rena Dihlatse re ile ra swanelwa ke go hlalosetša marabele ao a bego a galefile gotee le go hlalosetša mašole ao a bego a letile kgolego boemo bja rena. E le gore re be bao ba sa tšeego lehlakore go ile gwa nyakega tumelo go Modimo.

 Mpherefere!

Ka May 16, borabele ka kampeng ya kgolego bo ile bja thoma. Matšatši a mabedi ka morago, bagolegwa ba fetago 3 200 ba ile ba gana go ya mošomong, ba nyaka gore maemo a kgolego a kaonefatšwe gotee le go nyaka ditshwanelo tše itšego bakeng sa bagolegwa ba dipolitiki. Dilo di ile tša direga ka pela. Sa pele marabele a ile a gapeletša baleti gore ba tšwe ka kampeng. Ba ile ba phula mašoba legoreng leo le bego le dikologile kampa. Ka morago ga moo ba ile ba wiša maboto ao a bego a kgaoganya diphapoši tša basadi le tša banna gomme ba thoma go dula gotee. Matšatšing a thabišago ao a ilego a latela, bagolegwa ba bangwe ba ile ba ba ba nyalana, ditirelo tša lenyalo di be di swarwa ke baruti bao le bona ba bego ba golegilwe. Diphapošing tše tharo tša kampa moo bofetogedi bo diregilego gona, bontši bja bagolegwa ba 14 000 bo ile bja tšea karolo bofetogeding bjoo.

Marabele a ile a rulaganya gore go be le komiti ya kampa e le gore e boledišane le mašole. Lega go le bjalo, kapejana ka morago ga moo go ile gwa tsoga dingangišano gare ga ditho tša komiti, gomme taolo ya kampa e ile ya feleletša e le ka matsogong a bo-ntwa-dumela. Boemo bo ile bja mpefala le go feta. Baetapele ba marabele ba ile ba rulaganya lefapha la tšhireletšo, la tša bohlabani le la tša phatlalatšo ya ditaba bakeng sa go dira gore go be le seo go thwego ke molao. Baetapele ba be ba diriša digodiša-modumo tšeo di bego di beilwe dikoteng tšeo di bego di dikologile kampa bakeng sa go phatlalatša melaetša ya kgalefo, e le go godiša moya wa borabele. Marabele a ile a thibela ba bangwe go tšhaba, a otla bao ba bego ba thulana le dikgopolo tša ona le go bolela phatlalatša gore a be a ikemišeditše go bolaya motho le ge e le ofe yo a sa kwanego le ona. Go be go e-na le dipolelo tša gore bagolegwa ba bangwe ba be ba šetše ba bolailwe.

Ka ge bagolegwa ba be ba nagana gore mašole a ka tla a ba hlasela, ba ile ba dira ditokišetšo ka kelohloko bakeng sa go itšhireletša. E le go dira gore bagolegwa ba bantši ka mo go kgonegago ba be le ditlabakelo tše dintši tša go itšhireletša, baetapele ba marabele ba ile ba laela gore bagolegwa ka moka ba itlhame. Bakeng sa go dira bjalo, bagolegwa ba ile ba ntšha ditšhipi tša mafasetere gomme ba dira dithipa le dibetša tše dingwe ka tšona. Ba ile ba ba ba hwetša dithunya le dithuthupi.

Go Gapeletšwa go Tšea Lehlakore

Ka nako yeo, marabele a mabedi a ile a mpatamela. Le lengwe le be le swere thipa yeo e sa tšwago go loutšwa. Le ile a ntaela la re: “Tšea! O tla e nyaka bakeng sa go itšhireletša.” Ka setu, ke ile ka kgopela Jehofa gore a nthuše gore ke dule ke theošitše maswafo. Ke ile ka araba ka gore: “Ke Mokriste, ke yo mongwe wa Dihlatse tša Jehofa. Nna gotee le Dihlatse tše dingwe re golegilwe ka baka la gore ga re lwe le batho, eupša re lwa le meoya e sa bonagalego. Dibetša tšeo re di dirišago ke tumelo ya  rena le kholofelo ya rena Mmušong wa Modimo.”—Baefeso 6:12.

Seo se ilego sa mmakatša ke gore monna yo o ile a dumela ka hlogo go bontšha gore o a kwešiša. Eupša monna yo mongwe o ile a mpetha a tiišitše letsogo. Ka morago ba ile ba sepela. Marabele a ile a tsena phapoši e nngwe le e nngwe ka maiteko a go gapeletša Dihlatse gore di tšee lehlakore. Eupša bana babo rena ka moka gotee le dikgaetšedi ba Bakriste ba ile ba gana.

Komiti ya marabele e ile ya ahla-ahla taba ya Dihlatse tša Jehofa ya go gana go tšea lehlakore, lekgotleng la yona. E boletše gore: “Ditho tša madumedi ka moka—Mapentekoste, Maadventist, Mabaptist le a mangwe ka moka—a tšea karolo borabeleng bjo. Ke Dihlatse tša Jehofa feela tšeo di gannego. Re tla dirang ka tšona?” Lerabele le lengwe le ile la šišinya gore Hlatse e nngwe e fišwe ka gare ga onto e le go dira gore di tšhoge. Eupša mogolegwa yo a hlompšhago ke ba bangwe, yo e bego e le mohlankedi wa mašole o ile a ema gomme a re: “Bjoo ke bošilo. Re swanetše go ba bea ka phapošing e tee yeo e lego ka mafelelong a kampa, kgaufsi le kgoro. Ka tsela yeo, ge mašole a re hlasela ka dikoloi tša ntwa, Dihlatse e tla ba tša pele go bolawa. Re ka se be le molato wa go di bolaya.” Ba bangwe ba ile ba amogela tšhišinyo yeo.

Go Bewa Lefelong le Kotsi

Kapejana ka morago ga moo, bagolegwa ba ile sepela go dikologa kampa ka moka ba goeletša ba re: “Dihlatse tša Jehofa, e-tšwang!” Gomme ka moka re le ba 80 ba ile ba re iša ka phapošing yeo e lego mathomong a kampa. Ba ile ba ntšha malao ka meagong yeo bakeng sa go dira gore go be le sekgoba ka phapošing gomme ba re laela gore re tsene. Meago yeo e ile ya fetoga kgolego ya rena ya ka kgolegong.

Bakeng sa go dira gore re širele, dikgaetšedi tša Bakriste sehlopheng sa rena di ile tša rokaganya mašela, gomme re ile ra a dirišetša go dira diphapoši tše pedi—e nngwe e le ya banna e nngwe e le ya basadi. (Ka morago, Hlatse ya Morussia e ile ya thala seswantšho sa moago woo, seo se bontšhitšwego ka mo tlase.) Ge re be re dula moagong woo wo o pitlaganego, gantši re be re rapela gotee, re rapela ka phišego gore Jehofa a re  nee bohlale le “matla a fetago a tlwaelegilego.”—2 Bakorinthe 4:7.

Nako yeo ka moka re be re le kotsing gare ga marabele le mašole a Soviet. Go be go se na le o tee wa rena yo a bego a tseba gore go tla direga eng. Ngwanabo rena yo a botegago, yo a tšofetšego o ile a re kgothatša ka gore: “Le se ke la leka go akanya gore go tla direga eng. Jehofa a ka se ke a re lahla.”

Dikgaetšedi tša rena tše di rategago tša Bakriste—tša bafsa gotee le tše di godilego—di ile tša bontšha kgotlelelo e sa tlwaelegago. Yo mongwe wa dikgaetšedi tšeo o be a e-na le nywaga e 80 gomme o be a nyaka tlhokomelo e oketšegilego. Tše dingwe di be di babja gomme di nyaka dihlare. Nako yeo ka moka, mabati a moago a be a swanetše go dula a bulegile e le gore marabele a ka kgona go dula a re beile leihlo. Bošego, bagolegwa ba itlhamilego ba be ba e-tla moagong wa rena. Ka nako e nngwe re be re ba kwa ge ba re: “Mmušo wa Modimo o robetše.” Mosegare ge ba be ba re dumelela go ya ka holong ya bojelo, ka mehla re be re dula gotee re rapela Jehofa gore a re šireletše matsogong a banna ba ba šoro.

Ge re le ka moagong, re be re leka go tiišana moyeng. Ka mohlala, gantši ngwanabo rena o be a hlalosa pego ya Beibele ka go hlaboša, moo e lego gore re be re kgona go kwa. Ka morago o be a bontšha kamoo e šomago ka gona boemong bja rena. Ngwanabo rena yo mongwe o be a rata go bolela ka mašole a Gideoni. O ile a re gopotša gore: “Ka leina la Jehofa, banna ba 300 bao ba swerego diletšo ba ile ba lwa le mašole a 135 000 a itlhamilego. Ba 300 ka moka ba ile ba boa ba se ba gobala.” (Baahlodi 7:16, 22; 8:10) Mohlala wo gotee le mehlala e mengwe ya ka Beibeleng e ile ya re matlafatša moyeng. Ke be ke sa tšwa go ba Hlatse, eupša go bona tumelo e tiilego ya bana babo rena ba godilego ka tsebo le ya dikgaetšedi go ile gwa mmatlafatša kudu. Ke ile ka bona gore Jehofa o be a e-na le rena e le ka kgonthe.

Ntwa e a Thoma

Dibeke di ile tša feta gomme go se kwane ka kampeng go be go gola. Dingangišano gare ga marabele le balaodi di ile tša golela godimo. Baetapele ba marabele ba ile ba gapeletša gore mmušo wa gare wa Moscow o romele moemedi gore a tle a boledišane le bona. Balaodi ba be ba nyaka gore marabele a ineele, a lahle dibetša tša ona gomme a boele mošomong. Go be go se na lehlakore leo le bego le nyaka go kwa le lengwe. Ka nako yeo, kampa e be e dikologilwe ke mašole ao a bego a ikemišeditše go hlasela nako e nngwe le e nngwe ge a be a ka laelwa go dira bjalo. Marabele le ona a be a ikemišeditše go lwa, ka ge a be a dirile sebo e bile a kgobokeditše le dibetša. Mang le mang o be a lebeletše gore ntwa gare ga mašole le bagolegwa e ka thoma nako e nngwe le e nngwe.

Ka June 26, re ile ra tsošwa ke modumo o mogolo wa kanono. Dikoloi tša mašole tša ntwa di ile tša thula legora gomme tša šwahlela ka kampeng. Di be di latelwa ke dihlopha tše dintši tša mašole ao a swerego dithunya tše dikgolo. Bagolegwa—banna le basadi—ba ile ba kitimela dikoloing tšeo di bego di e-tla, ba goeletša ba re “Šibaaaoo!” gomme ba betša mafsika, dipomo tšeo ba  itiretšego tšona le dilo tše dingwe le tše dingwe tšeo ba bego ba ka kgona go di swara. Go ile gwa tsoga ntwa e kgolo, gomme rena Dihlatse re be re le gare ga ntwa yeo. Jehofa o be a tla araba bjang dithapelo tša rena tša go kgopela thušo?

Kapejana, mašole a ile a tla moagong wa rena. A ile a goeletša a re: “E-tšwang lena bakgethwa! Tšwelang ka ntle ga legora ka bjako!” Tona yeo e bego e eteletše pele e ile ya laela mašole gore a se ke a re thunya eupša a dule le rena, a re šireletše. Ge ntwa e tšwela pele re be re dutše mmotong wa bjang ka ntle ga kampa. Ka diiri tše nne re be re theeditše methuthupo, dithunya, megoo le go golola ga batho ba lego ka kampeng. Ka morago, go ile gwa re tuu! Ka morago, ge letšatši le hlaba, re bone mašole a ntšha ditopo ka kampeng. Re ile ra kwa gore ba makgolo-kgolo ba be ba gobetše goba ba hwile.

Ka moragonyana letšatšing leo, tona ya mašole yeo ke e tsebago e ile ya tla go rena. E ile ya botšiša ka boikgogomošo gore: “Nikolai, ke mang yo a le phološitšego? Na ke rena goba ke Jehofa?” Re ile ra e leboga ka ge e be e phološitše maphelo a rena, ra tlaleletša ka gore, “Re dumela gore ke Modimo yo-matla-ohle, Jehofa, yo a dirilego gore le re šireletše, go swana le ge a be a dira gore batho ba bangwe ba phološe bahlanka ba gagwe ba mehleng ya Beibele.”—Esera 1:1, 2.

Tona yeo e ile ya ba ya re hlalosetša kamoo mašole a tsebilego ka gona gore re bomang le gore re meagong efe. E boletše gore nakong e nngwe ge mašole a be a boledišana le marabele, mašole a ile a latofatša marabele ka gore a bolaya bagolegwa bao ba sa a thekgego. Marabele ge a ikemelela a ile a araba ka gore Dihlatse tša Jehofa ga di tšee karolo bofetogeding bjo, eupša ga se ra di bolaya. Go e na le moo, Dihlatse ka moka di golegilwe moagong o tee, e le go di otla. Ditona tša mašole di ile tša boloka pego yeo.

Re Ile ra Emela Mmušo re Tiile

Mongwadi yo a tsebegago kudu wa Morussia, Aleksandr Solzhenitsyn ka pukung ya gagwe ya The Gulag Archipelago, o bolela ka borabele bjoo bja ka kgolegong. Ge a ngwala mabapi le tiragalo yeo, o re borabele bo thomile ka baka la gore, “re nyaka tokologo, e le ka kgonthe, . . . eupša ke mang yo a ka re neago yona?” Le rena Dihlatse tša Jehofa ka ge re be re le kampeng e swanago ya kgolego, re be re hlologetše tokologo. Lega go le bjalo, e sego go lokollwa feela kgolegong eupša tokologo yeo e lego Mmušo wa Modimo feela wo o ka e neago. Ge re be re le kgolegong, re be re tseba gore re nyaka matla a tšwago go Modimo e le gore re kgone go ema re tiile ka lehlakoreng la Mmušo wa gagwe. Le gona Jehofa o ile a re nea dilo tšohle tšeo re bego re di nyaka. O ile a re nea phenyo ka ntle ga gore re diriše dithipa goba dipomo tša seatla.—2 Bakorinthe 10:3.

Jesu Kriste o ile a botša Pilato gore: “Mmušo wa-ka ga se karolo ya lefase le. Ge nkabe mmušo wa-ka e be e le karolo ya lefase le, bahlanka ba-ka ba ka be ba [o] lwela.” (Johane 18:36) Ka gona, bjalo ka balatedi ba Kriste, ga se ra ka ra tšea karolo dintweng tša dipolitiki. Re be re thabetše gore pele le ka morago ga bofetogedi, go bota ga rena Mmušo wa Modimo go bonagetše go batho ba bangwe. Solzhenitsyn o ngwadile mabapi le boitshwaro bja rena bja nakong yeo gore: “Dihlatse tša Jehofa di be di ikwa di lokologile go ka latela melao ya bodumedi bja tšona ka go tia le go gana go aga dibo goba go itšhireletša.”

Go fetile nywaga e 50 go tloga nakong yeo e thata. Lega go le bjalo, gantši ke lebelela morago dinakong tšeo ka tebogo ka baka la gore ke ithutile thuto ya bophelo ka moka, bjalo ka go letela Jehofa le go bota letsogo la gagwe le matla. Ee, go swana le Dihlatse tše dingwe tše dintši tše di rategago tša naga yeo pele e bego e bitšwa Soviet Union, ke ithutile gore Jehofa ka kgonthe o nea tokologo, tšhireletšo le go hlakodiša bao ba letilego Mmušo wo e sego “karolo ya lefase le.”

[Diswantšho go letlakala 8, 9]

Kampa ya mošomo ya Kazakhstan yeo re bego re golegilwe go yona

[Seswantšho go letlakala 10]

Seswantšho seo se thadilwego sa moago wa Dihlatse wa kgolego, karolo ya basadi

[Seswantšho go letlakala 11]

Ke e-na le bana babo rena ba Bakriste ka morago ga go lokollwa