Barongwa—Kamoo ba Kgomago Batho ka Gona
Barongwa—Kamoo ba Kgomago Batho ka Gona
“Ka morago ga dilo tše ka bona morongwa yo mongwe a theoga legodimong a e-na le matla a magolo . . . A goeletša ka lentšu le matla, a re: ‘O wele! Babilona o Mogolo o wele!’”—KUTOLLO 18:1, 2.
1, 2. Ke’ng seo se bontšhago gore Jehofa o diriša barongwa go phethagatša thato ya gagwe?
GE A golegilwe sehlakahlakeng sa Patimo, moapostola yo a tšofetšego Johane o bontšhwa dipono tša boporofeta. O bona ditiragalo tše di kgahlišago ge “ka pudulelo” a e-ba “letšatšing la Morena.” Letšatši leo le thoma ka go bewa ga Jesu Kriste sedulong sa bogoši ka 1914 gomme la tšwela pele go fihla bofelong bja Pušo ya Nywaga e Sekete.—Kutollo 1:10.
2 Jehofa Modimo ga se a utollela Johane kutollo ye ka go lebanya. O dirišitše mokero. Kutollo 1:1 e re: “Kutollo ka Jesu Kriste, yeo Modimo a mo neilego yona gore a bontšhe bahlanka ba gagwe dilo tše di tlago go direga kgaufsinyane. O romile morongwa wa gagwe, gomme a e bontšha ka yena ka dipontšho go Johane mohlanka wa gagwe.” Jehofa ka Jesu o dirišitše morongwa gore a tsebiše Johane dilo tše di makatšago mabapi le ‘letšatši la Morena.’ Ka nako e nngwe, Johane o ile a ba a “bona morongwa yo mongwe a theoga legodimong a e-na le matla a magolo.” Kabelo ya morongwa yo e be e le efe? “A goeletša ka lentšu le matla, a re: ‘O wele! Babilona o Mogolo o wele!’” (Kutollo 18:1, 2) Morongwa yo yo matla o bile le tokelo ya go dira tsebišo mabapi le go wa ga Babilona o Mogolo, e lego mmušo wa lefase wa bodumedi bja maaka. Ka gona, ga go pelaelo gore Jehofa o diriša barongwa ka tsela e bohlokwa e le gore a phethagatše thato ya gagwe. Pele ga ge re ka hlahloba ka botlalo tema yeo barongwa ba e kgathago morerong wa Modimo le kamoo ba re kgomago ka gona, anke re eleng hloko kamoo dibopiwa tše tša moya di bilego gona ka gona.
Barongwa ba Bile Gona Bjang?
3. Ke kgopolo efe e fošagetšego yeo batho ba bantši ba nago le yona ka barongwa?
3 Batho ba dimilione lehono ba a dumela gore barongwa ba gona. Eupša ba bantši ba na le dikgopolo tše di fošagetšego ka bona le kamoo ba bilego gona ka gona. Ka mohlala, batho ba bangwe ba bodumedi ba nagana gore ge motho yo ba mo ratago a e-hwa, motho yoo o biletšwa gore a tle go dula le Modimo gomme a be morongwa. Na seo ke se Lentšu la Modimo le se rutago mabapi le go bopša, go ba gona le morero wa barongwa?
4. Mangwalo a re botša’ng mabapi le moo barongwa ba tšwago gona?
4 Morongwa yo a ba fetago bohle ka matla le ka taolo—morongwa yo a phagamego—o bitšwa Mikaele, morongwa yo mogolo. (Juda 9) Ga se yo mongwe ge e se Jesu Kriste. (1 Bathesalonika 4:16) Nywageng e mentši e fetilego, ge Jehofa a be a thoma go ba Mmopi, tlholo ya gagwe ya pele e bile Morwa wa gagwe wa morongwa. (Kutollo 3:14) Ka morago Jehofa, ka Morwa wa gagwe wa leitšibulo, o ile a bopa dibopiwa ka moka tša moya. (Bakolose 1:15-17) Ge Jehofa a bolela ka dibopiwa tše tša barongwa e le barwa ba gagwe, o ile a botšiša mopatriareka Jobo gore: “O be O le kae mola kè thêa lefase?—Bolêla xe O tseba. . . . Mo-thêa-mathêkxa-dikhutlô tša lôna ké mang? Ké tša mola xò hlalala ’naledi tša mesô tšohle, xò xobêla bana bohle ba Modimo”. (Jobo 38:4, 6, 7) Go molaleng gore barongwa ba bopilwe ke Modimo gomme ba bile gona nako e telele pele batho ba e-ba gona.
5. Barongwa ba rulagantšwe bjang?
5 Bakorinthe ba Pele 14:33 e re: “Modimo ga se Modimo wa tlhakatlhakano eupša ke wa khutšo.” Ka baka leo, Jehofa o na le barwa ba moya bao ba rulagantšwego ka dihlopha tše tharo tša motheo: (1) baserafi, bao ba hlankelago e le bahlokomedi sedulong sa bogoši sa Modimo, bao ba tsebatšago bokgethwa bja gagwe le go boloka batho ba gagwe ba hlwekile moyeng; (2) bakerubi, bao ba godišago bogoši bja Jehofa; le (3) barongwa ba bangwe bao ba phethagatšago thato ya gagwe. (Psalme 103:20; Jesaya 6:1-3; Hesekiele 10:3-5; Daniele 7:10) Dibopiwa tše tše dintši tša moya di kgoma batho ka ditsela dife tše dingwe?—Kutollo 5:11.
Barongwa ba Kgatha Tema Efe?
6. Jehofa o ile a diriša bakerubi bjang kua tšhemong ya Edene?
6 Go bolelwa ka dibopiwa tša moya la mathomo ka go lebanya go Genesi 3:24, moo re balago gore: “[Jehofa] Ó lelekile motho; ’me ka thokô ya Bohlabêla bya Edene ó beile Bakerubi, le kxabo ya thšoša e xadimaxo; ya ba xo diša tsela ya xo ya sehlareng sa bophelô.” Bakerubi ba ba dirile gore Adama le Efa ba palelwe ke go tsena gape ka legaeng la bona la mathomo la tšhemo. E be e mathomong a histori ya batho. Barongwa ba kgathile tema efe ga e sa le go tloga ka nako yeo?
7. Tlhaloso ya mantšu a leleme la mathomo bakeng sa “morongwa” e bontšha’ng mabapi le e nngwe ya dikarolo tše di kgathwago ke barongwa?
7 Go bolelwa ka barongwa ka makga a nyakilego go ba a 400 ka Beibeleng. Lentšu la Seheberu le la Segerika bakeng sa “morongwa” le ka fetolelwa e le “motseta.” Ka baka leo, barongwa ba hlanketše e le batseta magareng ga Modimo le batho. Go etša ge go boletšwe dirapeng tše pedi tša mathomo sehlogong se, Jehofa o dirišitše morongwa go tsebiša moapostola Johane molaetša wa gagwe.
8, 9. (a) Diketelo tša barongwa di ile tša kgoma Manoa le mosadi wa gagwe bjang? (b) Batswadi ba ka ithuta’ng go seo morongwa wa Modimo a ilego a se botša Manoa ge a be a mo etetše?
8 Le gona barongwa ba dirišetšwa go thekga le go kgothatša bahlanka ba Modimo lefaseng. Ka mohlala, morago kua nakong ya Baahlodi ba Isiraele, Manoa le mosadi wa gagwe wa moopa ba be ba tloga ba kganyoga go ba le ngwana. Jehofa o rometše morongwa wa gagwe gore a tsebiše mosadi wa Manoa gore o tla ba le morwa. Pego e re botša gore: “O tsebe, xe O tlo ithwala wa bêlêxa ngwana wa mošemanyana, hlôxô ya xaxwe e se kê ya batamêlwa ka lexarê; ka xobane lesoxanyana leo, xe le sa tš’o bêlêxwa, e tlo ba mokxêthwa wa Modimo; xomme ké yêna e a tl’o xo thôma xo namolêla Isiraele diatleng tša Ba-Filisita.”—Baahlodi 13:1-5.
9 Mafelelong, mosadi wa Manoa o ile a belega morwa, Simisone, yo a ilego a tuma historing ya Beibele. (Baahlodi 13:24) Pele ga ge ngwana yo a ka belegwa, Manoa o ile a kgopela gore morongwa a boele go bona a ba botše seo ba swanetšego go se dira ge ba godiša mošemane yo. Manoa o ile a botšiša gore: “Lesoxanyana leo mekxwa ya lôna e tlo ba efe le modirô wa lôna?” Morongwa wa Jehofa o ile a bušeletša ditaelo tšeo a bego a di neile mosadi wa Manoa. (Baahlodi 13:6-14) Manoa o swanetše go ba a ile a ikwa a kgothatšegile e le ruri! Barongwa ga ba etele batho ka tsela e swanago lehono, eupša ka go swana le Manoa, batswadi ba ka tsoma tlhahlo ya Jehofa ge ba tlwaetša bana ba bona.—Baefeso 6:4.
10, 11. (a) Elisa le mohlanka wa gagwe ba ile ba kgongwa bjang ke madira ao a bego a hlasela a Siria? (b) Go hlahloba tiragalo ye go ka re hola bjang?
10 Go bile le mohlala o kgahlišago kudu wa thekgo ya barongwa mehleng ya moporofeta Elisa. Elisa o be a dula Dothane, motseng wa kua Isiraele. Ka letšatši le lengwe ge mohlanka wa Elisa a be a tsoga mesong gomme a lebelela ka ntle, o ile a bona motse o dikologilwe ke dipere le dikoloi tša ntwa. Kgoši ya Siria e be e rometše madira a matla a ntwa gore a ye go swara Elisa. Mohlanka wa Elisa o ile a arabela bjang? A tšhogile, mohlomongwe e bile a gakanegile, o ile a lla ka gore: “Yoo, Mong’a-ka! Xomme re tlo dira bya’ng?” Go yena go be go se na selo se se holofetšago le gatee. Eupša Elisa o ile a araba ka gore: “Se boifê; ba ba naxô le rena ba feta ba ba naxo le bala.” O be a e-ra go re’ng?—2 Dikxoši 6:11-16.
11 Elisa o be a lemoga gore go be go e-na le lešaba la barongwa bao ba bego ba tla mo thekga. Lega go le bjalo, mohlanka wa gagwe o be a sa bone selo. Ka gona Elisa o ile “a rapêla a re: Morêna, mo ponyollê mahlô a bônê! Morêna a ponyolla mahlô a lesoxana, ’me la re xo iša mahlô la bôna thaba è tletše dipitsi le dikoloi tša mollô, di dikaneditše Elisa thokô tšohle.” (2 Dikxoši 6:17) Bjale mohlanka o be a ka kgona go bona lešaba la barongwa. Ka temogo ya moya, le rena re ka kgona go bona gore barongwa ba gona, ka moka ga bona ba hlahlwa ke Jehofa le Kriste, ba thekga batho ba Jehofa le go ba šireletša.
Thekgo ya Barongwa Mehleng ya Kriste
12. Ke thekgo efe yeo Maria a ilego a e newa ke morongwa Gabariele?
12 Ela hloko thekgo yeo kgarebe ya Mojuda e lego Maria e ilego ya e hwetša ge e be e e-kwa ditaba tše di rego: “O tla ima popelong ya gago gomme wa belega morwa, leina la gagwe o mmitše Jesu.” Pejana ga ge morongwa Gabariele yo a bego a rometšwe ke Modimo a ka fetiša molaetša wo woo o makatšago, o boditše kgarebe yeo gore: “Se boife, Maria, gobane Modimo o go ratile.” (Luka 1:26, 27, 30, 31) Ruri Maria o swanetše go ba a ile a kgothatšwa le go matlafatšwa ke mantšu a ao a ilego a mo kgonthišetša gore o amogelwa ke Modimo!
13. Barongwa ba ile ba thekga Jesu bjang?
13 Boemo bjo bongwe bja thekgo ya barongwa bo ile bja bonagala ka morago ga ge Jesu a ganeditše diteko tše tharo tšeo Sathane a Mmeetšego tšona kua lešokeng. Pego e re botša gore mafelelong a diteko tše, “Diabolo a mo tlogela, gomme, bonang! barongwa ba tla ba thoma go mo direla.” (Mateo 4:1-11) Selo se se swanago se diregile bošegong bja pele ga ge Jesu a ka hwa. A le tlalelong, Jesu o ile a khunama gomme a thoma go rapela a re: “‘Tate, ge e ba o rata, tloša senwelo se go nna. Lega go le bjalo, go se phethege thato ya-ka eupša go phethege ya gago.’ Ke moka morongwa yo a tšwago legodimong a bonagala go yena gomme a mo matlafatša.” (Luka 22:42, 43) Eupša ke thekgo ya mohuta ofe ya barongwa yeo re nago le yona lehono?
Thekgo ya Barongwa Mehleng Yeno
14. Dihlatse tša Jehofa di ile tša swanelwa ke go lebeletšana le tlaišo efe mehleng yeno, gomme mafelelo e bile afe?
14 Ge re ela hloko histori ya mehleng yeno ya modiro wa boboledi wa Dihlatse tša Jehofa, na ga re bone bohlatse bja thekgo ya barongwa? Ka mohlala, batho ba Jehofa ba ile ba kgona go kgotlelela ditlhaselo tše šoro tša ma-Nazi kua Jeremane le ka Bodikela bja Yuropa pele le nakong ya Ntwa ya II ya Lefase (1939-1945). Ka tlase ga pušo ya Bofasi ya Katholika kua Italy, Sepania le Portugal, ba ile ba swanelwa ke go lebeletšana le tlaišo ka nako e teletšana. Le gona ba ile ba kgotlelela tlaišo ka nywaga-some go seo pele e bego e le Soviet Union gotee le dinaga tše di lego ka tlase ga yona. Mohlala o mongwe gape ke wa tlaišo yeo Dihlatse di ilego tša e kgotlelela ditšhabeng tše dingwe tša Afrika. * Dinakong tša morago-rago bjale, bahlanka ba Jehofa ba ile ba lebeletšana le tlaišo e šoro nageng ya kua Georgia. Sathane o dirile sohle seo a ka se kgonago go fediša modiro wa Dihlatse tša Jehofa. Lega go le bjalo, e le mokgatlo, ba ile ba fenya kganetšo e bjalo gomme ba atlega. Lebaka le lengwe la se ke tšhireletšo yeo barongwa ba e neilego.—Psalme 34:7; Daniele 3:28; 6:22.
15, 16. Ke thekgo efe ya barongwa yeo Dihlatse tša Jehofa di e hwetšago bodireding bja tšona bja modiro wa lefase ka bophara?
15 Dihlatse tša Jehofa di tšeela godimo thomo ya tšona ya go bolela ditaba tše dibotse tša Mmušo wa Modimo lefaseng ka bophara le go dira barutiwa ka go ruta therešo ya Beibele go batho bao ba thabelago kae le kae. (Mateo 28:19, 20) Lega go le bjalo, di tseba gabotse gore di ka se kgone go phethagatša thomo ye di sa thušwe ke barongwa. Ka baka leo, seo se boletšwego go Kutollo 14:6, 7 e bile mothopo o mogolo wa kgothatšo go tšona. Moo re bala gore: “[Nna moapostola Johane] ka bona morongwa yo mongwe a fofa gare ga legodimo a e-na le ditaba tše dibotse tša ka mo go sa felego gore a di tsebiše e le ditaba tše di thabišago go bao ba dulago lefaseng, le go ditšhaba tšohle le meloko yohle le maleme ohle le batho bohle, a bolela ka lentšu le le hlabošago a re: ‘Boifang Modimo gomme le mo nee letago, gobane nako ya kahlolo ya gagwe e fihlile, ka gona rapelang Yo a dirilego legodimo le lefase le lewatle le methopo ya meetse.’”
16 Mantšu a a bontšha gabotse gore modiro o mogolo wa lefase ka bophara wa boebangedi wa Dihlatse tša Jehofa o thekgwa le go hlahlwa ke barongwa. Jehofa o diriša barongwa ba gagwe go hlahla batho ba botegago gore ba be Dihlatse tša gagwe. Le gona, barongwa ba ile ba hlahla Dihlatse gore di ye go bao ba swanelegago. Se se hlalosa gabotse lebaka leo ka lona go kgonegago gore ka makga a mantši gakaakaa—gantši kudu mo re ka se kego ra fo go lebelela e le ga sewelo—yo mongwe wa Dihlatse tša Jehofa a kopane le motho ka nako e lebanego ya ge motho yoo a le tlalelong goba a nyaka thušo ya moya.
Karolo e Kgahlišago Kudu Kgaufsinyane
17. Baasiria ba ile ba diragalelwa ke’ng ge ba be ba hlasetšwe ke morongwa o tee feela?
17 Go oketša tabeng ya go hlankela e le batseta le thušo e matlafatšago go barapedi ba Jehofa, barongwa ba dira modiro o mongwe. Dinakong tše di fetilego, ba ile ba tsebatša dikahlolo tša Modimo. Ka mohlala, morago kua lekgolong la seswai la nywaga B.C.E., Jerusalema e ile ya tšhošetšwa ke lešaba le legolo la bahlabani ba Asiria. Jehofa o ile a arabela bjang? O itše: “Motse wó ke tlo o phêmêla ka o namolêla ka ’baka la-ka, le ka ’baka la Dafida mohlanka wa-ka.” Pego ya Beibele e re botša seo se diregilego ge e re: “Xomme bošexo byoo mo mešašeng ya Ba-Asiria xwa tšwêlêla Morongwa wa Morêna, a bolaya banna ba dikxao tše lekxolo le masome a seswai le metšô e mehlano. Ka moswana xe ba tsoxa è sa le bošexo, ba hwetša e le ditoto fêla.” (2 Dikxoši 19:34, 35) Ruri madira a batho ke a nyatšegago kudu ge a bapetšwa le matla a morongwa o tee feela!
18, 19. Ke karolo efe e kgolo yeo e tlago go phethwa ke barongwa kgaufsinyane, gomme seo se tla kgoma batho bjang?
18 Go se go ye kae, barongwa ba tla šoma e le madira a Modimo a phedišo. Kgaufsinyane, Jesu o tla tla “a e-na le barongwa ba gagwe ba matla a le mollong o laumago.” Ba tla tla ka morero wa go “tliša tefetšo go bao ba sa tsebego Modimo le bao ba sa kwego ditaba tše dibotse mabapi le Morena wa rena Jesu.” (2 Bathesalonika 1:7, 8) Ruri mogato wo o tla kgoma batho kudu! Bao ba ganago go arabela ditabeng tše dibotse tša Mmušo wa Modimo tšeo ga bjale di tsebatšwago lefaseng ka bophara ba tla fedišwa. Ke feela bao ba tsomago Jehofa, toka le boleta ba tlago go “efošwa mohla woo wa boxale bya Morêna” gomme ba se gobale.—Tsefanya 2:3.
19 Re ka leboga kudu gore Jehofa o diriša barongwa ba gagwe ba matla go thekga le go matlafatša barapedi ba gagwe mo lefaseng. Go kwešiša ga rena karolo yeo e phethwago ke barongwa morerong wa Modimo go a homotša e le ruri, ka gobane go na le barongwa bao ba ilego ba rabela malebana le Modimo gomme ba ba ka tlase ga boetapele bja Sathane. Sehlogo se se latelago se tla ahla-ahla megato yeo Bakriste ba therešo ba ka e gatago bakeng sa go itšhireletša tutuetšong e matla ya Sathane Diabolo le batemona ba gagwe.
[Mongwalo wa ka tlase]
^ ser. 14 Bakeng sa ditaba ka botlalo mabapi le mehuta ye ya tlaišo, bona Yearbook of Jehovah’s Witnesses ya 1983 (Angola), 1972 (Czechoslovakia), 2000 (Czech Republic), 1992 (Ethiopia), 1974 le 1999 (Jeremane), 1982 (Italy), 1999 (Malawi), 2004 (Moldova), 1996 (Mozambique), 1994 (Poland), 1983 (Portugal), 1978 (Sepania), 2002 (Ukraine) le 2006 (Zambia).
O Ithutile’ng?
• Barongwa ba bile gona bjang?
• Barongwa ba be ba dirišwa bjang mehleng ya Beibele?
• Kutollo 14:6, 7 e utolla’ng mabapi le modiro wa barongwa lehono?
• Ke karolo efe e kgolo yeo barongwa ba tlago go e phetha kgaufsinyane?
[Dipotšišo tša Thuto]
[Seswantšho go letlakala 22]
Manoa le mosadi wa gagwe ba ile ba kgothatšwa ke morongwa
[Seswantšho go letlakala 23]
“Ba ba naxô le rena ba feta ba ba naxo le bala”