Dumelela Lentšu la Modimo go Hlahla Dikgato Tša Gago

“’Ntšu la xaxo ké lebônê la dinaô tša-ka, ké seetša tseleng ya-ka.”—PSALME 119:105.

1, 2. Ke ka baka la’ng batho ba bantši ba paletšwe ke go hwetša khutšo ya kgonthe le lethabo?

NA O gopola nako yeo o kilego wa swanelwa ke go kgopela motho yo mongwe tlhahlo? Mohlomongwe o be o šetše o le kgaufsi le mo o yago gona eupša o se wa kgonthišega ka ditsela tše mmalwa tša mafelelo. Goba e ka no ba ka gobane o be o timetše ka mo go feletšego gomme o tsoma go sepela ka tsela e nngwe. Go bjo bongwe le bjo bongwe bja maemo a, na e be e ka se be gabohlale go latela tlhahlo ya motho yoo a tsebago lefelo leo? Motho yo bjalo o be a ka go thuša go fihla moo o yago gona.

² Ka nywaga e dikete, batho ka kakaretšo ba be ba dutše ba leka go hlahla maphelo a bona ntle le thušo ya Modimo. Lega go le bjalo, ka ge ba sa hlahlwe ke Modimo, batho ba sa phethagalago ba timetše ka mo go feletšego. Ba no ba ba sa kgone go hwetša tsela e išago khutšong ya kgonthe le lethabong. Ke ka baka la’ng ba be ba dutše ba palelwa ke go fihla moo ba yago gona? Moporofeta Jeremia o boletše nywageng e fetago 2 500 e fetilego gore: “Monna mo a yaxo xa’ ikiše, le xe a xata a tiiša.” (Jeremia 10:23) Yo mongwe le yo mongwe yo a lekago go hlahla dikgato tša gagwe ntle le thušo e šomago, ruri o tla gakanega. Ruri batho ba tsoma tlhahlo!

3. Ke ka baka la’ng Jehofa Modimo a swanelegela go nea batho tlhahlo go feta le ge e le mang, le gona o holofetša’ng?

³ Jehofa Modimo o swanelega go feta le ge e le mang go re fa tlhahlo e bjalo. Ka baka la’ng? Ka gobane o kwešiša lebopo la batho go feta motho le ge e le ofe. Le gona o lemoga ka mo go feletšego kamoo moloko wa batho o arogilego ka gona le go timela. E bile o tseba seo se nyakegago gore ba boele sekeng. Go oketša moo, bjalo ka Mmopi, Jehofa o dula a tseba seo se tlogago se re swanetše. (Jesaya 48:17) Ka gona, re ka bota ka mo go feletšego kholofetšo ya gagwe yeo e begilwego go Psalme 32:8 e rego: “Ke tlo Xo lemôša ka Xo ruta tsela ye O tl’o xo e swara, ka Xo eletša mahlô a-ka à Xo ukametše.” Ga go pelaelo gore: Jehofa o nea tlhahlo e kaone-kaone. Eupša ge e le gabotse o re hlahla bjang?

4, 5. Dipolelo tša Modimo di ka re hlahla bjang?

⁴ Mopsalme o rapetše Jehofa ka gore: “’Ntšu la xaxo ké lebônê la dinaô tša-ka, ké seetša tseleng ya-ka.” (Psalme 119:105) Dipolelo le dikgopotšo tša Modimo di hwetšwa ka Beibeleng, gomme di ka re thuša go fenya mapheko ao re ka kopanago le ona maphelong a rena. Ee, ge re bala Beibele le go e dumelela e re hlahla, re bona ka borena seo se hlaloswago go Jesaya 30:21 e rego: “Ditsêbê tša lena di tlo kwa ka nthaxo xa lena xe xo thwe: Tsela šé! Tšeang ka yôna!”

⁵ Lega go le bjalo, ela hloko gore Psalme 119:105 e bontšha dintlha tše pedi tše di tswalanago le Lentšu la Modimo. Ya pele, le bjalo ka lebone dinaong tša rena. Ge re lebeletšana le mathata a letšatši le letšatši, melao ya motheo ya ka Beibeleng e swanetše go hlahla dikgato tša rena gore re dire diphetho tše bohlale le go phema melaba ya lefase le. Ya bobedi, dikgopotšo tša Modimo ke seetša tseleng ya rena, di re thuša go dira dikgetho tšeo di sepedišanago le kholofelo ya rena ya go phela ka mo go sa felego Paradeiseng ye Modimo a e holofeditšego. Ge tsela ya rena ya bophelo e bonegilwe, re tla kgona go lemoga ditla-morago—tše di lokilego goba tše di sa lokago—tša tsela e itšego.  (Baroma 14:21; 1 Timotheo 6:9; Kutollo 22:12) Anke re boneng dintlha ka botlalo tša kamoo dipolelo tša Modimo tšeo di lego ka Beibeleng di ka bago lebone dinaong tša rena le seetša tseleng ya rena.

“Seetša Tseleng Ya-ka”

6. Dipolelo tša Modimo di ka ba lebone dinaong tša rena ka tlase ga maemo afe?

⁶ Re dira diphetho letšatši le lengwe le le lengwe. Diphetho tše dingwe di ka bonala e le tše dinyenyane, eupša ka dinako tše dingwe re ka lebeletšana le diteko tša boitshwaro bja rena, potego le boema-gare bja rena. Gore re lebeletšane le diteko tšeo ka katlego, re swanetše go ‘tlwaetša matla a rena a go hlatha, re kgethologanya se se nepagetšego le se se fošagetšego.’ (Baheberu 5:14) Ka go hwetša tsebo e nepagetšego ya Lentšu la Modimo le go ba le kwešišo ya melao ya yona ya motheo, re tlwaetša matswalo a rena gore re tle re kgone go dira diphetho tše di kgahlišago Jehofa.—Diema 3:21.

7. Hlalosa boemo bjoo go bjona Mokriste a ka lekegago go gwerana le bašomi-gotee bao ba sa dumelego.

⁷ Ela hloko mohlala wo. Na o motho yo a godilego, yoo a katanelago go thabiša pelo ya Jehofa? (Diema 27:11) Ge e ba go le bjalo, o swanetše go retwa. Eupša akanya go se nene ka bašomi-gotee le wena ba itšego bao ba go fago thekethe ya gore o ye le bona papading. Ba thabela go šoma le wena gomme ba ka rata go tlwaelana le wena medirong e mengwe. O ka no ba o nagana ka mo go tseneletšego gore batho ba ga se ba babe. E bile ba ka no ba ba e-na le dika tše dibotse. O be o tla dira’ng? Na go amogela taletšo yeo go be go ka ba le kotsi le ge e le efe? Lentšu la Modimo le ka go thuša bjang go dira phetho e nepagetšego tabeng ye?

8. Ke melao efe ya motheo yeo e re thušago go bea mabaka tabeng ya ditlwaelano?

⁸ Ela hloko melao e mmalwa ya motheo ya Mangwalo. Wa pele wo o ka tlago kgopolong o hwetšwa go 1 Bakorinthe 15:33, e rego: “Ditlwaelano tše mpe di senya mekgwa e holago.” Na go kwa molao wo wa motheo go ra gore o swanetše go efoga ka mo go feletšego batho bao ba sa dumelego? Karabo ya Mangwalo ya potšišo yeo ke aowa. Go ba gona, moapostola Paulo ka boyena o bontšhitše go tshwenyega ka lerato ka “batho ba mehuta ka moka,” go akaretša le ba sa dumelego. (1 Bakorinthe 9:22) Bokriste ka bobjona bo nyaka gore re kgahlegele batho ba bangwe—go akaretša le ba ditumelo tše di sa swanego le tša rena. (Baroma 10:13-15) Ee, re ka latela bjang keletšo ya gore re “direleng bohle botse” ge e ba re ikarola bathong bao ba ka nyakago thušo ya rena?—Bagalatia 6:10.

9. Ke keletšo efe ya Beibele yeo e re thušago go ba bao ba leka-lekanego ditswalanong tšeo re bago le tšona le bašomi-gotee?

⁹ Lega go le bjalo, go na le phapano e kgolo magareng ga go bontšha mošomi-gotee bogwera le go ba mogwera wa kgaufsi wa motho yoo. Mo ke moo molao o mongwe wa motheo wa Mangwalo o tsenago gona. Moapostola Paulo o lemošitše Bakriste ka gore: “Le se ke la rwala joko le ba ba sa dumelego.” (2 Bakorinthe 6:14) Ke’ng seo se bolelwago ke polelwana  e rego “le se ke la rwala joko”? Diphetolelo tše dingwe tša Beibele di fetoletše mantšu ao e le “le se ke la ba sehlopha setee,” “le se ke la leka go šoma gotee bjalo ka badirišani,” goba “kgaotšang go ba le ditswalano tše di sa swanelago.” Ke neng moo go sa swanelago go ba le tswalano le mošomi-gotee yo a sa dumelego? Ke neng moo e tshelelago ka kua gomme ya ba go rwala joko? Lentšu la Modimo e lego Beibele, le ka hlahla dikgato tša gago boemong bjo.

10. (a) Jesu o ile a kgetha bagwera bjang? (b) Ke dipotšišo dife tšeo di ka thušago motho go dira diphetho tše bohlale ge a kgetha bagwera?

¹⁰ Ela hloko mohlala wa Jesu, yoo a ratilego batho go tloga nakong ya tlholo. (Diema 8:31) Ge a be a le lefaseng, o ile a bopa kgokagano ya kgaufsi le balatedi ba gagwe. (Johane 13:1) O ile a ba a ‘kwa a rata’ monna yo a bego a timeditšwe ka tsela ya bodumedi. (Mareka 10:17-22) Eupša Jesu gape o ile a ipeela mellwane e lego molaleng mabapi le go kgetha ga gagwe bagwera ba kgaufsi. O be a sa bope dikgokagano tša kgaufsi le batho bao ba bego ba se na kgahlego ya go dira thato ya Tatagwe. Lebakeng le lengwe, Jesu o boletše gore: “Lena le bagwera ba-ka ge e ba le dira seo ke le laelago sona.” (Johane 15:14) Ke therešo gore o ka no ba o kwešišana le motho yo a itšego yo o šomago le yena. Eupša ipotšiše gore: ‘Na motho yo o ikemišeditše go dira seo Jesu a se laelago? Na o nyaka go ithuta ka Jehofa, yoo Jesu a re laetšego gore re mo rapele? Na ditekanyetšo tša gagwe tša boitshwaro di swana le tša-ka bjalo ka Mokriste?’ (Mateo 4:10) Ge o bolela le bašomi-gotee le wena gomme o gapeletša go diriša ditekanyetšo tša Beibele, dikarabo tša dipotšišo tše di tla ba molaleng.

11. Nea mehlala ya maemo ao go ona dipolelo tša Modimo di swanetšego go hlahla dikgato tša rena.

¹¹ Go na le maemo a mangwe a mantši ao go ona dipolelo tša Modimo di ka bago bjalo ka lebone dinaong tša rena. Ka mohlala, Mokriste yo a sa šomego a ka fiwa mošomo ka tšhoganetšo. Lega go le bjalo, mošomo o nyaka mo gontši, gomme ge a ka o amogela, a ka se be gona dibokeng tša Bokriste ka makga a mmalwa e bile a ka se kgone go tšea karolo medirong e mengwe ya borapedi bja therešo. (Psalme 37:25) Mokriste yo mongwe a ka lekega ka mo go tseneletšego go ithabiša ka go bogela dilo tšeo di lwantšhanago le melao ya motheo ya Beibele ka go lebanya. (Baefeso 4:17-19) Go sa dutše  go le bjalo, yo mongwe a ka kgopišwa gabonolo ke go se phethagale ga badumedi-gotee. (Bakolose 3:13) Maemong a bjalo ka moka, re swanetše go dumelela Lentšu la Modimo le e-ba lebone dinaong tša rena. Ka kgonthe, re ka lebeletšana le tlhohlo le ge e le efe bophelong ka go diriša melao ya motheo ya Beibele. Lentšu la Modimo le “hola ka go ruta, go sola, go lokiša dilo [le] go laya ka toko.”—2 Timotheo 3:16.

“Seetša Tseleng Ya-ka”

12. Ke bjang dipolelo tša Modimo e lego seetša tseleng ya rena?

¹² Gape Psalme 119:105 e re dipolelo tša Modimo di ka bonega tsela ya rena, tša bonega tsela e lego pele ga rena. Ga se ra tlogelwa re sa tsebe selo mabapi le bokamoso, ka gobane Beibele e hlalosa seo se bolelwago ke maemo a gateletšago a lefase le seo se letšego ka pele. Ee, re lemoga gore re phela “mehleng ya bofelo” ya tshepedišo ye e kgopo ya dilo. (2 Timotheo 3:1-5) Go tseba seo se letšego ka pele go swanetše go ba le tutuetšo e kgolo tseleng yeo re phelago ka yona gona bjale. Moapostola Petro o ngwadile gore: “Ka ge dilo tše ka moka di tla tologa ka tsela yeo, gona le swanetše go ba batho ba mohuta ofe ditirong tše kgethwa tša boitshwaro le medirong ya boineelo go Modimo, le letile e bile le dula le nagana ka go ba gona ga letšatši la Jehofa!”—2 Petro 3:11, 12.

13. Go akgofa ga mehla ya rena go swanetše go kgoma bjang tsela ya rena ya go nagana le maphelo a rena?

¹³ Tsela yeo re naganago ka yona le go phela ka yona di swanetše go bontšha kgodišego ya rena e tiilego ya gore “lefase le a feta gomme go bjalo le ka kganyogo ya lona.” (1 Johane 2:17) Go diriša tlhahlo ya Beibele go tla re thuša go dira diphetho tše bohlale tša mabapi le dipakane tša rena tša nakong e tlago. Ka mohlala, Jesu o boletše gore: “Ka gona, tšwelang pele le tsoma mmušo pele le toko ya gagwe, gomme dilo tše tše dingwe ka moka le tla di okeletšwa.” (Mateo 6:33) Ruri bafsa ba bantši bao ba bontšhago tumelo mantšung a Jesu ka go tsenela tirelo ya nako e tletšego ba swanetše go retwa! Ba bangwe—go akaretša malapa ka moka—ba ikgafetše go hudugela mafelong ao go nyakegago bagoeledi ba bantši ba Mmušo.

14. Lapa le lengwe la Bakriste le ile la katološa bjang bodiredi bja lona?

¹⁴ Ela hloko lapa le lengwe la Bakriste la ditho tše nne leo le ilego la tloga United States la hudugela Repabliking ya Dominican go yo hlankela phuthegong yeo e lego motseng o nago le badudi ba 50 000. Phuthego yeo e na le bagoeledi ba ka bago ba 130 ba Mmušo.  Lega go le bjalo, ka April 12, 2006, bao ba bilego gona Segopotšong sa lehu la Kriste e be e le ba ka bago ba 1 300! Tšhemo ya lefelong leo e tloga e “šweufaletše go bunwa” moo e lego gore ka dikgwedi tše tlhano feela, tate yo, mma, morwa le morwedi ba be ba e-na le palo-moka ya dithuto tše 30 tša Beibele. (Johane 4:35) Tate yoo o re: “Go hudugetše bana bešo le dikgaetšedi ba 30 phuthegong ye gore ba tlo thuša. Ba e ka bago ba 20 ba tšwa United States, mola ba bangwe ka moka ba e-tšwa Bahamas, Canada, Italy, New Zealand le Sepania. Ba fihla ba e-na le mafolofolo a bodiredi gomme ba ile ba kgoma bana babo rena ba moo ka mo go tseneletšego.”

15. O šegofaditšwe ka ditsela dife ka baka la go etiša mediro ya Mmušo pele bophelong bja gago?

¹⁵ Ka mo go kwešišegago, ba bantši ga ba kgone go hudugela lefelong le lengwe go yo hlankela moo go nago le tlhokagalo e kgolo. Eupša bao ba kgonago—goba bao ba ka fetošago maemo a bona gore ba ikgafe—ka ntle le pelaelo ba tla šegofatšwa ka ditsela tše dintši ka go tšea karolo sebopegong se sa bodiredi. Le gona go sa šetšwe moo o hlankelago gona, o se ke wa hlaelwa ke lethabo leo o ka le tlišetšwago ke ge o hlankela Jehofa ka matla a gago ka moka. Ge e ba o etiša mediro ya Mmušo pele bophelong bja gago, Jehofa o holofetša gore o tla ‘bula nthoba tša legodimo a go tšhollela ditšhegofatšo wa go tlo go golela.’—Maleaki 3:10.

Go Holwa ke Tlhahlo ya Jehofa

16. Re tla holwa bjang ke go dumelela dipolelo tša Modimo di re hlahla?

¹⁶ Bjalo ka ge re bone, dipolelo tša Jehofa di re hlahla ka ditsela tše pedi tše di tswalanago. Di bjalo ka lebone dinaong tša rena gomme di re thuša go gatela pele tseleng e nepagetšego le go re hlahla ge re swanetše go dira diphetho. Le gona di bonega tsela ya rena gomme di re kgontšha go bona gabotse seo se letšego ka pele. Ke moka, seo se re thuša go latela temošo ya Petro e rego: “Hlamelang menagano ya lena modiro, dulang le hlaphogetšwe monaganong ka mo go feletšego; holofelang botho bjo bo sa swanelago bjo bo tla tlišwago go lena kutollong ya Jesu Kriste.”—1 Petro 1:13.

17. Thuto ya Beibele e tla re thuša bjang go amogela tlhahlo ya Modimo?

¹⁷ Ga go pelaelo gore Jehofa o nea tlhahlo. Potšišo ke gore, Na o tla e amogela? Gore o kwešiše tlhahlo yeo Jehofa a e neago, ikemišetše go bala karolo ya Beibele letšatši le lengwe le le lengwe. Naganišiša ka seo o se balago, leka go lemoga thato ya Jehofa ka ditaba, gomme o nagane ditsela tšeo ka tšona taba yeo e ka šomago bophelong bja gago. (1 Timotheo 4:15) Ke moka diriša ‘matla a gago a tlhaologanyo’ ge o dira diphetho.—Baroma 12:1.

18. Ge re dumelela Lentšu la Modimo go re hlahla, re hwetša ditšhegofatšo dife?

¹⁸ Ge e ba re e dumelela, melao ya motheo yeo e hwetšwago ka Lentšung la Modimo e tla re bonegela le go re nea tlhahlo e nyakegago ge re dira diphetho tša mabapi le tsela e swanetšego go latelwa. Re ka kgodišega gore dipolelo tša Jehofa tšeo di begilwego di “hlalefiša a se naxo maanô.” (Psalme 19:7) Ge re dumelela Beibele gore e re hlahle, re tla ba le letswalo le le hlwekilego le kgotsofalo tšeo di tlišwago ke go thabiša Jehofa. (1 Timotheo 1:18, 19) Ge e ba re dumelela dipolelo tša Modimo go hlahla dikgato tša rena letšatši le letšatši, Jehofa o tla re fa moputso o kgahlišago kudu wa bophelo bjo bo sa felego.—Johane 17:3.

Na o a Gopola?

• Ke ka baka la’ng go le bohlokwa go dumelela Jehofa Modimo a hlahla dikgato tša rena?

• Ke ka tsela efe dipolelo tša Modimo di ka bago lebone dinaong tša rena?

• Ke bjang dipolelo tša Modimo di ka bago seetša tseleng ya rena?

• Thuto ya Beibele e tla re thuša bjang go amogela tlhahlo ya Modimo?

[Dipotšišo tša Thuto]

[Seswantšho go letlakala 15]

Ke neng moo go gwerana le motho yo a sa dumelego go sego bohlale?

[Seswantšho go letlakala 16]

Bagwera ba Jesu ba kgaufsi e be e le bao ba dirago thato ya Jehofa

[Seswantšho go letlakala 17]

Na tsela yeo re phelago ka yona e bontšha gore re etiša mediro ya Mmušo pele?