Phihlelo

Modiro Wa Go Dira Barutiwa O Tutueditše Diphetho Tše ke di Dirilego Bophelong

KA GE GO ANEGA LYNETTE PETERS

Ba be ba tletše go re phološa. Setsebi sa go thunya se be se le komana-madula-a-bapile ka godimo ga ngwako. Mašole a ka lewatleng a be a patlame bjanyeng, a itokišeleditše go thunya. Ge re be re kitimela ka helikoptareng yeo e bego e re letetše mesong yeo ya Sontaga, nna gotee le baromiwa ba bangwe re ile ra ikgapeletša go fodiša maswafo. Ka ponyo ya leihlo ke ge re šetše re le lefaufaung. Ka morago ga metsotso e lesome re ile ra fihla sekepeng sa mašole seo se bego se emišitšwe kgaufsi le lebopo, re bolokegile.

MESONG e latetšego, re ile ra kwa gore marabele a thuntšhitše pomo hoteleng yeo re bego re tšhabetše go yona bošegong bjo bo fetilego. Meferefere yeo e bilego gona ka nywaga e mentši kua Sierra Leone, e ile ya feleletša e le ntwa e kgolo. Batho bohle ba tšwago dinageng dišele, go akaretša le rena, ba ile ba gapeletšega go tšwa ka nageng yeo ka ntle le go dika-dika. E re ke go hlalosetše go tloga mathomong gore go tlile bjang gore ke ikhwetše ke le boemong bjoo.

Ke goletše Guiana ya Brithania, yeo go tloga ka 1966 e ilego ya tsebja e le Guyana. Ka bo-1950 ge ke be ke sa le yo monyenyane, ke be ke sa tshwenyege ka selo, e bile ke thabela bophelo. Batswadi ba bantši ba be ba tšeela thuto godimo, gomme bafsa ba be ba letetšwe gore ba šome gabotse sekolong. Ke gopola ge mongwadi wa ka pankeng a be a botšiša tate a re: “Ke ka baka la’ng o lefa tšhelete e ntši gakaakaa bakeng sa dithuto tša bana ba gago? Tate o ile a fetola ka gore: “Thuto e kaone-kaone e tla dira gore ba atlege.” Ka nako yeo, o be a nagana gore thuto e kaone-kaone e be e ka hwetšwa feela dikolong tša maemo a godimo. Kgopolo yeo e be e tla fetoga kgaufsinyane.

 Ge ke be ke e-na le nywaga e 11, mma o ile a thoma go ithuta Beibele le Dihlatse tša Jehofa. Yena gotee le moagišani ba ile ba ya Holong ya Mmušo. Seo ba se kwelego bošego bjoo, se ile sa ba kgodiša ka bobedi gore ba hweditše therešo. Ka morago, mma o ile a hlalosetša moagišani yo mongwe seo ba se kwelego moo. Go se go ye kae boraro bja bona ba ile ba ithuta le baromiwa, Daphne Harry (yoo ka morago a ile a ba wa ga Baird) le Rose Cuffie. Mma le bagwera ba gagwe ba babedi ba ile ba kolobetšwa ka lebaka la ka tlase ga ngwaga. Nywaga e mehlano ka morago ga moo, tate o ile a tlogela Kereke ya Seventh-Day Adventist gomme a kolobetšwa e le yo mongwe wa Dihlatse tša Jehofa.

Ge re be re sa le bana, nna gotee le baratho ba-ka ba babedi—bana ba mathomo ba bararo go bana ba lesome—re be re fetša diiri tše dintši tše di thabišago re le ngwakong wa baromiwa, moo go bego go dula Daphne le Rose. Dinakong tše di swanago le tšeo, re be re theetša diphihlelo tša tirelong ya tšhemo tšeo ba bego ba re anegela tšona. Baromiwa ba ba be ba dula ba thabile ka ge ba be ba šoma ka thata go hlokomela dinyakwa tša moya tša ba bangwe. Mohlala wa bona ke wona woo o dirilego gore ke kganyoge go ba moromiwa.

Lega go le bjalo, ke eng seo se nthušitšego gore ke dule ke e-na le pakane ya go ba modiredi wa nako e tletšego le ge ke be ke phela le ba leloko le bana ba bangwe ba sekolo bao ba bego ba e-na le pakane ya go tšwetša dithuto tša bona pele e le gore ba tle ba hwetše mešomo e atlegilego? Go be go e-na le dibaka tšeo di bego di gogela—ke be nka ipha nako ya go ithutela tša molao, mmino, bongaka goba selo se sengwe. Mohlala wa batswadi ba-ka o mobotse o nthušitše go hwetša tsela yeo ke bego ke e nyaka. Ba be ba diriša therešo maphelong a bona, ba ithuta Beibele ka mafolofolo, le gona ba be ba ikgafetše go thuša ba bangwe go ithuta ka Jehofa. * Go tlaleletša moo, ba be ba dula ba laletša badiredi ba nako e tletšego go tla ka gae. Lethabo le kgotsofalo tšeo di bego di bonagatšwa ke bana bao babo rena le dikgaetšedi, di ile tša matlafatša kganyogo ya-ka ya go dumelela modiro wa go dira barutiwa o ntutuetša bophelong.

Ge ke e-na le nywaga e 15, ke ile ka kolobetšwa. Ka morago ga go fetša sekolo se se phagamego, ke ile ka thoma go bula madibogo. Phiomena, yo a bego a šoma sepetlele, ke motho wa pele yoo ke ilego ka mo thuša gore a tšwele pele moyeng go ba go fihla ge a ineela le go kolobetšwa. Lethabo leo ke bilego le lona ge ke mmona a thoma go rata Jehofa le ile la matlafatša kganyogo ya-ka ya go tšwela pele ke le modiredi wa nako e tletšego. Nakwana ka morago ga moo, ke ile ka newa mošomo o kaone wa Mmušo moo ke bego ke šoma ke le mongwaledi. Ke ile ka o gana, go e na le moo, ka kgetha go tšwela pele ke le mmulamadibogo.

Ge ke be ke sa dula ka gae, baromiwa ba be ba tšwela pele go re etela. Ruri ke be ke thabela go theetša diphihlelo tša bona! Dilo tše ka moka di ile tša matlafatša kganyogo ya-ka ya go ba  moromiwa, le ge go be go bonala go ka se kgonege. Ka nako yeo baromiwa ba be ba romelwa Guyana, le ga bjale ba sa romelwa. Letšatšing le lengwe ka 1969, ke ile ka makala eupša ka thabela taletšo ya gore ke tle Sekolong sa Beibele sa Watchtower sa Gilead kua Brooklyn, New York.

Kabelo Yeo ke Bego ke se ka e Letela

Klaseng ya Gilead ya bo-48 go be go e-na le barutwana ba 54 ba tšwago dinageng tše 21. Ba 17 ba rena re be re le dikgaetšedi tše sego tša nyalwa. Le ge go fetile nywaga e 37, ke sa dutše ke gopola gabotse dikgwedi tšeo tše hlano. Re be re swanetše go ithuta dilo tše dintši, e sego ditherešo tša Mangwalo feela, eupša le dikeletšo tše di šomago gotee le tlhahlo ya bophelo bjo re bego re tla bo phela bjalo ka baromiwa. Ka mohlala, ke ile ka ithuta go latela tlhahlo, go ba yo a leka-lekanego mabapi le mekgwa e mefsa ya fešene gotee le go kgotlelela maemong a go se kgahliše.

Batswadi ba-ka ba be ba dula ba gatelela bohlokwa bja go ya dibokeng ka mehla. Yo a bego a ka itira e-ka o a lwala gore a se ke a ya dibokeng ka Sontaga o be a sa dumelelwe go tšea karolo medirong e mengwe e thabišago bošegong bjo bo latelago. Lega go le bjalo, ka nako e nngwe ge ke be ke le Sekolong sa Gilead ke ile ka palelwa ke go ba gona dibokeng ka moka. Bošegong bjo bongwe bja Labohlano, ke ile ka leka go lokafatša go se nyake ga-ka go ya dibokeng go Don le Dolores Adams, banyalani ba Bethele bao ba bego ba sepela le nna ka koloi ya bona. Mošomo ke o montši, mošomo wa gae le dipego! Nka kgona bjang go ya Sekolong sa Bodiredi sa Pušo ya Modimo le Sebokeng sa Tirelo? Ka morago ga go boledišana le nna ka nakwana, Ngwanabo rena Adams o ile a re: “Dumelela letswalo la gago le go hlahla.” Ke ile ka amogela keletšo ya gagwe gomme ka se foše diboka bošegong bjoo, goba mašegong a mangwe ka morago ga moo. Ka nywaga e mentši, ntle le maemong a thata, ga go na selo seo ke ilego ka se dumelela se nthibela go ya dibokeng tša Bokriste.

Ka morago ga dikgwedi tše pedi le seripa re le sekolong, go ile gwa thoma go bolelwa mabapi le go amogela dikabelo tša rena. Ke be ke dutše ke nagana gore ke tla abelwa Guyana, moo go bego go e-na le tlhokagalo e kgolo modirong wa boboledi. Akanya kamoo ke ilego ka makala ka gona ge ke be ke botšwa gore ga ke sa boela moo. Go e na le moo, ke ile ka abelwa Sierra Leone, ka Bodikela bja Afrika. Ke ile ka leboga Jehofa gakaakang ge mafelelong kganyogo ya-ka ya gore ke be moromiwa kgole le gae e ile ya phethega!

Go Ithuta Dilo tše Dintši

“E a kgahliša” ke mantšu ao a bego a hlalosa maikwelo a-ka ge ke be ke bona Sierra Leone la mathomo, ka meboto ya yona e mentši le dithaba, dikou gotee le mabopo. Lega go le bjalo, bobotse bja kgonthe bja naga ye ya ka Bodikela bja Afrika bo bonwa baduding ba yona, bao lerato la bona le botho di dirago gore le batho ba tšwago dinageng di šele ba ikwe ba amogelegile. Se se thuša baromiwa kudu gore ba fenye bothata bja go hlologela gae. Batho ba Sierra Leone ba rata go bolela ka metlwae ya bona le setšo sa bona gomme ka mo go kgethegilego ba rata go thuša batho bao ba sa tšwago go fihla gore ba tsebe Sekrio, e lego le lengwe la maleme a tlwaelegilego nageng yeo.

Batho bao ba bolelago Sekrio ba na le diema tše dintši tše di kwešišegago gabotse. Ka mohlala, kgabo e a šoma, tšhwene e a ja, seema se se ra gore yo a bjalago ga se ka mehla e lego yo a bunago. Ruri se bontšha gabotse gore mo lefaseng ga go na toka!—Jesaya 65:22.

Mošomo wa go ruta le wa go dira barutiwa o tšwela pele o thabiša. Ke ka sewelo go hwetšwago  motho yoo a sa kgahlegelego Beibele. Nywageng e mentši e fetilego, baromiwa gotee le bahlanka ba nako e telele ba thušitše batho—ba banyenyane le ba bagolo—ba tšwago maemong ka moka a bophelo le ditšong tše di sa swanego gore ba rate therešo.

Erla St. Hill, modirišani wa-ka wa pele wa moromiwa, e be e le mošomi yo a sa lapego. O be a šoma mešomo ya gagwe ya mo legaeng la baromiwa ka mafolofolo go fo swana le ge a be a le bodireding. O ile a nthuta go kwešiša bohlokwa bja dilo tše dintši, tše bjalo ka go tlwaelana le baagišani, go etela Dihlatse tšeo di babjago le batho bao ba thabelago, le go ya mahung ge go kgonega. Le gona o ile a gatelela go nna bohlokwa bja gore ge ke le tirelong ya tšhemo ga se ka swanela go boela gae ke se ka bona bana babo rena le dikgaetšedi bao ba dulago tšhemong yeo, le ge e ka ba ka metsotswana e sego kae. Ka go dira bjalo, ke ile ka hwetša bo-mma, dikgaetšedi, baratho le bagwera gomme naga yeo ke abetšwego go yona e ile ya fetoga gae ga mahlaku.—Mareka 10:29, 30.

Le gona ke ile ka bopa segwera seo se tiilego le baromiwa ba lokilego bao ke bego ke hlankela le bona. Gare ga bona go be go e-na le Adna Byrd, yo a bego a dula le nna ka phapošing, yo a ilego a hlankela kua Sierra Leone bogareng bja 1978 le 1981, gotee le Cheryl Ferguson, yo a dutšego le nna ka phapošing nywageng e 24 e fetilego.

Dintwa tša Selegae di Tliša Diteko

Ka ge go hlalositšwe pejana, ka 1997, kgwedi ka morago ga ge meago e mefsa ya lekala ya Sierra Leone e neetšwe, ntwa e ile ya re gapeletša go huduga nageng. Nywaga e tshela pele ga moo, re be re kgahlilwe ke tumelo ya Dihlatse tša Liberia tšeo di bego di tšhabetše Sierra Leone, di tšhaba ntwa yeo e bego e le Liberia. Ba bangwe ba be ba tlile ba se na selo. Ba be ba tšea karolo ka mehla modirong wa boboledi go sa šetšwe mathata. Re be re kgongwa ke go bona lerato leo ba ratago Jehofa le batho ka lona.

Ka ge bjale re be re le bafaladi nageng ya Guinea, re ile ra latela mohlala wa bana babo rena ba Liberia gomme ra tšwela pele re bota Jehofa le go etiša mediro ya Mmušo pele. Ngwaga ka morago ga moo, re ile ra kgona go boela Sierra Leone, eupša ka morago ga dikgwedi tše šupago, go ile gwa phulega ntwa gomme ra swanelwa ke go hudugela Guinea gape.

Kapejana re ile ra botšwa gore ditho tša se sengwe sa dihlopha tšeo di lwantšhanago di dula legaeng la rena la baromiwa kua Kissy le gore diphahlo tša rena di tšerwe goba gore di sentšwe. Go e-na le gore re nyame, re ile ra leboga feela gore re a phela. Re be re e-na le diphahlo tše sego kae  feela, eupša re ile ra kgona go lebeletšana le maemo a thata.

Ka morago ga go huduga la bobedi nna le Cheryl, yo a dulago le nna ka phapošing, re ile ra šala Guinea. Se se ile sa dira gore re ithute Sefora. Ba bangwe ba baromiwa-gotee le nna ba ile ba thoma go diriša Sefora seo ba bego ba ithuta sona, ba sa tshwenywe kudu ke go šaetša ga bona. Ge e le nna, ke be ke sa rate kgopolo ya go šaetša, ka gona ke be ke bolela Sefora feela ge go be go tloga go nyakega. Go be go nkweša bohloko kudu. Ke ile ka swanelwa ke go ikgopotša leboelela lebaka leo le ntlišitšego Guinea—go thuša ba bangwe go ithuta ka Jehofa.

Ganyenyane-ganyenyane ke ile ka dira tšwelopele thutong ya-ka, ka go theetša bao ba bego ba bolela polelo yeo gabotse, le ka go thušwa ke bana ba ka phuthegong, bao ba bolelago ba sa pepetletše. Ke moka, go se gwa letelwa, mokgatlo wa Jehofa o ile wa dira ditokišetšo tšeo di bego di le nakong. Go tlaleletša ditšhišinyong tša kamoo go ka sepedišetšwago batho ba madumedi a sa swanego dipuku le dipukwana, go thoma ka September 2001, Tirelo ya Rena ya Mmušo e ile ya nea ditšhišinyo mabapi le kamoo re ka sepedišago dimakasine ka gona. Ga bjale ke ba le kgodišego e kgolwanyane ge ke tšea karolo tirelong, le ge ke sa kgone go tšweletša dintlha gabotse go swana le kamoo ke di tšweletšago ka gona ka segagešo.

Go golela ka lapeng le legolo go nthušitše go fetoga le maemo gore ke kgone go dula le batho ba bantši, ka nako e nngwe ba ka bago ba 17. Lebakeng la nywaga e 37 ke le tirelong ya boromiwa, ke kgonne go dula le baromiwa ba bangwe ba 100. E bile tokelo gakaakang go tseba batho ba bantši gakaakaa, bao ka moka ba nago le dimelo tšeo di sa swanego eupša ba šomago ba e-na le morero o swanago! Le gona go thabiša gakaakang go ba modirišani wa Modimo le go tšea karolo modirong wa go dira gore batho ba amogele therešo ya Beibele!—1 Bakorinthe 3:9.

Ka nywaga e mentši ke ile ka foša ditiragalo tše bohlokwa maphelong a ditho tša lapa lešo, tše bjalo ka manyalo a bontši bja baratho ba-ka. Le gona ga se ka ka ka ba le sebaka sa go bona ditlogolo tša-ka gantši kamoo ke bego ke tla thabela go di bona ka gona. E bile boikgafo go nna le go lapa lešo, leo ka go hloka boithati le bego le nkgothaletša go tšwela pele ka modiro wa boromiwa.

Lega go le bjalo, seo ke paletšwego ke go yo se dira kua gae, ke ile ka kgona go se dira ka nako e nngwe ge ke le tirelong ya boromiwa. Le ge ke kgethile go se nyalwe, ke na le bana ba bantši ba moya, e sego feela bao ke ithutilego Beibele le bona eupša le bao ke gweranego le bona. Go tlaleletša moo, ke bone bana ba bona ba gola, ba tsena lenyalong e bile ba godišetša bana ba bona tseleng ya therešo. Ba bangwe ba bona, go swana le nna, ba ile ba dumelela modiro wa go dira barutiwa o tutuetša diphetho tša bona bophelong.

[Mongwalo wa ka tlase]

[Mebapa go letlakala 15]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Ke ile ka abelwa go ya Sierra Leone, Bodikela bja Afrika

GUINEA

SIERRA LEONE

[Seswantšho go letlakala 13]

Baratho ba-ka ba babedi bao gotee le nna re ilego ra fetša diiri tše dintši tše di thabišago re e-na le baromiwa ka bo-1950

[Seswantšho go letlakala 14]

Ke e-na le barutwana-gotee le nna ba klase ya bo-48 ya Gilead

[Seswantšho go letlakala 16]

Go neelwa ga meago e mefsa ya lekala kua Sierra Leone