“Na o Tseba Modimo ka Leina?”

POTŠIŠO yeo e ile ya tsoša kgahlego ya mosadi yo mongwe wa kua karolong ya ka borwa-bodikela bja Asia Bogareng. Potšišo yeo e ile ya tšwelela letlakaleng la ka ntle la tokollo ya makasine wa rena woo o sepedišanago le wo, wa Phafoga! ya February 8, 2004. Mosadi yoo o ile a ngwalela bagatiši ka gore: “Di sa tloga fase, ke ile ka kgahlwa ke makasine wa lena gomme o nthušitše go tsepamišetša kgopolo ditekanyetšong tše dibotse tša boitshwaro. Pono ya-ka ka bophelo e tšwela pele e kgahliša le go feta. Ke botša yo mongwe le yo mongwe ka Modimo wa rena le ka khutšo yeo e tlišwago ke tsebo ye.”

Mafelong a mantši, ge e le gabotse “go fihla karolong ya kgole ya lefase,” batho ba tlwaelana le leina la Modimo, Jehofa. (Ditiro 1:8) Ka mohlala, leina le lelemeng la se-Turkmen, Yehowa, le gona ka phetolelong ya se-Turkmen ya Mangwalo a Makgethwa. Psalme 8:1 e balega ka gore: “Jehofa Morena wa rena, leina la gago le tagile gakaakang lefaseng ka moka!”

Gore a ithute ka mo go oketšegilego ka Jehofa Modimo, mosadi yoo o ile a kgopela kopi ya poroutšha ya matlakala a 32 ya Leina la Modimo Leo le Tlago go ba Gona ka mo go sa Felego. Le wena o ka kgopela poroutšha ye go yo mongwe wa Dihlatse tša Jehofa.