Dipotšišo tše Tšwago go Babadi
Dipotšišo tše Tšwago go Babadi
Re swanetše go kwešiša bjang mantšu a Paulo a gore mohlologadi o swanetše go ba “mosadi wa monna o tee” e le gore a ka swanelegela thušo e tšwago phuthegong ya Bokriste?—1 Timotheo 5:9.
Ka ge moapostola Paulo a be a bolela ka mohlologadi, go molaleng gore polelwana e rego “mosadi wa monna o tee” e be e bolelela boemo bja pele ga ge a ka ba mohlologadi. Na se se ka ba se bolela gore mohlologadi o swanetše go ba a ile a nyalwa gatee feela? Goba na mantšu a Paulo a ka ba a bolela se sengwe? *
Ba bangwe ba boletše gore Paulo o be a bolela ka bahlologadi bao ba ilego ba nyalwa gatee feela. Ke therešo gore ditšong tše dintši le bathong ba bantši, mohlologadi yo a dulago a sa nyalwe o be a lebelelwa ka mo go kgethegilego e le yo a hlwekilego boitshwarong. Lega go le bjalo, pono e bjalo e fapane le mantšu ao Paulo a a ngwadilego mangwalong a mangwe. Ka mohlala, o boditše Bakriste ba Korinthe ka mo go kwagalago gore gaešita le ge a nagana gore mohlologadi o be a tla thaba ge a ka dula a sa nyalwa, “o lokologile go nyalwa ke yo a mo nyakago, e be feela Moreneng.” (1 Bakorinthe 7:39, 40; Baroma 7:2, 3) Go oketša moo, lengwalong la gagwe le le yago go Timotheo, Paulo o itše: “Ke rata gore bahlologadi ba bafsa ba nyalwe.” (1 Timotheo 5:14) Ka gona, mohlologadi a ka se solwe ge a ka kgetha go nyalwa gape.
Lega go le bjalo, re swanetše go kwešiša bjang mantšu ao Paulo a a boditšego Timotheo? Polelwana “mosadi wa monna o tee” e tšwelela temaneng ye feela. Se se kgahlišago ke gore polelwana ye e swana le yeo Paulo a e dirišitšego ka makga a mmalwa ka mangwalong a gagwe lelemeng la mathomo, ya gore “monna wa mosadi o tee.” (1 Timotheo 3:2, 12; Tito 1:6) Paulo o dirišitše polelwana ye ge a be a lokeletša ditshwanelego tša balebeledi ba Bakriste le bahlanka ba bodiredi. Tabeng yeo, lentšu le ka mo go kwagalago le bolela gore, e le gore a swanelegele boikarabelo ka phuthegong ya Bokriste, monna ge e ba a nyetše, o swanetše go botegela mosadi wa gagwe le go ba yo a sa solegego boitshwarong. * Ka baka leo, mantšu a lego go 1 Timotheo 5:9 a ka bolela se se swanago: Gore mohlologadi a swanelegele thušo ka phuthegong, o swanetše go ba yo a ineetšego le go ba mosadi yo a bego a botegela monna wa gagwe ge a be a sa phela le go se solege boitshwarong. Dinyakwa tše oketšegilego tšeo Paulo a di lokeleditšego di hlalosa motho yoo gabotse.—1 Timotheo 5:10.
[Mengwalo ya ka tlase]
^ ser. 2 Go nyalana le banna ba bantši, e lego mokgwa wa gore mosadi a be le banna ba mmalwa ka nako e tee, go be go sa amogelwe mmušong wa Baroma le Bagerika mehleng ya moapostola. Paulo o be a ka se ngwalele Timotheo ka mokgwa wo goba a kgalemela motho le ge e le ofe yo a ka bago a be a o dira.
^ ser. 4 Go bona mo taba ye e ahla-ahlwago gona, bona Morokami wa October 15, 1996, letlakala 17 le “Dipotšišo tše Tšwago go Babadi” tokollong ya June 1, 1981, letlakala 29 (ka Seisemane ke ya September 15, 1980, letlakala 31).