Dipotšišo tše Tšwago go Babadi

Na Diema 22:6 ke kgonthišetšo ya gore ge bana ba Bakriste ba tlwaeditšwe gabotse, ba ka se tlogele tsela ya Jehofa?

Temana ye e balega ka gore: “Ngwana mo eteletše tsela y’axwe; ké mo a tl’o xo tšofala à sa ka a e lahla.” Go fo swana le ge go kobega ga mohlašana go tutuetša tsela yeo o golago ka yona, bana bao ba tlwaetšwago gabotse ba ba le tshekamelo e kgolo ya go tšwela pele ba hlankela Jehofa ge ba gola. Bjalo ka ge motswadi yo mongwe le yo mongwe a tseba, tlwaetšo e bjalo e nyaka nako e ntši le maiteko. Gore ba dire bana ba bona barutiwa ba Bakriste, batswadi ba swanetše go ruta ka kelohloko, go lemoša, go kgothatša le go laya bana ba bona gotee le go ba beela mohlala o mobotse. Ba swanetše go dira se ka mehla le ka lerato ka nywaga e mentši.

Lega go le bjalo, na se se bolela gore ge e ba ngwana a tlogela go hlankela Jehofa, tlwaetšo ya batswadi e fošagetše? Ka dinako tše dingwe, batswadi ba ka ba ba ile ba palelwa ke go dira maiteko a go godiša bana ka tayo le tlhahlo ya monagano ya Jehofa. (Baefeso 6:4) Ka lehlakoreng le lengwe, seema se ga se kgonthišetše gore tlwaetšo e botse e tla tšweletša bana bao ba botegelago Modimo. Batswadi ba ka se dire gore bana ba bona e be seo bona ba se nyakago. Go swana le batho ba bagolo, bana ba na le boikgethelo gomme mafelelong ba swanetše go ikgethela seo ba nyakago go se dira ka maphelo a bona. (Doiteronomio 30:15, 16, 19) Go sa šetšwe maiteko a matla a batswadi, bana ba bangwe ba thoma go se sa botega go etša Salomo, yo a ngwadilego temana ye re e ahla-ahlago. Jehofa le yena o kile a ba le barwa ba go se botege.

Ka gona, lengwalo le ga le bontšhe gore tabeng e nngwe le e nngwe ngwana ‘a ka se ke a e lahla’ eupša ka kakaretšo se se tla direga. A kgothatšo e matla gakaakang go batswadi! Batswadi ba swanetše go kgothatšwa ke go tseba gore go leka ga bona ka matla ge ba ruta bana ba bona ka tsela ya Jehofa go tla ba le mafelelo a mabotse. Ka ge tema yeo ba e kgathago e le e bohlokwa le tutuetšo ya bona e le e kgolo, batswadi ba kgothaletšwa go tšeela tema ya bona godimo.—Doiteronomio 6:6, 7.

Gaešita le ge bana ba ka kgaotša go hlankela Jehofa, batswadi bao ba bego ba phafogetše go tlwaetša bana ba bona, ba ka holofela gore bana ba bona ba tla hlaphogelwa. Therešo ya Beibele ke e matla gomme tlwaetšo ya batswadi ga e lebalwe ka pela.—Psalme 19:7.