Tšhemo e “Šweufaletše go Bunwa”

Pheninsula ya Guajira e ikadile ka mollwaneng wa ka leboa wa Amerika Borwa. E ka leboa la Colombia le ka leboa-bodikela la Venezuela. Se se nyamišago ka seka-leganata se ke gore letšatši le fiša tšhiri-tšhiri e bile pula ga e ne ka tshwanelo, moo dithempheretšha di ka fihlago go 43°C. Go sa šetšwe boemo bja leratadima, batho ba mo ke balemi ba mafolofolo le ba atlegago. Meoya e bosana e lekanetšego e tšwago ka lewatleng gotee le diphefo tšeo di fokago di e-tšwa ka leboa-bohlabela di dira gore batho ba kgone go phela moo, le go dira gore baeti ba kgone go thabela ponagalo e botse ya naga ye le mabopo a yona a kgahlišago.

O A AMOGELWA nageng ya Maindia a Mawayuu. Go na le Mawayuu a ka bago a 305 000, ao a 135 000 a ona a dulago Colombia. Morafe wo o dutše mo nako e telele pele naga ye e e-ba koloni ya Sepania.

Mawayuu a iphediša kudu ka go godiša dihuswane le temo. Le gona a rea dihlapi gotee le go gwebišana le batho ba dinaga-mabapi. Basadi ba loga dilo tša mebala e tagilego ka bokgwari, gomme ditšweletšwa tša bona di ratwa kudu ke baeti ba basepedi.

Batho ba Mawayuu ba tsebega ka potego ya bona le mokgwa wa bona wa go amogela baeng. Lega go le bjalo, le bona ba phela ‘dinakong tše hlobaetšago tšeo go lego thata go lebeletšana le tšona.’ (2 Timotheo 3:1) Bodiidi ke bjo bongwe bja mathata a bona a magolo, bjoo bo bakago mathata a mangwe a bjalo ka go se tsene sekolo, phepompe ya bana, tlhaelelo ya tša kalafo gotee le borabele, mafelong a mangwe.

Ka nywaga e mentši, dikereke tša Bojakane di be di romela baromiwa gore ba yo dula le Mawayuu. Ka baka leo, dikolo tše dintši tša tlhahlo ya borutiši le dikolo tšeo di nago le bodula-barutwana di laolwa ke kereke. Mawayuu a mantši a amogetše metlwae yeo go thwego ke ya Bokriste, e bjalo ka go rapela diswantšho le go kolobetša masea, eupša ga se ba tlogela ditumelo le mediro yeo e thomilego metlwaeng ya setšo le ditumela-khweleng.

Ka kakaretšo, Mawayuu a boifa Modimo gomme a arabela gabotse ditherešong tša Beibele tšeo di rutwago ke Dihlatse tša Jehofa. Mathomong a bo-1980, kua Guajira go be go e-na Dihlatse tše šupa feela tša Mawayuu, tšeo tše tharo tša tšona di bego di dula Ríohacha, e lego motse-mošate. Go tlaleletša go Dihlatse tšeo tša moo, go be go e-na le bagoeledi ba bangwe ba 20 bao ba bego ba bolela ditaba tše dibotse moo ka Sepaniši.

Molaetša ka Segagabo Bona

Ntle le leleme la bona la Sewayuunaiki, bontši bja Mawayuu ao a dulago Ríohacha bo tseba Sepaniši ganyenyane. Mathomong, modiro wa go bolela ka molaetša wa Mmušo o be o sa atlege gakaalo. Badudi ba moo ba be ba bonagala ba phema go kopana le ma-arijuna, e lego leina leo ba bego ba le diriša go batho bao e sego Mawayuu. Ge Dihlatse di be di etela ka malapeng a bona, Mawayuu a mantši a be a arabela ka leleme labo ona, e sego ka Sepaniši. Dihlatse di be di fo fetela ntlong e latelago.

 Lega go le bjalo, bofelong bja 1994, ofisi ya lekala ya Dihlatse tša Jehofa e ile ya romela sehlopha sa babulamadibogo ba kgethegilego, goba barutiši ba nako e tletšego ba Beibele, go hlankela Phuthegong ya Ríohacha. Babulamadibogo ba ile ba kgopela Hlatse ya Mowayuu gore e ba rute Sewayuunaiki. Ka morago ga go swara dithero tše bonolo ka hlogo, badiredi bao ba ile ba ya tšhemong gomme kapejana ba ile ba lemoga phetogo e kgolo mokgweng woo batho ba bego ba arabela ka wona. Gaešita le ge e le gore barutiši bao ba Beibele ba be ba sa bolele Sewayuunaiki gabotse, beng ba dintlo ba be ba maketše ka tsela e kgahlišago gomme ba be ba ikemišeditše go theetša molaetša, ka dinako tše dingwe ba tšwetša poledišano pele ka Sepaniši sa bona seo se fokolago.

E “Šweufaletše go Bunwa”

Moapostola Paulo o ile a swantšha modiro wa Bakriste wa go dira barutiwa le modiro wa go lema tšhemo, e lego papišo yeo Mawayuu ao a ratago temo a e kwešišago gabotse. (1 Bakorinthe 3:5-9) Ka tsela ya seswantšhetšo, tšhemo ya Mawayuu e tloga e “šweufaletše go bunwa.”—Johane 4:35.

Neil, e lego Moindia wa Mowayuu yo a bego a dula Manaure, o belegwe a golofetše. Ka ge Neil a be a latofatša Modimo ka boemo bja gagwe, o be a gateletšegile kudu moo a ilego a nyaka go ipolaya. Hlatse yeo e bego e diriša sebaka sa go bolela ka ntlo le ntlo ge e be e etetše ditoropo tša go fapa-fapana ka baka la mošomo wa yona, e ile ya boledišana le Neil ka Mmušo wa Jehofa. Neil o be a e-na le nywaga e 14 feela. Ka go lemoga kgahlego ya Neil, Hlatse e ile ya thoma thuto ya Beibele le yena. Neil o be a thabetše go ithuta ka semelo sa Jehofa sa lerato, seo se ilego sa dira gore a bone gore ga se Modimo yo a bakilego tlaišego ya gagwe. O ile a kgongwa kudu ke go bala ka kholofetšo ya Modimo ya lefase la paradeise, moo go ka se kego gwa ba le bolwetši!—Jesaya 33:24; Mateo 6:9, 10.

Ka nako yeo, lapa labo Neil le be le lwantšhana le lapa le lengwe. Ba meloko ya bo Neil ba ile ba leka go itšhireletša ka go dira ditirelo tša metlwae ya setšo. Neil o hlalosa seo se ilego sa direga ka gore: “Mathomong ke be ke tšhaba go botša lapa lešo ka bodumedi bja-ka bjo bofsa, kudu-kudu batho ba bagolo bao ba tšeelwago godimo.” Batswadi ba Neil ba ile ba kgopišwa ke go kwa gore o be a ka se latele ditumelo tšeo e sego tša Mangwalo e bile a ka se dire metlwae yeo e sepedišanago le meoya. Ka gona Neil o ile a ya go dula Ríohacha gomme a thoma go kopanela le phuthego ya gona moo. Ka morago o ile a kolobetšwa. Ka 1993, o ile a kgethwa bjalo ka mohlanka wa bodiredi, gomme ka morago ga nywaga e meraro a ba mmulamadibogo wa ka mehla. Ke moka ka 1997 o ile a kgethwa bjalo ka mogolo ka phuthegong. Ka ngwaga wa 2000, o ile a oketša bodiredi bja gagwe, ka go ba mmulamadibogo yo a kgethegilego.

Le gona ela hloko boemo bja Teresa, Mowayuu yo a ilego a thoma go ithuta Beibele le Dihlatse. Daniel e lego monna yo a bego a dula le yena, o be a mo kwera le go mo tlaiša mmeleng gotee le go tlaiša bana ba bona ba bararo. Gaešita le ge mafelelong a ile a dumela go ithuta Beibele gotee le Teresa, gantši o be a sepela le bagwera ba gagwe ba e-ya go ipolaiša bjala, ka dinako tše dingwe ba fetša matšatši a mane goba a mahlano. Seo se be se dira gore lapa la gagwe le diile. Teresa o ile a tšwela pele a ithuta ka mafolofolo le go ba gona dibokeng tša Bokriste. Se se ile sa thuša Daniel go bona bohlokwa bja go  ithuta Beibele. Ka morago, yo mongwe wa bana ba bona o ile a wela ka gare ga ketlele ya meetse a go bela gomme a hwa ka baka la go fsa o šoro. Go sa šetšwe go kgotlelela ga gagwe manyami a go lahlegelwa ke morwa, Teresa o ile a swanelwa ke go lebeletšana le kgateletšo e tšwago go bagwera le baagišani ya gore a latele metlwae ya setšo ya go boloka, yeo e sa dumelelanego le Beibele.

Nakong yeo e thata, bobedi bja bona ba ile ba kgothatšwa le go homotšwa ke ditho tša phuthego ya kgaufsi. Ka morago ga poloko, ba ile ba tšwela pele ba homotšwa ke go etelwa ke ditho tša phuthego ya gona moo yeo e dirišago leleme la moo la Sewayuu. Ge a bona lerato la Bokriste leo le bego le bontšhwa ke ditho tša phuthego, Daniel o ile a tutueletšega go dira tšwelopele ya moya. O ile a kgaotša go nwa bjala gotee le go swara Teresa makgwakgwa. Daniel o ile a nyalana le Teresa, gomme a thoma go šoma ka thata gore a hlokomele lapa la gagwe. Ba ile ba dira tšwelopele moyeng gomme ba kolobetšwa ka 2003. Bobedi bja bona ba swara dithuto tše mmalwa tša Beibele. Ka baka la bohlatse bjo bobotse bjoo Teresa a bo neilego lapa labo, ga bjale meloko ya gagwe e kgona go theetša Dihlatse ge di e etetše. Setlogolo sa Daniel sa lesogana ke mogoeledi yo a sego a kolobetšwa, gomme batlogolo ba gagwe ba babedi ba banenyana ba ithuta Beibele e bile ba ba gona dibokeng tša phuthego. Mogadibo’a Teresa, yoo le yena a ilego a lahlegelwa ke ngwana kotsing, gotee le lapa la gagwe ba bontšhitše kgahlego ya go ithuta Beibele.

Dijo tša Moya ka Sewayuunaiki

Ka 1998, poroutšha ya Thabela Bophelo Lefaseng ka mo go sa Felego! * e ile ya lokollwa ka Sewayuunaiki. E ile ya ba sedirišwa se bohlokwa sa go lema tšhemo ya Mawayuu le go swara dithuto tša legae tša Beibele. Ka 2003 go ile gwa dirwa dithulaganyo tša gore bana babo rena ba mmalwa ba tlwaeletšwe go fetolela dikgatišo tša Dihlatse tša Jehofa polelong ya Sewayuunaiki. Ka baka la mošomo o mafolofolo o dirwago ke sehlopha sa bafetoledi ba kua Ríohacha, diporoutšha tše dingwe tše dintši di a hwetšagala gomme di thuša barutiwa bao ba bolelago Sewayuunaiki go gola moyeng.

Ga e sa le go tloga ka 2001, dipolelo tše dingwe tša kopano ya selete di be di fetolelwa go Sewayuunaiki. Barutwana ba Beibele ba tutuetšwa moyeng ke go kwa lenaneo ka segagabo bona. Ba letetše letšatši leo ka lona go tlago go ba le terama ka Sewayuunaiki.

Tšhemo Yeo e Atlegago

Uribia ke toropo yeo e lego dikhilomithara tše ka bago tše 100 ka leboa-bohlabela bja Ríohacha. Phuthego ya Uribia ya Sewayuu e na le bagoeledi ba Mmušo ba 16, bao ba bantši ba bona ba dirago boiteko bjo bo oketšegilego bja go boledišana le Maindia ao a dulago dinaga-magaeng. Yo mongwe wa bagolo ba phuthego yeo o bolela mabapi le leeto la go yo nea bohlatse moo ka gore: “Re ile ra etela motse woo o bopšago ke dintlo tše ka bago tše 12 tšeo di nago le mafasetere a manyenyane le marulelo a lego tlasana. Ka pele ga ntlo e nngwe le e nngwe go na le leobo leo le dirilwego ka yotojolo, e lego thito ya sekgopha. Moo, lapa le baeng ba a šireletšega ge letšatši le fiša tšhiri-tšhiri. Re ile ra thabišwa ke gore ba bantši ba be ba bontšha kgahlego e kgolo, ka gona ra dira ditokišetšo tša go boela le go thoma dithuto tša Beibele. Ge re boela, re ile ra lemoga gore ba bantši ba be ba sa kgone go bala le go ngwala. Ba ile ba re botša gore go be go e-na le sekolo seo se ilego sa tswalelwa ka ge se be se hloka thekgo ya tša ditšhelete. Mohlokomedi wa sona ka botho o ile a re dumelela go diriša e nngwe ya diphapoši go ruta batho go bala le go ngwala, gotee le go swarela dithuto tša Beibele moo. Mawayuu a tshelelago a ithutile go bala le go ngwala le gona a tšwela pele ka thuto ya ona ya Beibele. Re kgongwa kudu ke tebogo yeo ba e bontšhago, ka gona re rulaganya go swarela diboka merakeng yeo.”

Dihlatse tše mmalwa tšeo e sego Mawayuu di ithutile Sewayuunaiki, gomme thušo ya tšona e lebogwa kudu. Kua Pheninsuleng ya Guajira, diphuthego tše seswai le dihlopha tše pedi ga bjale di diriša leleme le.

Tšhegofatšo ya Jehofa maitekong a e a bonala. Ga go pelaelo gore go ka dirwa modiro o mogolo wa go bolela ditaba tše dibotse go Mawayuu. Go letetšwe dipoelo tše dibotse ge bao ba lemogago go nyaka ga bona dilo tša moya ba fetoga barutiwa ba Bakriste. Eka Jehofa a ka romela badiredi ba bantši go buna tšhemo ye, yeo e ‘šweufaletšego go bunwa.’—Mateo 9:37, 38.

[Mongwalo wa ka tlase]

[Mmapa go letlakala 16]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

VENEZUELA

COLOMBIA

LA GUAJIRA

Manaure

Ríohacha

Uribia

[Mothopo wa Seswantšho go letlakala 16]

Wayuu camp on both pages: Victor Englebert