Batšofadi—Tšhegofatšo go Bafsa
Batšofadi—Tšhegofatšo go Bafsa
“Byale xe ke tšofala, kè le wa hlôxô-pududu, O se ntloxêlê, ke bê ke anêxêlê ditloxolo tša ’tsôxô la xaxo; le meloko e tl’o xo tla yohle ke e anêxêlê ditirô tša xaxo tše matla.”—PSALME 71:18.
1, 2. Ke’ng seo bahlanka ba Modimo bao ba tšofetšego ba swanetšego go se lemoga, gomme ke’ng seo re tlago go se ahla-ahla gona bjale?
MOGOLO wa Mokriste wa kua Afrika Bodikela o ile a etela ngwanabo rena yo a tšofetšego wa motlotšwa gomme a mo dumediša a re, “Le kae?” Ngwanabo rena o ile a fetola ka gore, “Nka kitima, nka tshela-tshela, nka taboga e bile nka taboga-taboga ka leoto le tee,” a bile a leka go dira seo a se bolelago. O okeditše ka gore: “Eupša nka se kgone go fofa.” Seo a bego a se bolela se ile sa kwešišwa. ‘Seo ke kgonago go se dira, ke thabela go se dira, eupša seo ke sa kgonego go se dira, ga ke se dire.’ Mogolo yoo a bego a dirile leeto leo o nywageng ya gagwe ya bo-80 gona bjale, gomme o gopola go rata batho ga ngwanabo rena yoo gotee le potego ya gagwe e sa kwanantšhego.
2 Dika tšeo di bontšhago go boifa Modimo tšeo motšofadi a di bonagatšago di ka kgoma ba bangwe ka tsela e swarelelago. Ke therešo gore nywaga ka boyona ga e tšweletše bohlale le dika tše di swanago le tša Kriste. (Mmoledi 4:13) Beibele e re: “Hlôxô-pududu ké ’ala sa bothšephi; se hwetšwa tseleng ya xo loka.” (Diema 16:31) Ge e ba o motšofadi, na o lemoga kamoo mantšu a gago feela gotee le ditiro tša gago di ka kgomago ba bangwe ka tsela e holago? Ela hloko mehlala e mengwe ya Beibele yeo e bontšhago gore batšofadi ke tšhegofatšo ya kgonthe go bafsa go fihla bokgoleng bofe.
Tumelo e Nago le Mafelelo a Kgomago Kudu
3. Potego ya Noa e kgomile bohle bao ba phelago gona bjale ka tsela efe?
3 Tumelo ya Noa le go dula ga gagwe a tiile di bile le mohola woo o bonagalago gaešita le lehono. Noa o be a le kgaufsi le go ba le nywaga e 600 ge a be a aga areka, a kgoboketša diphoofolo le go dira boboledi go baagišani ba gagwe. (Genesi 7:6; 2 Petro 2:5) Ka baka la go boifa ga gagwe Modimo, Noa o ile a phologa Meetse-fula gotee le lapa la gagwe gomme a ba rakgolokhukhu wa batho ka moka bao ba phelago mo lefaseng lehono. Ke therešo gore Noa o phetše nakong ya ge batho ba be ba phela nako e telele. Lega go le bjalo, gaešita le ge a be a tšofetše kudu, Noa o ile a dula a botega gomme seo se na le ditšhegofatšo tše di lemogegago. Ka tsela efe?
4. Go ema ga Noa a tiile go hotše bjang diithuti tša Beibele lehono?
4 Noa o be a batametše nywaga ya bo-800 ge Nimirode a be a thoma go aga Tora ya Babele ka go nyatša taelo ya Jehofa e rego “le tlalê lefase.” (Genesi 9:1; 11:1-9) Lega go le bjalo, Noa ga se a ka a kgatha tema borabeleng bja Nimirode. Ka go rialo, go bonagala leleme la gagwe le se la ka la fetolwa ge marabele a be a raraganywa maleme. Tumelo ya Noa le go ema ga gagwe a tiile, tšeo di sa kago tša bonwa feela ge a tšofetše eupša gape le bophelong bja gagwe ka moka, ruri di swanelwa ke go ekišwa ke bahlanka ba Modimo ba nywaga ka moka.—Baheberu 11:7.
Tutuetšo ka Lapeng
5, 6. (a) Jehofa o boditše Aborahama gore a dire’ng ge a be a e-na le nywaga e 75? (b) Aborahama o ile a arabela bjang taelong ya Modimo?
5 Tutuetšo yeo batšofadi ba ka bago le yona tumelong ya ditho tša malapa a bona e ka bonwa maphelong a bapatriareka ba ka morago ga Noa. Aborahama o be a e-na le nywaga e ka bago e 75 ge Modimo a mmotša gore: “Tloxêla lefase lé la xeno, le metswalo ya xaxo, le ngwako wa tat’axô; O yê naxeng ye ke tl’o xo Xo laetša yôna. Xobane ke tlo Xo dira sethšaba se sexolo; ke tlo Xo šexofatša.”—Genesi 12:1, 2.
6 Anke o nagane o botšwa gore o tlogele legae la gago, bagwera ba gago, naga yeo o tswaletšwego go yona le tšhireletšo ya ba leloko leno gomme o ye nageng yeo o sa e tsebego. Aborahama o ile a botšwa gore a dire sona seo. O ile a “dira se Morêna a mmoditšexo sôna,” gomme o feditše bophelo bja gagwe ka moka a dula ditenteng bjalo ka modiiledi le mofaladi nageng ya Kanana. (Genesi 12:4; Baheberu 11:8, 9) Gaešita le ge Jehofa a ile a botša Aborahama gore o be a tla ba “sethšaba se sexolo,” o hwile nywaga e mentši pele bana ba gagwe ba ntšifala. Sara, e lego mosadi wa gagwe, o mmelegetše morwa o tee feela, Isaka, ka morago ga ge Aborahama a be a tšere leeto la nywaga e 25 la go ya nageng ya kholofetšo. (Genesi 21:2, 5) Lega go le bjalo, Aborahama ga se a ka a belaela gomme a gomela nageng yeo a bego a e-tšwa go yona. A mohlala o mogolo gakaakang wa tumelo le kgotlelelo!
7. Ke mafelelo afe ao kgotlelelo ya Aborahama e bilego le ona go morwa wa gagwe Isaka, gomme ya kgoma moloko wa batho bjang?
7 Kgotlelelo ya Aborahama e ile ya ba le tutuetšo e matla go morwa wa gagwe Isaka, yoo a feditšego bophelo bja gagwe ka moka—nywaga e 180—e le modiiledi nageng ya Kanana. Kgotlelelo ya Isaka e be e theilwe tumelong ya dikholofetšo tša Modimo, e lego tumelo yeo e ilego ya tiišetšwa go yena ke batswadi ba gagwe bao ba tšofetšego gomme ka morago ya matlafatšwa ke lentšu la Jehofa go yena. (Genesi 26:2-5) Go ema ga Isaka a tiile go kgathile tema e bohlokwa kudu go phethagatšweng ga kholofetšo ya Jehofa ya gore “peu” yeo e tlago go šegofatša moloko wa batho e tla tšwelela lešikeng la Aborahama. Nywaga e makgolo ka morago, Jesu Kriste, karolo ya motheo ya “peu” yeo, o ile a bulela bohle bao ba dumelago go yena tsela ya go ba kopanya le Modimo le go hwetša bophelo bjo bo sa felego.—Bagalatia 3:16; Johane 3:16.
8. Jakobo o bontšhitše bjang tumelo e tiilego, gomme ka mafelelo afe?
8 Ka morago, Isaka o ile a thuša morwa wa gagwe Jakobo go hlagolela tumelo e tiilego yeo e ilego ya mo matlafatša go fihla botšofading bja gagwe. Jakobo o be a e-na le nywaga e 97 ge a be a e-lwa le morongwa bošego ka moka gore a mo šegofatše. (Genesi 32:24-28) Pele a e-hwa a e-na le nywaga e 147, Jakobo o ile a ntšha matla a lekanego go šegofatša yo mongwe le yo mongwe wa barwa ba gagwe ba 12. (Genesi 47:28) Mantšu a boporofeta ao a a boletšego, ao ga bjale a hwetšwago go Genesi 49:1-28, a ile a itlhatsela e le therešo gomme a sa dutše a phethagala.
9. Go ka thwe’ng ka tšhušumetšo yeo batšofadi bao ba godilego moyeng ba nago le yona malapeng a bona?
9 Go molaleng gore bahlanka ba Modimo bao ba tšofetšego ba ka kgoma ditho tša malapa a bona ka tsela e nago le mohola. Tlhahlo e theilwego Mangwalong le keletšo e bohlale gotee le mohlala wa kgotlelelo di ka dira phapano e kgolo ya ge e ba mofsa a tla gola a e-na le tumelo e tiilego. (Diema 22:6) Bao ba godilego ga se ba swanela go tšeela fase tšhušumetšo e matla e holago yeo ba ka bago le yona malapeng a bona.
Tšhušumetšo go Barapedi-gotee
10. ‘Taelo ya Josefa ya mabapi le marapo a gagwe’ e be e le efe, gomme mafelelo a yona e bile afe?
10 Batšofadi gape ba ka ba le tutuetšo e botse go badumedi-gotee. Ge a tšofetše, morwa wa Jakobo e lego Josefa o ile a dira tiro e bonolo ya tumelo yeo e bilego le mafelelo a mabotse go barapedi ba therešo ba dimilione bao ba phetšego ka morago ga gagwe. O be a e-na le nywaga e 110 ge a be “a nea taelo mabapi le marapo a gagwe,” e rego, ge mafelelong Baisiraele ba tloga Egipita, ba be ba swanetše go sepela le marapo a gagwe. (Baheberu 11:22; Genesi 50:25) Taelo yeo ile ya ba bjalo ka lebaka la gore Isiraele e be le kholofelo nakong ya nywaga e mentši ya bokgoba bjo thata bjoo bo ilego bja tla ka morago ga lehu la Josefa, ka go nea kgonthišetšo ya gore tlhakodišo ya bona e be e tla tla.
11. Moše yo a tšofetšego a ka ba a ile a ba le tutuetšo efe go Jošua?
11 Moše e be e le yo mongwe wa bao ba ilego ba kgothatšwa ke mantšu a Josefa a tumelo. Ge Moše a be a e-na le nywaga e 80, o ile a ba le tokelo ya go rwala marapo a Josefa gomme a tloga le ona nageng ya Egipita. (Ekisodo 13:19) Mo e ka bago ka yona nako yeo, o ile a kopana le Jošua, yoo a bego a le yo monyenyane kudu. Nywageng e 40 e latetšego, Jošua o ile a ba mohlanka wa Moše. (Numeri 11:28) O ile a felegetša Moše Thabeng ya Sinai gomme o be a le gona bakeng sa go gahlanetša Moše ge a be a fologa thaba a swere diphaphathi tša mafsika a Melao. (Ekisodo 24:12-18; 32:15-17) A mothopo o mogolo gakaakang wa keletšo e tšeago gabotse le e bohlale woo Moše a swanetšego go ba a be a le wona go Jošua!
12. Jošua o ile a itlhatsela bjang e le tutuetšo e botse go setšhaba sa Isiraele nakong ka moka ya bophelo bja gagwe?
12 Ka morago, Jošua o ile a kgothatša setšhaba sa Isiraele mehla yohle ya ge a sa phela. Baahlodi 2:7 e re botša gore: “Mehleng yohle ya xe Jošua à sa phela, sethšaba se be se dirêla Morêna, le mehleng yohle ya xe xò sa phela baxolo bao ba ba phetšexo xa-lelele mehleng ya xe Jošua à šetše à ile; bôná-bao ba ba bonexo ditirô tše kxolo tše Morêna a di diretšexo Isiraele.” Lega go le bjalo, ka morago ga lehu la Jošua le la banna ba bagolo go ile gwa thoma mehla ya nywaga e 300 ya go palelwa ke go kgetha bodumedi bja therešo le bja maaka, yeo e ilego ya fihla mehleng ya moporofeta Samuele.
Samuele o Ile a “Phetha Toko”
13. Samuele o dirile’ng go “phetha toko”?
13 Beibele ga e bolele gore Samuele o hwile a e-na le nywaga e mekae, eupša ditiragalo tše di lego ka pukung ya Pele ya Samuele ke tša nywaga e ka bago e 102, gomme Samuele o bone tše dintši tša tšona. Go Baheberu 11:32, 33, re bala gore baahlodi ba lokilego le baporofeta ba ile ba “phetha toko.” Ee, Samuele o ile a tutueletša batho ba bangwe ba mehleng ya gagwe gore ba pheme goba ba lahle ditiro tše fošagetšego. (1 Samuele 7:2-4) Ka ditsela dife? O be a botegela Jehofa ka go se kwanantšhe bophelo bja gagwe ka moka. (1 Samuele 12:2-5) O be a sa tšhabe go fa gaešita le kgoši keletšo e matla. (1 Samuele 15:16-29) Go oketša moo, Samuele, ka ge a be a ‘tšofetše e bile e le yo mopududu,’ o ile a iponagatša e le mohlala ka go rapelela ba bangwe. O be a bona e le ‘go senyetša Morena go lesa go rapelela’ Baisiraele-gotee le yena.—1 Samuele 12:2, 23.
14, 15. Batšofadi lehono ba ka ekiša Samuele bjang tabeng ya thapelo?
14 Dilo tše ka moka di gatelela tsela e bohlokwa yeo ka yona batšofadi ba tutuetšago bahlanka-gotee le bona ba Jehofa. Go sa šetšwe mafokodi ao a bakwago ke mathata a tša maphelo goba maemo a mangwe, batšofadi ba ka rapelela ba bangwe. Lena bao le godilego, na le lemoga kamoo dithapelo tša lena di holago phuthego ka gona? Ka baka la tumelo ya lena mading a tšholotšwego a Kriste, le na le boemo bjo bobotse pele ga Jehofa, le gona ka baka la pego ya lena ya kgotlelelo, tumelo ya lena e hweditše ‘boemo bjo bo lekilwego.’ (Jakobo 1:3; 1 Petro 1:7) Le se ke la tsoga le lebetše gore: “Topo ya moloki, ge e šoma, e na le matla kudu.”—Jakobo 5:16.
15 Dithapelo tša lena tšeo di thekgago modiro wa Jehofa wa Mmušo di a nyakega. Bana babo rena ba bangwe ba golegilwe ka baka la boema-gare bja bona bja Bokriste. Ba bangwe ba bile bahlaselwa ba dikotsi tša tlhago, dintwa le dintwa tša selegae. Ba bangwe le bona, ka diphuthegong tša gabo rena, ba lebeletšane le diteko goba kganetšo. (Mateo 10:35, 36) Bao ba etelelago pele modiro wa boboledi le go okamela diphuthego le bona go nyakega gore le ba rapelele ka mehla. (Baefeso 6:18, 19; Bakolose 4:2, 3) Ke mo gobotse gakaakang gore le bolela ka badumedi-gotee dithapelong tša lena, go swana le Epafora!—Bakolose 4:12.
Go Ruta Moloko o sa Tlago
16, 17. Ke’ng seo go boletšwego ka sona e sa le pele go Psalme 71:18, gomme se se phethagetše bjang?
16 Go tlwaelana le bao ba botegago ba “mohlatswana,” bao ba nago le kholofelo ya go yo phela legodimong, go neile tlwaetšo e nyakegago go ba “dinku tše dingwe,” e lego bao ba nago le kholofelo ya go phela lefaseng ka mo go sa felego. (Luka 12:32; Johane 10:16) Se go boletšwe ka sona e sa le pele go Psalme 71:18, yeo e balegago ka gore: “Byale xe ke tšofala, kè le wa hlôxô-pududu, O se ntloxêlê, ke bê ke anêxêlê ditloxolo tša ’tsôxô la xaxo; le meloko e tl’o xo tla yohle ke e anêxêlê ditirô tša xaxo tše matla.” Bao ba tloditšwego ka moya ba be ba dutše ba fagahlela go tlwaetša bagwera ba bona ba dinku tše dingwe boikarabelo bjo bo oketšegilego pele ba ba tlogela ge ba e-ya go tagafatšwa gotee le Jesu Kriste.
17 Ka tsela ya molao wa motheo, seo Psalme 71:18 e se bolelago ka “meloko e tl’o xo tla” le sona se ka šoma go ba dinku tše dingwe, bao ba amogetšego tlhahlo e tšwago go batlotšwa ba Modimo. Jehofa o file batšofadi tokelo ya go bolela ka yena go bao gona bjale ba amogelago borapedi bja therešo. (Joele 1:2, 3) Ba dinku tše dingwe ba ikwa ba šegofaditšwe ka baka la seo ba ithutilego sona go tšwa go batlotšwa e bile ba šušumeletšega go ruta ba bangwe bao ba sa nyakago go hlankela Jehofa thuto ya bona ya Mangwalo.—Kutollo 7:9, 10.
18, 19. (a) Ke tsebišo efe e bohlokwa yeo bahlanka ba Jehofa ba bantši ba batšofadi ba ka e neago? (b) Bakriste bao ba tšofetšego ba swanetše go kgodišega ka eng?
18 Bahlanka ba Jehofa ba ba šetšego ba godile, bao ba tloditšwego le ba dinku tše dingwe, ke digopotši tše di phelago tša ditiragalo tše bohlokwa historing. Ba sego kae bao ba sa dutšego ba phela ba be ba le gona ge go be go bontšhwa “Photo-Drama of Creation” la mathomo. Ba bangwe ba be ba tseba bana babo rena bao ba etelelago pele bao ba bego ba golegilwe ka 1918. Ba bangwe ba ile ba tšea karolo kgašong ya seteišene sa radio sa Watchtower, e lego WBBR. Ba bantši ba ka hlalosa nako yeo ka yona go bego go sekwa melato yeo e akaretšago ya tokologo ya bodumedi ya Dihlatse tša Jehofa yeo e bego e lwelwa ka dikgorong-kgolo tša tsheko. Lega go le bjalo ba bangwe ba ile ba emela borapedi bja therešo ba tiile ge ba dutše ba phela ka tlase ga dipušo tša bogateledi. Ee, batšofadi ba ka hlalosa kamoo kwešišo ya therešo e ilego ya utollwa ganyenyane-ganyenyane ka gona. Beibele e re kgothaletša go holwa ke lehumo le la phihlelo.—Doiteronomio 32:7.
19 Bakriste bao ba tšofetšego ba kgothaletšwa go ba mehlala e mebotse go bafsa. (Tito 2:2-4) Mohlomongwe ga bjale ga le bone kamoo kgotlelelo ya lena, dithapelo le keletšo ya lena di kgomago ba bangwe ka gona. Noa, Aborahama, Josefa, Moše, gotee le ba bangwe ba ka no ba ba sa ka ba lemoga gore potego ya bona e be e tla kgoma kudu meloko yeo e bego e sa tla. Lega go le bjalo, pego ya bona ya tumelo le potego e bile le mafelelo a tseneletšego; le ya gago e bjalo.
20. Ke tšhegofatšo efe yeo e letetšego bao ba bolokago kholofelo ya bona e tiile go fihla bofelong?
20 Go sa šetšwe gore o phološwa ‘masetlapelong a magolo’ goba o bušwa ka tsogo, ruri e tla ba mo go thabišago go phela ‘bophelo bja kgonthe’! (Mateo 24:21; 1 Timotheo 6:19) Nagana ka nako ya Pušo ya Nywaga e Sekete ya Kriste ge Jehofa a tla be a fediša mafelelo a botšofadi. Go e na le go gwahlafala mebeleng, letšatši le lengwe le le lengwe re tla tsoga re bona re kaonefala mmeleng ganyenyane-ganyenyane—matla a oketšegilego, go bona gabotse, go kwa gabotse le go bogega gabotse! (Jobo 33:25; Jesaya 35:5, 6) Bao ba šegofaditšwego ka go phela lefaseng le lefsa la Modimo ba tla dula e le ba banyenyane ge ba bapetšwa le bosafelego bjo bo sa letšego ka pele. (Jesaya 65:22) Ka baka leo, anke ka moka ga rena re boloke kholofelo ya rena e tiile go fihla bofelong gomme re tšwele pele re hlankela Jehofa ka moya ka moka. Re ka kgodišega gore Jehofa o tla phethagatša dikholofetšo tša gagwe ka moka le gore seo a tlago go se dira se tla feta kgole tebelelo le ge e le efe yeo re ka bago re e-na le yona.—Psalme 37:4; 145:16.
O be o tla Araba Bjang?
• Go ema ka go tia ga Noa yo a tšofetšego go ile gwa hola moloko wa batho ka moka bjang?
• Tumelo ya bapatriareka e bile le mafelelo afe baneng ba bona?
• Ge ba le botšofading bja bona, Josefa, Moše le Samuele ba matlafaditše barapedi-gotee bjang?
• Batšofadi ba ka fetišetša pego efe?
[Dipotšišo tša Thuto]
[Seswantšho go letlakala 26]
Kgotlelelo ya Aborahama e ile ya kgoma Isaka ka mo go tseneletšego
[Seswantšho go letlakala 28]
Keletšo ya Moše yeo e budulego e kgothaditše Jošua
[Seswantšho go letlakala 29]
Go rapelela ga lena ba bangwe go ka ba le mafelelo a mabotse kudu
[Seswantšho go letlakala 30]
Bafsa ba holwa ke go theetša batšofadi ba ba botegago