Jehofa O Tšeela go kwa ga gago Godimo

“Ngwaka’a-ka! Hlalefa, O nthabišê pelo.”—DIEMA 27:11.

1. Ke moya ofe o šwahletšego bathong lehono?

LEFASE lehono le šwahletšwe ke moya wa go rata go itaola le go se kwe. Lengwalong la gagwe leo le yago go Bakriste ba Baefeso, moapostola Paulo o hlalosa lebaka ka gore: “Ka nako e nngwe le [be] le sepela go tšona go ya ka tshepedišo ya dilo ya lefase le, go ya ka mmuši wa matla a moya, moya woo bjale o šomago go barwa ba go se kwe.” (Baefeso 2:1, 2) Ee, mohlomongwe o ka re Sathane Diabolo, “mmuši wa matla a moya,” o fetišeditše moya wa gagwe wa go se kwe lefaseng ka moka. O be a dira bjalo lekgolong la pele la nywaga, le gona go feta moo o be a dira bjalo ka matla kudu ka morago ga ge a rakilwe legodimong nakong ya Ntwa ya I ya Lefase.—Kutollo 12:9.

2, 3. Re na le mabaka afe a gore re kwe Jehofa?

² Lega go le bjalo, ka ge re le Bakriste re a tseba gore Jehofa Modimo o swanelwa ke gore re mo kwe ka dipelo tša rena ka moka ka baka la gore ke Mmopi wa rena, Mothekgi wa maphelo a rena, Mmuši yo lerato le Mophološi wa rena. (Psalme 148:5, 6; Ditiro 4:24; Bakolose 1:13; Kutollo 4:11) Baisiraele ba mehleng ya Moše ba be ba tseba gore Jehofa ke Monei-bophelo le Mophološi wa bona. Ka gona, Moše o ile a ba botša gore: “Hlôkômêlang-xê, xore Le dirê ka mo Morêna Modimo wa lena a Le laetšexo ka xôna.” (Doiteronomio 5:32) Ee, Jehofa o be a swanelwa ke gore ba mo kwe. Lega go le bjalo, kapejana ba ile ba tlogela go kwa Mmuši wa bona.

³ Go kwa ga rena Mmopi wa legohle go bohlokwa gakaaka’ng? Modimo o kile a laela moporofeta Samuele go botša Kgoši Saulo gore: “Xo kwa xo phala sedimo.” (1 Samuele 15:22, 23) Ke ka baka la’ng go le bjalo?

Kamoo go kwa go ‘Phalago Sedimo’

4. Ke ka kgopolo efe re ka neago Jehofa selo se itšego?

⁴ Ka ge e le Mmopi, dilo tše di bonagalago ka moka tšeo re nago le tšona ke tša Jehofa. Ka gona, na go na le selo seo re ka mo neago sona? Ee, re ka mo nea selo se sengwe se bohlokwa kudu. Ke sefe? Re ka hwetša karabo keletšong e latelago: “Ngwan’a-ka! Hlalefa, O nthabišê pelo, ke tsebê se nkaxo fetola sôna xe ba nnyatša.” (Diema 27:11) Re ka nea Modimo ditsebe tša rena. Le ge re e-tšwa maemong le ditlogong tše di sa swanego, ge re e-kwa, yo mongwe le yo mongwe wa rena a ka araba polelo  ya Sathane Diabolo e senyago leina ya gore batho ba ka se dule ba botegela Modimo ge ba lebane le diteko. Yeo ke tokelo e kgolo gakaakang!

5. Go se kwe go kgoma Mmopi bjang? Bontšha.

⁵ Modimo o šetša diphetho tšeo re di dirago. Ge e ba re sa mo kwe, o a kgomega. Bjang? O kwešwa bohloko ke go bona motho a tšea tsela yeo e sego bohlale. (Psalme 78:40, 41) A re re motho yo a swerwego ke bolwetši bja swikiri o paletšwe ke go tšwela pele a e-ja dijo tšeo a laetšwego gore a di je bakeng sa gore a phele gabotse mmeleng eupša a tšwela pele a e-ja tšeo di ka se dirego gore a phele gabotse. Ngaka ya gagwe e hlokomelago e tla ikwa bjang? Re ka kgodišega gore Jehofa o kwešwa bohloko ke ge batho ba sa mo kwe, ka ge a tseba ditla-morago tša go hlokomologa ditaelo tša gagwe tšeo di phedišago.

6. Ke’ng seo se tla re thušago go kwa Modimo?

⁶ Ke’ng seo se tla thušago yo mongwe le yo mongwe wa rena go kwa? Go bohlokwa gore yo mongwe le yo mongwe wa rena a kgopele “pelo e kwaxo” go Modimo, bjalo ka ge Kgoši Salomo a ile a dira. O ile a kgopela pelo e bjalo bakeng sa gore a “hlaoloxanyê botse le bobe” e le gore a kgone go ahlolela Baisiraele-gotee le yena. (1 Dikxoši 3:9) Re swanetše go ba le “pelo e kwaxo” ge e ba re nyaka go kgethologanya botse le bobe lefaseng leo le tletšego moya wa go se kwe. Modimo o re neile Lentšu la gagwe, dipuku tšeo di re thušago go ithuta Beibele, diboka tša Bokriste le bagolo ba hlokomelago ba phuthego e le gore re ka hlagolela “pelo e kwaxo.” Na re diriša ditokišetšo tše bjalo?

7. Ke ka baka la’ng Jehofa a gatelela go kwa go feta dihlabelo?

⁷ Mabapi le taba ye, gopola gore Jehofa o kile a botša batho ba gagwe ba bogologolo gore go kwa go be go phala dihlabelo tšeo di dirwago ka diphoofolo. (Diema 21:3, 27; Hosea 6:6; Mateo 12:7) Ke ka baka la’ng go be go le bjalo, ka ge Jehofa e le yena yo a ilego a laela batho ba gagwe gore ba dire dihlabelo tše bjalo? Go ba gona, maikemišetšo a yoo a dirago sehlabelo ke afe? Na o se direla go kgahliša Modimo? Goba o fo se dira ka ge a latela motlwae o itšego? Ge e ba morapedi a tloga a rata go kgahliša Modimo, o tla ela hloko gore a kwe ditaelo ka moka tša Modimo. Modimo ga a nyake dihlabelo tša diphoofolo, eupša go mo kwa ke selo seo se lego bohlokwa seo re ka mo neago sona.

Mohlala o Lemošago

8. Ke ka baka la’ng Modimo a ile a amoga Saulo bogoši?

⁸ Pego ya Beibele ya Kgoši Saulo e gatelela bohlokwa bja go kwa. Ge Saulo a be a thoma go buša o be a ikokobeditše le go ipoetša, a “ipôna bonyane.” Lega go le bjalo, ka morago boikgogomošo le tsela ya maaka ya go nea mabaka di ile tša thoma go laola diphetho tšeo a bego a di dira. (1 Samuele 10:21, 22; 15:17) Ka nako e nngwe, Saulo o be a swanetše go lwa le Bafilisita. Samuele o ile a botša kgoši gore e letele gore a tle a direle Jehofa sehlabelo le go mo nea ditaelo tše dingwe. Lega go le bjalo, Samuele ga se a ka a tla ka nako yeo a bego a letetšwe ka yona, gomme batho ba ile ba thoma go phatlalala. Ge a bona seo, Saulo o ile “a dira sehlabêlô.” Seo ga sa ka sa thabiša Jehofa. Mafelelong ge Samuele a fihla, kgoši e ile ya lokafatša go se kwe ga yona ya re ke ka baka la ge Samuele a tlile ka morago ga nako, ya re e ile ya “beta pelo” ya dira sehlabelo go nolofatša sefahlego sa Jehofa. Go ya ka Kgoši Saulo, go dira sehlabelo seo go be go le bohlokwa kudu go feta go latela taelo yeo a e boditšwego ya go letela gore Samuele a dire sehlabelo. Samuele o ile a mmotša gore: “O dirile tša bošilo, xe O sa ka wa dira ka taêlô ye Morêna Modimo wa xaxo a Xo laetšexo yôna.” Go se kwe Jehofa go ile gwa dira gore Saulo a lahlegelwe ke bogoši bja gagwe.—1 Samuele 10:8; 13:5-13.

9. Saulo o ile a bontšha bjang moya wa go se kwe Modimo?

⁹ Na Kgoši ye e ile ya ithuta phihlelong ye?  Aowa! Ka morago, Jehofa o ile a laela Saulo gore a fediše setšhaba sa Baamaleke, seo pejana se bego se hlasetše Baisiraele ba se ba se rumola. Saulo o be a swanetše go fediša le diruiwa ka moka. O ile a kwa ka go “bolaya Ba-Amaleke xo tloxa Habila xo fihla Suri.” Ge Samuele a be a e-tla go e gahlanetša, kgoši ye e be e thabile ka ge e fentše gomme ya re: “A Morêna a Xo šexofatšê! Ke phethile se Morêna a se boletšexo.” Lega go le bjalo, go fapana le ditaelo tše di kwagalago tšeo ba di boditšwego, Saulo le batho ba gagwe ba ile ba tlogela Kgoši Agaga a phela le “dinku tše botse, le dikxomo tše botse, le tše di hlatlamaxo tšeo ka botse le ka xo nôna” di phela. Kgoši Saulo o ile a lokafatša go se kwe ga gagwe ka go bolela gore: “Batho ba tsebafile le tše botse mo xo dinku le dikxomo, xore e bê didimo tša Morêna Modimo wa xaxo.”—1 Samuele 15:1-15.

10. Ke thuto efe yeo Saulo a paletšwego ke go ithuta yona?

¹⁰ Ka baka la seo, Samuele o ile a botša Saulo gore: “A O re Morêna ó thabêla dihlabêlô le didimo xo fetiša mola motho xe a e-kwa se Morêna a se boletšexo? O tsebê xore xo kwa xo phala sedimo, xo thaetša xo phadiša mahura a dikxapa.” (Samuele 15:22) Ka ge Jehofa a be a nyaka gore diphoofolo tšeo di fedišwe, di be di sa amogelege go ka dirwa dihlabelo.

E ba yo a Kwago Dilong Tšohle

11, 12. (a) Jehofa o lebelela bjang maiteko a rena a go leka go mo kgahliša borapeding bja rena? (b) Motho a ka iphora bjang ka go nagana gore o dira thato ya Modimo mola ge e le gabotse a bontšha go se kwe?

¹¹ Jehofa o thaba gakaakang ge a bona bahlanka ba gagwe bao ba botegago ba dula ba mmotegela go sa šetšwe ditlaišo, ba bolela ka Mmušo go sa šetšwe go šitišwa ke batho, le ge ba e ba gona dibokeng tša Bokriste le ge ba gateleditšwe ke mešomo ya boiphedišo! Go kwa ga rena maemong a bjalo a bohlokwa a bophelo bja rena bja moya go dira gore pelo ya gagwe e thabe! Maiteko a rena a go rapela Jehofa a bohlokwa go yena ge e ba re a dira ka lerato. Batho ba ka hlokomologa go šoma ga rena ka thata, eupša Modimo o lemoga le go gopola dihlabelo tšeo re di dirago go tšwa pelong.—Mateo 6:4.

¹² Lega go le bjalo, gore re thabiše Modimo ka botlalo, re swanetše go mo kwa maemong ka moka a bophelo bja rena. Ga se ra swanela go iphora ka go nagana gore re ka aroga dinyakweng tša Modimo ge feela re sa dutše re dira ka go dumelelana le borapedi dibopegong tše dingwe tša bophelo. Ka mohlala, motho a ka iphora ka go nagana gore ge e ba a ithola kgwara ka go phetha mediro e itšego ya borapedi, a ka se ke a otlwa bakeng sa go  itshwara ka tsela e gobogilego goba go dira diphošo tše dikgolo. Yeo e tla ba phošo e le ruri!—Bagalata 6:7, 8.

13. Ge re le ka sephiring, potego ya rena go Jehofa e ka lekwa bjang?

¹³ Ka baka leo, re ka ipotšiša gore, ‘Na ke kwa Jehofa medirong ya-ka ya letšatši le letšatši, gaešita le dilong tša motho ka noši?’ Jesu o itše: “Motho yo a botegago go se senyenyane, o botega le go se segolo, gomme motho yo a sa lokago go se senyenyane-nyenyane, ga a loka le go se segolo.” (Luka 16:10) Na re ‘itshepelela re le ba dipelo tše di se nago bosodi’ le ge re le ‘nywakong ya rena,’ moo ba bangwe ba sa re bonego? (Psalme 101:2) Ke therešo gore ge re le ka nywakong ya rena, potego ya rena e ka lekwa. Dinageng tše dintši moo go nago le di-computer ka dintlong, diswantšho tše di hlabišago dihlong di hwetšagala gabonolo. Nywaga e mmalwa e fetilego, motho o be a ka se bone diswantšho tše bjalo ntle le gore a ye mafelong ao go nago le boithabišo bjo bo gobogilego. Na re tla bontšha go kwa ka go tšeela godimo mantšu a Jesu, a rego: “Yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe”? Ee, na re tla gana le go bogela diswantšho tšeo di kgothaletšago bootswa? (Mateo 5:28; Jobo 31:1, 9, 10; Psalme 119:37; Diema 6:24, 25; Baefeso 5:3-5) Go thwe’ng ka mananeo a TV ao a tletšego bošoro? Na re dumelelana le Modimo wa rena, yoo moya wa gagwe o ‘hloilego ba ba ratago bosenyi.’ (Psalme 11:5) Goba go thwe’ng ka go nwa dino-tagi ka mo go feteletšego ka sephiring? Beibele e ganetša botagwa, e bile e eletša Bakriste gore e se be makgoba a “beine e ntši.”—Tito 2:3; Luka 21:34, 35; 1 Timotheo 3:3.

14. Ke ditsela dife tše dingwe tšeo re ka bontšhago ka tšona gore re kwa Modimo ditabeng tša tša ditšhelete?

¹⁴ Ntlha e nngwe yeo re swanetšego go e phafogela ke ya go diriša tšhelete. Ka mohlala, na re ka tsenela mekgatlo ya go humiša batho ka pela yeo e theilwego ka maikemišetšo a go radia? Na re diriša mekgwa e sego ya molao go leka go phema motšhelo? Goba, go fapana le moo, na re kwa taelo ya go ‘nea bohle tše di ba swanelago, yo a swanelwago ke lekgetho, re mo nee lekgetho’?—Baroma 13:7.

Go kwa Moo go Theilwego Leratong

15. Ke ka baka la’ng o e-kwa melao ya Jehofa?

¹⁵ Go kwa dithuto tša Modimo go tliša ditšhegofatšo. Ka mohlala, ka go ila motšoko, ka go itshwara gabotse le ka go hlompha go kgethega ga madi, re ka phema go ba bahlaselwa ba malwetši a itšego. Go tlaleletša moo, ka go phela ka go dumelelana le therešo ya Beibele dikarolong tše dingwe tša bophelo, re ka holega go tša boiphedišo, tša leago goba tša ka gae. (Jesaya 48:17) Go holega le ge e le gofe mo go bjalo moo go bonagalago, go ka lebelelwa ka mo go swanetšego e le tšhegofatšo yeo e hlatselago gore melao ya Modimo e a šoma. Lega go le bjalo, lebaka le legolo leo le dirago gore re kwe Jehofa ke gore re a mo rata. Ga re hlankele Modimo ka mabaka a boithati. (Jobo 1:9-11; 2:4, 5) Modimo o re file tokologo ya go kgetha yoo re nyakago go mo kwa. Re kgetha go kwa Jehofa ka baka la gore re nyaka go mo kgahliša le ka baka la gore re nyaka go dira seo se nepagetšego.—Baroma 6:16, 17; 1 Johane 5:3.

16, 17. (a) Jesu o bontšhitše bjang gore o kwa Modimo ka go tutuetšwa ke lerato leo le tšwago pelong? (b) Re ka ekiša Jesu bjang?

¹⁶ Jesu o beile mohlala o mobotse o phethagetšego wa go kwa Jehofa ka baka la lerato leo a bego a Mo rata ka lona. (Johane 8:28, 29) Ge a be a le mo lefaseng, Jesu o “ithutile go kwa dilong tšeo a tlaišegilego ka tšona.” (Baheberu 5:8, 9) Bjang? Jesu o ile a “ikokobetša gomme a ba yo a kwago go fihla lehung, ee, lehung koteng ya tlhokofatšo.” (Bafilipi 2:7, 8) Le ge Jesu a be a e-kwa ge a be a le legodimong, go kwa ga gagwe go ile gwa tšwela pele go lekwa ge a le mo lefaseng. Re ka kgodišega gore Jesu o swanelega ka botlalo ka ditsela tšohle go hlankela bana babo ba moya e le Moperisita  yo a Phagamego gotee le bakeng sa batho ba bangwe bao ba dumelago.—Baheberu 4:15; 1 Johane 2:1, 2.

¹⁷ Go thwe’ng ka rena? Re ka ekiša Jesu ka go dira gore go dira thato ya Modimo go tle pele maphelong a rena. (1 Petro 2:21) Re ka kgotsofala ge lerato leo re ratago Modimo ka lona le re tutueletša go phetha ditaelo tša Jehofa, gaešita le dinakong tšeo re gapeletšwago goba re lekegago go dira se se fapanego. (Baroma 7:18-20) Se se akaretša go ikemišetša ga rena go latela ditaelo tše di tšwago go bao ba etelelago pele borapeding bja therešo, le ge ba se ba phethagala. (Baheberu 13:17) Go kwa ditaelo tša Modimo bophelong bja motho ka noši go bohlokwa mahlong a Jehofa.

18, 19. Go kwa ga rena Modimo ka go tšwa pelong go ba le mafelelo afe?

¹⁸ Lehono, go kwa ga rena Jehofa go ka akaretša go kgotlelela tlaišo e le gore re boloke potego ya rena. (Ditiro 5:29) Le gona, go kwa ga rena taelo ya Jehofa ya gore re dire boboledi le go ruta, go nyaka gore re kgotlelele go fihla bofelong bja tshepedišo ye ya dilo. (Mateo 24:13, 14; 28:19, 20) Re nyaka kgotlelelo e le gore re tšwele pele re bokana gotee le bana babo rena, le ge mohlomongwe re ka gateletšwa ke lefase. Modimo wa rena yo lerato o tloga a tseba maikemišetšo a rena a go mo kwa maemong a bjalo. Lega go le bjalo, e le gore re mo kwe ka botlalo re swanetše go lwa le mebele ya rena ya sebe le go furalela se se fošagetšego mola re hlagolela go rata se sebotse.—Baroma 12:9.

¹⁹ Ge re hlankela Jehofa ka baka la lerato le ka dipelo tšeo di lebogago, “[go rena] e ba moputsi wa bao ba mo tsomago ka phišego.” (Baheberu 11:6) Dihlabelo tše di swanetšego di a nyakega e bile di a kgahliša, eupša Jehofa o kgahlišwa kudu ke ge re mo kwa ka mo go feletšego ka baka la ge re mo rata.—Diema 3:1, 2.

O be o tla Araba Bjang?

• Ke ka baka la’ng re ka re re na le seo re ka se neago Jehofa?

• Ke diphošo dife tšeo di dirilwego ke Saulo?

• O ka bontšha bjang gore o a dumela gore go kwa go phala sehlabelo?

• Ke’ng seo se go tutueletšago go kwa Jehofa?

[Dipotšišo tša Thuto]

[Seswantšho go letlakala 26]

Ngaka e lerato e tla ikwa bjang ka molwetši yoo a hlokomologago ditaelo tša yona?

[Seswantšho go letlakala 28]

Ke bjang Kgoši Saulo a ilego a dira gore a se sa amogelwa ke Jehofa?

[Seswantšho go letlakala 30]

Na o kwa ditaelo tša Modimo le ge o dutše ka gae o sa bonwe ke motho?