Kganyogo ya Adryana

ADRYANA, e lego ngwanenyana wa nywaga e tshela wa kua Tulsa, U.S.A, o be a e-na le selo seo a se kganyogago. Se be se swana le sa mopsalme Dafida, yo a opetšego ka gore: “Se ke se kxopêlaxo xo Morêna ké se tee; se ke se nyakaxo ké xore ke dulê Ngwakong wa Morêna mehla yohle kè sa phela, ke boxê mabothakxa a Morêna, ke fahloxêlê Ntlo-kxêthwa ya xaxwe.”—Psalme 27:4.

Ge Adryana a be a e-na le dikgwedi tše tshela feela, go ile gwa hwetšwa gore o na le bolwetši bja neuroblastoma, e lego serurugi seo se melago dikarolong tša tshepedišo ya megalatšhika. Bolwetši bjo bo beago bophelo kotsing bo ile bja mo golofatša maoto ka bobedi. Dingaka di ile tša leka go thuša ka go mmua gantši le go tšea ngwaga ka moka ba leka go mo alafa ka dikhemikhale.

Tatago Adryana, yo a sa dumelego seo Adryana le mmagwe ba se dumelago, o ile a ikgokaganya le mokgatlo o mongwe gore o thuše ngwana wa gagwe go etela phaka ya boithabišo yeo e tumilego lefaseng. Pele ga ge ba ka phethagatša kganyogo ya gagwe, ba mokgatlo woo ba ile ba boledišana le Adryana. O ile a ba leboga ge ba ile ba mo ela hloko eupša a ba botša gore a ka upša a etela Bethele, e lego lefelo la modiro wa lefase ka bophara wa Dihlatse tša Jehofa kua New York. Ka morago ga ge a kwele ka kgopelo ya tatagwe, Adryana o ile a rapela Jehofa gore a mo nee sebaka sa go etela Bethele. Gaešita le ge mathomong ba be ba tshwenywa ke gore Bethele e ka no ba lefelo leo le sa kgahlego bana ka mo go lekanego, ba mokgatlo woo ba ile ba phethagatša kgopelo ya gagwe ge tatagwe a be a sa ganetše kgetho yeo.

A felegeditšwe ke mmagwe, mogolo’agwe le mogwera’gwe, Adryana o ile a ya New York go yo etela Bethele ka lekga la pele. Adryana o boletše gore: “Jehofa o nkarabile. Ke be ke tseba gore o tla re amogela kua Bethele. Ke bone kamoo dipuku, dimakasine le Dibeibele di dirwago ka gona. Go kaone go feta phakeng ya boithabišo.”

Adryana o ‘bogile mabothakga a Jehofa’ gomme a lebelela ka tebogo lefelo leo go lona go dirwago mediro ya batho ba Jehofa lehono. Le wena o lokologile go ka etela Bethele. Go oketša ntlong-kgolo ya lefase ya Dihlatse tša Jehofa kua New York, go na le diofisi tša makala dikarolong tše dingwe tše di fapa-fapanego tša lefase.