Dipotšišo tše Tšwago go Babadi

Na noga yeo e boletšego le Efa e be e e-na le maoto?

Bjalo ka ge go begilwe go Genesi 3:14, Jehofa Modimo o boletše le noga yeo e ilego ya fora Efa tšhemong ya Edene. Modimo o itše: “Ka xe O dirile tšeo, O seroxiwa mo xo diruiwa ka moka le xo diphôôfôlô ka moka tša naxa. O tlo sepela ka mpa ya xaxo; O tlo ja lerole mehla ka moka ya xo phela xa xaxo.” Beibele ga e bolele ka go lebanya gore phoofolo yeo e dirišeditšwego go goketša Efa e be e e-na le maoto nakong e fetilego gomme ya se sa ba le ona. Gaešita le ge mantšu a lego go Genesi 3:14 a ka dira gore ba bangwe ba nagane bjalo, ga go nyakege gore re phethe ka gore noga e be e e-na le maoto pele e rogwa. Ka baka la’ng?

Kudu-kudu ka gobane yoo ge e le gabotse Jehofa a bego a mo ahlola e be e le Sathane—sebopiwa se se sa bonagalego sa moya seo se ilego sa diriša gampe phoofolo yeo ya tlasana. Beibele e re Sathane ke “tatago maaka” le “noga ya kgale.” Dipolelwana tše tše pedi di bonala di šupa morago kua nakong ya ge Sathane a be a diriša phoofolo e bonagalago, noga, e le selo seo a se dirišago go kgothaletša Efa go se kwe taelo ya Modimo.—Johane 8:44; Kutollo 20:2.

Modimo o hlodile dinoga, gomme ge e le gabotse Adama o be a šetše a reetše dinoga leina la tšona pele ga tiro ya Sathane ya bohwirihwiri. Noga yeo e bego e se na matla a go bea mabaka yeo e boletšego le Efa e be e se ya swanela go solwa. E ka ba e be e sa lemoge gore Sathane o a e radia, gomme e be e ka se kwešiše kahlolo ya Modimo malebana le marabele a.

Ka gona, ke ka baka la’ng Modimo a ile a bolela ka go kokobetša noga? Boitshwaro bja noga ka tlhago, e lego go sepela ga yona ka mpa le go koma mobu tše nkego e latswa lerole, bo swantšhetša gabotse boemo bja Sathane bjo bo kokobeditšwego. Ka ge a ile a ba boemong bjo bo phagamego e le yo mongwe wa barongwa ba Modimo, o ile a išwa boemong bja tlase kudu bjoo ka Beibeleng go thwego ke Tatarase.—2 Petro 2:4.

Go feta moo, go swana le ge noga ya kgonthe e ka loma motho serethe, Sathane maemong a gagwe a tlase o be a tla “loma serêthê” sa “peu” ya Modimo. (Genesi 3:15) Jesu Kriste, yo a ilego a tlaišega lebakanyana ka diatleng tša batseta ba Sathane, o ile a bonagala e le karolo ya motheo ya peu yeo. Eupša mafelelong hlogo ya seswantšhetšo ya noga e tla pšhatlwa sa ruri ke Kriste le bagwera ba gagwe ba Bakriste ba ba tsošitšwego ba batlotšwa. (Baroma 16:20) Ka go rialo, go lebiša ga Modimo thogako ya gagwe go noga e bonagalago go be go bontšha gabotse go kokobetšwa le tshenyego ya sa ruri ya ‘noga e sa bonagalego ya kgale,’ Sathane Diabolo.