Phihlelo

Go Tsoma Ga Rena Lehumo Go Dirile Gore Re Hwetše Mahumo a Swarelelago

KA GE GO ANEGA DOROTHEA SMITH LE DORA WARD

Re be re tsoma lehumo la mohuta mang? Re be re le banenyana ba babedi bao ba bego ba e-na le kganyogo e tseneletšego ya go tšea karolo phethagatšong ya taelo ya Jesu e rego: ‘E-yang gomme le dire batho ba ditšhaba ka moka barutiwa.’ (Mateo 28:19) Anke re hlaloseng kamoo go tsoma mo go ilego gwa dira gore re hwetše mahumo a swarelelago.

DOROTHEA: Ka 1915, nakwana ka morago ga go thoma ga Ntwa ya I ya Lefase, ke ile ka belegwa ke le ngwana wa boraro lapeng lešo. Re be re dula kgaufsi le Howell, Michigan, kua United States. Tate e be e se motho wa bodumedi, eupša mma e be e le mosadi yo a boifago Modimo. O lekile go re ruta go latela Melao e Lesome, eupša o be a tshwenywa ke gore nna, kgaetšedi’a-ka e lego Willis; le ngwanešo e lego Viola; re be re sa tsene kereke.

Ge ke be ke e-na le nywaga e 12, mma o ile a phetha ka gore ke swanetše go kolobetšwa ke be setho sa Kereke ya Presbyterian. Ke sa gopola gabotse letšatši leo ke kolobeditšwego ka lona. Masea a mabedi, ao a bego a swerwe ke mmago ona, a ile a kolobetšwa ka nako e tee le nna. Ke ile ka ikwa ke nyaditšwe kudu gore ke kolobeditšwe le masea. Moruti o ile a nkgaša ka meetse a manyenyane mo hlogong gomme a bolela mantšu a mangwe ao ke sa kago ka a kwešiša. Ruri masea ao a mabedi a be a sa tsebe selo ka kolobetšo go fo swana le nna!

Ka letšatši le lengwe ka 1932, koloi e ile ya tla ya ema tseleng yeo e tsenago gagešo, gomme mma o ile a ya go bula mojako. E be e le masogana a mabedi ao a bego a nea batho dipuku tša bodumedi. Le lengwe la ona le ile la re ke lona Albert Schroeder. Le ile la bontšha mma dipuku tšeo di  gatišitšwego ke Dihlatse tša Jehofa. O ile a amogela dipuku tšeo. Dikgatišo tšeo di ile tša mo thuša go amogela therešo e tšwago Lentšung la Modimo.

Go Tsoma Lehumo go a Thoma

Mafelelong, ke ile ka ya go dula le mogolo’a-ka kua Detroit. Moo ke ile ka kopana le mosadi yo a bego a etetše mogolo’a-ka go tlo mo ruta Beibele. Ditaba tše bjalo di ile tša nkgopotša lenaneo la beke le beke la radio leo ke bego ke le theetša le mma, ge ke be ke le gae. Lenaneo leo le be le akaretša le polelo ya metsotso e 15 ya sehlogo sa Beibele yeo e bego e neelwa ke J. F. Rutherford, yo a bego a etelela Dihlatse tša Jehofa pele ka nako yeo. Ka 1937, re ile ra thoma go kopanela le phuthego ya pele ya kua Detroit ya Dihlatse tša Jehofa. Ke ile ka kolobetšwa ngwageng o latetšego.

Mathomong a bo-1940, go ile gwa tsebišwa gore Dihlatse tša Jehofa di be di thoma sekolo se se bitšwago Gilead ka Borwa bja Lansing, New York, bakeng sa go tlwaetša baromiwa. Ge ke be ke e-kwa gore tše dingwe tša dialoga tša sekolo seo di tla laletšwa gore di ye go hlankela dinageng dišele, ke ile ka ipotša gore, ‘Ruri nka rata go ya lefelong leo!’ Ke ile ka ipeela pakane ya go ya Gilead. E be e tla ba tokelo e kgolo gakaakang go ya dinageng tše dingwe go yo tsoma “mahumo”—ke gore, batho bao ba kganyogago go ba barutiwa ba Kriste Jesu!—Hagai 2:6, 7.

Go Fihlelela Pakane Ya-ka Ganyenyane-ganyenyane

Ka April 1942, ke ile ka rola modiro gomme ka thoma go hlankela ke le mmulamadibogo, goba moebangedi wa nako e tletšego, kua Findlay, Ohio, gotee le sehlopha sa dikgaetšedi tše tlhano tša moya. Go be go se na phuthego yeo e nago le lenaneo la go swara diboka ka mehla, eupša re ile ra kgothatšana ka go bala dihlogo go tšwa dikgatišong tša rena tša Bokriste re le sehlopha. Kgweding ya-ka ya pele ke le mmulamadibogo, ke ile ka sepedišetša batho ba thabelago dipuku tše 95! Mo e ka bago ngwaga le seripa ka morago ga moo, ke ile ka hwetša kabelo ya go hlankela ke le mmulamadibogo yo a kgethegilego kua Chambersburg, Pennsylvania. Gona moo, ke ile ka tlatša sehlopha sa babulamadibogo ba bangwe ba bahlano, go akaretša Dora Ward, e lego kgaetšedi wa Mokriste yo a tšwago Iowa. Nna le Dora re ile ra ba babulamadibogo bao ba šomago gotee. Re kolobeditšwe ngwageng o tee, gomme re be re e-na le kganyogo e swanago ya go ya Sekolong sa Gilead le go hlankela re le baromiwa dinageng dišele.

Mathomong a 1944, letšatši le legolo le ile la fihla! Bobedi bja rena re ile ra amogela taletšo ya go ba klaseng ya bone ya Gilead. Re ile ra ingwadiša ka August ngwageng wona woo. Eupša pele ke e-ya kgole ka taba ye, anke Dora a le hlalosetše kamoo a bilego modirišani wa-ka wa nako e telele ge re tsoma lehumo.

 Go Fagahlela go Thoma Modiro wa go Nea Bohlatse ka Botlalo

DORA: Mma o be a rapelela go hwetša kwešišo ya Lentšu la Modimo. Ka Sontaga se sengwe, nna le yena re ile ra kwa polelo yeo e bego e neelwa ke J. F. Rutherford radiong. Mafelelong a polelo yeo, mma o ile a goeletša ka gore, “Ye ke therešo!” Nakwana ka morago ga moo, ke ge re ithuta dikgatišo tša Dihlatse tša Jehofa. Ka 1935, ge ke be ke e-na le nywaga e 12, ke ile ka ba gona polelong ya kolobetšo yeo e bego e neelwa ke yo mongwe wa Dihlatse tša Jehofa, gomme ka ikwa ke e-na le kganyogo e tšwago pelong ya go neela bophelo bja-ka go Jehofa. Nywageng e meraro ka morago, ke ile ka kolobetšwa. Go ineela ga-ka le go kolobetšwa go ile gwa nthuša go dula ke tiile go bolokeng dipakane tša-ka di phela nakong ya nywaga ye e bego e šetše yeo ke e feditšego ke le sekolong. Ke be ke fagahletše go fetša sekolo e le gore nka thoma go hlankela ke le mmulamadibogo.

Ka nako yeo, sehlopha sa Dihlatse seo re bego re kopanela le sona se be se kopana e le phuthego kua Fort Dodge, Iowa. Go be go nyakega boiteko bjo bogolo gore motho a be gona dibokeng tša Bokriste. Morago ka nako yeo, dihlogo tša thuto ya Morokami di be di se na dipotšišo bakeng sa go ahla-ahlwa ke phuthego. Re be re kgopelwa go nea ngwanabo rena yo a bego a swara thuto ya Morokami dipotšišo tšeo re di lokišeditšego. Mašegong a Mošupologo, nna le mma re be re lokišetša dipotšišo tša serapa se sengwe le se sengwe, gomme re be re di nea moswari wa thuto e le gore a ka kgetha gore ke dife tšeo di ka dirišwago.

Nako le nako, phuthego ya rena e be e etelwa ke molebeledi wa mosepedi. Yo mongwe wa bana bao babo rena, John Booth, o ile a nthuša go thoma bodiredi bja ntlo le ntlo ge ke be ke e-na le nywaga e 12. Ge ke be ke e-na le nywaga e 17, ke ile ka mmotšiša gore nka tlatša bjang kgopelo ya go ba mmulamadibogo, gomme o ile a nthuša. Ke be ke sa tsebe gore re tla kopana gape ka morago bophelong le gore o be a tla ba mogwera wa-ka wa bophelo ka moka!

Ke le mmulamadibogo, gantši ke be ke šoma le Kgaetšedi Dorothy Aronson, moebangedi wa nako e tletšego yo a bego a mpheta ka nywaga e 15. Re bile badirišani-gotee ba babulamadibogo go fihlela a laletšwa go ya klaseng ya mathomo ya Gilead ka 1943. Ka morago ga moo, ke ile ka tšwela pele ke hlankela ke le mmulamadibogo ke nnoši.

Re ka se Thibelwe ke Kganetšo

Nywaga ya bo-1940 e be e le e thata go rena ka baka la moya wo o bego o tutueditšwe ke Ntwa ya II ya Lefase wa borata-naga. Ge re be re dira boboledi ka ntlo le ntlo, gantši re be re fošwa ka mae a go bola, ka ditamati tša go butšwa, gomme ka dinako tše dingwe le ka mafsika! Teko e kgolo kudu e tlile ge re be re sepediša dimakasine tša Morokami le Consolation (yeo ga bjale e lego Phafoga!) re le sekhutlong sa setarata. Maphodisa, ao a bego a hlohleleditšwe ke baganetši ba bodumedi, a ile a re batamela gomme a re tšhošetša ka gore a tla re golega ge re ka bonwa gape re dira boboledi phatlalatša.

 Ke therešo gore re ile ra gana go kgaotša go nea bohlatse, gomme re ile ra išwa maphodiseng bakeng sa go yo botšološišwa. Ka morago ga go lokollwa, re ile ra boela gona kua sekhutlong sa setarata gomme ra sepediša dimakasine tšona tšeo re bego re di sepediša. Ka ge re be re eleditšwe ke bana babo rena bao ba ikarabelago, re ile ra diriša Jesaya 61:1, 2 bakeng sa go ipolelela. Ka nako e nngwe ge ke be ke batamelwa ke lephodisa le lengwe la lesogana, ke tšhogile ke ile ka le balela mangwalo. Seo se makatšago ke gore le ile la retologa ka yona nako yeo gomme la sepela! Ke be ke bona gore barongwa ba a re šireletša.

Letšatši Leo le sa Lebalegego

Ka 1941, ke ile ka thabela go ba gona kopanong ya Dihlatse tša Jehofa yeo e tšerego matšatši a seswai kua St. Louis, Missouri. Kopanong yona yeo, Ngwanabo rena Rutherford o ile a kgopela bana ka moka ba nywaga ya magareng ga e 5 le e 18 gore ba bokane karolong e kgolo ya lebala. Go ile gwa bokana bana ba dikete. Ngwanabo rena Rutherford o ile a re dumediša ka go re emišetša letsogo ka sakatuku sa gagwe. Le rena re ile ra mo dumediša ka go emiša matsogo. Ka morago ga go bea polelo yeo e tšeago iri e tee, o itše: “Bana bao ba dumetšego go dira thato ya Modimo gomme ba eme ka go tia ka lehlakoreng la mmušo wa pušo ya Modimo ka Kriste Jesu gomme ka go rialo ba dumetšego go kwa Modimo le Kgoši ya gagwe, hle emang ka maoto.” Bana ba 15 000 ba ile ba ema sammaletee—ke be ke le yo mongwe wa bona! Seboledi se ile sa oketša ka gore: “Lena ka moka bao le tla dirago seo le ka se kgonago go botša ba bangwe ka Mmušo wa Modimo le ditšhegofatšo tšeo di sepedišanago le wona, hle e reng Ee.” Re ile ra dira bjalo, gomme gwa latela legowa la go opša ga magofsi.

Ke moka go ile gwa lokollwa puku ya Children *, gomme mothaladi o motelele wa bafsa o be o lokologane o lebile sethaleng, moo Ngwanabo rena Rutherford a neilego yo mongwe le yo mongwe wa rena kopi ya puku ye e mpsha. E be e kgahliša! Lehono, palo e ntši ya bao ba hweditšego puku yeo tiragalong yeo ba sa dutše ba hlankela Jehofa ka mafolofolo lefaseng ka bophara, ba bolela ka Mmušo wa Modimo le go loka ga gagwe.—Psalme 148:12, 13.

Ka morago ga go bula madibogo ke nnoši ka nywaga e meraro, ke ile ka thaba kudu gakaakang go hwetša kabelo ya go ba mmulamadibogo yo a kgethegilego kua Chambersburg! Gona moo ke ile ka kopana le Dorothea, gomme go se go ye kae ke ge re e-ba bagwera ba go ntšhana sa inong. Re be re e-na le mafolofolo a bofsa gomme re fišega kudu. Re be re fagahletše go katološa go tšea ga rena karolo modirong wa boboledi. Bobedi bja rena re ile ra thoma modiro wa go tsoma lehumo wo e bilego wa bophelo ka moka.—Psalme 110:3.

Dikgwedi tše mmalwa ka morago ga ge re thomile go hlankela re le babulamadibogo ba kgethegilego, re ile ra kopana le sealoga sa klase ya mathomo ya Gilead, e lego Albert Mann. O be a le kgaufsi le go ya kabelong ya gagwe nageng e šele. O ile a re kgothaletša go amogela kabelo yeo re bego re ka e hwetša ya go ya nageng le ge e le efe e šele.

Go Tsena Sekolo Gotee

DORA LE DOROTHEA: Nagana kamoo re ilego ra thaba ka gona ge re be re thoma go tlwaeletšwa modiro wa boromiwa. Letšatšing la mathomo sekolong, Albert Schroeder, e lego ngwanabo rena yo a ilego a sepedišetša mmago Dorothea puku ya Studies in the Scriptures nywageng e 12 e fetilego, e be e le yena a re ngwadišago. John Booth le yena o be a le moo. Ga bjale e be e le mohlanka wa tšhemo Tšhemong ya Mmušo, moo sekolo se bego se le gona. Ka morago, banna ba ka bobedi ba hlanketše e le ditho tša Sehlopha se Bušago sa Dihlatse tša Jehofa.

Sekolong sa Gilead, re ithutile ditherešo tše di tseneletšego tša Beibele. E be e le tlwaetšo e botse kudu. Go be go e-na le barutwana ba 104 ka klaseng ya rena, go akaretša le morutwana wa pele yo a tšwago nageng e šele ya Mexico. O be a leka go kaonefatša tsebo ya gagwe ya Seisemane mola rena re be re leka go ithuta Sepaniši. Ruri re be re thabile kudu letšatšing leo Ngwanabo rena Nathan H. Knorr a ilego a nea rena barutwana dikabelo tša go ya dinageng dišele! Ba bantši ba be ba abetšwe go ya Amerika Bogare le Amerika Leboa; kabelo ya rena e be e le ya go ya Chile.

 Go Tsoma Lehumo kua Chile

Go be go nyakega visa gore re kgone go tsena kua Chile, e lego seo se ilego sa re tšea nako e telele. Ka baka leo, ka morago ga go aloga ka January 1945, re ile ra fetša ngwaga le seripa re hlankela re le babulamadibogo kua Washington, D.C. Ge re be re hwetša di-visa tša rena, re bile karolo ya sehlopha sa baromiwa ba senyane seo se bego se tšea leeto la go ya Chile. Ba šupago e be e le ba alogilego diklaseng tša Gilead tša pele ga ya rena.

Bana babo rena ba mmalwa ba Bakriste ba ile ba re gahlanetša kua Santiago, e lego motse-mošate. Yo mongwe wa bona e be e le Albert Mann, e lego sealoga sa Gilead, yoo nywaga e mmalwa pejana a ilego a re kgothatša. O be a tlile Chile ngwaga pele ga rena, gotee le Joseph Ferrari yo a bego a le klaseng ya bobedi ya Gilead. Kua Chile ka moka go be go e-na le bagoeledi ba ka tlase ga 100 ge re be re fihla. Re be re fagahletše go tsoma le go hwetša mahumo a oketšegilego—batho ba dipelo tše di botegago—kabelong ya rena e mpsha.

Re ile ra abelwa go hlankela re le legaeng la baromiwa kua Santiago. Go dula le lapa le legolo la baromiwa e be e le phihlelo e mpsha go rena. Go oketša go šomeng diiri tšeo di bego di nyakega modirong wa boboledi, beke e nngwe le e nngwe go be go e-na le baromiwa bao ba bego ba abelwa go apeela lapa ka moka la baromiwa. Re bile le dinako tše dingwe tše di lešago dihlong. Ka nako e nngwe, re kile ra paka makwinya bakeng sa difihlolo gore lapa le le swerwego ke tlala le je, eupša ge re be re ntšha makwinya ao ka ontong, re ile ra kwa monkgo o sa kgahlišego le gatee. Re be re dirišitše baking soda go e na le go diriša baking powder! Motho yo mongwe o be a tšhetše baking soda ka bolekaneng bjo bo bego bo se na selo bja baking powder.

Lega go le bjalo, se se bego se leša dihlong le go feta e be e le diphošo tšeo re bego re di dira ge re be re ithuta Sepaniši. Lapa le legolo leo re bego re ithuta Beibele le lona le ile la nyaka go kgaotša go ithuta ka baka la ge le be le sa kwešiše seo re bego re se bolela. Eupša ka go lebelela mangwalo Dibeibeleng tša lona, lapa leo le ile la kgona go ithuta therešo, gomme ba bahlano ba lona e bile Dihlatse. Nywageng yeo, go be go se na lenaneo la go ithuta leleme bakeng sa baromiwa ba bafsa. Re be re leba thwii modirong wa boboledi gomme ra leka go ithuta leleme go batho bao re bego re nea bohlatse go bona.

Re ile ra swara dithuto tše dintši tša Beibele, gomme ba bangwe ba barutwana ba rena ba ile ba arabela ka pela. Go be go nyakega gore ba bangwe re se ke ra ba felela pelo. Kgarebe yeo e bitšwago Teresa Tello, e ile ya theetša molaetša wa rena wa therešo gomme ya re, “Hle le boeng gape le tle le mpotše mo go oketšegilego.” Re ile ra boela ka makga a 12 re sa e hwetše. Go ile gwa feta nywaga e meraro. Ke moka re ile ra ya kopanong yeo e bego e swaretšwe moagong woo go bapalelwago dipapadi tša sethaleng kua Santiago. Ge re be re tloga kopanong ka Sontaga, motho yo mongwe o ile a goeletša a re, “Senorita Dora, Senorita Dora!” Re ile ra retologa, gomme e be e le Teresa. O be a etetše ngwanabo yo a bego a dula ka kua ga setarata gomme o be a tlile moagong wo go tla go bona seo se diregago. E be e le mo go thabišago e le ruri go kopana le yena gape! Re ile ra dira dithulaganyo tša go ithuta Beibele le yena, gomme nakwana ka morago ga moo, o ile a kolobetšwa. Ka morago, o ile a ba mmulamadibogo yo a kgethegilego.  Lehono, ka morago ga nywaga e ka bago e 45, Teresa o sa dutše a le bodireding bjo bo kgethegilego bja nako e tletšego.—Mmoledi 11:1.

Go Hwetša Mahumo ‘Santeng’

Ka 1959 re ile ra abelwa go ya Punta Arenas—yeo e bolelago gore “Lefelo la Santa”—yeo e lego ka borwa bja lebopo la Chile la dikhilomithara tše 4 300. Punta Arenas ke tšhemo e sa tlwaelegago. Dikgweding tša selemo, go tšea nako e telele gore letšatši le sobele—letšatši le hlaba go fihla ka 11:30 bošego. Re be re kgona go fetša matšatši a mantši re le bodireding eupša re be re lebeletšana le mapheko, ka ge nakong ya selemo go be go e-ba le moya o matla o tšwago ka Borwa. Go tonya kudu marega, gomme letšatši le sobela ka pela.

Go sa šetšwe ditlhohlo tše, Punta Arenas e a kgahliša. Sehleng sa selemo, go ba le maru a pula ao a bilokanago kua lefaufaung ka thoko ya ka bodikela. Ka dinako tše dingwe, o ka no nelwa ke pula e ntši eupša moya wa tsoga wa go omiša. Ka morago go latela molalatladi o mobotse gomme letšatši le ntšha mahlasedi a lona le širilwe ke maru. Ka dinako tše dingwe melalatladi ye e ba gona ka diiri tše dintši, e tšwelela le go nyamelela ge letšatši le dutše le phadima marung a pula.—Jobo 37:14.

Ka nako yeo, go be go e-na le bagoeledi ba mmalwa kua Punta Arenas. Rena dikgaetšedi re be re swanetše go swara diboka phuthegong e nyenyane ya lefelong leo. Jehofa o šegofaditše maiteko a rena. Nywageng e 37 ka morago, re ile ra etela lefelo le gape. Re hweditše’ng? Diphuthego tše tshela tše di atlegilego le Diholo tše dibotse tša Mmušo tše tharo. Ruri go a thabiša gore Jehofa o dirile gore re hwetše mahumo a moya santeng yeo ya ka borwa!—Sakaria 4:10.

Mahumo a Oketšegilego ‘Lebopong le le Alegilego’

Ka morago ga go hlankela ka nywaga e meraro le seripa kua Punta Arenas, re ile ra abelwa go yo hlankela motseng wa boema-kepe wa kua Valparaiso. Motse wo o na le meboto e 41 yeo e dikologilego kou yeo e okametšego ka Lewatleng la Pacific. Re ile ra dira modiro wa rena wa boboledi re lebišitše tlhokomelo kudu go o mongwe wa meboto yeo, e lego Playa Ancha, yeo e bolelago gore “Lebopo le le Alegilego.” Nywageng ya rena e 16 yeo re e dutšego moo, re bone sehlopha sa bana babo rena ba Bakriste ba masogana se gola moyeng moo ga bjale se hlankelago bjalo ka balebeledi ba basepedi gotee le bagolo ba Bakriste diphuthegong go dikologa Chile.

Kabelo ya rena e latelago ya boromiwa e be e le kua Viña del Mar. Re hlanketše moo ka nywaga e meraro le seripa go fihlela ge tšhišinyego ya lefase e senya legae la baromiwa. Re ile ra boela Santiago, e lego moo re ilego ra thoma tirelo ya rena ya boromiwa nywageng e 40 pejana. Dilo di be di fetogile. Go be go agilwe meago e mefsa ya lekala, gomme moago wola wa kgale wa lekala e be e le legae la baromiwa bao ba bego ba šetše nageng yeo. Ka morago, legae leo le ile la dirišwa e le lefelo la Sekolo sa Tlwaetšo ya Bodiredi. Ka nako yeo, Jehofa o ile a re bontšha botho bja gagwe bjo lerato gape. Re le baromiwa ba bahlano bao ba bego ba tšofetše, re ile ra laletšwa go ya go dula Bethele. Nakong yeo re hlanketšego kua Chile, re bile le dikabelo tše 15 tše di fapa-fapanego. Re bone mošomo o oketšega go tloga go bagoeledi ba ka tlasana ga 100 go ya go ba ka bago 70 000! Ruri e be e le mo go thabišago go tsoma mahumo kua Chile ka nywaga e 57!

Re ikwa re šegofaditšwe kudu gore Jehofa o re dumeletše go hwetša batho ba bantši gakaakaa—mahumo e le ruri—bao ba tšwetšego pele ba dirišwa ke Jehofa ka mokgatlong wa gagwe. Nywageng ya rena e fetago 60 ya go hlankela Jehofa re le gotee, re dumelelana ka pelo ka moka le mantšu ao a boletšwego ke Kgoši Dafida yo a ngwadilego gore: “Botho bya xaxo ké byo boxoloxolo byo O bo beetšexo ba Xo boifaxo.”—Psalme 31:19.

[Mongwalo wa ka tlase]

[Diswantšho go letlakala 9]

Dorothea ka 2002 le ge a le modirong wa boboledi ka 1943

[Seswantšho go letlakala 10]

Go dira modiro wa setarateng kua Fort Dodge, Iowa, ka 1942

[Seswantšho go letlakala 10]

Dora ka 2002

[Seswantšho go letlakala 12]

Dorothea le Dora ka ntle ga legae la bona la pele la baromiwa kua Chile ka 1946