Go ba le Kholofelo Lefaseng Leo le Tletšego Tlalelo

“BADUDI ba na le bolokologi bjo bogolo bja go dira botse phatlalatša le go rarolla mathata a tlwaelegilego go feta nakong le ge e le efe historing ya batho.” Mantšu ao a boletšwe ke yoo e kilego ya ba mopresidente wa Amerika, Bill Clinton, ka March 2006 kua Ottawa, Canada. O ile a phetha ka gore mokgwa wa go direla batho ba dinaga tše dingwe botse o be o dutše o gola ga e sa le go tloga nakong ya tsunami ka 2004 gomme o boletše a e-na le kholofelo gore lefase ga bjale le “nakong yeo batho ba ithekgilego ka ba bangwe go feta le ge e le neng pele.”

Na re ka letela gore dikotsi tša tlhago e be tšona tšeo di dirago gore batho ka moka ba leke go hwetša bokamoso bjo bokaone? Na ‘go ithekga ka batho ba bangwe go feta le ge e le neng pele’ ke motheo o ka botwago wa go ba le kholofelo ya gore go tla ba le khutšo ya kgonthe le tšhireletšego e sa felego nakong e tlago?

Mothopo wa Kholofelo ya Kgonthe

Pego ya nako e telele ya maiteko ao batho ba a dirilego ka nywaga e  fetago e dikete tše tshela e fetilego e bontšha gore batho ba nyamišana leboelela. Ka gona, ke ka lebaka le lebotse ge Mangwalo ao a buduletšwego a re eletša gore: “Se boteng maxoši e lexo bana ba batho, bao xo sexo phološô xo bôná.” (Psalme 146:3) Go holofela mekgatlo ya lefase le, dilo tša lona tše di bonagalago le ditoro tša lona go lebiša feela manyaming. Ka baka la’ng? Ka baka la gore “lefase le a feta gomme go bjalo le ka kganyogo ya lona.”—1 Johane 2:17.

Lega go le bjalo, ka nywaga-kgolo e mentši Modimo e be e dutše e le kholofelo ya kgonthe ya batho ba lokilego. Beibele e mmitša ‘kholofelo ya Isiraele ya bogologolo’ le ‘kholofelo ya bo-rr’abo,’ le gona e bolela go gontši ka kholofelo, go bota le go mo holofela. (Jeremia 14:8; 17:13; 50:7) Ka kgonthe, Mangwalo a re kgothaletša gore re “Ikholofelele Jehofa.”—Psalme 27:14, PK.

Diema 3:5, 6 e re kgothatša ka gore: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” O na le mabaka ka moka a go holofela kholofetšo yeo ka botlalo ka ge Jehofa Modimo a sa fetoge, a botega e bile ka mehla a phetha seo a se boletšego. (Maleaki 3:6; Jakobo 1:17) O nyaka gore dilo di go sepelele gabotse, gomme ge ka mehla o e-kwa seo se ngwadilwego ka Lentšung la gagwe, Beibele, o tla hwetša tlhahlo yeo e tla dirago gore o atlege dinakong tše tše di boifišago.—Jesaya 48:17, 18.

Motho yo a latelago tlhahlo ya Modimo ka pelo ka moka a ka ithekga ka kholofetšo ye: “O se boifê xobane ke na le wene. O se kê wa thšoxa, xobane Modimo wa xaxo ké Nna. Ke a Xo tiiša; ke a Xo thuša; ke Xo hlêka ka letsôxô la-ka le letona le-ya-ka-tokô.” (Jesaya 41:10) Bao ba ratago Jehofa Modimo e le ka kgonthe ba homotšwa kudu ke thapelo e tšwago pelong gotee le go naganišiša ka kgonthišetšo ye, ka ge go ba thuša go fenya maemo a thata le dipelaelo.

Ela hloko Andrea, yo mongwe wa Dihlatse tša Jehofa e bile e le mmago bana ba babedi. O re: “Ge go tšwelela dinako tše di hlobaetšago bophelong bja-ka, ke matlafatšwa ke thapelo le go naganišiša ka dikholofetšo tša Jehofa. Ge ke dula ke lebelela Jehofa e le motho wa kgonthe, ke kgona go dula ke tsepame.”

Matlafatša Kholofelo ya Gago go Jehofa

A bontšha bohlokwa bja go holofela Jehofa, mopsalme yo mongwe o itše: “Moláô-moxolo ó na le bao ba rataxo melaô ya xaxo; xa ba na se ba kxopišaxo.” (Psalme 119:165) Go bala Lentšu la Modimo ka phišego go ka tlatša monagano le pelo ya gago ka dilo tše di agago tša moya, ‘dilo le ge e le dife tša therešo, tše di naganišišwago ka šedi, tše di lokilego, tše di sekilego, tše di rategago, tšeo go bolelwago gabotse ka tšona, tša bokwala le selo le ge e le sefe se se tumišegago.’ Ge o leka go kwa, go ithuta, go amogela le go dira dilo tše, “Modimo wa khutšo o tla ba le [wena].”—Bafilipi 4:8, 9.

Ge a bolela go tšwa phihlelong yeo a nago le yona ya nywaga e mentši, John o re: “Pele ga ge nka fetoša tsela yeo ke ikwago ka yona ka bokamoso, go be go le bohlokwa go ithuta gore ke swanetše go fetoša semelo sa-ka le tsela ya-ka ya go nagana pele nka holofela go aga segwera le Modimo yo a phethagetšego, yo a sa bonagalego. Tsela e nnoši yeo ke bego nka dira seo e be e le ka go ba motho wa moya. Seo se be se akaretša gore ke fetoge motho wa moya, yo a bonago dilo ka tsela yeo Modimo a di bonago ka yona, ka go bala Lentšu la gagwe leo le buduletšwego le go naganišiša ka lona.

Ge o e-nwa meetse a lapološago a therešo e neago bophelo ao a hwetšwago ka Mangwalong a buduletšwego, o tla be o diriša mokgwa o atlegago le o kgonthišeditšwego wa go fenya mafula a dilo tše mpe tšeo di bontšhwago ka mehla ke methopo ya ditaba. Le gona, go diriša seo se bolelwago ka Beibeleng go ka matlafatša ditswalano tša lapa la gago le go fokotša dipelaelo. Go feta moo, Modimo o holofetša gore o ikemišeditše “xore a bônatšê matla a xaxwe ka bao ba lebeletšexo Yêna ka pelo ka moka.” (2 Koronika 16:9) O tla dira dilo ka tsela yeo ruri go se nago lebaka la gore o tšhoge.

Phinehas, yo a phetšego nakong ya ntwa le dipolao tša molokwanarite, o re: “Ke ithutile go bea bophelo bja-ka ka diatleng tša Jehofa yo a hlokomelago. Go latela melao ya Beibele ya  motheo go nthušitše go phema mathata a mantši.” Ge e ba o bota Jehofa Modimo e le ka kgonthe, a ka go thuša go tshelela ka kua ga morako o mongwe le o mongwe wa mathata. (Psalme 18:29) Ngwana yo a nago le tswalano ya kgaufsi le batswadi ba gagwe, o ba bota kudu le go ikwa a šireletšegile tlhokomelong ya bona le ge a babja goba a e-na le mathata ka tsela e itšego. Le wena o ka ba le maikwelo a bjalo ge o dira boiteko e bile o amogela taletšo ya gore o holofele Jehofa.—Psalme 37:34.

Motheo o Kgonthišeditšwego wa Kholofelo

Jesu Kriste o boditše balatedi ba gagwe gore: “Le swanetše go rapela ka tsela ye: ‘Tatago rena wa magodimong, leina la gago a le kgethagatšwe. Mmušo wa gago a o tle. Thato ya gago a e direge le mo lefaseng bjalo ka ge e direga legodimong.’” (Mateo 6:9, 10) Mmušo woo wa magodimo—Mmušo woo o lego ka diatleng tša Jesu Kriste—ke sedirišwa sa Modimo seo a bontšhago ka sona tshwanelo ya Gagwe ya go buša lefase.—Psalme 2:7-12; Daniele 7:13, 14.

Dilo ka moka tšeo di bakago poifo dikarolong ka moka tša bophelo lehono ke pontšho e lego molaleng ya gore go a nyakega gore Modimo a tsene ditaba gare. Se se thabišago ke gore o kgaufsi le go tsena ditaba gare! Jesu Kriste, yoo ga bjale a beilwego ke Modimo go ba Kgoši Mesia, o neilwe matla a go lwela bogoši bja Jehofa le go kgethagatša leina la Gagwe. (Mateo 28:18) Go se go ye kae, pušo ya Mmušo e tla lebišwa lefaseng bakeng sa gore o fediše dilo ka moka tšeo di bakago poifo le pelaelo. Jesaya 9:5 e tšweletša dika tšeo di bontšhago gore Jesu ke Mmuši yo a swanelegago yo a ka fedišago poifo ya rena. Ka mohlala, o bitšwa “Tatê wa xo sa felexo,” “Matete, Moeletši,” le “Kxoši ya kaxišô.”

Ela hloko polelwana e bontšhago lerato e rego, “Tatê wa xo sa felexo.” Ka ge a le bjalo, Jesu o na le matla le bokgoni—gotee le kganyogo—ya go nea batho ba kwago tebelelo ya bophelo bjo bo sa felego mo lefaseng ka mohola wa sehlabelo sa gagwe sa topollo. Se se bolela gore mafelelong batho ba tla lokollwa sebeng le go se phethagaleng tšeo ba di abetšego mothong wa pele wa go dira sebe, Adama. (Mateo 20:28; Baroma 5:12; 6:23) Le gona Kriste o tla diriša matla ao a a neilwego ke Modimo go tsoša batho ba bantši bao ba hwilego.—Johane 11:25, 26.

Ge a be a le lefaseng, Jesu o itlhatsetše e le “Matete, Moeletši.” Ka baka la tsebo ya gagwe ya Lentšu la Modimo le kwešišo ya gagwe e sa tlwaelegago ka batho, Jesu o be a kgona go rarolla mathata a tšwelelago bophelong bja letšatši le letšatši. Ga e sa le go tloga mola a bewago Kgoši legodimong, Kriste o tšwela pele e le “Matete, Moeletši,” a hlankela e le motho yo mogolo mokerong wa Jehofa wa go boledišana le batho. Keletšo ya Jesu yeo e begilwego ka Beibeleng, ka mehla e bohlale e bile ga e na bosodi. Go tseba le go dumela se go ka go lebiša bophelong bjo bo tsepamego le bjo bo sa boifišego.

Jesaya 9:5 e bontšha le gore Jesu ke “Kxoši ya kaxišô.” A le maemong ao, Kriste kgaufsinyane o tla diriša matla a gagwe go fediša kgethollo—dipolitiking, setšhabeng le maemong a boiphedišo. Bjang? Ka go tliša batho ka tlase ga pušo e tee ya khutšo, ya Mmušo wa Mesia.—Daniele 2:44.

Ka tlase ga Mmušo woo go tla ba le khutšo e sa felego lefaseng ka bophara. Ke ka baka la’ng o ka kgonthišega ka se? Lebaka le utollwa go Jesaya 11:9, moo re balago gore: “Xo ka se hlwê xo dirwa dibe, xo ka se hlwê xo senywa mo xo fêla dithabeng tše kxêthwa tša-ka, xobane xo tseba Morêna xo tlo tlala ’fase lohle bo-ka meetse xe a nabile lewatleng.” Mafelelong, motho yo mongwe le yo mongwe lefaseng o tla ba le tsebo e nepagetšego ka Modimo le gona o tla ikokobeletša yena. Na tebelelo yeo e dira gore o thabe? Ge e ba e dira bjalo, o se ke wa dika-dika go nyaka tsebo e bohlokwa ya “xo tseba Morêna.”

O ka ikgafela go hwetša tsebo yeo e agago tumelo le yeo e neago bophelo ka Modimo, ka go hlahloba seo ge e le gabotse Beibele e se rutago mabapi le ditiragalo tša mehla ya rena le bokamoso bjo bo phadimago bjo Beibele e bo holofeditšego. Ka gona, re go kgothaletša gore o ikgafele go amogela lenaneo la thuto yeo e sa lefelelwego ya Beibele yeo Dihlatse tša Jehofa di e neago motseng wa geno. Ye ke tsela ya go okobatša poifo le go hwetša kholofelo ya kgonthe lefaseng leo le tletšego mathata.

 [Lepokisi go letlakala 7]

Lebaka Leo ka Lona Mmušo o Neago Kholofelo

Jesu Kriste, ka ge e le Kgoši ya Mmušo wa Modimo, o neilwe bokgoni le tshwanelo ya go buša legohle ka moka. (Mateo 28:18) O tla tsošološa tswalano ya diphedi tša lefase le tikologo ya tšona a dira gore e lekanele ka mo go phethagetšego. Le gona o kgona go fodiša malwetši. Mediro e matla yeo Jesu a e phethilego lefaseng e be e le pontšho ya ditšhegofatšo tše kaone le go feta tšeo di tlago go tla nakong ya pušo ya gagwe e le Kgoši e ka botwago le e phethagetšego. Ke dika dife tša Kgoši ye e lego Mesia tšeo di lego ka mo tlase tšeo di tlogago di go kgahla?

▪ O a batamelega.—Mareka 10:13-16.

▪ O leka-lekane e bile ga a bebe sefahlego.—Mareka 10:35-45.

▪ O a botega e bile ga a na boithati.—Mateo 4:5-7; Luka 6:19.

▪ O lokile e bile o dira dilo ka toka.—Jesaya 11:3-5; Johane 5:30; 8:16.

▪ O a hlokomela, o a naganela e bile o ikokobeditše.—Johane 13:3-15.

[Seswantšho go letlakala 4]

Go bala Beibele le go naganišiša ka yona go ka dira gore re holofele Jehofa