Bokgopo—Na ga bo sa Laolega?
Bokgopo—Na ga bo sa Laolega?
Mošemane yo monyenyane yo a ratago go tseba o topa selo se sengwe ka mašemong—pomo ya go epelwa fase—o a foufala gotee le go golofalela sa ruri. Mma o lahla lesea la gagwe leo le sa tšwago go belegwa, o le uta ka gare ga ditlakala tšeo di lego ka thoko ga tsela. Mošomi yo a sa tšwago go tlogedišwa mošomo o boela moo a bego a šoma gona, o thunya motho yo mongwe le yo mongwe yo a kopanago le yena gomme ka morago o a ipolaya. Modudi yo a hlomphegago o goboša bana bao ba sa kgonego go itšhireletša ka dikopano tša botona le botshadi.
KA MANYAMI, dipego tše swanago le tše, tša ditiro tša bokgopo ke tše di tlwaelegilego kudu mehleng ya rena. Se se nyamišago le go feta ke gore dipego tše di bonagala e le tše dinyenyane ge di bapišwa le dipego tša go fedišwa ga morafe, dipolao tša molokwanarite le botšhošetši. Kuranta yeo e gatišitšwego ka 1995 e boletše gore: “Manyami a magolo ke gore, ngwaga-kgolo wo e be e le wa Sathane, ka bokgopo bja wona. Nywageng ya pele, batho ga se ba ka ba bontšha bokgoni le kganyogo e kaakaa ya go bolaya batho ba dimilione ka mabaka a botšhaba, bodumedi le maemo.”
Ka nako e swanago, batho ba šilafatša moya, ba šilafatša lefase, ba senya ditšweletšwa tša tlhago gomme ba bolaya mehuta e sa balegego ya diphoofolo ka boati moo e lego gore di kgaufsi le go fela. Na batho ba ka kgona go fenya bokgopo bjo le go dira gore lefase e be lefelo le lekaone le leo le bolokegilego? Goba na go dira bjalo go tla swana le go leka go itoma sejabana? Moprofesara yo a ngwadilego dipego tše dintši mabapi le bokgopo o boletše gore: “Ke be ke e-na le kganyogo e tseneletšego ya go dira diphetogo tše bohlokwa lefaseng, go kaonefatša lefase. Eupša lefase ga le bonagale le kaonefala.” Mohlomongwe le wena o ikwa ka tsela yeo.
Tsela yeo lefase le sepelago ka yona e ka swantšhwa le sekepe seo se sesago ka lewatleng leo le galefilego le leo le bago kotsi letšatši le letšatši. Le ge go se na yo a nyakago go sepela ka tsela yeo, maiteko ka moka a go nyaka go sepela ka tsela e nngwe ga a atlege. Sekepe se fo sesela ka gare ga ledimo, se sa emišege.
Go fihla bokgoleng bjo itšego, boemo bjo bjo bo phuhlamago nako le nako bo ka swantšhwa le go se phethagale ga motho. (Baroma 3:23) Lega go le bjalo, go ata ga bokgopo, go phatlalala ga bjona le go se phemege ga bjona go bonagala di feta kgole lehloyo leo batho ba nago le lona. Na go na le kgonagalo ya gore batho ba tutuetšwa ke moya o sa bonagalego eupša e le o matla le o kgopo? Ge e ba go le bjalo, ke ofe, le gona re ka itšhireletša bjang? Sehlogo se se latelago se tla araba dipotšišo tše.
[Mothopo wa Seswantšho go letlakala 3]
© Heldur Netocny/Panos Pictures