Thušo e Tšwago go “Modimo yo a Fago Kgotlelelo le Khomotšo”

NYWAGA e ka bago 2 000 e fetilego, mongwadi wa Beibele e lego Paulo, o ile a hlalosa Jehofa e le “Modimo yo a fago kgotlelelo le khomotšo.” (Baroma 15:5) Ka ge Beibele e re kgonthišetša gore Jehofa ga a fetoge ge nako e dutše e e-ya, re ka kgodišega gore Modimo o sa dutše a homotša bao ba mo hlankelago. (Jakobo 1:17) Ge e le gabotse, Beibele e utolla gore Jehofa o diriša ditsela tše di fapa-fapanego go homotša bao ba nyakago khomotšo. Tše dingwe tša ditsela tšeo ke dife? Modimo o matlafatša bao ba mo kgopelago thušo ka thapelo. Le gona o šušumeletša Bakriste ba therešo go homotša badumedi-gotee le bona. Jehofa gape o nea dipego tše di kgothatšago ka Lentšung la gagwe e lego Beibele, tšeo ka mo go kgethegilego di matlafatšago bao ba nyamišitšwego ke go hwelwa ke bana ba bona. A re hlahlobe mehuta ye e meraro ya khomotšo, ka o tee ka o tee.

“Morêna, a mo kwa”

Kgoši Dafida o ngwadile mabapi le Mmopi wa rena, Jehofa, gore: “Fêlang Le holofêla Yêna, lena batho; thšollang dipelo tša lena pele xa xaxwe. Modimo ké Yêna ’thšabêlô sa rena.” (Psalme 62:8) Ke ka baka la’ng Dafida a be a botile Jehofa gakaakaa? Ge Dafida a bolela ka yena ka noši, o ngwadile gore: “Mmôtlana šó, a bitša Morêna, a mo kwa, a mo phološa mo mahlomoleng a xaxwe ohle.” (Psalme 34:6) Maemong a gateletšago ka moka ao a fetilego go ona, Dafida o be a dula a rapela Modimo gore a mo thuše gomme ka mehla Jehofa o be a mo thuša. Dafida o be a tseba go tšwa phihlelong ya gagwe gore Modimo  o be a tla mo thekga le go mo thuša go kgotlelela.

Batswadi bao ba nyamilego ba swanetše go tseba gore Jehofa o tla ba thekga manyaming a bona a tseneletšego, bjalo ka ge a ile a thekga Dafida. Ba ka batamela ‘Mokwi yo mogolo wa dithapelo,’ ba holofela gore o tla ba thuša. (Psalme 65:2) William, yo go boletšwego ka yena sehlogong se se fetilego, o boletše gore: “Ka dinako tše dintši ke be ke ikwa nka se kgone go tšwela pele ke phela ka ntle le morwa wa-ka, gomme ke kgopetše Jehofa gore a mphe kimologo. Ka mehla o be a nnea matla le sebete sa go tšwela pele ka bophelo.” Ge e ba le wena o rapela Jehofa ka tumelo, Modimo yo mogolo wa magodimong o tla go matlafatša. Go ba gona, Jehofa Modimo o holofetša bao ba katanelago go mo hlankela gore: “Nna Morêna ké Modimo w’axo; ke Xo swere ka seatla sa-ka sa le letona, ’me ke bolêla naxô ke re: Se boifê, ké Nna ke Xo phološaxo!”—Jesaya 41:13.

Thekgo ya Bagwera ba Kgonthe

Gantši batswadi bao ba hlokofaletšwego ke ngwana ba nyaka nako ya gore ba lle ba nnoši le go beakanya maikwelo a bona. Lega go le bjalo, go efoga go ba le batho ba bangwe ka lebaka le letelele e ka se be tsela e bohlale. Go ya ka Diema 18:1, “Mo-dula-thokô” a ka ikweša bohloko. Ka gona, bao ba llago ba swanetše go šetša gore ba se wele molabeng wa go ipea lekatana.

Bagwera bao ba boifago Modimo ba ka nea bao ba gateletšegilego thušo e bohlokwa. Diema 17:17 e re: “Moxwêra ké moratwa wa ka mehla; ké ngwan’ešo e a ntswáletšwexo wa mohla wa tlalêlô.” Lucy, yoo le yena go boletšwego ka yena sehlogong se se fetilego, o ile a homotšwa ke bagwera ba kgonthe ka morago ga go lahlegelwa ke morwa wa gagwe. Ge a bolela ka bagwera ba gagwe ba ka phuthegong, o itše: “Diketelo tša bona di thušitše kudu, le ge ka dinako tše dingwe ba be ba sa bolele gakaalo. Mogwera yo mongwe o be a nketela ge ke be ke nnoši. O be a tseba gore ke be ke tla ba ke le ka gae ke lla, gomme o be a e-tla bakeng sa go lla le nna. Yo mongwe o be a nteletša mogala ka mehla bakeng sa go nkgothatša. Le gona ba bangwe ba be ba re laletša gore re tle re je ka malapeng a bona, gomme ba sa dutše ba dira bjalo.”

Le ge bohloko bjo bo tseneletšego bjoo batswadi ba bo kwago ge ba lahlegelwa ke ngwana wa bona bo sa tloge ka pela, go rapela Modimo  le go ba gotee le bagwera ba kgonthe ba Bakriste go tla dira gore bao ba llago ba homotšege. Batswadi ba mmalwa ba Bakriste bao ba lahlegetšwego ke ngwana ba lemoga gore Jehofa o na le bona. Ee, Jehofa “Ó fodiša ba dipelo tše’ robexilexo, ó tlêmêlêla ’nthô tša bôná.”—Psalme 147:3.

Dipego tša Beibele tše di Homotšago

Go tlaleletša thapelong le segwereng seo se agago, Lentšu la Modimo leo le ngwadilwego ke mothopo wa khomotšo go bao ba llago. Dipego tša Beibele di utolla gore Jesu o na le kganyogo e tseneletšego gotee le bokgoni bja go tloša bohloko bja batswadi bao ba hwetšwego, ka go tsošetša bao ba hwilego bophelong. Ruri dipego tše bjalo di homotša bao ba llago. A re hlahlobe tše pedi tša dipego tše bjalo.

Luka kgaolo 7 e hlalosa seo se ilego sa direga motseng wa Naini ge Jesu a be a kopana le lešaba leo le bego le e-ya mabitleng. Batho bao ba be ba le kgaufsi le go boloka morwa a nnoši wa mosadi wa mohlologadi. Temana 13 e re: “Ge Morena a mmona, a mo šokela gomme a re go yena: ‘Lesa go lla.’”

Ke ba mmalwa bao ba ka botšago mosadi polokong ya morwa wa gagwe gore a tlogele go lla. Ke ka baka la’ng Jesu a ile bolela bjalo? Ka baka la gore o be a tseba gore bohloko bja mosadi yoo bo be bo le kgaufsi le go fela. Pego e tšwela pele ka gore: “[Jesu] a batamela a kgwatha leako gomme barwadi ba lona ba ema pho, gomme a re: ‘Lesogana, ke re go wena, Tsoga!’ Mohu a dula ka go hlophologa a thoma go bolela, gomme a mo nea mmagwe.” (Luka 7:14, 15) Ka nako yeo, mosadi yoo o swanetše go ba a ile a lla gape, eupša mo lebakeng le a llišwa ke lethabo.

Ka nako e nngwe, Jesu o ile a batamelwa ke  monna yo a bitšwago Jairo, yo a ilego a mo kgopela gore a fodiše morwedi wa gagwe wa nywaga e 12, yo a bego a babja la go hwa. Nakwana ka morago ga moo, go ile gwa tla molaetša wa gore ngwanenyana yoo o hwile. Ditaba tše di ile tša nyamiša Jairo, eupša Jesu o ile a mmotša gore: “O se ke wa boifa, wena bontšha tumelo feela.” Ge a le legaeng la lapa leo, Jesu o ile tsena gomme a ya setopong sa mosetsana. A se swere ka letsogo, o ile a re: “Mosetsana, ke re go wena, Tsoga!” Go ile gwa direga’ng? “Ka bjako mosetsana a tsoga a thoma go sepela.” Batswadi ba ile ba ikwa bjang? Ba ile “ba thaba wa go se kgone go itshwara.” Ge Jairo le mosadi wa gagwe ba gokarela morwedi wa bona, ba ile ba thaba kudu. Go be go le bjalo ka ge eka ba a lora.—Mareka 5:22-24, 35-43.

Dipego tše bjalo tša Beibele tša mabapi le go tsošwa ga bana di bontšha seo batswadi bao lehono ba llago ba ka se letelago nakong e tlago. Jesu o itše: “Le se ke la makatšwa ke se, gobane nako e a tla yeo ka yona bohle bao ba lego mabitleng a kgopotšo ba tlago go kwa lentšu la gagwe gomme ba tšwa.” (Johane 5:28, 29) Jehofa o rerile gore Morwa wa gagwe a tle a nee bao ba hwilego bophelo. Bana ba dimilione tše sa balegego bao ba hwilego ba tla “kwa lentšu la gagwe” ge a bolela le bona a re: “Ke re go wena, Tsoga!” Bana bao ba tla kgona go sepela le go bolela gape. Le gona, go swana le Jairo le mosadi wa gagwe, batswadi ba bana bao ba tla “thaba wa go se kgone go itshwara.”

Ge e ba o lahlegetšwe ke morwa goba morwedi ka lehu, hle tseba gore Jehofa a ka diriša tsogo go fetola manyami a gago lethabo. E le gore o holwe ke tebelelo ye yeo e kgahlišago, e-kwa kgothatšo ya mopsalme e rego: “Nyakang Morêna le matla a xaxwe, Le fêlê Le nyaka sefahloxô s’axwe. Le se lebalê mehlôlô ye a e dirilexo, matete a xaxwe.” (Psalme 105:4, 5) Ee, hlankela Modimo wa therešo, Jehofa, le go mo rapela ka tsela e amogelegago.

Ge o ‘nyaka Morena,’ o tla ba le dipoelo dife tša kapejana? O tla hwetša matla ka go rapela Modimo, o tla ikwa o homotšwa ke tlhokomelo e lerato ya Bakriste-gotee le wena ba therešo le gona o tla matlafatšwa ke go ithuta Lentšu la Modimo. Go feta moo, kgaufsinyane, o tla bona gore Jehofa o tla phetha ‘mediro e makatšago le mehlolo’ bakeng sa gore wena gotee le ngwana yo a go lahlegetšego ka lehu le holege ka mo go sa felego.

[Lepokisi go letlakala 5]

“Bitša Mosadi yo a Hlokofaletšwego ke Bana ba Babedi”

Kehinde le Bintu, banyalani ba Dihlatse tša Jehofa ba Nigeria, ba ile ba lahlegelwa ke ba babedi ba bana ba bona kotsing ya koloi. Ga e sa le go tloga ka nako yeo, ba kwile bohloko ka baka la go lahlegelwa o šoro ke bana. Lega go le bjalo, go bota ga bona Jehofa go a ba matlafatša, gomme ba tšwela pele ba boledišana le baagišani ba bona ka molaetša wa Beibele wa kholofelo.

Ba bangwe ba ile ba lemoga khutšo le kgotlelelo tšeo di bego di bontšhwa ke Kehinde le Bintu. Ka letšatši le lengwe mosadi yo mongwe yo a bitšwago Moh. Ukoli o ile a botša yo mongwe wa bagwera ba Bintu gore: “Bitša mosadi yo a hlokofaletšwego ke bana ba babedi ka nako e tee, gomme a sa tšwelago pele a bolela ka molaetša wa Beibele. Ke nyaka go tseba gore ke eng seo se mo neago matla a go kgotlelela.” Ge Bintu a fihla ka lapeng la mosadi yoo, Moh. Ukoli o ile a mmotša gore: “Ke nyaka go tseba gore ke ka baka la’ng o sa bolela le batho ka Modimo yo a bolailego bana ba gago. Modimo o tšere morwedi o tee yo ke bego ke e-na le yena. Go tloga ka nako yeo, ga ke sa nyaka go kwa selo ka Modimo.” Bintu o ile a diriša Beibele go hlalosa lebaka leo ka lona batho ba hwago, le gore ke ka baka la’ng re ka ba le kholofelo ya kgonthe ya gore baratiwa bao ba hwilego ba tla tsošwa.—Ditiro 24:15; Baroma 5:12.

Ka morago ga moo, Moh. Ukoli o ile a re: “Ke be ke nagana gore Modimo o tšea batho ka lehu. Ga bjale ke tseba therešo.” O ile a dira phetho ya gore a ithute Beibele le Dihlatse tša Jehofa e le gore a ithute mo gontši ka dikholofetšo tša Modimo.

[Lepokisi go letlakala 6]

‘Ke Nyaka go Thuša, Eupša ga ke Tsebe Gore Bjang’

Ge batswadi le bana babo ngwana yo a hwilego ba dutše ba e-kwa bohloko bjo bogolo, bagwera ba bona ba ka ba le poifo. Ba nyaka go thuša ba lapa leo eupša ba boifa gore ba ka bolela goba go dira selo se se kgopišago seo se ka dirago gore dilo di mpefale le go feta. Ditšhišinyo tše di latelago ke tša bao ba naganago gore, ‘Ke nyaka go thuša, eupša ga ke tsebe gore bjang.’

❖ O se ke wa efoga batho bao ba hwetšwego ka baka la ge o sa tsebe seo o ka se bolelago goba go se dira. Go ba gona ga gago go a ba kgothatša. Na ga o tsebe seo o ka se bolelago? Go gokara le go bolela go tšwa pelong gore “Ke maswabi,” go dira gore ba bone gore o tshwenyega ka bona. Na o boifa gore ge o ka thoma go lla o tla dira gore ba nyame le go feta? Beibele e re: “Llang le ba llago.” (Baroma 12:15) Megokgo ya gago e bontšha gore le wena o kwa bohloko bjoo ba bo kwago, gomme seo se a kgothatša.

❖ Gata mogato wa pele. Na o ka direla ba lapa leo dijo tše bonolo? Na o ka hlatswa dibjana tše di tšhilafetšego tšeo di bego di dirišwa? Na ba ka go roma? O se ke wa re, “Le mpotše ge go na le seo le se nyakago.” Le ge mantšu ao a ka bolelwa ka maikemišetšo a mabotse, a botša batswadi ba bantši bao ba hwetšwego gore ga o na nako ya bona. Go e na le moo, ba botšiše gore “Ke eng seo nka le direlago sona gona bjale?” gomme o dire seo ba se kgopelago. Eupša efoga go šwahlela mafelong ao o sa dumelelwago go ba go ona ka legaeng la bona goba go tsena ditabeng tšeo di sa go nyakego.

❖ Efoga go bolela gore, “Ke tseba kamoo le ikwago ka gona.” Motho yo mongwe le yo mongwe o arabela lehung la motho yo a mo ratago ka tsela ya gagwe ka noši. Le ge le wena o lahlegetšwe ke ngwana, ga o tsebe ka mo go feletšego gore ba ikwa bjang.

❖ Go tla feta nako e ntši pele bophelo bja lapa leo bo ka boela sekeng gape. Tšwela pele o thuša kamoo o ka kgonago ka gona. Mathomong ba lapa leo le llago ba ka newa thušo ka mahlakoreng ka moka, eupša ga ba e nyake feela dibekeng le dikgweding tša mathomo. Ba thuše ka dinyakwa tša bona dibekeng le dikgweding tše di latelago. *

[Mongwalo wa ka tlase]

[Diswantšho go letlakala 7]

Dipego tša Beibele di bontšha gore Jesu o na le matla gotee le kganyogo ya go tsoša bana bao ba hwilego