Mothopo wa Bokgopo o Pepentšhitšwe!

LEKGOLONG la pele la nywaga, bontši bja Bajuda bo be bo letile go tla ga Mesia yo a holofeditšwego. (Johane 6:14) Ge Jesu a tšwelela, o ile a tliša khomotšo le tshedimošo. O ile a fodiša balwetši, a fepa bao ba swerwego ke tlala, a laola boemo bja leratadima gaešita le go tsoša bahu. (Mateo 8:26; 14:14-21; 15:30, 31; Mareka 5:38-43) O ile a ba a bolela mantšu a tšwago go Jehofa gomme a nea kholofetšo ya bophelo bjo bo sa felego. (Johane 3:34) Ka seo a bego a se bolela le go se dira, Jesu o bontšhitše gabotse gore e be e le yena Mesia yoo a bego a tla lokolla batho sebeng gotee le ditla-moragong ka moka tša sona.

Ge e le gabotse, baetapele ba bodumedi ba Bajuda ba be ba swanetše go ba ba pele ba go amogela Jesu, go mo theetša gotee le go amogela tlhahlo ya gagwe ka lethabo. Lega go le bjalo, ga se ba ka ba dira bjalo. Go e na le moo, ba ile ba mo hloya, ba mo tlaiša le go loga maano a go mmolaya!—Mareka 14:1; 15:1-3, 10-15.

Ka mo go swanetšego, Jesu o ile a ahlola banna bao bao ba bego ba solwa. (Mateo 23:33-35) Lega go le bjalo, o ile a lemoga gore go be go e-na le yo mongwe yoo a ikarabelago ka bokgopo bjoo bo bego bo le ka dipelong tša banna bao. O ile a ba botša gore: “Le tšwa go tatago lena Diabolo, gomme le rata go dira dikganyogo tša tatago lena. Yena yoo e bile mmolai wa batho go tloga mathomong, gomme ga se a ka a ema a tiile therešong, gobane therešo ga e gona go yena. Ge a bolela maaka o bolela go ya ka tshekamelo ya gagwe, gobane ke moaketši le tatago maaka.” (Johane 8:44) Le ge Jesu a ile a dumela gore batho ba kgona go dira ditiro tša bokgopo, o ile a tloga a šupa mothopo wa bokgopo—Sathane Diabolo.

Ka go bolela gore Sathane “ga se a ka a ema a tiile therešong,” Jesu o utollotše gore sebopiwa se sa moya se ile sa hlankela Modimo ka potego eupša sa aroga tseleng yeo ya therešo. Ke ka baka la’ng Sathane a ile a rabela malebana le Jehofa? Ka baka la gore o ile a godiša maikwelo a gore o be a le bohlokwa go fihla bokgoleng bjoo a ilego a duma borapedi bjoo bo bego bo swanela Modimo a nnoši. *—Mateo 4:8, 9.

Borabele bja Sathane bo ile bja bonwa tšhemong ya Edene ge a be a fora Efa gore a je seenywa seo se ileditšwego. Ka go bolela maaka ao a pele le ka go senya Jehofa leina, Sathane o ile a itira “tatago maaka.” Go feta moo, ka go goketša Adama le Efa gore ba se kwe, o ile a dira gore ba laolwe ke sebe gomme se ba lebiše lehung la bona le la moloko wa bana ba bona woo o bego o sa tla. Ka go rialo, Sathane o ile a itira “mmolai wa batho”—ee, mmolai yo sehlogo kudu wa batho yo a kilego a ba gona!—Genesi 3:1-6; Baroma 5:12.

Tutuetšo ya Sathane e kgopo e ile ya ba ya fihla le lefelong la moya, moo a ilego a tutuetša barongwa ba bangwe gore ba mo thekge borabeleng bja gagwe. (2 Petro 2:4) Go swana le Sathane, meoya ye e kgopo e ile ya kgahlegela batho ka tsela e fošagetšego. Lega go le bjalo, yona e ile ya ba le kganyogo e gobogilego ya dikopano tša botona le botshadi, yeo e bilego le ditla-morago tše mpe le tše kgopo.

 Bokgopo bo a Ata Lefaseng

Beibele e re botša gore: “Xe batho ba thôma xo ata . . . bà belexetšwe barwedi, Barwa ba Modimo ba bôna barwedi ba batho e le bôná ba ba botse, ba tšea basadi mo xo bôná-bao bohle ba ba bexo ba ba kxahla.” (Genesi 6:1, 2) “Barwa ba Modimo” bao ke bomang? E be e le dibopiwa tša moya, e sego batho. (Jobo 1:6; 2:1) Re tseba bjang? Re a tseba gore manyalo gare ga batho a be a dutše a e-ba gona ka nywaga e 1 500 gomme go be go se na lebaka la gore go bolelwe ka ona ka tsela e kgethegilego. Ka gona ka go lebiša tlhokomelo dikopanong tša botona le botshadi tša “barwa ba Modimo” bao ba ilego ba itira batho ba nama le go tšea “barwedi ba batho,” pego e šupa gabotse go selo seo se sa kago sa ba gona pele, seo e sego sa tlhago.

Go se be ga tlhago moo go kgonthišetšwa ke mohuta wa bana bao ba ilego ba tšwelela manyalong a bjalo. Bana bao ba bitšwa Banefilimi ka ge e be e le mahlakanasela ao a ilego a ba ditšitširipa ge a gola. Le gona e be e le bomphenyašilo ba šoro. Ge e le gabotse, lentšu “Banefilimi” le bolela gore “Bagale,” goba “bao ba dirago gore ba bangwe ba we.” Batho ba ba sehlogo ba hlaloswa e le “baxale bala ba boxolo-xolo, banna ba maina a a tumilexo.”—Genesi 6:4.

Banefilimi le bo-tatabo ba ile ba ba sehlogo ka tsela yeo e bego e se ya ka ya bonwa. Genesi 6:11, e bega gore: “Modimo yêna ó bone lefase lè senyêxa lè e-ya, . . . lè tletše tša sehloxo.” Ee, batho ba ile ba dira ditiro tše sehlogo, e lego mekgwa e sehlogo ya morafe o mofsa woo o bego o le gare ga bona.

Banefilimi le bo-tatabo ba kgonne bjang go ba le tutuetšo e kgopo le e matla gakaakaa molokong wa batho? Ka go diriša tshekamelo e kgopo ya batho le dikganyogo. Mafelelo e bile afe? “Nama ka moka è sentše tsela ya yôna lefaseng.” Mafelelong, Jehofa o ile a senya lefase ka meetse-fula ao a ilego a aparetša lefase ka moka, a phološa Noa le lapa la gagwe feela. (Genesi 6:5, 12-22) Lega go le bjalo, barongwa bao ba ile ba boela lefelong la moya ba lewa ke dihlong. E le batemona bao ba kokobeditšwego, ba ile ba tšwela pele ba ganetša Modimo le lapa la gagwe la barongwa ba lokilego. Go molaleng gore go tloga ka nako yeo go ya pele, Modimo o ile a thibela dibopiwa tše tše kgopo tša moya go ikapeša mebele ya batho. (Juda 6) Lega go le bjalo, di ile tša dula di le matla go laoleng ditaba tša batho.

Yo Mobe o Utollwa ka Botlalo!

Bogolo bja bokgopo bja Sathane bo utollwa ka botlalo go 1 Johane 5:19, yeo e rego: “Lefase ka moka le rapaletše matleng a yo kgopo.” Diabolo o dira gore moloko wa batho o aparelwe ke madimabe a oketšegago. Ge e le gabotse, o ikemišeditše go senya go feta le ge e le neng pele. Ka baka la’ng? Ka baka la gore yena le batemona ba ile ba rakwa legodimong ka morago ga go hlongwa ga Mmušo wa Modimo wa legodimong ka 1914. Beibele e boletše e sa le pele mabapi le go rakwa moo gore: “Go madimabe lefase . . . , gobane Diabolo o theogetše go lena a galefile kudu, ka ge a tseba gore o na le nako e kopana.” (Kutollo 12:7-12) Bjale, Sathane o tutuetša batho bjang lehono?

Sathane o dira bjalo ka go godiša moya woo o tutuetšago tsela ya batho ya go nagana le ya go dira dilo. Ka baka leo, Baefeso 2:2 e bitša Diabolo “mmuši wa matla a moya, moya [goba, tutuetšo e matla] woo bjale o šomago go barwa ba go se kwe.” Go e na le go kgothaletša go boifa Modimo le go dira botse, “moya” wo wa botemona o godiša borabele malebana le Modimo le ditekanyetšo tša gagwe. Ka go rialo, Sathane le batemona ba gagwe ba godiša bobe bjo bo dirwago ke batho e bile ba dira gore bo phatlalale le go feta.

 “Diša Pelo Y’axo”

Selo se sengwe seo se godišago “moya” wo ke leuba la diswantšho tšeo di kgothaletšago bootswa, tšeo di godišago dikganyogo tše di fošagetšego tša dikopano tša botona le botshadi le go dira gore mekgwa e sa tlwaelegago e bonale e kganyogega. (1 Bathesalonika 4:3-5) Go kata, go kgotsofatša dikganyogo tša botona le botshadi ka go kweša ba bangwe bohloko, go katwa ke sehlopha sa batho, go ba le dikopano tša botona le botshadi le diphoofolo le go tlaiša bana ka tša botona le botshadi ke tše dingwe tša dilo tšeo di tšweletšwago diswantšhong tšeo di kgothaletšago bootswa e le boithabišo. Gaešita le ge di le ka tsela yeo e ka bonagalago e sa goboga kudu, diswantšho tšeo di kgothaletšago bootswa di ka lemalelwa o šoro le go gobatša bao ba di bogelago goba ba di balago, tša dira gore babogedi ba tšona ba dule ba ikgotsofatša ka go di bogela. * Ke bokgopo bjo bo senyago ditswalano tša batho gotee le tswalano ya motho le Modimo. Diswantšho tšeo di kgothaletšago bootswa di bontšha tsela e gobogilego ya go nagana yeo batemona ba e godišago—marabele ao kganyogo ya ona ya dikopano tša botona le botshadi e thomilego pele ga Meetse-fula a mehla ya Noa.

Ka mabaka a kwagalago, monna yo bohlale Salomo o eleditše ka gore: “Mo xo tšohle di dišwaxo, diša pelo y’axo; xobane bophelô bo hlaxa xo yôna.” (Diema 4:23) Ka tsela e kwešišegago, go šireletša pelo ya gago dikgoketšong tša diswantšho tšeo di kgothaletšago bootswa go ka bolela go fetoša seteišene sa thelebišene goba go tima computer ge go ka tšwelela diswantšho tše di gobogilego, le gona ke gabohlokwa go gata mogato ka pela le ka bohlale! Inagane o le lešole leo le lekago go phema lerumo leo le lebilego pelong ya gago. Sathane o korotše pelo ya gago ya seswantšhetšo—mothopo wa gago wa tutuetšo le kganyogo—gomme o nyaka go e senya.

Le gona o swanetše go šireletša pelo ya gago gore e se rate bošoro, ka ge Diabolo a tseba gore “[Jehofa] ó hloile ba ba rataxo bosenyi.” (Psalme 11:5, mongwalo o sekamego ke wa rena.) Ga se gore Sathane o swanetše go go tutueletša go dira ditiro tša bosenyi gore o fetoge lenaba la Modimo; o nyaka feela go hlagolela ka go wena lerato la go rata bošoro. Ga go makatše ge mekero ya ditaba e tletše ka bošoro, bjoo gantši bo sepedišanago le go dirišana le meoya. Banefilimi ba hwile e bile ga ba sa le gona, eupša dika le mekgwa ya bona ya boitshwaro di sa le gona! Na kgetho ya gago ya boithabišo e bontšha gore o ganetšana le makatika a Sathane?—2 Bakorinthe 2:11.

Kamoo o ka Ganetšago Tutuetšo e Kgopo ya Diabolo

Meoya e kgopo e ka bonala e le e matla go ka lwantšhwa. Beibele e bolela gore bao ba katanelago  go kgahliša Modimo “[ba] kakadipana . . . le madira a kgopo a moya,” go tlaleletša go lwantšhaneng le nama ya bona e sa phethagalago. E le gore re fenye ntweng yeo gotee le gore re amogelwe ke Modimo, re swanetše go diriša ditokišetšo tše dintši tša Modimo.—Baefeso 6:12; Baroma 7:21-25.

Ditokišetšo tše di akaretša moya o mokgethwa wa Modimo, moya o matla kudu legohleng. Moapostola Paulo o ngwaletše Bakriste ba lekgolong la pele la nywaga gore: “Ga se ra amogela moya wa lefase, eupša re amogetše moya o tšwago go Modimo.” (1 Bakorinthe 2:12) Bao ba hlahlwago ke moya wa Modimo ba thoma go rata seo Modimo a se ratago le go hloya seo a se hloilego. (Amosi 5:15) Motho a ka amogela moya o mokgethwa bjang? Kudu-kudu ka go rapela, go ithuta Beibele—Beibele ka boyona e tšweleditšwe ka moya o mokgethwa—le ka go ba le segwera seo se agago le batho bao ba ratago Modimo e le ka kgonthe.—Luka 11:13; 2 Timotheo 3:16; Baheberu 10:24, 25.

Ge o diriša ditokišetšo tše tšeo di tšwago go Modimo, o thoma go apara “ditlhamo tše di feletšego tše di tšwago go Modimo,” e lego tšhireletšo e nnoši kgahlanong le “maano a bohwirihwiri a Diabolo.” (Baefeso 6:11-18) Go diriša ditokišetšo tše ka botlalo ke gabohlokwa gona bjale go feta le ge e le neng pele. Bjang?

Go Fela ga Bokgopo go Batametše!

Mopsalme o re: “Ba babe xe ba hloxa wa mabyang, ’me ba-dira-bobe bohle xe ba taxa wa matšoba, sa bôná ké xo y’o lôba ya ba moka.” (Psalme 92:7) Ee, go swana le mehleng ya Noa, go oketšega ga bobe mo go diregago ga bjale ke bohlatse bja gore kahlolo ya Modimo e kgaufsi, e sego feela kgahlanong le batho eupša le kgahlanong le Sathane le batemona ba gagwe, bao ba tlago go lahlelwa moleteng gore ba se kgone go dira selo, e le mathomo a phedišo ya bona yeo e tlago go latela ka morago. (2 Timotheo 3:1-5; Kutollo 20:1-3, 7-10) Ke mang yo a tlago go phetha kahlolo yeo? Ga go yo mongwe ge e se Jesu Kriste, yo re balago ka yena gore: “Morwa wa Modimo o bonagaditšwe bakeng sa morero wo, e lego, go fediša mediro ya Diabolo.”—1 Johane 3:8.

Na o hlologetše go bona bokgopo bo fela? Ge e ba go le bjalo, gona o tla homotšwa ke dikholofetšo tšeo di lego ka Beibeleng. Ga go na puku e nngwe yeo e bolelago ka mothomi wa bokgopo, Sathane, le gona ga go na puku e nngwe yeo e hlalosago kamoo yena le mediro ya gagwe ba tlago go fedišwa ka gona mafelelong. Re go kgothaletša gore o hwetše tsebo e nepagetšego ya Beibele e le gore o kgone go itšhireletša kgahlanong le ditutuetšo tše mpe tša Sathane gona bjale le gore o be le kholofelo ya go phela lefaseng leo le se nago bokgopo.—Psalme 37:9, 10.

[Mengwalo ya ka tlase]

[Seswantšho go letlakala 5]

Mekgwa ya Banefilimi e bonwa bathong lehono

[Seswantšho go letlakala 7]

Tsebo e nepagetšego e re matlafatša kgahlanong le ditutuetšo tše kgopo

[Lepokisi/Diswantšho go letlakala 6]

Dinonwane Tšeo di Nago le Therešo e Nyenyane

Dipego tšeo di bolelago ka dika-modimo, makgema le ka mafula a šoro di hwetšwa dinonwaneng tša bogologolo lefaseng ka bophara. Ka mohlala, Thetogale ya Gilgamesh ya Seakkadia e bolela ka mafula, sekepe le baphologi. Gilgamesh yena o hlaloswa e le yo a bego a e-na le dikganyogo tše di feteletšego tša dikopano tša botona le botshadi, e le seka-modimo seo se ratago bošoro, goba e le seka-modimo, seka-motho. Nonwane ya Aztec e bolela ka lefase la bogologolo leo le bego le dulwa ke makgema le ka mafula a magolo. Nonwane ya Norse e bolela ka morafe wa makgema le ka monna yo bohlale yo a bitšwago Bergelmir yoo a ilego a aga sekepe se segolo gomme a iphološa gotee le mosadi wa gagwe. Bohlatse bjo bo kopantšhitšwego bja dinonwane tše bjalo ka moka bo thekga bohlatse bja Beibele bja gore batho ka moka ke ditlogolo tša baphologi ba meetse-fula ao a ilego a fediša lefase le kgopo la bogologolo.

Letlapa leo go lona go ngwadilwego Thetogale ya Gilgamesh

[Mothopo go letlakala 6]

The University Museum, University of Pennsylvania (neg. # 22065)