Go Botegela Kriste le Mohlanka Wa Gagwe yo a Botegago
Go Botegela Kriste le Mohlanka Wa Gagwe yo a Botegago
“Mong wa gagwe . . . O tla mmea gore a hlokomele dilo tša gagwe ka moka.”—MATEO 24:45-47.
1, 2. (a) Mangwalo a re Moetapele wa rena ke mang? (b) Ke’ng seo se bontšhago gore Kriste o eta phuthego ya Bokriste pele ka mafolofolo?
“LE SE ke la dumelela batho ba le bitša ‘baetapele’—le na le moetapele o tee feela, e lego Kriste!” (Mateo 23:10, The New Testament in Modern English) Ka mantšu a, Jesu o dirile gore balatedi ba gagwe ba kwešiše gore ga go motho le ge e le ofe mo lefaseng yoo a bego a tla ba moetapele wa bona. Moetapele wa bona e be e tla ba o tee wa legodimong—Jesu Kriste ka boyena. Jesu o filwe boetapele bjo ke Modimo. Jehofa o ile a “mo tsoša bahung gomme . . . a mo dira hlogo ya dilo tšohle phuthegong, yeo e lego mmele wa gagwe.”—Baefeso 1:20-23.
2 Ka ge Kriste e le “hlogo ya dilo tšohle” ka phuthegong ya Bokriste, o diriša matla a gagwe a taolo dilong ka moka tšeo di diregago ka phuthegong. O bona dilo ka moka tšeo di diregago ka phuthegong. O šetša boemo bja moya bja sehlopha se sengwe le se sengwe sa Bakriste, goba phuthego. Se se bonagala gabotse go kutollo yeo e filwego moapostola Johane mafelelong a lekgolo la pele la nywaga C.E. Jesu o boditše diphuthego tše šupago ka makga a mahlano gore o tseba mediro ya tšona, dika tše di kgahlišago le mafokodi a tšona, gomme a ba a di fa keletšo le kgothatšo ka baka la seo. (Kutollo 2:2, 9, 13, 19; 3:1, 8, 15) Go na le mabaka a kwagalago a go dumela gore Kriste ka mo go swanago o be a tseba boemo bja moya bja diphuthego tše dingwe tša kua Asia Minor, Palestina, Siria, Babilonia, Gerika, Italy le tša mafelong a mangwe. (Ditiro 1:8) Go thwe’ng ka lehono?
Mohlanka yo a Botegago
3. Ke ka baka la’ng e le mo go swanetšego go swantšha Kriste le hlogo gomme phuthego le mmele?
3 Ka morago ga tsogo ya gagwe le pejana ga go rotogela ga gagwe legodimong go Tatagwe, Jesu o ile a botša barutiwa ba gagwe gore: “Ke neilwe matla ka moka legodimong le lefaseng.” O ile a bolela gape gore: “Bonang! Ke na le lena matšatši ka moka go fihla bofelong bja tshepedišo ya dilo.” (Mateo 28:18-20) O be a tla tšwela pele a e-na le bona bjalo ka Hlogo e mafolofolo. Mangwalong ao a yago go Bakriste ba Efeso le ba Kolose, moapostola Paulo o ile a swantšha phuthego ya Bokriste le “mmele,” woo Kriste e lego Hlogo ya wona. (Baefeso 1:22, 23; Bakolose 1:18) The Cambridge Bible for Schools and Colleges e re tshwantšhišo ye “ga e šišinye feela kgokagano e bohlokwa le Hlogo, eupša gape le gore ditho di dira thato ya Hlogo. Ke didirišwa tša Gagwe.” Ke sehlopha sefe seo Kriste a bego a dutše a se diriša bjalo ka sedirišwa sa gagwe ga e sa le go tloga ge a newa matla a Mmušo ka 1914?—Daniele 7:13, 14.
4. Bjalo ka ge go boletšwe e sa le pele boporofeteng bja Maleaki, Jehofa le Kriste Jesu ba ile ba hwetša’ng ge ba be ba tlela go tlo lekola tempele ya moya?
4 Boporofeta bja Maleaki bo boletše e sa le pele gore Jehofa, “Morena wa therešo (NW),” a e-na le “Motseta [wa gagwe] wa kxwêranô,” e lego Morwa wa gagwe yo a sa tšwago go bewa sedulong sa bogoši, Kriste Jesu, ba tla tlela go ahlola le go lekola “tempele” ya Gagwe, goba ngwako wa gagwe wa seswantšhetšo wa borapedi. Go molaleng gore “nako e beilwego” ya go thoma ga ‘kahlolo ya ntlo ya Modimo’ e ile ya fihla ka 1918. * (Maleaki 3:1; 1 Petro 4:17) Bao ba ipolelago gore ba emela Modimo le borapedi bja gagwe bja therešo mo lefaseng ba ile ba lekolwa gabotse. Dikereke tša Bojakane, tšeo ka nywaga-kgolo di bego di ruta dithuto tšeo di bontšhago go se hlomphe Modimo e bile di ilego tša akaretšwa kudu polaong e sehlogo ya Ntwa ya I ya Lefase, di ile tša se amogelwe. Mašaledi a botegago a Bakriste bao ba tloditšwego ka moya a ile a lekwa, a hlwekišwa moo e kego ke ka mollo, le go amogelwa, ka go rialo go Jehofa a ba ‘batho bao ba tlišago dibego ba lokile.’—Maleaki 3:3.
5. Ka go dumelelana le boporofeta bja Jesu bja mabapi le ‘go ba gona ga gagwe,’ ke mang yoo a ilego a itlhatsela e le “mohlanka” yo a botegago?
5 Ka go dumelelana le boporofeta bja Maleaki, pontšho e bopaganego yeo Jesu a e neilego barutiwa ba gagwe bakeng sa go ba kgontšha go lemoga nako ya “go ba gona ga [gagwe] le ya bofelo bja tshepedišo ya dilo” e be e akaretša le go hlaolwa ga sehlopha sa “mohlanka.” Jesu o boletše gore: “Ke mang yo ruri e lego mohlanka yo a botegago le wa temogo, yo mong wa gagwe a mmeilego gore a hlokomele ba ntlo ya gagwe, gore a ba nee dijo tša bona ka nako e swanetšego? Go thaba mohlanka yoo ge e ba mong wa gagwe a fihla a mo hwetša a dira bjalo. Ruri ke re go lena, O tla mmea gore a hlokomele dilo tša gagwe ka moka.” (Mateo 24:3, 45-47) “Ge . . . a fihla” go tlo lekola “mohlanka” ka 1918, Kriste o hweditše mašaledi a tloditšwego ka moya a barutiwa ba botegago ao ga e sa le go tloga ka 1879 a bego a aba “dijo [tša moya] ka nako e swanetšego” ka go diriša makasine wo le dikgatišo tše dingwe tšeo di theilwego Beibeleng. O ile a a amogela bjalo ka sehlopha sa gagwe sa sedirišwa, goba “mohlanka,” gomme ka 1919 a a bea gore a hlokomele dilo tša gagwe ka moka tša lefaseng.
Go Hlokomela Dilo tša Kriste tša Lefaseng
6, 7. (a) Jesu gape o ile a bolela ka “mohlanka” wa gagwe yo a botegago ka mantšu afe? (b) Go diriša ga Jesu lentšu “molaki” go umaka’ng?
6 Dikgwedi tše sego kae pele Jesu a porofeta mabapi le pontšho ya go ba gona ga gagwe, go akaretša le go ba gona ga “mohlanka” yoo a mo emelago mo lefaseng, o boletše ka “mohlanka” yo ka mantšu ao a fapanego ka gonyenyane ao a bego a utolla boikarabelo bja mohlanka yo. Jesu o boletše gore: “Ke mang yo ruri e lego molaki yo a botegago, yo a nago le temogo, yo mong wa gagwe a tlago go mmea gore a hlokomele sehlopha sa gagwe sa bahlanka gore a tšwele pele a ba nea tekanyo ya dijo tša bona ka nako e swanetšego? Ruri ke a le botša, O tla mmea gore a hlokomele dilo tša gagwe ka moka.”—Luka 12:42, 44.
7 Mohlanka mo o bitšwa molaki, e lego lentšu leo le fetoletšwego go tšwa lentšung la Segerika leo le šupago “mohlokomedi wa lapa goba kgoro.” Sehlopha sa molaki e be e ka se fo ba sehlopha sa dirutegi tšeo di hlalosago dintlha tše di kgahlišago go tšwa Beibeleng. Go tlaleletša go abeng dijo tša moya tše di nago le phepo “ka nako e swanetšego,” “molaki yo a botegago” o be a tla bewa go hlokomela sehlopha ka moka sa bahlanka ba Kriste le go hlokomela mediro ya Kriste ka moka ya mo lefaseng, e lego “dilo tša gagwe ka moka.” Se se ka ba se akaretša’ng?
8, 9. Ke “dilo” dife tšeo mohlanka a beetšwego go di hlokomela?
8 Mediro ya mohlanka e akaretša go laka dilo tšeo di dirišwago ke balatedi ba Kriste go phetha mediro ya bona ya Bokriste, tše bjalo ka ntlo-kgolo ya lefase ka moka le diofisi tša makala tša Dihlatse tša Jehofa, gotee le mafelo a tšona a borapedi—Diholo tša Mmušo le Diholo tša Kopano—lefaseng ka bophara. Se bohlokwa le go feta, mohlanka gape o okamela mananeo ao a agago moyeng a dithuto tša Beibele dibokeng tša beke le beke gotee le dikopanong tšeo di bago gona tše dikgolo le tše dinyenyane. Dipokanong tše, go hlaloswa tsebišo ya mabapi le go phethagala ga boporofeta bja Beibele, gomme go fiwa le tlhahlo e lego nakong ya kamoo go swanetšego go dirišwa melao ya motheo ya Beibele bophelong bja letšatši le letšatši.
9 Mediro ya molaki gape e akaretša go laka modiro o bohlokwa-hlokwa wa go bolela “ditaba tše tše dibotse tša mmušo” le go dira “batho ba ditšhaba ka moka barutiwa.” Se se akaretša go ruta batho go boloka dilo tšohle tšeo Kriste, Hlogo ya phuthego, a laelago gore di dirwe mo mehleng ya bofelo. (Mateo 24:14; 28:19, 20; Kutollo 12:17) Modiro wa boboledi le wa go ruta o tšweleditše “lešaba le legolo” la bagwera ba botegago ka go se kwanantšhe ba mašaledi a batlotšwa. Ga go pelaelo gore ‘matsaka a a ditšhaba ka moka’ ke karolo ya “dilo” tše bohlokwa tša Kriste tšeo di hlokometšwego ke mohlanka yo a botegago.—Kutollo 7:9; Hagai 2:7.
Sehlopha se Bušago sa Moemedi
10. Go be go e-na le sehlopha sefe sa go dira diphetho lekgolong la pele la nywaga, gomme mafelelo e bile afe go diphuthego?
10 Go molaleng gore modiro o boima wa mohlanka yo a botegago o be o tla akaretša go dira diphetho tše dintši. Ka phuthegong ya pele ya Bokriste, baapostola le bagolo ba Jerusalema ba be ba dira bjalo ka baemedi, ba direla phuthego ka moka ya Bokriste diphetho. (Ditiro 15:1, 2) Diphetho tša sehlopha se seo se bušago sa lekgolong la pele la nywaga di be di išwa diphuthegong go dirišwa mangwalo le baemedi ba basepedi. Bakriste ba pele ba be ba thabela go hwetša tlhahlo ye yeo e kwagalago, gomme go ikemišetša ga bona go dirišana le sehlopha se bušago go ile gwa dira gore go be le khutšo le botee.—Ditiro 15:22-31; 16:4, 5; Bafilipi 2:2.
11. Ke bomang bao Kriste a ba dirišago lehono go hlahla phuthego ya gagwe, gomme re swanetše go lebelela sehlopha se sa Bakriste ba tloditšwego bjang?
11 Go swana le mehleng ya pele ya Bokriste, sehlopha se senyenyane sa balebeledi bao ba tloditšwego ka moya se bopa Sehlopha se Bušago sa balatedi ba Kriste mo lefaseng lehono. Ka ‘seatla sa gagwe sa le letona’ sa matla a dirišwago, Kriste, Hlogo ya phuthego, o hlahla banna ba bao ba botegago ge ba dutše ba okamela modiro wa Mmušo. (Kutollo 1:16, 20) Phihlelong ya gagwe, Albert Schroeder, setho sa nako e telele sa Sehlopha se Bušago yoo a phethilego bophelo bja gagwe bja lefaseng morago bjale, o ngwadile gore: “Sehlopha se Bušago se kopana Laboraro le lengwe le le lengwe, gomme se bula seboka ka thapelo go kgopela go hlahlwa ke moya wa Jehofa. Go dirwa boiteko bja kgonthe go kgonthišetša gore taba e nngwe le e nngwe yeo go bolelwago ka yona le phetho e nngwe le e nngwe e dirwago e dumelelana le Lentšu la Modimo e lego Beibele.” * Re ka bota Bakriste ba bjalo ba ba botegago ba batlotšwa. Mabapi le bona ka mo go kgethegilego, re swanetše go kwa taelo ya moapostola Paulo e rego: “Kwang bao ba etelelago pele gare ga lena gomme le ikokobetše, gobane ba hlokomela meoya ya lena.”—Baheberu 13:17.
Go Bontšha Mohlanka yo a Botegago Tlhompho e Swanetšego
12, 13. Ke mabaka afe a Mangwalo ao a lego gona a go bontšha sehlopha sa mohlanka tlhompho?
12 Lebaka la motheo la go bontšha sehlopha sa mohlanka yo a botegago tlhompho e swanetšego ke ka gobane ge re dira bjalo, ge e le gabotse re hlompha Mong, e lego Jesu Kriste. Paulo o ngwadile mabapi le batlotšwa gore: “Yo a biditšwego e le molokologi ke mohlanka wa Kriste. Le rekilwe ka theko.” (1 Bakorinthe 7:22, 23; Baefeso 6:6) Ka go rialo, ge re ikokobeletša ka potego tlhahlo ya mohlanka yo a botegago le Sehlopha sa gagwe se Bušago, re ikokobeletša Kriste, e lego Mong wa mohlanka. Go bontšha ga rena tlhompho e swanetšego sedirišweng seo Kriste a se dirišago go hlokomela dilo tša gagwe ke tsela e nngwe yeo ka yona re ‘dumelago phatlalatša gore Jesu Kriste ke Morena gore go išwe letago go Modimo Tate.’—Bafilipi 2:11.
13 Lebaka le lengwe la Mangwalo la go bontšha go hlompha mohlanka yo a botegago ke ka gobane Bakriste ba tloditšwego ba lego lefaseng ba hlaloswa ka tsela ya seswantšhetšo e le “tempele” yeo Jehofa a dulago go yona “ka moya.” Ka baka leo, ke ba “bakgethwa.” (1 Bakorinthe 3:16, 17; Baefeso 2:19-22) Jesu o neile sehlopha se sa tempele e kgethwa dilo tša gagwe ka moka tša lefaseng, e lego seo se bolelago gore ditshwanelo tše itšego le mediro e itšego ka phuthegong ya Bokriste ke tša sehlopha se sa mohlanka feela. Ka lona lebaka le, bohle ka phuthegong ba bona modiro wa bona o mokgethwa e le go latela le go diriša tlhahlo e tšwago go mohlanka yo a botegago le Sehlopha se Bušago. Ee, “dinku tše dingwe” di bona e le tokelo go thuša sehlopha sa mohlanka go hlokomela dilo tša Mong.—Johane 10:16.
Go Nea Thekgo ka Potego e sa Kwanantšhego
14. Bjalo ka ge Jesaya a porofetile, dinku tše dingwe di sepela bjang ka morago ga sehlopha sa mohlanka sa batlotšwa le go hlankela bjalo ka “bašomi ba sa lefšego”?
14 Go kwa ga dinku tše dingwe ditho tše di tloditšwego tša Isiraele ya moya ka boikokobetšo go ile gwa bolelwa e sa le pele boporofeteng bja Jesaya bjo bo rego:“Morêna ó re: Lehumô la Ba-Egipita [bašomi ba sa lefšego ba Egipita, NW], le maruô a Ba-Kuše, le a ba Seba, banna bala ba batelele, di tlo tla xo wene, e bê tša xaxo. Ba tlo Xo šala nthaxo, ba tlo feta bà tlemilwe ka dithsipi, ba tlo Xo lothša ba rapêla ba re: Modimo ké wa xaxo, xa xo sa na yo mongwê e a kaxo ba Modimo.” (Jesaya 45:14) Ka tsela ya seswantšhetšo, lehono dinku tše dingwe di sepela ka morago ga sehlopha sa mohlanka sa batlotšwa le Sehlopha sa sona se Bušago, di latela boetapele bja tšona. Bjalo ka “bašomi ba sa lefšego,” dinku tše dingwe di neela ka matla a tšona le dilo tše di bonagalago ka go rata bakeng sa go thekga modiro wa boboledi wa lefase ka bophara woo Kriste a o neilego balatedi ba gagwe ba tloditšwego mo lefaseng.—Ditiro 1:8; Kutollo 12:17.
15. Boporofeta bja Jesaya 61:5, 6 bo bolela bjang e sa le pele ka tswalano e lego gona magareng ga dinku tše dingwe le Isiraele ya moya?
15 Dinku tše dingwe di thabile e bile di leboga go hlankela Jehofa ka tlase ga bolebeledi bja sehlopha sa mohlanka le Sehlopha sa sona se Bušago. Di lebelela batlotšwa e le ditho tša “Isiraele wa Modimo.” (Bagalatia 6:16) Di le bjalo ka “ba mathokô” le “ba mehuta e šele” ba seswantšhetšo bao ba kopanelago le Isiraele ya moya, ka lethabo di hlankela bjalo ka ‘ba go lema mašemo’ le ‘ba go lema dirapa tša merara’ bao ba hlahlwago ke batlotšwa, e lego “baperisita ba Morêna” le “bahlanka ba Modimo.” (Jesaya 61:5, 6) Di bolela ditaba tše tše dibotse tša Mmušo le go dira batho ba ditšhaba ka moka barutiwa ka mafolofolo. Di thuša sehlopha sa mohlanka ka pelo ka moka ka go diša le go šetša bao ba swanago le dinku bao ba sa tšwago go hwetšwa.
16. Ke’ng seo se šušumeletšago dinku tše dingwe go thekga mohlanka yo a botegago le wa temogo ka potego?
16 Dinku tše dingwe di lemoga gore di hotšwe kudu ke maiteko a mafolofolo a mohlanka yo a botegago a go di abela dijo tša moya tše di lego nakong. Di lemoga ka boikokobetšo gore ge e be e se ka mohlanka yo a botegago le wa temogo, nkabe di tseba ganyenyane goba di sa tsebe selo ka ditherešo tše bohlokwa tša Beibele, tše bjalo ka bogoši bja Jehofa, go kgethagatšwa ga leina la gagwe, Mmušo, magodimo a mafsa le lefase le lefsa, moya [soul], boemo bja bahu gotee le go tseba Jehofa e le ka kgonthe, Morwa wa gagwe le moya o mokgethwa. Ka baka la tebogo ya kgonthe le potego e sa kwanantšhego, dinku tše dingwe ka go rata di thekga ‘bana babo’ Kriste ba tloditšwego ba lego mo lefaseng mo mehleng ya bofelo.—Mateo 25:40.
17. Sehlopha se Bušago se ile sa bona go le bohlokwa go dira’ng, gomme ke’ng seo se tlago go ahlwa-ahlwa sehlogong se se latelago?
17 Ka baka la palo ya bona e fokotšegago, batlotšwa ba ka se kgone go ba gona diphuthegong ka moka bakeng sa go kgonthišetša go hlokomelwa ga dilo tša Kriste. Ka baka leo, Sehlopha se Bušago se kgetha banna go tšwa go dinku tše dingwe sa ba dira balebeledi diofising tša makala, dileteng, ditikologong le ka diphuthegong tša Dihlatse tša Jehofa. Na boemo bja rena bja kgopolo ka badiši bao ba šomago ka tlase ga tlhokomelo ya Kriste bo kgoma go botegela ga rena Kriste gotee le mohlanka wa gagwe yo a botegago? Se se tla ahlwa-ahlwa sehlogong se se latelago.
[Mengwalo ya ka tlase]
^ ser. 4 Bakeng sa dintlha ka botlalo tša taba ye, bona Morokami wa March 1, 2004, matlakala 13-18, le wa December 1, 1992, letlakala 13.
^ ser. 11 E gatišitšwe ka tokollong ya March 1, 1988, ya makasine wo, matlakala 10-17.
E le Poeletšo
• Moetapele wa rena ke mang, gomme ke’ng seo se bontšhago gore o lemoga seo se diregago ka diphuthegong?
• Ge go be go lekolwa “tempele,” ke bomang bao ba ilego ba hwetšwa ba dira bjalo ka mohlanka yo a botegago, gomme ke dilo dife tšeo ba ilego ba di newa?
• Go na le mabaka afe a Mangwalo a go thekga mohlanka yo a botegago?6
[Dipotšišo tša Thuto]
[Seswantšho go letlakala 23]
“Dilo” tšeo di lakwago ke “molaki” di akaretša dilo tše di bonagalago, mananeo a moya le modiro wa boboledi
[Seswantšho go letlakala 25]
Ditho tša dinku tše dingwe di thekga sehlopha sa mohlanka yo a botegago ka go dira boboledi ka mafolofolo