Go tla ga Kriste—Na go Swanetše go re Tšhoša?

O NAGANA gore go tla ga Jesu Kriste go tla ba bjang? Na o nagana gore e tla ba tiragalo yeo e tlago go fediša, go senya le go otla moloko wa batho? Goba, na o letetše gore e be tiragalo yeo e tlago go fediša mathata ohle a rena? Na go tla ga Kriste e swanetše go ba tiragalo yeo e swanetšego go re tšhoša? Goba na re swanetše go e letela?

Beibele e bolela mabapi le go tla ga Kriste gore: “Bonang! O tla ka maru, gomme mahlo ka moka a tla mmona, . . . meloko ka moka ya lefase e tla itshetla dihuba ka go nyama ka baka la gagwe.” (Kutollo 1:7) Go tla moo go šupa nakong e tlago ge Jesu a tla be a e-tla bakeng sa go putsa baloki le go otla ba babe.

Go e na le gore moapostola Johane a boife go tla ga Kriste, o be a go letetše. Ka morago ga gore a utollelwe ka go tla moo le seo go tla se phethago lefaseng, Johane o ile a rapela ka go tšwa pelong gore: “Tlaa, Morena Jesu.” (Kutollo 22:20) Eupša ke ka baka la’ng “meloko ka moka ya lefase e . . . itshetla dihuba ka go nyama ka baka la gagwe”? Ke bjang “mahlo ka moka” a tlago go mmona? Ke’ng seo go tla ga Kriste go tlago go se phetha? Go dumela go go tla ga Kriste go ka re hola bjang gona bjale? Sehlogo se se latelago se tla araba dipotšišo tše.