O Golofetše—Eupša o Fišegela go Hlankela

GE O thoma go bona Leonardo, o ka no se nagane gore ke motho yo a šomago ka tša meago. Ga a kgone go diriša diatla tša gagwe ka gobane di ile tša ripega ka kotsi mošomong. Lega go le bjalo, go sa šetšwe bogole bja gagwe, Leonardo o be a šoma ka thata lefelong leo go bego go agwa go lona kua Acajutla, El Salvador, bjalo ka ge o ka bona mo seswantšhong.

Gore a kgone go tšea karolo modirong woo wa go aga, Leonardo o ile a itirela didirišwa tša gagwe ka noši. O tsenya letsogo la gagwe le letona ka gare ga mokgoko wa tshipi woo o kgomareditšwego garafong gomme ka bokgoni a tšhela ditšhila ka gare ga keribane. O kgomareditše mekgoko ya maseka diswarong tša keribane e le gore a kgone go e kgorometša ka boyena. Ke’ng seo se mo šušumeleditšego go tšea karolo mošomong wo?

Leonardo o be a nyaka go tšea karolo ge go agwa Holo ya Mmušo, goba lefelo la borapedi la phuthego ya gabo ya Dihlatse tša Jehofa. O be a e-na le mabaka a mantši a go ka lokafatša go se tšee karolo modirong wa go aga. O be a e-na le mošomo wa nako e tletšego, a golofetše e bile a šetše a hlankela bjalo ka mohlanka wa bodiredi ka phuthegong ya gabo. Lega go le bjalo, le yena o be a nyaka go dira seo a ka se kgonago go hlankela Modimo lefelong leo go bego go agwa go lona.

Na o na le moya o swanago wa go hlankela Modimo? Go e na le gore a diriše bogole bja gagwe go itokafatša, Leonardo o ile a diriša matla a gagwe a go nagana go hlama didirišwa tša gagwe bakeng sa gore a kgone go dira mošomo woo a bego a ka se kgone go o dira. O be a hlankela Modimo ‘ka monagano wa gagwe ka moka.’ (Mateo 22:37) Go sa šetšwe gore ba golofetše goba aowa, bašomi bao ba tšeago karolo modirong wa go aga Diholo tša Mmušo tša Dihlatse tša Jehofa lefaseng ka bophara ba na le moya wa boithapi. Diboka tša bona di bulegetše batho bohle, gomme o ka ikwa o lokologile go ba gona go tšona.