Seo go tla ga Kriste go Tlago go se Phetha

“POIFO KUA SÃO PAULO.” Ke kamoo makasine wa Veja o ilego wa hlalosa matšatši a mane a May 2006 a ge bosenyi bjo bo rulagantšwego bo be bo “fokodiša” toropo e kgolo le e humilego ya Brazil. Batho ba ka bago 150, bao ba akaretšago maphodisa, disenyi le badudi ba tlwaelegilego ba naga yeo ba ile ba bolawa nakong yeo ya “diiri tše di fetago tše 100 tša poifo.”

Mathokong ohle a lefase, ntwa e fetogile sehlogo sa ka mehla sa dipego tša ditaba. Go bonala baetapele bao e lego batho ba palelwa ke go e fediša. Lefase la rena le fetoga lefelo le kotsi leo go phelwago go lona. Mohlomongwe o nyamišwa ke gore kae le kae moo o lebelelago gona, go na le dipego tše dintši tša bobe. Lega go le bjalo, nako ya phetogo e batametše.

Jesu o rutile balatedi ba gagwe go rapelela gore Mmušo wa Modimo o tle le gore thato ya Modimo e direge “le mo lefaseng bjalo ka ge e direga legodimong.” (Mateo 6:9, 10) Mmušo wo ke woo Kriste Jesu e lego Kgoši ya wona yeo e kgethilwego ke Modimo. O tla rarolla mathata ohle a batho. Lega go le bjalo, e le gore Mmušo wa Modimo o fetoše lefase, dipušo tša batho di swanetše go tšeelwa legato ke pušo ya Kriste. Se ke sona seo se tlago go phethwa ke go tla ga Kriste.

Na Phetogo Yeo e tla ba ya Khutšo?

Na ditšhaba di tla amogela pušo ya Kriste ka bolokologi? Moapostola Johane o ile a bontšhwa pono yeo e neago karabo. Johane o hlalosa gore: “Ka bona sebata [mebušo ya lefase ya dipolitiki] le dikgoši tša lefase le madira a tšona ba kgobokane go lwa le [Jesu] yo a nametšego pere le madira a gagwe.” (Kutollo 19:19) Go tla direga’ng ka dikgoši tša lefase ntweng yeo? Beibele e bolela gore Kgoši ya Jehofa e tloditšwego e “tlo ba rôba ka molamó wa thsipi; [e] tlo ba phšatla wa pitša tša letsopa.” (Psalme 2:9) Mebušo ya dipolitiki e tla fedišetšwa sa ruri. Mmušo wa Modimo “o tlo phšatla mebušô e mengwê ka moka [ya batho] wa e fediša; xe e le wôna, o tlo êma xo ya xo ile.”—Daniele 2:44.

Go tla direga’ng ka batho bao ba ganetšanago le Mmušo wa Modimo? “Kutollong ya Morena Jesu go tšwa legodimong a e-na le barongwa ba gagwe ba matla a le mollong o laumago,” Jesu o tšweletšwa e le motho yo a ‘tlišago  tefetšo go bao ba sa tsebego Modimo le bao ba sa kwego ditaba tše dibotse.’ (2 Bathesalonika 1:7, 8) Diema 2:22 e re: “Ba babe ba tlo fedišwa naxeng; bakxeloxi ba tlo rakwa mo xo yôna.”

Beibele e bolela mabapi le go tla ga Kriste gore: “Bonang! O tla ka maru, gomme mahlo ka moka a tla mmona.” (Kutollo 1:7) Batho ba ka se ke ba mmona ka mahlo a bona a nama. Ga e sa le go tloga nakong ya ge a rotogela legodimong, Jesu e bile motho wa moya “yo a dulago seetšeng se se sa batamelegego, yo go se nago motho le o tee yo a kilego a mmona goba yo a ka mmonago.”—1 Timotheo 6:16.

Ga go nyakege gore Jesu a be ka mmele wa nama gore a ‘bonwe’ ke badudi bohle ba lefase, go fo swana le ge go be go sa nyakege gore Jehofa a bonagale ka mmele wa nama ge a be a tliša Dikotlo tše Lesome go Baegipita ba mehleng ya Moše. Batho ba nakong yeo ba be ba sa belaele gore dikotlo tšeo di be di tlišwa ke Jehofa, gomme ba ile ba gapeletšega go lemoga matla a gagwe. (Ekisodo 12:31) Ka tsela e swanago, ge Kriste a gata mogato e le Mophethagatši wa Kahlolo wa Modimo, ba babe ba tla gapeletšega go ‘bona,’ goba go lemoga gore Modimo o diriša Jesu go ba ahlola. Ba tla tseba se ka gobane moloko wa batho o tla be o lemošitšwe e sa le pele. Ee, ‘mahlo ka moka a tla bona Jesu, gomme meloko ka moka ya lefase e tla itshetla dihuba ka go nyama ka baka la gagwe.’—Kutollo 1:7.

Go fedišwa ga bakgopo le go tlošwa ga mebušo e kgopo ke selo seo se swanetšego go direga pele go ka ba le khutšo le katlego tša kgonthe lefaseng. Kriste o tla dira seo. Ka morago o tla laola dilo ka moka lefaseng, gomme go tla latela diphetogo tše dikgolo.

Tsošološo e Tlišago Ditšhegofatšo

Moapostola Petro o ile a bolela ka “tsošološo ya dilo ka moka yeo Modimo a e boletšego ka molomo wa baporofeta ba gagwe ba bakgethwa ba mehleng ya bogologolo.” (Ditiro 3:21) Tsošološo ye e akaretša phetogo yeo e tla diregago mo lefaseng nakong ya pušo ya Kriste. Moporofeta Jesaya wa lekgolong la seswai la nywaga B.C.E., o gare ga baporofeta bao Modimo a ilego a ba diriša go bolela mabapi le “tsošološo ya dilo ka moka” mo lefaseng. O boletše e sa le pele gore Jesu Kriste, “Kxoši ya kaxišô,” o tla dira gore go be le khutšo lefaseng. Mabapi le pušo ya Kriste, boporofeta bja Jesaya bo re: “Mmušô wó ké wa kênêlô, wa khutšô ye e sa felexo.” (Jesaya 9:5, 6) Jesu o tla ruta batho ba lefase go phela ka khutšo. Bao ba dulago lefaseng ba “tlo thaba ka botlalô bya moláô.”—Psalme 37:11.

Go tla direga’ng ka bodiidi le tlala pušong ya Kriste? Jesaya o itše: “Morêna wa mašaba ó dirêla dithšaba ka moka monyanya thabeng yé, monyanya wa makhura, wa dinwewa tše monate, wa dinwewa tše di hlotlilwexo.” (Jesaya 25:6) Mopsalme o opetše ka gore: “Xo tlo ba le mohora wa mabêlêʹ mo naxeng; ’phoxong tša thaba meré ya dienywa e tlo xwaša.” (Psalme 72:16) Go feta moo, mabapi le badudi ba lefase re bala gore: “Nywakô ye ba e axaxo ba tlo dula mo xo yôna; dirapa tša merara ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele; xobane matšatši a batho ba-ka a tlo lekana le matšatši a sehlare, ’me bahlaolwa ba-ka ba tlo phela ka tše ba itiretšexo tšôna, tša tlo bá tša ba ônalêla diatleng.”—Jesaya 65:21, 22.

Jesaya o ile a ba a bolela e sa le pele mabapi le go fedišwa ga bolwetši le lehu. Modimo o boletše a diriša Jesaya gore: “Ké mo xo tl’o xo budollwa mahlô a difofu, xwa thibollwa ’tsêbê tša difoa. Ké mo dixôlê di tl’o xo taboxa bo-ka thsêpê, xwa tlo hlalala ’leme la semuma.” (Jesaya 35:5, 6) Ka morago ga moo, “xo ba ba axilexo fá xo ka se bê le e a rexo: Ke a babya!” (Jesaya 33:24) “Lehu [Modimo] ó tlo le tloša ka xo sa felexo; Mong ’a bohle Morêna ó tlo phomola mexôkxô mahlong ohle.”—Jesaya 25:8.

Go tla direga’ng ka bahu bohle bao ba lego “mabitleng a kgopotšo”? (Johane 5:28, 29) Jesaya o porofetile gore: “Bahu ba xaxo ba tlo phela. . . . Ba tlo tsoxa.” (Jesaya 26:19) Ee, bao  ba robetšego lehung ba tla tsošetšwa bophelong!

“Modimo ke Sedulo sa Gago sa Bogoši go Iša Mehleng ya Neng le Neng”

Ruri go tla ga Kriste go tla dira gore polanete ya Lefase e tsošološwe ka mo go feletšego. Lefase le tla fetošwa paradeise ya letago, gomme batho ba tla rapela Modimo wa therešo ka botee. Na re ka kgodišega gore Jesu Kriste o tla atlega go fediša bobe mo lefaseng le go dira gore go be le maemo a lokilego?

Nagana ka matla a mantši le taolo tšeo di neilwego Jesu. Ge Beibele e bolela ka Morwa, e re: “Modimo ke sedulo sa gago sa bogoši go iša mehleng ya neng le neng gomme molamo wa mmušo wa gago ke molamo wa go loka. O ratile toko gomme wa hloya go hloka molao.” (Baheberu 1:8, 9) Sedulo sa Jesu sa bogoši, ke gore, boemo bja gagwe goba taolo, di tšwa go Jehofa. Modimo ke Mothei le Monei wa sedulo se sa bogoši. Ga go na bothata bjo e tla bago e le bjo bogolo kudu moo Jesu a tlago go palelwa ke go bo rarolla.

Ka morago ga go tsošwa ga gagwe, Jesu o ile a botša barutiwa ba gagwe gore: “Ke neilwe matla ka moka legodimong le lefaseng.” (Mateo 28:18) Petro wa Pele 3:22 e re: “Barongwa le balaodi ba ile ba dirwa gore ba ikokobeletše yena.” Ga go na matla goba bolaodi bjo bo ka atlegago go lwantšha Jesu. Ga go na seo se ka mo šitišago go tlišetša batho ditšhegofatšo tša sa ruri.

Go tla ga Kriste go Kgoma Batho Bjang?

Ka lengwalong la gagwe leo le yago go Bathesalonika, moapostola Paulo o ngwadile gore: “Re gopola modiro wa lena wa tumelo re sa kgaotše le boitapišo bja lena bjo lerato le kgotlelelo ya lena ka baka la kholofelo ya lena go Morena wa rena Jesu Kriste pele ga Modimo wa rena le Tatago rena.” (1 Bathesalonika 1:3) Paulo o ile a bontšha gore mošomo o atlegago le kgotlelelo di tlišwa ke go holofela Jesu Kriste. Kholofelo yeo e akaretša go dumela gore Kriste o tla tla gotee le go dumela tsošološong yeo e tla tlišwago ke seo. Kholofelo yeo e ka thekga Bakriste ba therešo goba go ba thuša go kgotlelela, gaešita le maemong a thata kudu.

Ka mohlala, ela hloko Carlos, yo a dulago São Paulo, kua Brazil. Ka August 2003, Carlos o ile a lemoga gore o na le kankere. Ga e sa le go tloga nakong yeo, o šetše a builwe ga seswai e lego moo go dirilego gore a be le dihlabi le ditla-morago tše di fokodišago mmele. Lega go le bjalo, o tšwela pele e le mothopo wa kgothatšo bathong ba bangwe. Ka mohlala, ge a be a dira modiro wa boebangedi setarateng seo se putlago pele ga sepetlele se segolo, o ile a gahlana le yo mongwe wa Dihlatse tša Jehofa, yoo monna wa gagwe a bego a e-tla sepetlele bakeng sa go tlo alafša ka dikhemikhale. Ka ge a kwešiša ditla-morago tše di kwešago bohloko tša kankere, Carlos o ile a kgona go kgothatša le go homotša mosadi yoo le monna wa gagwe. Ka morago ga moo ba ile ba bolela gore ba kgothaditšwe ke poledišano yeo. Ka gona Carlos o bone go nepagala ga mantšu a Paulo a rego, ‘Modimo o re homotša ditlaišegong tša rena tšohle, e le gore re kgone go homotša bao ba lego ditlaišegong tša mohuta le ge e le ofe ka khomotšo yeo le rena re homotšwago ke Modimo ka yona.’—2 Bakorinthe 1:4.

Ke’ng seo se thušago Carlos gore a hwetše matla a go tšwela pele a kgothatša ba bangwe go sa šetšwe bolwetši bja gagwe? Kholofelo ya go tla ga Kriste le seo go tlago go se phetha di tutuetša Carlos gore a tšwele pele a “dira botse.”—Bagalata 6:9.

Le gona, ela hloko boemo bja Samuel, yoo ngwanabo a ilego a bolawa dimithara tše 50 feela go tloga ntlong ya gabo. Ngwanabo o ile a thunywa ka dikolo tše lesome. Setopo sa gagwe se ile sa rapalala tsejaneng ya basepela-ka-dinao diiri tše seswai nakong ya ge maphodisa a dira dinyakišišo. Samuel a ka se lebale seo se diragetšego letšatšing leo. Lega go le bjalo, o matlafatšwa ke kholofelo ya gore Kriste o tla tloša bokgopo ka moka lefaseng le gore pušo ya toko yeo e tlago go latela e tla tliša  ditšhegofatšo molokong wa batho. Gantši Samuel o ipona a le lefaseng la Paradeise a gokarela ngwanabo yo a tsošitšwego.—Ditiro 24:15.

Ke’ng Seo o Swanetšego go se Dira?

O tla homotšwa kudu ke go ba le kholofelo ya go tla ga Kriste le go seo go tlago go se phetha. Ka kgonthe Jesu Kriste o tla tloša dilo ka moka tšeo di bakelago batho mathata le bobe bjo bo ba wetšego.

Ke’ng seo o swanetšego go se dira gore o thabele ditšhegofatšo tšeo pušo ya Kriste e tlago go di tlišetša moloko wa batho? Ithute Lentšu la Modimo, Beibele, ka kelohloko. Ge Jesu a be a rapela Tatagwe, o itše: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.” (Johane 17:3) Ipeele pakane ya go hlahloba seo Beibele e se rutago. Dihlatse tša Jehofa tša motseng wa geno di tla thabela go go thuša gore o dire bjalo. Re go laletša ka borutho gore o ikopanye le tšona goba o ngwalele bagatiši ba makasine wo.

[Diswantšho go letlakala 7]

Go tla ga Kriste go tla dira gore lefase le tsošološwe

[Mothopo]

Inset, background only: Rhino and Lion Park, Gauteng, South Africa