Lebaka Leo Ka Lona Tlaišego Ka Moka E Tlago Go Fela Kgaufsinyane
Lebaka Leo Ka Lona Tlaišego Ka Moka E Tlago Go Fela Kgaufsinyane
“Ke Yena Lefsika, Yo tiro ya gagwe e lego e phethegilego.”—DOITERONOMIO 32:4, PK.
1, 2. (a) Ke ka baka la’ng o tšeela godimo kholofelo ya go phela ka mo go sa felego? (b) Ke’ng seo se thibelago ba bantši go dumela go Modimo yo a holofetšago dilo tše di kgahlišago ka bokamoso?
NA O rata go nagana ka bophelo bja Paradeiseng? Mohlomongwe o ipona o fetleka polanete ye e botse gomme o ithuta ka diphedi tše di fapa-fapanego tše di bonagalago di sa balege. Goba mohlomongwe o naganišiša ka kgotsofalo ye o tlago go e hwetša ge o šoma le ba bangwe go hlokomela lefase le go thuša go le fetoša gore e be phaka ya lefase ka bophara. Goba o ka nagana ka bokgoni bjo o ka bago le bjona go tša bokgabo, modirong wa go aga, mminong goba medirong e mengwe yeo o ka se bego le nako ya go e dira bophelong bja lehono bja leema-ema. Boemong le ge e le bofe, o tšeela godimo kholofelo ya go phela seo Beibele e se bitšago ‘bophelo bja kgonthe’—bophelo bjo Jehofa a bego a rerile gore re bo phele, ka kholofelo ya go dira bjalo ka mo go sa felego.—1 Timotheo 6:19.
2 Ke lethabo le tokelo e bohlokwa go boledišana le ba bangwe ka kholofelo yeo e theilwego Beibeleng, na ga go bjalo? Lega go le bjalo, ba bantši ba gana kholofelo e bjalo. Ba e gana ka go bolela gore ke boiphoro, e lego toro e sa kwagalego ya batho bao ba foregago gabonolo. Le gona ba ka thatafalelwa le ke go dumela go Modimo yoo a holofetšago bophelo bjo bo sa felego Paradeiseng. Ka baka la’ng? Go ba bangwe, lepheko le akaretša seo gantši se bitšwago bothata bja bokgopo. Ba dumela gore ge e ba Modimo a le gona e bile e le yo matla ohle le yo lerato, ga go na lebaka la gore go be le bokgopo le tlaišego lefaseng. Ba bolela gore ga go na Modimo yo a ka kgotlelelago bokgopo—goba ge e ba a le gona ga se yo matla ohle e bile ga a na taba le rena. Go ba bangwe, tsela e bjalo ya go bea mabaka e kwagala e kwešišega. Ka kgonthe Sathane o ipontšhitše e le yo a nago le bokgoni bja go foufatša menagano ya batho.—2 Bakorinthe 4:4.
3. Ke potšišo efe e thata yeo re ka thušago batho go e araba, gomme ke ka baka la’ng re le boemong bja moswana-noši bja go dira bjalo?
3 Bjalo ka Dihlatse tša Jehofa, re boemong bja moswana-noši bja go thuša batho bao ba forwago ke Sathane le bohlale bja lefase le. (1 Bakorinthe 1:20; 3:19) Re kwešiša lebaka leo ka lona ba bantši ba sa dumelego dikholofetšong tša Beibele. Ba fo ba ba sa tsebe Jehofa. Ba ka no ba ba sa tsebe leina la gagwe goba seo le se bolelago, gomme go bonagala ba tseba mo gonyenyane goba ba sa tsebe selo ka dika tša gagwe goba botumo bja go phethagatša dikholofetšo tša gagwe. Re šegofaditšwe ka go ba le tsebo e bjalo. Ke mo gobotse go dula re hlahloba kamoo re ka thušago batho bao ba lego “lefsifsing monaganong” go hwetša karabo go e nngwe ya dipotšišo tše thata kudu tšeo batho ba ipotšišago tšona, “Ke ka baka la’ng Modimo a dumelela bokgopo le tlaišego?” (Baefeso 4:18) Re tla thoma ka go hlahloba kamoo re ka hwetšago karabo e kgotsofatšago ka gona. Ke moka re tla ahla-ahla kamoo dika tša Jehofa di bonagalago ka gona tseleng yeo a ilego a swaragana le taba ya bokgopo.
Go Hwetša Tsela e Nepagetšego ya go Araba Potšišo
4, 5. Ke selo sefe sa pele seo re ka swanelwago ke go se dira ge motho a botšiša gore ke ka baka la’ng Modimo a dumelela tlaišego? Hlalosa.
4 Ge motho a botšiša lebaka leo ka lona Modimo a dumelelago tlaišego, re araba bjang? Go ka no ba bonolo gore re thome go hlalosa ditaba ka botlalo, re thoma ka seo se diregilego kua tšhemong ya Edene. Maemong a mangwe, seo e ka ba se se swanetšego. Lega go le bjalo, go nyakega temogo. Go ka nyakega gore ditaba di alwe gabotse. (Diema 25:11; Bakolose 4:6) Anke re ahla-ahleng dintlha tše tharo tša Mangwalo tšeo re ka ratago go di hlalosa ka boripana pele ga ge re ka tšweletša karabo ya potšišo.
5 Ya pele, ge e ba motho a bonagala a tshwenywa ke go ba gona ga bokgopo lefaseng, e ka no ba ka gobane bokgopo bo ile bja kgoma bao a ba ratago ka go lebanya. Ka gona, e ka ba gabohlale go thoma ka go bontšha kwelobohloko e tšwago pelong. Moapostola Paulo o eleditše Bakriste ka gore: “Llang le ba llago.” (Baroma 12:15) Go bontšha ‘kwelobohloko’ go ka kgoma motho yoo. (1 Petro 3:8) Ge e ba a kwešiša gore re tshwenyegile ka yena, go na le kgonagalo e kgolo ya gore o tla theetša seo re se bolelago.
6, 7. Ke ka baka la’ng e ka ba mo go swanetšego go reta motho yo a botegago yo a rotošago potšišo yeo e mo tshwenyago ya mabapi le dilo tša moya?
6 Ya bobedi, re ka reta motho yo yo a botegago ka ge a botšišitše potšišo ye. Batho ba bangwe ba phetha ka gore ka ge ba katana le dipotšišo tše bjalo, ga ba na tumelo goba ga ba hlomphe Modimo. Ba ka no ba ba ile ba botšwa seo ke moruti. Lega go le bjalo, ga se gore go tloga go le bjalo. Ge e le gabotse, batho ba botegago mehleng ya Beibele ba ile ba botšiša dipotšišo tše di swanago le yeo. Ka mohlala, mopsalme Dafida o botšišitše gore: “Morêna, O re’ng Ò êma kxolê? O re’ng Ò sa tšwêlêle mohla wa tlalêlô?” (Psalme 10:1) Ka mo go swanago, moporofeta Habakuku o botšišitše gore: “Morêna, xo tlo feletša neng kè fêla kè bitša Ò sa kwe? Ke hlaboša lentšu kè Xo bitša kè patilwe, Ò sa nnamolele. O re’ng Ò ntesa kè lebane le bobe? O dula Ò bôna kè hlaka, kè lebane le thlakolô le sehloxo, xò tsoxa ntwa, xò hlaxa phapang?”—Habakuku 1:2, 3.
7 Ba e be e le banna ba botegago bao ba bego ba hlompha Modimo kudu. Na ba ile ba solelwa go rotoša dipotšišo tše bjalo tšeo di bego di ba tshwenya? Ka go fapana le seo, Jehofa o ile a bona go swanetše gore a ngwale dipotšišo tša bona tše di tšwago pelong ka Lentšung la gagwe. Lehono, motho yo a tshwenywago ke go ba gona ga bokgopo ge e le gabotse a ka ba a swerwe ke tlala ya moya—a hlologela dikarabo tšeo di ka newago feela ke Beibele. Gopola gore Jesu o ile a bolela gabotse ka bao ba swerwego ke tlala ya moya, goba bao ba “lemogago go nyaka ga bona dilo tša moya.” (Mateo 5:3) Ruri ke tokelo go thuša batho ba bjalo go hwetša lethabo leo Jesu a le holofeditšego!
8. Ke dithuto dife tše di gakantšhago tšeo di dirilego gore batho ba nagane gore Modimo o a ikarabela bakeng sa tlaišego, gomme re ka ba thuša bjang?
8 Ya boraro, re ka swanelwa ke go thuša motho go bona gore Modimo ga a ikarabele ka bokgopo bjo bo lego gona mo lefaseng. Batho ba bantši ba rutwa gore Modimo o buša lefase le leo re phelago go lona, gore ke kgale kudu Modimo a rulagantše dilo ka moka tše di re diragalelago le gore o na le mabaka a sa tsebjego a go tlišetša batho manyami. Dithuto tše di fošagetše. Di bontšha go se hlomphe Modimo e bile di dira gore go be le dikgopolo tša gore o a ikarabela ka bokgopo le tlaišego lefaseng le. Ka baka leo, re ka swanelwa ke go diriša Lentšu la Modimo go lokiša ditaba tše bjalo. (2 Timotheo 3:16) Jehofa ga se mmuši wa tshepedišo ye e kgopo ya dilo; mmuši wa yona ke Sathane Diabolo. (1 Johane 5:19) Jehofa ga a rulaganye e sa le pele dilo tšeo di tla diragalelago dibopiwa tša gagwe tše bohlale; o nea yo mongwe le yo mongwe tokologo le dibaka tša go kgetha magareng ga se sebotse le se sebe, se se nepagetšego le se se fošagetšego. (Doiteronomio 30:19) Le gona Jehofa le ka mohla ga se mothopo wa bokgopo; o hloile bokgopo gomme o tshwenyega ka bao ba tlaišegago ka tsela e se nago toko.—Jobo 34:10; Diema 6:16-19; 1 Petro 5:7.
9. Ke didirišwa dife tše dingwe tšeo “mohlanka yo a botegago le wa temogo” a di neilego bakeng sa go thuša batho go kwešiša lebaka leo ka lona Jehofa Modimo a dumeletšego tlaišego?
9 Ge o šetše o adile taba ka tsela yeo, o ka hwetša motheetši wa gago a itokišeleditše go ithuta lebaka leo ka lona Modimo a dumeletšego tlaišego gore e tšwele pele. “Mohlanka yo a botegago le wa temogo” o lokišeditše didirišwa tše dintši bakeng sa go go thuša. (Mateo 24:45-47) Ka mohlala, kopanong ya Selete ya 2005/06 ya “Go kwa Modimo,” go ile gwa lokollwa pampišana e nago le sehlogo se se rego Tlaišego ka Moka e tla Fela Kgaufsinyane! Ge e-ba pampišana ye e le gona ka leleme la geno, o re’ng o sa itlwaetše dikagare tša yona? Ka mo go swanago, puku ya Ke Eng Seo ge e le Gabotse Beibele e se Rutago?, yeo ga bjale e hwetšagalago ka maleme a 157, e na le kgaolo yeo e ahla-ahlago potšišo ye e bohlokwa. Diriša didirišwa tše bjalo ka botlalo. Di hlalosa gabotse seo Mangwalo a se bolelago ka kgang ya bogoši bja legohle yeo e ilego ya rotošwa kua Edene le lebaka leo ka lona Jehofa a ilego a swaragana le tlhohlo ye kamoo a swaraganego le yona ka gona. Le gona gopola gore ge o dutše o hlahloba taba ye, o utollela motheetši wa gago mohuta o bohlokwa kudu wa tsebo e lego gona. Ke go tseba Jehofa le dika tša gagwe tše di kgahlišago.
Lebiša Tlhokomelo Dikeng tša Jehofa
10. Ke’ng seo batho ba bantši ba thatafalelwago ke go se kwešiša mabapi le go dumelela ga Modimo tlaišego, gomme ke tsebo efe yeo e ka ba thušago?
10 Ge o dutše o thuša batho go kwešiša lebaka leo ka lona Jehofa a dumeletšego gore batho ba ipuše ka tlase ga tutuetšo ya Sathane, leka go lebiša tlhokomelo dikeng tša Jehofa tše dibotse. Batho ba bantši ba a tseba gore Modimo ke yo matla; ba tlwaetše go kwa a bitšwa Modimo Ramatla-ohle. Lega go le bjalo, ba ka thatafalelwa ke go kwešiša lebaka leo ka lona a sa dirišego matla a gagwe a magolo go fediša go hloka toko le tlaišego gatee ya ba moka. Mohlomongwe ga ba kwešiše dika tše dingwe tša Jehofa, tše bjalo ka bokgethwa bja gagwe, toka, bohlale le lerato. Jehofa o bonagatša dika tše ka tsela e phethagetšego le e leka-lekanego. Ka baka leo, Beibele e re: “Ke . . . Yo tiro ya gagwe e lego e phethegilego.” (Doiteronomio 32:4, PK) O ka tšweletša bjang dika tše ge o dutše o araba dipotšišo tšeo gantši di botšišwago tabeng ye? Anke re hlahlobeng mehlala e sego kae.
11, 12. (a) Ke ka baka la’ng go be go sa kgonege go lebalela Adama le Efa ge ba be ba dira sebe? (b) Ke ka baka la’ng Jehofa a ka se ke a kgotlelela sebe ka mo go sa felego?
11 Na Jehofa o be a ka fo lebalela Adama le Efa? Tebalelo e be e sa kgonege tabeng ye. Bjalo ka batho bao ba phethagetšego, Adama le Efa ba dirile kgetho ya ka boomo ya go ganetša bogoši bja Jehofa le go fo amogela tlhahlo ya Sathane. Ga go makatše ge marabele a a sa ka a bontšha go itshola. Lega go le bjalo, ge batho ba botšiša lebaka leo ka lona a sa kago a ba lebalela, ge e le gabotse ba ka ba ba ipotšiša lebaka leo ka lona Jehofa a sa kago a fokotša ditekanyetšo tša gagwe go se nene gomme a kgotlelela go ba gona ga sebe le borabele. Karabo e akaretša seka seo se lego bohlokwa go seo Jehofa a lego sona e le ruri—bokgethwa bja gagwe.—Ekisodo 28:36; 39:30.
12 Beibele e gatelela bokgethwa bja Jehofa ka makga a mantši. Lega go le bjalo, se se nyamišago ke gore ke batho ba mmalwa lefaseng le leo le gobogilego bao ba kwešišago seka seo. Jehofa o hlwekile, o sekile e bile o kgole le bobe bjohle. (Jesaya 6:3; 59:2) Tabeng ya sebe, o rulagantše tsela ya gore go be le poelano, ka go se tloša, eupša a ka se ke a se kgotlelela ka mo go sa felego. Ge e ba Jehofa a be a nyaka go kgotlelela sebe ka mo go sa felego, re be re ka se be le kholofelo ya bokamoso. (Diema 14:12) Ka nako ya gagwe e swanetšego, Jehofa o tla bušetša tlholo ka moka boemong bja bokgethwa. Seo se tla direga, ka gobane ke thato ya Yo Mokgethwa.
13, 14. Ke ka baka la’ng Jehofa a ile a kgetha go se fediše marabele a kua Edene?
13 Na Jehofa nkabe a sa ka a fo fediša marabele a kua Edene gomme a thomološa dilo lefsa? Ruri o be a e-na le matla a go dira bjalo; go se go ye kae o tla diriša matla ao go fediša ba kgopo ka moka. Ba bangwe ba ka botšiša gore: ‘Ke ka baka la’ng a sa ka a dira bjalo nakong ya ge go be go e-na le badiradibe ba bararo feela legohleng? Na go phatlalala ga sebe—le mahloko ka moka ao re a bonago lefaseng—go be go tla ba go se gwa thibelwa?’ Ke ka baka la’ng Jehofa a sa ka a kgetha go gata mogato woo? Doiteronomio 32:4 e re: “’Tsela tsa’xwe tšohle dì lokile.” Jehofa o tšeela toko godimo kudu. Ge e le gabotse, “Morêna ó rata tša tokô.” (Psalme 37:28) Ka baka la ge a rata toko, Jehofa ga se a ka a fediša marabele a kua Edene. Ka baka la’ng?
14 Borabele bja Sathane bo ile bja rotoša potšišo yeo e lego mabapi le go nepagala ga bogoši bja Modimo. Tsela yeo Jehofa a lebelelago toko ka yona e be e nyaka gore tlhohlo ya Sathane e arabje ka tsela yeo e bontšhago toko. Go bolawa ga marabele a le semeetseng, le ge go be go swanela, e be e tla ba e se karabo ya toko. Go be go tla ba go neile bohlatse bjo bo oketšegilego bja gore Jehofa o na le matla a magolo, eupša ga se matla a gagwe ao a bego a belaelwa. Go feta moo, Jehofa o be a boditše Adama le Efa morero wa gagwe. Ba be ba swanetše go ba le bana le go tlatša lefase, ba le buše le go dira gore tlholo ka moka ya lefase e ikokobeletše bona. (Genesi 1:28) Ge nkabe Jehofa a ile a fo fediša Adama le Efa, morero wa gagwe wo o boletšwego ka batho o be o ka se be le mohola. Toko ya Jehofa e be e ka se dumelele gore go be le mafelelo a bjalo, ka ge morero wa gagwe o phethagatšwa ka mehla.—Jesaya 55:10, 11.
15, 16. Ge batho ba bolela dilo tšeo bona ba naganago gore e be e tla ba ditharollo tlhohlong ya kua Edene, re ka kgona go ba thuša bjang?
15 Na go na le motho legohleng yo a bego a ka swaragana le borabele bjoo ka bohlale go phala Jehofa? Batho ba bangwe ba ka bolela dilo tšeo bona ba naganago gore e be e tla ba ditharollo tša borabele bja kua Edene. Lega go le bjalo, na go dira bjalo e be e ka se be go bolela gore ba ka nagana ditsela tše kaone tša go rarolla kgang ye? Ba ka no se dire bjalo ka maikemišetšo a kgopo, eupša ga ba kwešiše Jehofa le bohlale bja gagwe bjo bo makatšago. Ge a ngwalela Bakriste ba kua Roma, moapostola Paulo o ile a epa ka mo go tseneletšego bohlaleng bja Modimo, go akaretša ‘sephiri se sekgethwa’ sa mabapi le morero wa Jehofa wa go diriša Mmušo wa Mesia gore o lopolle batho bao ba botegago le go kgethagatša leina la Gagwe le lekgethwa. Paulo o ile a ikwa bjang ka bohlale bja Modimo yo a ilego a rulaganya morero wo? Moapostola yo o phethile lengwalo la gagwe ka mantšu a: “Go Modimo, yo bohlale a nnoši, a go išwe letago ka Jesu Kriste go ya go ile. Amene.”—Baroma 11:25; 16:25-27.
16 Paulo o be a kwešiša gore Jehofa ke “yo bohlale a nnoši”—motho yo a phalago bohle legohleng ka bohlale. Ke motho ofe yo a sa phethagalago yo a bego a ka fo nagana ka tsela e kaone ya go swaragana le selo le ge e le sefe—re se sa bolela ka tsela e kgolo kudu yeo bohlale bja Modimo bo ilego bja belaelwa ka yona? Ka gona, re swanetše go thuša batho gore ba be le tlhompho e swanago le yeo re nago le yona ka Modimo wa “pelo e bohlale.” (Jobo 9:4) Ge re kwešiša gakaone bohlale bja Jehofa, ke mo re tla dumelago gore tsela ya gagwe ya go swaragana le ditaba ke e phalago tšohle.—Diema 3:5, 6.
Go Lemoga Seka se Segolo Kudu sa Jehofa
17. Go kwešiša lerato la Jehofa ka mo go tseneletšego go ka thuša bjang bao ba tshwenywago ke go dumelela ga Modimo tlaišego?
17 “Modimo ke lerato.” (1 Johane 4:8) Ka mantšu ao a makatšago, Beibele e hlaola seka se segolo kudu sa Jehofa, seka seo se kgahlišago kudu go di feta ka moka le se se homotšago go bao ba tlaišwago ke go ata ga bokgopo. Jehofa o bontšhitše lerato dikarolong ka moka tša tsela yeo a ilego a swaragana le tshenyo e kgolo kudu ya sebe tlholong ya gagwe. Lerato le ile la tutueletša Jehofa go nea bana ba sebe ba Adama le Efa kholofelo, a ba nea mokgwa wa go Mmatamela e le gore ba be le tswalano e amogelegago le Yena. Lerato le ile la tutueletša Modimo go nea sehlabelo seo se bego se tla bula tsela bakeng sa tebalelo e feletšego ya dibe le go boela bophelong bjo bo phethagetšego le bjo bo sa felego. (Johane 3:16) Le gona lerato le ile la mo tutueletša gore a se felele batho pelo, a nea ba bantši ka mo go ka kgonegago sebaka sa go gana Sathane le go kgetha Jehofa e le Mmuši wa bona.—2 Petro 3:9.
18. Re šegofaditšwe ka go ba le temogo efe, gomme ke’ng seo re tlago go se ahla-ahla sehlogong se se latelago?
18 Ge moruti yo mongwe a be a bolela le batheetši bao ba bego ba bokane go gopola letšatši la tlhaselo e tšhošago ya batšhošetši, o itše: “Ga re tsebe lebaka leo le dirago gore Modimo a dumelele bokgopo le tlaišego gore di tšwele pele.” A manyami ruri! Na ga se tšhegofatšo go rena ge re e-na le temogo tabeng ye? (Doiteronomio 29:29) Le gona ka ge Jehofa a le bohlale, a e-na le toko e bile a le lerato, re a tseba gore o tla fediša tlaišego ka moka kgaufsinyane. Ge e le gabotse, o holofeditše go dira bjalo. (Kutollo 21:3, 4) Lega go le bjalo, go thwe’ng ka bao ba hwilego go theoša le nywaga-kgolo? Na tsela ya Jehofa ya go swaragana le tlhohlo ya kua Edene e dira gore ba se ke ba ba le kholofelo? Aowa. Lerato le dirile gore le bona a ba direle ditokišetšo ka tsogo. Yeo ke taba ye e tlago go ahla-ahlwa sehlogong se se latelago.
O be o tla Araba Bjang?
• Re ka re’ng go motho yo a botšišago lebaka leo ka lona Modimo a dumelelago tlaišego?
• Bokgethwa le toko tša Jehofa di bonagala bjang tseleng yeo a ilego a swaragana le marabele a kua Edene?
• Ke ka baka la’ng re swanetše go thuša batho go kwešiša lerato la Jehofa ka botlalo?
[Dipotšišo tša Thuto]
[Seswantšho go letlakala 21]
Nyaka go thuša bao ba tshwenywago ke tlaišego yeo e lego mo lefaseng
[Diswantšho go letlakala 23]
Dafida le Habakuku bao ba botegago ba ile ba botšiša Modimo dipotšišo tše di tšwago pelong