Re Thabela go Letela Jehofa

NA O kile wa ja seenywa se se sa butšwago? Ga go pelaelo gore o ile wa nyamišwa ke tatso ya sona. Go tšea nako gore seenywa se butšwe, gomme go se letela go a hola e le ruri. Go na le maemo a mangwe ao go ona go leta go holago. Beibele e re: “Ké mo xo botse xe motho a hutša à ikhomoletše, a bá a hlakodišwa ke Morêna.” (Dillo tša Jeremia 3:26; Tito 2:13) Bakriste ba swanetše go letela Jehofa ka ditsela dife? Re ka holwa bjang ke go mo letela?

Go Letela Modimo—Go Akaretša’ng?

Bjalo ka Bakriste, re “letile e bile [re] dula [re] nagana ka go ba gona ga letšatši la Jehofa.” Re lebeletše pele kimologong ge a tla be a tliša “tshenyego ya batho ba sa boifego Modimo.” (2 Petro 3:7, 12) Jehofa ka boyena o fagahletše go fediša bokgopo ka moka, eupša o letile e le gore a ka phološa Bakriste ka tsela yeo e tla tlišago letago leineng la gagwe. Beibele e re: “Modimo, gaešita le ge a rata go bontšha kgalefo ya gagwe le go dira gore matla a gagwe a tsebje, [o] leseleditše ka bopelotelele bjo bogolo dibjana tša kgalefo tšeo di dirilwego gore di swanelwe ke tshenyego, e le gore a tsebiše mahumo a letago la gagwe dibjaneng tša kgaugelo.” (Baroma 9:22, 23) Go etša ge a dirile mehleng ya Noa, Jehofa o tseba nako e swanetšego ya go phološa batho ba gagwe mehleng yeno. (1 Petro 3:20) Ka go rialo, go letela Modimo go akaretša go letela gore nako ya gagwe ya go gata mogato e fihle.

Ge re dutše re letetše letšatši la Jehofa, ka dinako tše dingwe re ka nyamišwa ke go bona ditekanyetšo tša boitshwaro tša lefase di phuhlama le go feta. Ka dinako tše bjalo, ke mo gobotse go ela hloko mantšu a moporofeta wa Modimo Mika, yo a ngwadilego gore: “Barapedi ba fedile mo naxeng; xa xo sa na moloki mo bathong.” Ke moka o okeditše ka gore: “Xe e le nna, ke lebeletše Morêna; ke dula kè letetše Modimo Mo-mphološi.” (Mika 7:2, 7) Ke go ‘letela’ gofe mo re swanetšego go go hlagolela? Ka ge gantši go leta go ferekanya, ke bjang re ka bago ba thabilego mola re dutše re letetše Modimo?

Go Thaba ge re Dutše re Letile

Re ka ithuta boemo bjo bo nepagetšego bja kgopolo go Jehofa. Ga se a ka a tlogela go ba “Modimo yo a thabilego.” (1 Timotheo 1:11) O a thaba ge a dutše a letile ka gobane o tšwela pele a šoma ka thata go fihlela a phethagatša morero wa gagwe e le gore a iše batho bao ba mo ratago phethegong yeo a bego a e reretše batho ge a be a ba bopa. (Baroma 5:12; 6:23) O bona mafelelo a mabotse a modiro wa gagwe—batho ba dimilione ba ile ba gogelega borapeding bja therešo. Jesu o itše: “Tate o tšwetše pele a šoma go fihla mo nakong ye, le nna ke tšwela pele ke šoma.” (Johane 5:17) Go direla ba bangwe dilo go bohlokwa e le gore motho a thabe. (Ditiro 20:35) Ka mo go swanago, Bakriste ba therešo ga ba no leta feela ba phuthile matsogo. Go e na le moo, ba tšwela pele ba šoma e le gore ba thuše ba bangwe go ithuta ka morero wa Modimo bakeng sa batho.

Batho bao ba botegago ba be ba dutše ba kgotsofatšwa ke go tumiša Modimo ge ba dutše ba letetše nako ya gagwe ya gore a gate mogato. Ka mohlala, ela hloko mopsalme Dafida. Dafida o ile a tlaišwa ke kgoši ya gagwe, a ekwa ke mogwera wa paale le go hlanogelwa ke morwa wa gagwe. Maemong a ka moka, na Dafida o be a ka thaba ge a dutše a letetše gore nako ya Jehofa  ya go mo lokolla e fihle? Psalme 71, yeo go bonagalago e ngwadilwe ke Dafida, e re: “’Me nna ke dula kè Xo lebeletše; ke tlo fêla ke atiša dithêtô tša xaxo ka moka. Ka mehla ke tlo laodiša tša xe O le Mo-loka-kahlolong, xe O le Mophološi.” (Psalme 71:14, 15) Go e na le go leta ka go fela pelo, Dafida o ile a bontšha go thaba ka gobane o be a swaregile ka go tumiša Jehofa le ka go matlafatša ba bangwe borapeding bja therešo.—Psalme 71:23.

Go letela Jehofa ga go ferekanye go swana le go letela pese yeo e šiilwego ke nako. Go swana kudu le go leta ga batswadi ka lethabo ge ngwana wa bona a dutše a gola gomme ba ikgantšha ka yena. Nywaga yeo e tletše ka mediro—tlwaetšo, thuto le tayo—yeo e dirwago ka morero wa go fihlelela mafelelo a kganyogwago. Ka mo go swanago, rena bao re letetšego Jehofa re hwetša lethabo ka go thuša ba bangwe go batamela kgaufsi le Modimo. Le rena re nyaka go amogelwa ke Modimo, gomme mafelelong re phološwe.

Go se Langwe

Go letela Jehofa go bolela go tšwela pele re mo rata le go mo hlankela re sa langwe. Se e ka ba tlhohlo. Bahlanka ba bantši ba Modimo lehono ba dula ditšhabeng tšeo go tšona batho ba kwerago motho le ge e le ofe yo a phelago bophelo bjo bo theilwego tumelong ya go dumela dikholofetšo tša Modimo. Lega go le bjalo, ela hloko mohlala wa Baisiraele bao ba botegago bao ba ilego ba dula ba e-na le kholofelo nakong ya bokgoba bja nywaga e 70 kua Babilona. Ke’ng seo se ba thušitšego go dira bjalo? Ga go pelaelo gore ba ile ba matlafatšwa ke go bala dipsalme. Psalme e nngwe e kgothatšago yeo e ka bago e ile ya ngwalwa nakong yeo e re: “Ke holofetše ’ntšu la xaxo. Môya wa-ka o letetše Yêna Mong’a-ka, o fetiša ba tišô ya mesô xe ba lebeletše mesô. Isiraele a a holofêlê Morêna.”—Psalme 130:5-7.

Bajuda bao ba ilego ba boloka kholofelo ya bona e phela ka go bala le go bolela ka yona ba ile ba putswa ge mafelelong Babilona e be e wišwa ke bašwahledi. Kapejana, Bajuda ba dikete bao ba botegago ba ile ba leba Jerusalema. Go ngwadilwe mabapi le nako yeo gore: “Mohla wola xe Morêna à buša mathopya a Tsione . . . ké xe melomo ya rena è tletše lesêxô.” (Psalme 126:1, 2) Bajuda bao ga se ba ka ba langwa, eupša ba ile ba tšwela pele ba matlafatša tumelo ya bona. Le gona ga se ba ka ba langwa go opelela Jehofa ditumišo.

Ka tsela e swanago, Bakriste ba therešo bao ba letelago Modimo nakong ya “bofelo bja tshepedišo ya dilo” ba dira maiteko a magolo a go boloka tumelo ya bona e phela. Ba ithuta Lentšu la Modimo, ba a kgothatšana le go tšwela pele ba tumiša Jehofa ka go bolela ditaba tše dibotse tša Mmušo wa gagwe.—Mateo 24:3, 14.

Go Leta Gore re tle re Holwe ke Tayo

Moporofeta wa Modimo Jeremia o ngwadile gore: “Ké mo xo botse xe motho a hutša à ikhomoletše, a bá a hlakodišwa ke Morêna.” (Dillo tša Jeremia 3:26) Jeremia o be a bolela gore e be e tla ba mo gobotse ge batho  ba Modimo ba sa belaele mabapi le tsela yeo Jehofa a ilego a ba laya ka yona ge a be a dumelela Jerusalema gore e senywe. Go e na le moo, ba swanetše go holwa ke phihlelo ye ka go gopola ka go se kwe ga bona le go nyakega ga gore ba fetoše dikgopolo.—Dillo tša Jeremia 3:40, 42.

Tsela yeo tayo ya Jehofa e re holago ka yona e ka bapišwa le tsela yeo seenywa se golago ka yona ka botlalo. Beibele e bolela mabapi le tayo e tšwago go Modimo gore: “Go bao ba tlwaeditšwego ka yona e tšweletša seenywa sa khutšo, e lego toko.” (Baheberu 12:11) Go fo swana le ge go nyakega nako gore seenywa se butšwe, go nyakega nako gore re fetoše mekgwa ya rena e le ge re arabela tlwaetšong yeo Modimo a re neago yona. Ka mohlala, ge go itshwara ga rena ka tsela e mpe go ka dira gore re lahlegelwe ke ditokelo tše itšego ka phuthegong, go ikemišetša go letela Jehofa go tla re thibela go nyama le go langwa. Maemong a bjalo, mantšu a buduletšwego a Dafida a a kgothatša ge a re: “Boxale bya [Modimo] ké bya lebakanyana fêla; ’me botho bya xaxwe ké bya bophelô byohle. Sellô se tsêna bošexo, ya ba thlalalô xe xo e-sa.” (Psalme 30:5) Ge e ba re hlagolela boemo bja kgopolo bja go leta gomme re diriša keletšo yeo re e hwetšago Lentšung la Modimo le mokgatlong wa gagwe, nako ya rena ya “thlalalô” e tla tla.

Go Gola ka Tsebo go Tšea Nako

Ge e ba o sa le yo monyenyane goba o sa tšwa go kolobetšwa, o ka ba o fagahlela go ba le boikarabelo bjo itšego ka phuthegong ya Bokriste. Eupša go tšea nako gore motho a gole moyeng bakeng sa go rwala boikarabelo bjo bjalo. Ka baka leo, diriša matla a gago a bofsa go gola moyeng. Ka mohlala, bofsa ke nako e botse ya go bala Beibele ka moka, go hlagolela dika tša Bokriste le go ithuta bokgoni bja go dira barutiwa. (Mmoledi 12:1) Ge e ba ka boikokobetšo o bontšha moya wa go leta, nako ya Jehofa ya go go nea boikarabelo bjo bo oketšegilego e tla tla.

Modiro wa go dira barutiwa le wona o nyaka go se fele pelo. Go fo swana le ge molemi a swanetše go tšwela pele a nošetša go fihlela Modimo a dira gore peu e mele, go bjalo le ka modiro wa go dira barutiwa. (1 Bakorinthe 3:7; Jakobo 5:7) Go hlagolela tumelo le tebogo bakeng sa Jehofa ka dipelong tša ba bangwe go tšea dikgwedi gaešita le nywaga ya go ithuta Beibele ka go se fele pelo. Go letela Jehofa go akaretša go kgotlelela, gaešita le ge mathomong barutwana ba sa arabele go seo ba ithutago sona. Ge bonyenyane ba bontšha tebogo, seo e ka ba leswao la gore ba arabela moyeng wa Jehofa. Ka go se fele pelo, o ka thabišwa ke go bona Jehofa a dira gore barutwana ba gago ba gole moyeng gomme e be barutiwa ba Kriste.—Mateo 28:20.

Go Bontšha Lerato ka go Leta

E le mohlala wa kamoo go leta e ka bago ponagatšo ya lerato le kholofelo, ela hloko boemo bja mokgekolo yo mongwe yo a dulago tikologong ya leganata ya Andes, kua Amerika Leboa. Yena le kgaetšedi yo mongwe ke bona feela Dihlatse tša Jehofa tikologong yabo bona. Na o kgona go bona kamoo ba dulago ba fagahletše go etelwa ke Bakriste-gotee le bona? Go kile gwa ba le nako yeo molebeledi wa mosepedi a ilego a lahlega ge a be a le tseleng ya go yo ba etela la mathomo. O ile a swanela ke go boela morago tseleng yeo gomme a thomološe gape, ka gona o ile a šalela ka diiri tše mmalwa. Go be go šetše go fetile bošego-gare ge mafelelong a be a bona tikologo yeo a sa le kgojana. Ka ge go be go se na mohlagase tikologong yeo, o ile a makatšwa ke go bona seetša se phadima. O be a thabile gakaakang ge mafelelong a be a tsena tikologong ya motse gomme a bona gore seetša seo e be e le lebone la oli leo le bego le swaretšwe godimo ke mokgekolo yoo! Mokgekolo yo o be a kgodišegile gore molebeledi wa mosepedi o tla tla, gomme o be a letile.

Ka go se fele pelo mo go swanago, re thabela go letela Jehofa. Re kgodišegile gore o tla phethagatša dikholofetšo tša gagwe. Le gona ka go swana le molebeledi yola wa mosepedi, re leboga bao ba re letelago ka lerato. Ka gona, ga go makatše gore Modimo o thabela bao ba mo letelago. Beibele e re: “Morêna, ba ba mo kxahlaxo kè ba ba . . . mmotilexo botho.”—Psalme 147:11.

[Seswantšho go letlakala 18]

Batho bao ba swaregilego ka go reta Modimo ba thabišwa ke go letela Jehofa