Phenyo Kgorong ya Tsheko ya Ditshwanelo tša Batho ta Yuropa

KA JANUARY 11, 2007, Kgoro ya Tsheko ya Ditshwanelo tša Batho ya Yuropa kua Strasbourg, Fora, e tsebaditše phetho ya go dumelelana le Dihlatse tša Jehofa tša kua Russia molatong wa tšona o lego malebana le mokgatlo wa Russian Federation. Phetho yeo e ile ya fa Dihlatse tša Jehofa tokologo ya bodumedi le tshwanelo ya go sekišwa ka tsela e se nago go beba sefahlego. Anke re eleng hloko seo se dirilego gore go be le tsheko ye.

Bontši bja ditho tša phuthego ya Dihlatse tša Jehofa kua toropong ya Chelyabinsk, Russia, ke difoa. Lefelo leo ba bego ba kopanela go lona e be e le leo le hirilwego leo le lego kholetšheng ya go tlwaeletša mošomo. Ka Sontaga, April 16, 2000, seboka sa bona se ile sa šitišwa ke mookamedi wa mosadi, goba Molaodi, wa Mokgatlo wa tikologo wa Ditshwanelo tša Batho le baetapele ba babedi ba maphodisa gotee le lephodisa. Ka baka la go beba sefahlego, kudu-kudu ga Molaodi, pokano e ile ya emišwa ka ditatofatšo tša maaka le tša go ba thomeletša gore ba swere diboka ka ntle le tumelelo ya molao. Ga e sa le go tloga ka May 1, 2000, tumelelano ya bona ya go diriša phapoši yeo e ile ya fedišwa.

Dihlatse tša Jehofa di ile tša bula molato go motšhotšhisi wa kua Chelyabinsk, eupša gwa se be le nko e tšwago lemina. Molao-theo wa Russia le mokgatlo wa Tumelelano ya Tšhireletšo ya Ditshwanelo tša Batho gotee le Ditokologo tša Motheo di kgonthišetša gore go ba le tokologo ya bodumedi le ya go bokana. Ka baka leo go ile gwa bulwa molato kgorong ya tsheko ya selete, woo ka morago go ilego gwa dirwa boipiletšo bja gore o išwe kgorong ya tsheko ya tikologo. Pejana, ka July 30, 1999, kgoro-kgolo ya tsheko e ile ya ahlola tsheko e nngwe ka gore “go ya ka Molao wa Russia wa tokologo ya letswalo le ya dipokano tša bodumedi, polelwana e rego ‘ka ntle le tšhitišo’ e bolela gore ga go nyakege tumelelo e tšwago go, goba go kwana le, balaodi ba lefelong gore go dirwe ditirelo tša bodumedi lefelong leo ba le filwego [bakeng sa morero woo].” (Mašakana ke a bona.) Go sa šetšwe mohlala wo, dipelaelo tšeo di išitšwego kgorong ya tsheko ya selete le ya tikologo di ile tša phumolwa.

Ka December 17, 2001, molato woo o ile wa tlišwa Kgorong ya Tsheko ya Ditshwanelo tša Batho ya Yuropa. Tsheko e bile ka September 9, 2004. Tše di latelago ke ditsopolo tša mantšu a mafelelo a kahlolo ya Kgoro ya Tsheko:

“Kgoro e bona gore go ile gwa šitišanwa le tshwanelo ya bakgopedi ya tokologo ya bodumedi ka gobane, ka di-16 April 2000, bahlankedi ba Naga ba ile ba dira gore pokano ya bona e fele pele ga nako.”

“Go molaleng gore go šitiša tiragalo ya bodumedi yeo e bego e swerwe lefelong leo le hirilwego ka molao bakeng sa morero woo go be go se gwa thewa molaong.”

“[Kgoro] e tsebiša gore molao o tiilego woo o beilwego ke Kgoro-kgolo ya Tsheko ya Russia ke wo o rego dipokano tša bodumedi ga di tsome tumelelo, goba tsebišo, e dirwago e sa le pele ke babuši.”

“Go robilwe Karolo 9 [tokologo ya bodumedi] ya Tumelelano ge Molaodi le bathuši ba gagwe ba be ba šitiša seboka sa bakgopedi ka di-16 April 2000.”

“Kgoro e bona gore dikgoro tša naga tša tsheko di paletšwe ke go phetha mošomo wa tšona . . . wa go bontšha gore mahlakore ka bobedi a kwelwe ntle le go beba sefahlego le ka mokgwa o leka-lekanego. Go robilwe . . . Karolo 6 [tshwanelo ya go ba le tsheko e sa bebego sefahlego] ya Tumelelano.”

Dihlatse tša Jehofa di leboga Modimo bakeng sa go di fa phenyo Kgorong ya Tsheko ya Ditshwanelo tša Batho ya Yuropa. (Psalme 98:1) Phetho ya Kgoro ya Tsheko e tla ba le mafelelo afe a kgahlišago kudu? Joseph K. Grieboski, mopresidente wa Mokgatlo wa Bodumedi le Melao ya Setšhaba, o bolela gore: “Ye ruri ke phetho e bohlokwa yeo ka mo go kgethegilego e kgomago tokologo ya bodumedi kua Yuropa ka moka, bjalo ka ge phetho yeo e tla kgoma ditshwanelo tša bodumedi dinageng ka moka tšeo di welago ka tlase ga Kgoro ya Tsheko ya Ditshwanelo tša Batho ya Yuropa.”