Ge Seo se Lebeletšwego se sa Direge

GO NYAMA go ka ba gona lenyalong le lengwe le le lengwe, gaešita le ge nakong ya lefereyo go be go bonagala eka monna le mosadi ba a swanetšana. Eupša ke bjang batho ba babedi bao pele ba nyalana, ba bego ba bonagala ba bopetšwe go ba gotee ba ka fapanago ka mokgwa wo ge ba šetše ba nyalane?

Beibele e re bao ba tsenago lenyalong ba tla ba le “bohloko le manyami.” (1 Bakorinthe 7:28, The New English Bible) Gantši bogolo bja tlaišego e bjalo bo bakwa ke go se phethagale ga batho. (Baroma 3:23) Go oketša moo, molekane yo mongwe goba bobedi bja bona ba ka ba ba palelwa ke go diriša melao ya motheo ya Beibele. (Jesaya 48:17, 18) Lega go le bjalo, ka dinako tše dingwe monna goba mosadi o tsena lenyalong a e-na le ditebelelo tše sa kwagalego. Ge se se direga, go se kwešišane go ka lebiša mathateng a magolo.

Ditebelelo Tšeo di sa Kwagalego

Ge e ba o le monna goba mosadi yo a lego lenyalong, o ka no ba o tsene lenyalong o e-na le ditebelelo tše mmalwa, batho ba bantši ba dira bjalo. Nagana go se nene ka mohuta wa bophelo bjo o bego o bo holofetše. Na lenyalo la gago ga le ka mokgwa woo o bego o nagana gore le tla ba ka wona? Ge e ba le le bjalo, o se ke wa phetha ka gore mathata a ka se rarollege. Go diriša melao ya motheo ya Beibele go ka go thuša go lokiša dilo. * (2 Timotheo 3:16) Go sa dutše go le bjalo, go ka ba kaone go hlahloba tše dingwe tša dilo tšeo o ka bago o be o di lebeletše lenyalong.

Ka mohlala, ba bangwe ba be ba nagana gore bophelo lenyalong bo be bo tla tlala ka go bontšhana lerato, go swana le dinonwaneng. Goba mohlomongwe o be o nagana gore wena le molekane wa gago le be le tla fetša nako e ntši le le gotee goba gore bobedi bja lena le be le tla rarolla bothata bjo bongwe le bjo bongwe ka tsela e bonolo le e bontšhago gore le gotše. Ba bantši ba be ba nagana gore lenyalo le be le tla fediša go nyakega ga boitshwaro ditabeng tša tša botona le botshadi. Ka baka la gore ditebelelo tše tšeo di tlwaelegilego ke tše sa kwagalego ka tsela e itšego, ruri di tla lebiša ba bangwe manyaming.—Genesi 3:16.

Tebelelo e nngwe e sa kwagalego ke ya gore lenyalo ka bolona le tla dira gore motho a thabe. Ke therešo gore go ba le molekane bophelong e ka ba mothopo wa lethabo le legolo. (Diema 18:22; 31:10; Mmoledi 4:9) Eupša na go ka lebelelwa gore lenyalo e be phedišo ya mohlolo ya mathata ka moka? Ruri bao ba naganago bjalo gantši ba phafoga ga bohloko!

Ditebelelo Tšeo di sa Bolelwego

Ga se ditebelelo ka moka tšeo e lego tše sa kwagalego. Ka mo go fapanego, tše dingwe di akaretša go kganyoga dilo tšeo di kwagalago. Lega go le bjalo, mathata a ka tsoga ka baka la ditebelelo tše itšego. Moeletši yo mongwe wa manyalo o re: “Ke bona balekane ba galefelana  ka gobane yo mongwe wa bona a letetše gore go kgotsofatšwe kganyogo e itšego, mola molekane yo mongwe a sa tsebe selo ka kganyogo yeo.” Go kwešiša kamoo se se ka diregago ka gona, ela hloko tiragalo e latelago.

Mokgadi o nyalana le Malose, yoo a dulago dikhilomithara tše makgolo kgole le gagabo. Pele ba nyalana, Mokgadi o lemoga gore go hudugela lefelong le lefsa go tla tšweletša ditlhohlo—kudu-kudu ka ge a e-na le dihlong ka tlhago. Lega go le bjalo, o be a kgodišegile gore Malose o tla mo thuša go tlwaela. Ka mohlala, Mokgadi o be a lebeletše gore Malose o tla mo thekga le go mo thuša go tlwaelana le bagwera ba gagwe. Lega go le bjalo, se ga se direge. Malose o swarega ka go boledišana le bagwera ba gagwe ba bantši—a tlogela Mokgadi, yo a sa tšwago go fihla, a nnoši. Mokgadi o ikwa a hlokomologilwe, gaešita le go ikwa a lahlilwe ka tsela e itšego. O ipotšiša gore: ‘Go tla bjang gore Malose a hloke maikwelo gakaakaa?’

Na tebelelo ya Mokgadi e be e le e sa kwagalego? Ga se gore go bjalo. O fo ba a nyaka gore monna wa gagwe a mo thuše go tlwaelana le maemo a mafsa. Mokgadi o na le dihlong, e bile o bona a thatafalelwa ke go kopana le batho ba bantši kudu bao a sa ba tsebego. Lega go le bjalo, taba ke gore Mokgadi o be a se a ka a botša Malose kamoo a ikwago ka gona. Ka baka leo, Malose ga a lemoge kamoo Mokgadi a ikwago ka gona. Go tla direga’ng ge e ba boemo bo tšwela pele ka tsela ye? Mokgadi o be a tla tšwela pele a kgopišega le go feta, gomme ge nako e dutše e e-ya, o be a ka nagana gore monna wa gagwe ga a tshwenyege ka maikwelo a gagwe.

Mohlomongwe le wena o ile wa nyama le go gakanega ge molekane wa gago a be a bonagala a sa dire seo o nyakago gore a se dire. Ge e ba go le bjalo, ke’ng seo o ka se dirago?

Bolela ka Sona

Go se direge ga seo se lebeletšwego go ka gateletša e le ka kgonthe. (Diema 13:12) Lega  go le bjalo, go na le seo o ka se dirago ka boemo bjoo. Seema sa Beibele se re: “O ka tutuetša ba bangwe ge o le bohlale e bile o bolela ka tlhaologanyo.” (Diema 16:23, Contemporary English Version) Ka gona, ge e ba o bona o e-na le tebelelo e kwagalago yeo e sa phethagalego, bolela ka taba yeo le molekane wa gago.

Leka go kgetha nako e swanetšego, boemo bjo bo swanetšego gotee le mantšu a swanetšego go bolela dilo tšeo o tshwenyegilego ka tšona. (Diema 25:11) Bolela ka boleta le ka tlhompho. Gopola morero wa gago—ga se go latofatša molekane wa gago eupša ke go mo tsebiša ditebelelo tša gago le maikwelo a gago.—Diema 15:1.

Ke ka baka la’ng o swanetše go dira tše ka moka? Na molekane yo a naganelago o be a ka se no lemoga dinyakwa tša gago? Go ba gona, molekane wa gago a ka no ba a lebelela dilo ka tsela e fapanego, eupša a ka thabela go kwa dinyakwa tša gago ge e ba o di hlalosa. Go bolela ga gago seo o se nyakago goba se nyakegago ga se leswao la lenyalo le fokolago, e bile ga se bohlatse bja go ba molekane yo a sa naganelego.

Ka gona o se ke wa dika-dika go boledišana le molekane wa gago. Ka mohlala, boemong bjo go boletšwego ka bjona pejana, Mokgadi o be a ka botša Malose gore: “Go bolela therešo, ke thatafalelwa ke go kopana le batho ba bantši kudu bao ke sa ba tsebego. Na o ka nthuša go tlwaelana le batho ka moka go ba go fihlela ke ikwa ke le gae ga mahlaku?”

 “Yo a Akgofago Mabapi le go kwa”

Bjale ela hloko taba ka leihlo le lengwe. A re re molekane wa gago o a go batamela, gomme o gateletšegile ka baka la gore ga o phethagatše tebelelo e kwagalago. Ge e ba se se direga, theetša molekane wa gago! O se ke wa leka go itšhireletša. Go e na le moo, “[e ba] yo a akgofago mabapi le go kwa, yo a diegago mabapi le go bolela, yo a diegago mabapi le go galefa.” (Jakobo 1:19; Diema 18:13) Moapostola Paulo o kgothaditše Bakriste ka gore: “Anke yo mongwe le yo mongwe a tšwele pele a tsoma, e sego seo se holago yena a nnoši, eupša seo se holago motho yo mongwe.”—1 Bakorinthe 10:24.

O ka dira se ka go ipea boemong bja molekane wa gago. Beibele e re: “Lena banna, tšwelang pele le dula le [basadi ba lena] ka mokgwa wo o swanago go ya ka tsebo,” goba, bjalo ka ge phetolelo ya J. B. Phillips e bolela, “lena banna le swanetše go leka go kwešiša basadi bao le dulago le bona.” (1 Petro 3:7) Ke therešo gore basadi bao ba nyetšwego ba swanetše go dira maiteko a swanago bakeng sa banna ba bona.

Gopola, go sa šetšwe gore wena le molekane wa gago le swanetšana gakaakang, ga le na pono e swanago dilong ka moka. (Bona lepokisi le le rego, “Ponagalo e Tee ya Naga, Dipono tše Fapanego.”) Ruri se se a hola, ka gobane go lebelela ditaba ka tsela yeo yo mongwe a di lebelelago ka yona ke mo gobotse. Wena le molekane wa gago le tsene lenyalong le e-na le ditebelelo tše sa swanego tše theilwego dilong tše bjalo ka lapa leo o tšwago go lona gotee le setšo. Ka baka la seo, le ka ratana ka mo go tseneletšego eupša la ba le ditebelelo tše di sa swanego.

Ka mohlala, balekane bao e lego Bakriste ba ka tseba molao wa motheo wa Beibele wa bohlogo gabotse. (Baefeso 5:22, 23) Eupša ke bjang bohlogo bo tla dirišwago ka go lebanya ka lapeng la gago, gomme go ikokobeletša bjona go ka bontšhwa bjang? Na bobedi bja lena le hlahlwa ke molao wo wa motheo wa Beibele, le gona na le dira maiteko a kgonthe a go o diriša?

Gape le ka no ba le e-na le dikgopolo tše fapanego mabapi le ditaba tše dingwe tša bophelo bja letšatši le letšatši. Ke mang yo a tlago go phetha mediro e itšego ya ka gae? Le tla fetša nako neng le ba leloko, le gona e kaaka’ng? Balekane ba Bakriste ba tla bontšha bjang gore ba etiša mediro ya Mmušo pele maphelong a bona? (Mateo 6:33) Ge go tliwa go tša ditšhelete, go itsenya dikolotong go bonolo, ka gona go seketša le go ela hloko go bohlokwa. Lega go le bjalo, ge e le gabotse go seketša le go ela hloko go bolela’ng? Ditaba tše swanago le tše di swanetše go bolelwa ka bolokologi le ka tlhompho, gomme go dira bjalo e tla ba mo go holago.

Dipoledišano tše bjalo di ka le thuša gore le be le khutšo lenyalong la lena, gaešita le ge gona bjale go e-na le ditebelelo tšeo di sego tša hlwa di phethagatšwa. Ee, le tla kgona go diriša gakaone keletšo ya moapostola Paulo e rego: “Tšwelang pele le kgotlelelana gomme le lebalelana ka bolokologi ge e ba motho a e-na le lebaka la go ba le pelaelo ka yo mongwe.”—Bakolose 3:13.

[Mengwalo ya ka tlase]

[Lepokisi/Seswantšho go letlakala 10]

PONAGALO E TEE YA NAGA, DIPONO TŠE FAPANEGO

“Akanya ka lešaba la babogi ba mafelo leo le lebeletšego ponagalo ya naga yeo e bogegago. Le ge sehlopha ka moka se lebeletše lefelo le tee, o mongwe le o mongwe o le bona ka tsela e fapanego. Ka baka la’ng? Ka gobane motho o mongwe le o mongwe o na le pono yeo e fapanego yeo a bonago dilo ka yona. Ga go na batho ba babedi bao ba emego tlwaa lefelong le tee. Go feta moo, ga se batho ka moka bao ba lebelelago karolo e swanago ya seo se bonwago. Motho o mongwe le o mongwe o hwetša lehlakore le le fapanego e le leo le kgahlišago ka mo go kgethegilego. Go bjalo le ka lenyalong. Lege e ka ba bao ba dumelelanago kudu, ga go na balekane ba babedi bao ba nago le pono e swanago tlwaa ka dilo. . . . Poledišano e ka akaretša go leka go nyalantšha diphapano tše tswalanong ya go ba nama e tee. Se se nyaka gore go bulwe sebaka sa go bolela.”—Morokami, August 1, 1993, letlakala 4.

[Lepokisi go letlakala 11]

SEO O KA SE DIRAGO GONA BJALE

• Hlahloba ditebelelo tša gago gape. Na di a kwagala? Na o lebeletše gore molekane wa gago a dire selo seo a ka se se kgonego?—Bafilipi 2:4; 4:5.

• Leka go fetoša tebelelo le ge e le efe e sa kwagalego. Ka mohlala, go e na le gore o re, “Re ka se tsoge re bile le diphapano,” ikemišetše go katanela go rarolla mathata ka khutšo.—Baefeso 4:32.

• Bolela ka ditebelelo tša gago. Go bolela ke mogato o bohlokwa wa go ithuta kamoo le ka bontšhanago lerato le tlhompho ka gona.—Baefeso 5:33.

[Seswantšho go letlakala 9]

E-ba “yo a akgofago mabapi le go kwa” seo molekane wa gago a tshwenyegilego ka sona