Lefase la Lehono le Sehlogo

MARÍA o be a e-na le nywaga e 64, e bile a dula a nnoši. O ile a hwetšwa ka ga gagwe a hwile, a bethilwe a bile a kgamilwe ka lethala.

Sehlopha se se befetšwego se ile sa betha maphodisa a mararo, se a latofatša ka gore a thopile bafsa ba babedi. Sehlopha seo se ile sa tšhela maphodisa a mabedi ka peterole, sa a fiša ka mollo gomme a hwa. Lephodisa la boraro le ile la kgona go tšhaba.

Mogala wo o ilego wa arabja go sa tsebje gore o tšwa go mang, o ile wa dira gore go hwetšwe selo sa go makatša. Ditopo tša banna ba bane bao ba bego ba tlile go boga naga, di ile tša epollwa ka serapeng. Di be di bofilwe mahlo le diatla. Pego yeo e dirilwego ka morago ga ge ditopo di hlahlobilwe e bontšhitše gore banna bao ba be ba epetšwe ba sa phela.

Dipego tše tša sehlogo se se šiišago ga se diswantšho tšeo di bontšhwago difiliming tše sehlogo le tše tšhošago o šoro. Dipego tše ka moka ke ditiragalo tša kgonthe, tšeo nakong e sa tšwago go feta di ilego tša fetoga dihlogo tša ditaba nageng e nngwe ya Latin-Amerika. Lega go le bjalo, lefaseng la lehono, ditiro tše tša bošoro ga di direge nageng yeo feela.

Ditiro tša bošoro di direga ka mehla. Go thuthupišwa ga dipomo, ditlhaselo tša botšhošetši, dipolao, ditlhaselo, go thunywa le go katwa ke palo e nyenyane feela ya mekgwa ya bošoro. Mekero ya ditaba gantši e bontšha diswantšho tša sehlogo se šiišago, gomme batho ba bantši ga ba sa makatšwa ke go bona goba go kwa ka ditiro tše bjalo tša bošoro.

Ruri o ka ipotšiša gore: ‘Go direga’ng lefaseng lehono? Na go naganela batho ba bangwe le go hlompha bophelo go fedile?’ Ke ka baka la’ng re swanetše go phela lefaseng la go swana le le?

Ga bjale, ela hloko Harry, monna yo a nago le nywaga e 69, yo a swerwego ke bolwetši bja kankere. Mosadi wa gagwe o swerwe ke bolwetši bja multiple sclerosis, gomme baagišani le bagwera ba fela ba e-tla go ba thuša. Harry o re: “Ga ke tsebe gore re be re tla dira’ng ge nkabe re be re sa thušwe ke batho ba.” Kua Canada, moo a dulago gona, nyakišišo e bontšha gore batho ba e ka bago ba 50 lekgolong bao ba thušago batšofadi ba bangwe, ba thuša batho bao ba sego ba tswalana le bona. Ga go pelaelo gore o tseba batho ba tlwaelegilego bao ba bontšhago batho ba bangwe botho le boagišani letšatši le lengwe le le lengwe. Ee, batho ba na le bokgoni bja go bontšha ba bangwe lerato le botho go e na le gore e be ba šoro.

Ge e ba go le bjalo, ke ka baka la’ng go e-na le bošoro bjo bo šiišago gakaakaa? Ke eng seo se dirago gore batho ba be sehlogo? Na bao ba swarago ba bangwe ka tsela e sehlogo ba ka fetoga? Na bošoro bo tla ka bja fela? Ge e ba go le bjalo, bo tla fela bjang le gona neng?

[Seswantšho go letlakala 3]

Train: CORDON PRESS