Matla a Leleme

LELEME la thutlwa ke la botelele bja disenthimithara tše 45, ke le matla e bile le kgona go fula matlakala sehlareng ka go akgofa. Leleme la blue whale le imela go lekana le tlou. Nagana ka matla ao a nyakegago bakeng sa go fo le šuthiša!

Leleme la motho le bonagala e se selo ka bogolo, ka boima le ka matla. Lega go le bjalo, le na le matla a magolo kudu. Ge Beibele e bolela ka setho se se senyenyane sa mmele wa motho e re: “Lehu le bophelô di ’atleng tša leleme.” (Diema 18:21) Ee, ke gakae re e-kwa gore leleme la motho le na matla a go bolaya ao le a dirišetšago go thoma maaka le go nea bohlatse bja maaka tšeo di bakilego tshenyo, gaešita le go dira gore batho ba se nago molato ba bolawe?

Ka mo go swanago, bogwera bja nako e telele bo ile bja senywa ke mantšu a hlabago. Maikwelo a ile a senywa ke mantšu a bogale. Jobo yo a bego a senywa leina o llile ka gore: “Le tlo kxaotša neng xo hlokofatša pelo ya-ka le xo nthsetlaxanya ka dipuô?” (Jobo 19:2) Morutiwa Jakobo o ile a hlalosa gabotse matla a go senya ao leleme leo le sa laolwego ka tomo le ka bago le ona, ge a re: “Ka gona, le leleme ke setho se senyenyane, lega go le bjalo le ikgantšha kudu. Bonang! Go nyakega mollo o monyenyane gakaakang go tšhuma sekgwa se segolo! Ee, leleme ke mollo.”—Jakobo 3:5, 6.

Ka lehlakoreng le lengwe, matla a leleme a ka phediša. Mantšu a kwelobohloko le a homotšago a ile a phološa batho ba bangwe kgateletšegong a ba a phološa le bao ba bego ba nyaka go ipolaya. Ge e be e elwa hloko, keletšo e botse e ile ya dira gore batho ba bantši bao ba bego ba diriša dihlare-tagi gampe le bao e bego e le dikebekwa ba se ke ba hwa go sa letelwa. Ke therešo gore seenywa sa leleme la moloki ke “sehlare sa bophelô” gomme “le bjalo ka diapola tša gauta mogopšaneng wa silifera.”—Diema 15:4; 25:11, PK.

Lega go le bjalo, go dirišwa mo gobotse ga leleme, ke ka go reta Jehofa Modimo, go bolela ditaba tše dibotse tša Mmušo wa Modimo le go ruta ba bangwe ditherešo tše bohlokwa tša Beibele. Ka baka la’ng? Jesu o itše: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.”—Johane 17:3; Mateo 24:14; 28:19, 20.