Go Tsoma Dikarabo tše di Nepagetšego

Nka šireletša bjang boemo bja-ka bja tša maphelo?

Nka dira bjang gore bophelo bja lapa la-ka bo thabiše kudu?

Nka godiša bjang dibaka tša go boloka mošomo wa-ka?

NA O kile wa botšiša e nngwe ya dipotšišo tšeo? Na o kile wa hwetša dikarabo tšeo di ilego tša šoma e le ka kgonthe? Ngwaga o mongwe le o mongwe, go gatišwa dipuku tše ka bago tše 2 000 tše di sa swanego, tšeo di neago tlhahlo ka ditaba tše gotee le tše dingwe tše bohlokwa. Kua Brithania feela, ka ngwaga babadi ba diriša tšhelete e ka bago diponto tše dimilione tše 80 (dimilione tše dikete tše 1,1 tša diranta), go reka dipuku tšeo di neago batho tlhahlo ya kamoo ba ka lebeletšanago le mathata a bophelo ka gona. Kua United States, dikgwebo tša dipuku tšeo di thušago motho go ikaonefatša di dira tšhelete e ka bago diranta tše dimilione tše dikete tše 4,4 ka ngwaga. Ga se wena feela yo a tsomago tlhahlo mabapi le kamoo o ka swaraganago le mathata a letšatši le letšatši.

Mongwadi yo mongwe o boletše mabapi le tlhahlo yeo e hwetšwago ka dipukung tšeo tše dintši gore: “Bontši bja dipuku tše difsa bo fo ba bo bušeletša seo se šetšego se ngwadilwe.” Ke therešo gore bontši bja keletšo yeo e hwetšwago ka dipukung tše e fo ba e bušeletša bohlale bjo bo šetšego bo ngwadilwe ka pukung e nngwe ya dipuku tša kgale lefaseng. Puku ye ge e le gabotse ke kgatišo e phatlaladitšwego kudu lefaseng ka bophara. E fetoletšwe ka maleme a ka bago a 2 400, e feletše goba ka karolo ya yona. Ka kakaretšo, go gatišitšwe dikopi tša puku ye tše dimilione tše dikete tše 4,6 lefaseng ka bophara. Puku ye ke Beibele.

Beibele e bolela ka go lebanya gore: “Lengwalo ka moka le buduletšwe ke Modimo gomme le hola ka go ruta, go sola, go lokiša dilo [le] go laya ka toko.” (2 Timotheo 3:16) Ke therešo gore Beibele ga se ya ngwalwa e le puku ya tlhahlo ya go thuša batho go ikaonefatša. Morero wa yona o mogolo ke go utolla thato ya Modimo ka batho. Lega go le bjalo, Beibele e-na le tsebišo e ntši mabapi le kamoo re ka lebeletšanago le mathata ao ka moka ga rena re a tlwaetšego, le gona e holofetša gore bao ba latelago tlhahlo ya yona ba tla holega. (Jesaya 48:17, 18) Ge e dirišwa, tlhahlo ya yona e a šoma ka mehla, go sa šetšwe gore motho ke wa morafe ofe, wa setšhaba sefe goba gore o rutegile gakaaka’ng. Ke ka baka la’ng o sa bale sehlogo se se latelago ka kelohloko gomme o bone ge e ba seo Beibele e se bolelago ditabeng tše bjalo ka tša maphelo, lapa le mošomo, se šoma?