Batemona—Re ka ba Lwantšha Bjang?

“Le barongwa bao ba sa kago ba boloka boemo bja bona bja pele, eupša ba tlogetše bodulo bja bona bjo bo swanetšego [Modimo] o ba bolokile ditlemong tša neng le neng lefsifsing la kgampi bakeng sa kahlolo ya letšatši le legolo.”—JUDA 6.

1, 2. Go rotoga dipotšišo dife mabapi le Sathane Diabolo le batemona?

MOAPOSTOLA PETRO o lemoša ka gore: “Dulang le hlaphogetšwe, le phakgame. Lenaba la lena, Diabolo, o sepela-sepela go swana le tau e rorago, a nyaka go metša yo mongwe.” (1 Petro 5:8) Moapostola Paulo o bolela mabapi le batemona gore: “Ga ke nyake gore le be ba abelanago le batemona. Le ka se nwele senwelong sa Jehofa le senwelong sa batemona; le ka se jele ‘tafoleng ya Jehofa’ le tafoleng ya batemona.”—1 Bakorinthe 10:20, 21.

² Lega go le bjalo, Sathane Diabolo le batemona ke bomang? Ba bile gona bjang le gona neng? Na Modimo o ba bopile? Tutuetšo ya bona ke e matla gakaaka’ng bathong? Ke tšhireletšo efe, ge e ba e le gona, yeo re nago le yona kgahlanong le bona?

Sathane le Batemona ba Bile Gona Bjang?

3. Go tlile bjang gore morongwa yo mongwe wa Modimo e be Sathane Diabolo?

³ Mathomong a histori ya motho, ge motho a thoma go ba gona kua tšhemong ya Edene, morongwa yo mongwe wa Modimo o ile a rabela. Ka baka la’ng? Ka baka la gore o be a sa kgotsofalele karolo ya gagwe mokgatlong wa Jehofa wa legodimong. Ge go be go bopša Adama le Efa, o ile a bona sebaka sa go ka aroša go kwa ga bona le borapedi bja bona go Modimo wa therešo le go ka di lebiša go yena ka noši. Ka go rabela malebana le Modimo le ka go iša batho ba babedi ba pele tseleng ya sebe, morongwa yo o ile a itira Sathane Diabolo. Ge nako e dutše e e-ya, barongwa ba bangwe ba ile ba mo tlatša borabeleng bja gagwe. Bjang?—Genesi 3:1-6; Baroma 5:12; Kutollo 12:9.

4. Barongwa ba bangwe ba marabele ba ile ba dira’ng pele ga Meetse-fula a mehleng ya Noa?

⁴ Mangwalo ao a buduletšwego a re botša gore nakwana pele ga Meetse-fula a magolo a mehleng ya Noa, barongwa ba bangwe ba ile ba thoma go kgahlegela basadi ba lefaseng ka tsela e sa tlwaelegago. Beibele e re, ka morero o fošagetšego “barwa [ba legodimong] ba Modimo ba bôna barwedi ba batho e le bôná ba ba botse, ba tšea basadi mo xo bôná-bao bohle ba  ba bexo ba ba kxahla.” Manyalo a e be e se a tlhago, gomme ba ile ba ba le bana ba ba bitšwago Banefilimi. (Genesi 6:2-4) Ka baka leo, dibopiwa tša moya tšeo di ilego tša se kwe Modimo di tladitše Sathane borabeleng bja gagwe malebana le Jehofa.

5. Marabele a ile a kgomega bjang ge Jehofa a be a tliša tshenyo ka Meetse-fula?

⁵ Ge Jehofa a be a tliša Meetse-fula bathong, Banefilimi le bo-mmago bona ba ile ba hwa. Barongwa ba marabele ba ile ba gapeletšega go apola mebele ya bona ya nama gomme ba boela boemong bja moya. Lega go le bjalo, ga se ba ka ba kgona go boela ‘boemong bja bona bja pele’ go Modimo. Go e na le moo, ba ile ba gafelwa “lefsifsing la kgampi [la moya],” leo go thwego ke Tatarase.—Juda 6; 2 Petro 2:4.

6. Batemona ba fora batho bjang?

⁶ Ga e sa le go tloga ge barongwa ba kgopo ba lahlegelwa ke “boemo bja bona bja pele,” ba bile batemona bao e lego bagwera ba Sathane gomme ba thekgile dikgahlego tša gagwe tše kgopo. Go tloga ka nako yeo go ya pele, batemona ga se ba hlwa ba kgona go apara mebele ya nama. Lega go le bjalo, ba ka goketša batho gore ba be le mekgwa e kgopamego ya dikopano tša botona le botshadi. Batemona gape ba fora batho ka go ba dira gore ba dirišane le meoya, e lego seo se ka akaretšago dilo tše bjalo ka maleatlana a boloi, voodoo le bonoge. (Doiteronomio 18:10-13; 2 Dikoronika 33:6) Pheletšo ya barongwa ba kgopo ke e swanago le ya Diabolo—phedišo ya sa ruri. (Mateo 25:41; Kutollo 20:10) Lega go le bjalo, ga bjale re swanetše go ema ka go tia gomme re ba ganetše. Re dira ka bohlale ge re ela hloko kamoo Sathane a lego matla ka gona le kamoo re ka lwago le yena gotee le batemona ba gagwe ka katlego.

Sathane ke yo Matla Gakaaka’ng?

7. Sathane o na le matla afe godimo ga lefase?

⁷ Go theoša le histori, Sathane o be a dutše a thomeletša Jehofa. (Diema 27:11) Le gona o tutueditše karolo e kgolo ya batho. Johane wa Pele 5:19 e re: “Lefase ka moka le rapaletše matleng a yo kgopo.” Ke ka baka leo Diabolo a ilego a leka Jesu ka go mo nea matla le letago tša “mebušo ka moka ya lefase le go agilwego go lona.” (Luka 4:5-7) Moapostola Paulo o bolela mabapi le Sathane gore: “Ge e ba bjale ditaba tše dibotse tšeo re di bolelago ge e le gabotse di širegile, di širegile go bao ba lahlegago, bao go bona modimo wa tshepedišo ye ya dilo a foufaditšego menagano ya ba ba sa dumelego, e le gore seetša sa ditaba tše dibotse tša letago mabapi le Kriste, yo e lego seswantšho sa Modimo, se se ke sa ba phadimela.” (2 Bakorinthe 4:3, 4) Sathane ke “moaketši le tatago maaka” eupša o itira “morongwa wa seetša.” (Johane 8:44; 2 Bakorinthe 11:14) O na le matla le mekgwa tše di nyakegago bakeng sa go foufatša menagano ya babuši ba lefase le balata ba bona. O forile batho a diriša tsebišo e fošagetšego le dinonwane gotee le maaka a bodumedi.

8. Beibele e bontšha’ng mabapi le tutuetšo ya Sathane?

⁸ Matla le tutuetšo tša Sathane di ile tša bonagala mehleng ya moporofeta Daniele, nywaga-kgolong e ka bago e mehlano pele ga Mehla ya rena e Tlwaetšwego. Ge Jehofa a be a romile morongwa gore a iše molaetša wa kgothatšo go Daniele, morongwa o ile a lwa le “molaodi [wa moya] wa mmušô wa Peresia.” Morongwa yo a botegago o ile a thibelwa ka matšatši a 21 go fihlela “Mikaele, e mongwê wa balaodi,” a e-tla go mo thuša. Pego yona yeo e bolela gape ka “Molaodi [yo e lego motemona] wa Gerika.” (Daniele 10:12, 13, 20) Le gona, go Kutollo 13:1, 2, Sathane o bolelwa e le “drakone” yeo e neago sebata sa bopolitiki “matla a sona le sedulo sa bogoši sa sona le taolo e kgolo.”

9. Bakriste ba lwa le bomang?

⁹ Ga go makatše ge moapostola Paulo a ile a ngwala gore: “Ga re kakadipane le madi le nama, eupša re kakadipana le mebušo le balaodi, le babuši ba lefase ba lefsifsi le, le madira a kgopo a moya mafelong a legodimong.” (Baefeso 6:12) Gaešita le lehono, madira ao a sa bonagalego a batemona a ka tlase ga taolo ya Sathane  Diabolo gomme a tutuetša babuši bao e lego batho le batho ka kakaretšo, a ba šušumeletša go dira ditiro tše di sa hlalosegego tša polao ya molokwana-rite, botšhošetši le dipolao. Ga bjale anke re ahla-ahleng kamoo re ka ganetšago madira a a matla a moya ka katlego.

Re na le Tšhireletšo Efe?

10, 11. Re ka fenya bjang Sathane le barongwa ba gagwe ba kgopo?

¹⁰ Re ka se fenye Sathane le barongwa ba gagwe ba kgopo ka matla a rena ka noši, e ka ba ka matla a rena a mmele goba a monagano. Paulo o re eletša ka gore: “Tšwelang pele le hwetša matla Moreneng le bonatleng bja matla a gagwe.” Re swanetše go retologela go Modimo gore a re šireletše. Paulo o oketša ka gore: “Aparang ditlhamo tše feletšego tše di tšwago go Modimo gore le kgone go emela maano a bohwirihwiri a Diabolo le tiile . . . Tšeang ditlhamo tše feletšego tše di tšwago go Modimo, gore le kgone go ikemela letšatšing le kgopo, gomme ka morago ga ge le dirile dilo tše ka moka ka mo go tletšego, le eme le tiile.”—Baefeso 6:10, 11, 13.

¹¹ Ka makga a mabedi, Paulo o kgothaletša Bakriste-gotee le yena gore ba apare “ditlhamo tše feletšego tše di tšwago go Modimo.” Lentšu “feletšego” le bontšha gore ga go na ntwa e lwewago ka pelo e sa felelago yeo e tla bago e lekane bakeng sa go lwa le ditlhaselo tša batemona. Ka baka leo, ke dikarolo dife tša ditlhamo tša moya tšeo go tlogago go le bohlokwa gore Bakriste lehono ba be le tšona e le gore ba kgone go ganetša batemona?

“Emang le Tiile”—Bjang?

12. Bakriste ba ka itlema matheka bjang ka therešo?

¹² Paulo o hlalosa gore: “Ka baka leo, emang le tiile, matheka a lena a tlemilwe ka therešo, gomme le apere sephemela-sefega sa toko.” (Baefeso 6:14) Dikarolo tše pedi tša ditlhamo tšeo go bolelwago ka tšona mo ke selo sa go itlema, goba lepanta, le sephemela-sefega. Lešole le be le swanetše go dula le tlemile lepanta la lona gabotse bakeng sa go šireletša matheka a lona (dinoka, lengamu le ka tlase ga mpa) le go rwala tšhoša ya lona e boima. Ka mo go swanago, therešo ya Beibele ka tsela ya seswantšhetšo e swanetše go tlengwa ka go tia go re dikologa, e le gore re ka phela ka go dumelelana le yona. Na re na le lenaneo la go bala Beibele letšatši le letšatši? Na lapa ka moka le a akaretšwa? Na re na le mokgwa wa go ahla-ahla temana ya letšatši re le lapa? Go oketša moo, na re sepedišana le ditlhaloso tše di lego ka dikgatišong tše di newago ke “mohlanka yo a botegago le wa temogo”? (Mateo 24:45) Ge e ba go le bjalo, gona re katanela go diriša keletšo ya Paulo. Le gona re na le dibidio le di-DVD tšeo di neago tlhahlo ya Mangwalo. Go kgomarela therešo go ka re thuša go dira diphetho tše bohlale le go re šireletša gore re se ke ra latela tsela e fošagetšego.

13. Re ka šireletša bjang pelo ya rena ya seswantšhetšo?

¹³ Sephemela-sefega sa kgonthe se be se thuša go šireletša sehuba sa lešole, pelo le ditho tše dingwe tše bohlokwa. Mokriste a ka šireletša pelo ya gagwe ya seswantšhetšo—motho yo a lego yena ka gare—ka go hlagolela go rata toko ya Modimo le go kgomarela ditekanyetšo tša Jehofa tša go loka. Sephemela-sefega sa seswantšhetšo se re thuša gore re se ke ra nyatša Lentšu la Modimo. Ge re dutše re ‘hloya tše mpe, re rata tše botse’ re tloša  dinao tša rena ‘tseleng e kgopo.’—Amosi 5:15; Psalme 119:101.

14. Ke’ng seo se bolelwago ke go dira gore ‘dinao tša rena di hlangwe ka ditaba tše dibotse’?

¹⁴ Dinao tša mašole a Roma gantši di be di rwešwa dieta tše di loketšego go gwanta nako e telele ditseleng tše dikgolo tša Roma tša dikhilomithara tše makgolo tšeo di bego di putla-putla motseng woo. Polelwana e rego “dinao tša lena di hlamilwe ka ditaba tše dibotse tša khutšo” e bolela’ng go Bakriste? (Baefeso 6:15) E bolela gore re itokišeleditše go gata mogato. Re itokišeleditše go bolela ditaba tše dibotse tša Mmušo wa Modimo boemong le ge e le bofe bjo bo swanelago. (Baroma 10:13-15) Go ba mafolofolo ga rena bodireding bja Bokriste ke tšhireletšo malebana le “maano a bohwirihwiri” a Sathane.—Baefeso 6:11.

15. (a) Ke’ng se se bontšhago gore kotse e kgolo ya tumelo e bohlokwa kudu? (b) Ke ‘mesebe efe e tukago’ yeo e ka bago le mafelelo a kotsi tumelong ya rena?

¹⁵ Paulo o tšwela pele ka gore: “Godimo ga tšohle, tšeang kotse e kgolo ya tumelo, yeo ka yona le tla kgonago go tima mesebe ka moka e tukago ya yo kgopo.” (Baefeso 6:16) Keletšo ya go rwala kotse e kgolo ya tumelo e thongwa ka polelwana e rego “godimo ga tšohle,” go bontšha gore karolo ye ya go itlhama e bohlokwa kudu. Ga se ra swanela go fokola tumelong. Ka go swana le kotse e kgolo ya tšhireletšo, tumelo ya rena e re šireletša ‘mesebeng e tukago’ ya Sathane. Tše di ka ba di swantšhetša’ng lehono? E ka ba dikwero tše di hlabago, maaka le ditherešo tše di sa felelago tšeo di bolelwago ke manaba le bahlanogi bao ba lekago go fokodiša tumelo ya rena. “Mesebe” ye gape e ka ba e le diteko tša go rata dilo tše di bonagalago, tšeo di re dirago gore re swarege kudu ka go reka dilo tše dintši gaešita le go dira gore re phadišane  le bao ba wetšego mokgweng wa bophelo wa bomponeng. Mohlomongwe ba ipoloketše matlotlo ka go ba le dintlo tše dikgolo le tše kaone gotee le dikoloi tše kaone goba ba dira pontšho ya bomponeng ka mabenyabje a bona a bitšago kudu le fešene ya morago-rago ya diaparo. Go sa šetšwe seo ba bangwe ba se dirago, re swanetše go ba le tumelo e matla ka mo go lekanego bakeng sa go ka phaela ‘mesebe ye e fišago’ ka thoko. Ke bjang re ka agago tumelo e matla le go e boloka?—1 Petro 3:3-5; 1 Johane 2:15-17.

16. Ke’ng se se ka re thušago go matlafatša tumelo?

¹⁶ Re ka batamela kgaufsi le Modimo ka thuto ya ka mehla ya motho ka noši ya Beibele le ka dithapelo tše di tšwago pelong. Re ka lopa Jehofa gore a re thuše go matlafatša tumelo gomme ra dira ka go dumelelana le dithapelo tša rena ka ditiro tše di nyakegago. Ka mohlala, na re lokišeletša Thuto ya Morokami ya beke le beke ka kelohloko ka maikemišetšo a go tšea karolo? Tumelo ya rena e tla ba e matla ge re ithuta Beibele le dikgatišo tše di theilwego Beibeleng.—Baheberu 10:38, 39; 11:6.

17. Re ka ‘amogela kefa ya phološo’ bjang?

¹⁷ Paulo o phetha tlhaloso ya gagwe ya ditlhamo tše di feletšego ka keletšo e rego: “Amogelang kefa ya phološo le tšhoša ya moya, ke gore, lentšu la Modimo.” (Baefeso 6:17) Kefa e be e šireletša hlogo le bjoko bja lešole, e lego mo diphetho di dirwago gona. Ka mo go swanago, kholofelo ya rena ya Bokriste e šireletša matla a rena a monagano. (1 Bathesalonika 5:8) Go e na le go tlatša menagano ya rena ka dipakane tša lefase le dikganyogo tša dilo tše di bonagalago, re swanetše go tsepamišetša megopolo ya rena kholofelong yeo re e neilwego ke Modimo, go fo swana le ge Jesu a dirile.—Baheberu 12:2.

18. Ke ka baka la’ng re sa swanela go hlokomologa lenaneo la rena la go bala Beibele ka mehla?

¹⁸ Tšhireletšo ya rena ya mafelelo malebana le tutuetšo ya Sathane le batemona ba gagwe ke lentšu la Modimo, goba molaetša wo o begilwego ka Beibeleng. Le ke lebaka le lengwe leo ka lona re sa swanelago go tšeela fase lenaneo la rena la go bala Beibele ka mehla. Tsebo e feletšego ya Lentšu la Modimo e re šireletša maakeng a Sathane le dipolelong tša maaka tša batemona gotee le dipolelong tše di galakago tša bahlanogi.

“Tšwela Pele Thapelong Mabakeng Ohle”

19, 20. (a) Sathane le batemona ba gagwe ba tla diragalelwa ke’ng? (b) Ke’ng se se ka re matlafatšago moyeng?

¹⁹ Go fedišwa ga Sathane, batemona ba gagwe le lefase le kgopo go kgaufsi. Sathane o a tseba gore “o na le nako e kopana.” O galefile e bile o lwa le bao “ba bolokago ditaelo tša Modimo gomme ba e-na le modiro wa go nea bohlatse ka Jesu.” (Kutollo 12:12, 17) Go bohlokwa gore re ganetše Sathane le batemona ba gagwe.

²⁰ Ruri re swanetše go leboga keletšo ya gore re apare ditlhamo tše di feletšego tše di tšwago go Modimo! Paulo o phetha poledišano ya gagwe ya ditlhamo tša moya ka keletšo ye: “Ka mohuta o mongwe le o mongwe wa thapelo le topo le [tšwele] pele thapelong mabakeng ohle ka moya. Gore le fihlelele seo le dule le phafogile ka mehla le ka topo ya go lopela bakgethwa bohle.” (Baefeso 6:18) Thapelo e ka re matlafatša moyeng gomme ya re thuša gore re dule re phafogile. Anke re tšeeleng mantšu a Paulo godimo gomme re tšweleng pele re rapela, ka gobane se se tla re thuša gore re ganetše Sathane le batemona ba gagwe.

O Ithutile’ng?

• Sathane le batemona ba gagwe ba bile gona bjang?

• Diabolo ke yo matla gakaaka’ng?

• Ke tšhireletšo efe yeo re nago le yona malebana le Sathane le batemona ba gagwe?

• Re ka apara bjang ditlhamo tše di feletšego tše di tšwago go Modimo?

[Dipotšišo tša Thuto]

[Seswantšho go letlakala 26]

“Barwa ba Modimo ba bôna barwedi ba batho”

[Seswantšho go letlakala 28]

Na o ka kgona go bolela dikarolo tše tshela tša ditlhamo tša rena tše di feletšego?

[Diswantšho go letlakala 29]

Go tšea karolo medirong ye go re šireletša bjang malebana le Sathane le batemona ba gagwe?