Go Bea Dienywa tša Moya le Botšofading
Go Bea Dienywa tša Moya le Botšofading
“Ba ba bjetšwego ngwakong wa Jehofa . . . ba sa tlo bea dikenyo le botšofading bja bona.”—PSALME 92:14, 15, PK.
1, 2. (a) Botšofadi gantši bo hlaloswa bjang? (b) Mangwalo a holofetša’ng mabapi le ditla-morago tša sebe sa Adama?
BOTŠOFADI—lentšu leo le tliša’ng kgopolong ya gago? Na le tliša letlalo le le šošobanego? Go se kwe gabotse? Ditho tše di fokolago? Goba na le tliša seka se sengwe sa “matšatši a mabe” seo se bontšhitšwego ka mo go feletšego go Mmoledi 12:1-7? Ge e le gore go bjalo, go bohlokwa go gopola gore tlhaloso yeo e lego go Mmoledi kgaolo 12 ke ya botšofadi, e sego bjalo ka ge Mmopi, Jehofa Modimo, a be a rerile mathomong, eupša bjalo ka ge e le mafelelo a sebe sa Adama mmeleng wa motho.—Baroma 5:12.
2 Botšofadi ka bobjona ga se kotlo, ka gobane gore motho a dule a le gona go nyakega gore nywaga e fete. Ge e le gabotse, kgolo le go butšwa ke dika tšeo di kgahlišago tša dilo ka moka tšeo di phelago. Tshenyego ya nywaga e dikete tše tshela ya sebe le go se phethagale yeo re e bonago makgatheng a rena e tla ba selo sa nakong e fetilego kgaufsinyane gomme batho ka moka bao ba kwago ba tla thabela bophelo bjoo ba bopetšwego go bo phela, bjo bo se nago mahloko a botšofadi le lehu. (Genesi 1:28; Kutollo 21:4, 5) Nakong yeo, “Mo xo ba ba axilexo fá xo ka se bê le e a rexo: Ke a babya!” (Jesaya 33:24) Batšofadi ba tlo boela ba etša ‘mola e sa le ba bafsa,’ gomme nama ya bona ‘e tlo boela ya mpshafala.’ (Jobo 33:25) Lega go le bjalo, ga bjale bohle ba swanetše go katana le bohwa bja Adama. Lega go le bjalo, bahlanka ba Jehofa ba šegofatšwa ka ditsela tše kgethegilego ge ba dutše ba tšofala.
3. Bakriste ba ka tšwela pele ba “bea dikenyo le botšofading bja bona” ka ditsela dife?
3 Lentšu la Modimo le re kgonthišetša gore “ba ba bjetšwego ngwakong wa Jehofa . . . ba sa tlo bea dikenyo le botšofading bja bona.” (Psalme 92:13, 14, PK) A diriša polelo ya dika, mopsalme o bolela therešo ya motheo ya gore bahlanka ba Modimo ba ba botegago ba ka tšwela pele ba dira tšwelopele, ba letlega le go atlega moyeng, gaešita le ge ba gwahlafala mmeleng. Mehlala e mentši ya ka Beibeleng le ya mehleng yeno e bontšha gore se ke therešo.
“Yo a Bego a sa ke a Hlokwa”
4. Moporofeta yo a tšofetšego wa mosadi e lego Anna o bontšhitše boineelo bja gagwe go Modimo bjang, gomme o ile a putswa bjang?
4 Ela hloko moporofeta wa mosadi wa lekgolong la pele la nywaga e lego Anna. Ge a be a e-na le nywaga e 84, e be e le “yo a bego a sa ke a hlokwa tempeleng, a dira tirelo e kgethwa bošego le mosegare ka go ikona dijo le go lopa.” Bjalo ka mosadi yo tatagwe e bego e se Molefi “wa moloko wa Ašere,” Anna o be a ka se phele ka tempeleng ka go lebanya. Nagana ka maiteko ao a ilego a swanelwa ke go a dira gore a dule a le tempeleng letšatši le letšatši go tloga tirelong ya mesong go fihla go ya mantšiboa! Lega go le bjalo, Anna o ile a putswa ka mo go humilego ka baka la boineelo bja gagwe. O ile a ba le tokelo ya go ba gona ge Josefa le Maria ba be ba tliša Jesu wa lesea pele ga Jehofa tempeleng go ya ka Molao. Ge a bona Jesu, Anna o ile “a thoma go leboga Modimo le go bolela ka ngwana go bohle bao ba bego ba letetše tlhakodišo ya Jerusalema.”—Luka 2:22-24, 36-38; Numeri 18:6, 7.
5, 6. Batšofadi ba bantši lehono ba bonagatša moya wa go swana le wola wa Anna ka ditsela dife?
5 Go swana le Anna, batšofadi ba bantši bao re phelago le bona lehono ba ba gona dibokeng ka mehla, ba lopa Jehofa go tšwa pelong bakeng sa tšwelopele ya borapedi bja therešo e bile ba kganyoga ka phišego go bolela ditaba tše dibotse. Ngwanabo rena yo a lego nywageng ya gagwe ya bo-80 yo a bago gona dibokeng tša Bokriste ka mehla le mosadi wa gagwe o itše: “Re hlagoletše mokgwa wa go ya dibokeng. Ga re nyake go ba lefelong le ge e le lefe le lengwe. Moo batho ba Modimo ba lego gona, ke moo re nyakago go ba gona. Ke moo re ikwago re šireletšegile.” A mohlala o kgothatšago gakaakang go bohle!—Baheberu 10:24, 25.
6 “Ge go tšwelela selo le ge e le sefe sa moya gomme nka kgona go ba karolo ya sona, ke dira bjalo.” Woo ke moano wa Jean, mohlologadi wa Mokriste yo a lego nywageng ya gagwe ya bo-80. O tšwela pele ka gore: “Ke therešo gore ke a nyama ka dinako tše dingwe, eupša ke ka baka la’ng batho bohle bao ke dulago le bona ba swanetše go nyama ge ke nyamile?” Ka mahlahla, o bontšhitše lethabo la go etela dinaga tše dingwe bakeng sa dinako tšeo di agago moyeng. Leetong la gagwe la morago bjale, o boditše bao a bego a sepela le bona gore, “Ga ke sa nyaka go bona dilo tšeo di kgahlago baeti ba basepedi; ke nyaka go ya bodireding bja tšhemo!” Gaešita le ge a be a sa tsebe leleme la moo, Jean o ile a kgona go tsoša kgahlego ya batho ya molaetša wa Beibele. Go oketša moo, o ile a hlankela ka nywaga e mmalwa phuthegong yeo e bego e nyaka thušo, gaešita le ge se se be se nyaka gore a ithute leleme le lefsa le gore a sepele iri ka moka leetong le lengwe le le lengwe la go ya dibokeng.
Go Boloka Monagano o le Mafolofolo
7. Botšofading bja gagwe, Moše o bontšhitše bjang kganyogo ya go godiša tswalano ya gagwe le Modimo?
7 Phihlelo bophelong e tlišwa ke go feta ga nako. (Jobo 12:12) Ka lehlakoreng le lengwe, tšwelopele ya moya ga e fo itlela ge motho a gola. Ka baka leo, go e na le go fo ithekga ka tsebo e šaletšego yeo ba sa lego ba e hwetša nakong e fetilego, bahlanka ba Modimo ba ba botegago ba katanela go ‘ekeletšwa tsebo’ ge nywaga e dutše e feta. (Diema 9:9) Ge Jehofa a be a mo kgetha, Moše o be a e-na le nywaga e 80. (Ekisodo 7:7) Mehleng ya gagwe, go molaleng gore go phela go fihla nywageng yeo go be go lebelelwa e le mo go sa tlwaelegago, ka gobane o ngwadile gore: “’Phelô bya rena ké nywaxa e masome a šupaxo; xo yo thata ké masome a seswai.” (Psalme 90:10) Lega go le bjalo, Moše ga se a ka a ikwa a tšofetše kudu go ka ithuta. Ka morago ga go hlankela Modimo ka nywaga e masome, go thabela ditokelo tše dintši le go rwala boikarabelo bjo bo imelago, Moše o ile a kgopela Jehofa gore: “Ntsebišê tsela ya xaxo hlê, xore ke Xo tsebê.” (Ekisodo 33:13) Moše o be a dula a ikemišeditše go godiša tswalano ya gagwe le Jehofa.
8. Daniele o ile a boloka bjang monagano wa gagwe o le mafolofolo go ba go fihla nywageng ya gagwe ya bo-90, gomme ka mafelelo afe?
8 Moporofeta Daniele, mohlomongwe a le nywageng ya gagwe ya bo-90, o be a sa hwetšwa a hlahloba mangwalo a makgethwa ka kelohloko. Seo a ilego a se lemoga ge a be a ithuta “dipukung”—tšeo di ka bago di akaretša Lefitiko, Jesaya, Jeremia, Hosea le Amosi—se ile sa mo tutueletša go tsoma Jehofa ka thapelo e tšwago pelong. (Daniele 9:1, 2, PK) Thapelo yeo e ile ya arabja ka tsebišo e buduletšwego ya mabapi le go tla ga Mesia le borapedi bjo bo sekilego bja nakong e tlago.—Daniele 9:20-27.
9, 10. Ke’ng seo ba bangwe ba se dirilego go boloka monagano o le mafolofolo?
9 Ka go swana le Moše le Daniele, re ka katanela go boloka menagano ya rena e le mafolofolo ka go tsepamišetša dikgopolo tša rena dilong tša moya nakong ka moka ya ge re sa kgona go dira bjalo. Ba bantši ba dira sona seo. Worth, mogolo wa Mokriste yo a lego nywageng ya gagwe ya bo-80, o katanela go dula a le nakong ka dijo tša moya tšeo di abjago ke “mohlanka yo a botegago le wa temogo.” (Mateo 24:45) O re, “Ke fo ba ke rata therešo e le ruri, gomme ke thabela go bona kamoo seetša sa therešo se golago ganyenyane-ganyenyane ka gona.” (Diema 4:18) Ka mo go swanago, Fred, yo a feditšego nywaga e fetago e 60 a le tirelong ya nako e tletšego, o bona go tsoša dipoledišano tša Beibele le badumedi-gotee e le mo go tutuetšago moyeng. O re: “Ke swanetše go boloka Beibele e phela ka kgopolong ya-ka. Ge e ba o kgona go phediša Beibele—go e dira gore e be le seo e se bolelago—le ge e ba o ka kgona go dumelelanya seo o ithutago sona le ‘mohlala wa mantšu a phedišago,’ gona ga o fo ba le diripana-ripana tša tsebišo tšeo di aroganego. O ka bona kamoo seripana se sengwe le se sengwe sa therešo se phadimago ka gona se le mo se swanetšego go ba gona.”—2 Timotheo 1:13.
10 Go ba yo a godilego ga go go iletše go ithuta dilo tše difsa le tše thata. Batho ba lego nywageng ya bo-60, 70, gaešita le ya bo-80 ba šetše ba fentše go se rutege goba ba šetše ba ithutile maleme a mafsa. Dihlatse tše dingwe tša Jehofa di dirile bjalo ka morero wa go bolela ditaba tše dibotse le batho ba ditšhaba tše di fapa-fapanego. (Mareka 13:10) Harry le mosadi wa gagwe ba be ba le kgaufsi le go ba le nywaga e 70 ge ba be ba dira phetho ya go yo thuša tšhemong ya Sepotokisi. Harry o re: “Go bolela therešo, modiro le ge e le ofe bophelong o a thatafala ge motho a gola.” Lega go le bjalo, ka go dira maiteko le go phegelela, ba ile ba kgona go swara dithuto tša Beibele ka Sepotokisi. Gona bjale e šetše e le nywaga e mentši Harry a neela dipolelo tša kopano ya selete ka leleme la gagwe le lefsa.
11. Ke ka baka la’ng go swanetšwe go elwa hloko seo batšofadi ba botegago ba se fihleletšego?
11 Ke therešo gore ga se mang le mang yo a nago le boemo bjo bobotse bja tša maphelo goba a dumelelwago ke maemo gore a amogele ditlhohlo tše bjalo. Bjale ke ka baka la’ng go elwa hloko seo batšofadi ba bangwe ba se fihleletšego? Ruri ga se ka morero wa go šišinya gore ka moka ba swanetše go katanela go fihlelela dilo tše di swanago. Go e na le moo, ke ka moya wa seo moapostola Paulo a se ngwaletšego Bakriste ba Baheberu mabapi le bagolo ba botegago ba phuthego gore: “Ge le dutše le akanya kamoo boitshwaro bja bona bo felelago ka gona, le ekiše tumelo ya bona.” (Baheberu 13:7) Ge re akanya ka mehlala e bjalo ya mafolofolo, re ka tutueletšega go ekiša tumelo e matla yeo e šušumetšago batšofadi ba tirelong ya bona go Modimo. Ge a hlalosa seo se mo tutuetšago, Harry, yo ga bjale a nago le nywaga e 87, o re: “Ke nyaka go diriša nywaga ya-ka yeo e šetšego ka bohlale gomme ke be le mohola kudu ka mo go ka kgonegago tirelong ya Jehofa.” Fred, yoo go boletšwego ka yena pejana, o kgotsofatšwa kudu ke go phetha kabelo ya gagwe ya Bethele. O re, “O swanetše go bona kamoo o ka hlankelago Jehofa gakaone-kaone ka gona gomme o tšwele pele o dira bjalo.”
Go Ineela go sa Šetšwe Maemo a Fetogago
12, 13. Barasilai o ile a bonagatša bjang boineelo bja gagwe go Modimo go sa šetšwe maemo a gagwe ao a bego a fetogile?
12 Go tlwaelana le diphetogo tša mmele go ka ba thata. Lega go le bjalo, go bonagatša boineelo go Modimo go sa šetšwe diphetogo tše bjalo go a kgonega. Barasilai wa Mogileada ke mohlala o mobotse tabeng ye. Ge a be a e-na le nywaga e 80, o ile a bontšha Dafida le madira a gagwe moya wa go amogela baeng ka tsela e sa tlwaelegago, a ba nea dijo le marobalo nakong ya borabele bja Abesalomo. Ge Dafida a be a boela Jerusalema, Barasilai o ile a felegetša bafelegetši ba gagwe Nokeng ya Jorodane. Dafida o ile a kgopela Barasilai gore a be setho sa ka mošate wa gagwe. Barasilai o ile a araba bjang? “Byale ke na le nywaxa e masome a seswai. . . . Nna mohlanka wa xaxo xa ke sa kwa bose bya se ke se jaxo. Le dikoša tša baopedi xa ke sa di kwa. . . . Kimehama mohlanka wa xaxo šó; a yêna a yê le kxoši mong wa-ka. Yêna O mo dirê ka mo O rataxo.”—2 Samuele 17:27-29; 19:31-40.
13 Go sa šetšwe maemo a gagwe ao a bego a fetogile, Barasilai o ile a dira seo a bego a ka se kgona go thekga kgoši e kgethilwego ke Jehofa. Gaešita le ge a ile a lemoga gore dikwi tša gagwe tša tatso le tša go kwa ga di sa le ka mokgwa woo di bego di le ka wona, ga se a ka a ferekanywa ke seo. Go e na le moo, ka go bolela ntle le boithati gore Kimehama a holwe ke seo a bego a se fiwa, Barasilai o ile a utolla mohuta wa motho yo a bego a le yena ka pelong. Ka go swana le Barasilai, batšofadi ba bantši lehono ba bonagatša moya wa go hloka boithati le wa go nea ka seatla se se bulegilego. Ba dira seo ba ka se kgonago go thekga borapedi bja therešo, ba tseba gore “Modimo o kgahlišwa ke dihlabelo tše bjalo.” Ruri ke tšhegofatšo go ba le babotegi makgatheng a rena!—Baheberu 13:16.
14. Nywaga ya Dafida yeo e iketšego e dira bjang gore mantšu ao a begilwego go Psalme 37:23-25 a kwagale?
14 Gaešita le ge maemo a Dafida a ile a fetoga gantši ge nywaga e dutše e e-ya, o ile a dula a kgodišegile gore go hlokomela ga Jehofa bahlanka ba gagwe ba ba botegago ka go se kwanantšhe ga go fetoge. Go ya mafelelong a bophelo bja gagwe, Dafida o ile a hlama koša yeo lehono e tsebjago e le Psalme 37. Akanya feela Dafida a le moyeng wa go naganišiša, a sepedišana le harepa gomme a opela mantšu a: “Mošitô wa monna o tiišwa ke Morena, xe a kxahlwa ke ditsela tš’axwe. Xe a ka wa, xa a wêle ruri, xobane Morêna ó swere seatla sa xaxwe. Ke be ke le lesoxana, ka bá ka tšofala kè sešo ka bôna moloki à lahlilwe, le bana ba xaxwe bà diila.” (Psalme 37:23-25) Jehofa o bone e le mo go swanetšego go akaretša nywaga ya Dafida mo psalmeng ye yeo e buduletšwego. Ruri seo se tlaleletša mantšu a ao a tšwago pelong ka maikwelo a tseneletšego gakaakang!
15. Moapostola Johane o beile bjang mohlala o mobotse wa potego go sa šetšwe maemo ao a bego a fetogile gotee le botšofadi?
15 Moapostola Johane ke mohlala o mongwe o mobotse wa potego go sa šetšwe maemo ao a fetogago le botšofadi. Ka morago ga go hlankela Modimo ka nywaga e nyakilego go ba e 70, Johane o ile a golegwa sehlakahlakeng sa Patimo “ka baka la go bolela ka Modimo le go nea bohlatse ka Jesu.” (Kutollo 1:9) Lega go le bjalo, modiro wa gagwe o be o se wa fela. Ge e le gabotse, mangwalo ka moka ka Beibeleng ao a ngwadilwego ke Johane a ngwadilwe nywageng ya gagwe ya mafelelo bophelong. Ge a be a le Patimo, o ile a newa pono e boifišago ya Kutollo, yeo a ilego a e ngwala ka kelohloko. (Kutollo 1:1, 2) Go naganwa gore o ile a lokollwa kgolegong nakong ya Mmuši wa Roma yo a bitšwago Nerva. Ka morago ga moo, mo e ka bago ka 98 C.E., ge a be a e-na le nywaga e ka bago e 90 goba e 100, Johane o ile a ngwala Ebangedi gotee le diepistola tše tharo tše nago le leina la gagwe.
Pego e sa Hwelelego ya Kgotlelelo
16. Bao ba nago le bofokodi bja go se kgone go bolela ba ka bonagatša boineelo bja bona go Jehofa bjang?
16 Mafokodi a ka tla ka ditsela tše dintši le ka ditekano tše fapa-fapanego. Ka mohlala, batho ba bangwe ba ile ba senyegelwa gaešita le ke bokgoni bja go boledišana le ba bangwe. Lega go le bjalo, ba sa dutše ba tšeela godimo dikgopolo tše di kgahlišago tša lerato la Modimo le botho bja gagwe bjo bo sa swanelago. Gaešita le ge ba e-na le bofokodi bja seo ba ka se bolelago ka molomo wa bona, ba botša Jehofa ka dipelong tša bona gore: “Melaô ya xaxo ke e rata xakaka’ng! Ke eleletša yôna mehla yohle.” (Psalme 119:97) Jehofa ruri o tseba bao “ba sa lebalexo ’ina l’axwe,” gomme o lemoga kamoo ba bjalo ba fapanego le batho ba bantši kudu ka gona, bao ba se nago taba le melao ya gagwe. (Maleaki 3:16; Psalme 10:4) Ruri go homotša kudu go tseba gore Jehofa o thabela diakanyo tša dipelo tša rena!—1 Koronika 28:9; Psalme 19:14.
17. Bahlanka ba nako e telele ba Jehofa ba fihleletše eng yeo e tlogago e le ya moswana-noši?
17 Seo se sego sa swanela go hlokomologwa ke taba ya gore bao ba bego ba dutše ba hlankela Jehofa ka potego ka nywaga e masome ba ikhweleditše selo sa moswana-noši e le ruri le seo se ka se hwetšwego ka tsela le ge e le efe e nngwe—pego e sa hwelelego ya kgotlelelo. Jesu o itše: “Ka go kgotlelela ga lena, le tla rua meoya ya lena.” (Luka 21:19) Kgotlelelo e bohlokwa gore re hwetše bophelo bjo bo sa felego. Lena bao le ‘dirilego thato ya Modimo’ le go hlatsela potego ya lena e sa kwanatšhego ka tsela ya lena ya bophelo le ka lebelela pele go hwetšeng “phethagatšo ya kholofetšo.”—Baheberu 10:36.
18. (a) Jehofa o thabela go bona’ng go batšofadi? (b) Ke’ng seo re tlago go se ahla-ahla sehlogong se se latelago?
18 Jehofa o tšeela godimo tirelo ya gago ya moya ka moka go sa šetšwe gore o ka dira mo gontši gakaakang goba mo gonyenyane gakaakang. Go sa šetšwe seo se ka bago se diragalela ‘motho wa ka ntle’ ge motho a tšofala, ‘motho wa ka gare’ a ka mpshafatšwa letšatši le letšatši. (2 Bakorinthe 4:16) Ga go pelaelo gore Jehofa o tšeela godimo seo o ilego wa se fihlelela nakong e fetilego, eupša go tloga go le molaleng gore o tšeela godimo le seo o se dirago leineng la gagwe gona bjale. (Baheberu 6:10) Sehlogong se se latelago, re tla ahla-ahla mafelelo a magolo a potego e bjalo.
O be o tla Araba Bjang?
• Anna o ile a beela batšofadi ba Bakriste ba lehono mohlala ofe o mobotse?
• Ke ka baka la’ng nywaga e se yona e bolelago gore motho a ka fihlelela eng?
• Batšofadi ba ka tšwela pele bjang ba bonagatša boineelo go Modimo?
• Jehofa o lebelela bjang tirelo yeo a e direlwago ke batšofadi?
[Dipotšišo tša Thuto]
[Seswantšho go letlakala 23]
Daniele yo a tšofetšego o ile a ithuta ka nako ya bothopša bja Bajuda “dipukung”
[Seswantšho go letlakala 25]
Batšofadi ba bantši ba bea mohlala ka go ba gona dibokeng ka mehla, ka go dira boboledi ka mafolofolo le ka kganyogo ya bona e tseneletšego ya go ithuta