Saulo O Kopana le Bagwera ba Gagwe ba Kgale le Bao e Kilego ya ba Manaba a Gagwe

SAULO, yo ka morago a ilego a fetoga moapostola Paulo, o swanetše go ba a ile a tšhoga ge a be a boela Jerusalema ka lekga la pele ka morago ga go sokologela Bokristeng. * Nywageng e meraro pejana o be a tlogile motseng wo, a tletše moya wa go tšhošetša le wa go bolaya barutiwa ba Jesu. O be a laetšwe go swara Mokriste le ge e le ofe yo a bego a ka mo hwetša kua Damaseko.—Ditiro 9:1, 2; Bagalatia 1:18.

Ge a e-ba Mokriste, Saulo o ile a bolela ka sebete gore o dumela go Mesia yo a tsošitšwego. Ka baka la se, Bajuda ba kua Damaseko ba be ba nyaka go mmolaya. (Ditiro 9:19-25) Na ruri o be a ka letela gore bao e bego e le bagwera ba gagwe ba Bajuda ba kua Jerusalema ba mo amogele ka borutho? Lega go le bjalo, seo Saulo a bego a tshwenyegile kudu ka sona e be e le go kopana le balatedi ba Kriste kua Jerusalema. Seo se be se ka se be bonolo.

“Ge a fihla Jerusalema o ile a dira maiteko a go ikopanya le barutiwa; eupša ka moka ba be ba mo tšhaba, gobane ba be ba sa kgolwe gore e be e le  morutiwa.” (Ditiro 9:26) Seo se a kwagala. Seo ba bego ba se tseba ka yena ke gore e be e le motlaiši yo a se nago kgaugelo. Go bolela ga gagwe gore ke yena Mokriste yo a nago le tumelo go be go ka bonagala eka ke bofora bja gore a kgone go tsena ka phuthegong. Ka gona, Bakriste ba kua Jerusalema ba be ba nyaka gore a be kgole le bona.

Lega go le bjalo, motho yo mongwe wa bona o ile a thuša Saulo. Beibele e bolela gore Baranaba o ile a iša motlaiši yo wa kgale “go baapostola,” bao go lego molaleng gore e be e le Petro (Kefase) le Jakobo, ngwanabo Morena, a ba tsebiša ka tshokologo ya Saulo le ka go nea ga gagwe bohlatse kua Damaseko. (Ditiro 9:27; Bagalatia 1:18, 19) Ga go hlaloswe gore go tlile bjang gore Baranaba a bote Saulo. Na bobedi bja bona ba be ba tlwaelane, moo Baranaba a ilego a tutueletšega go leka Saulo gomme a bona gore o botega e le ka kgonthe? Na Baranaba o be a tsebana le Bakriste ba kua Damaseko moo a ilego a kwa ka go sokologa ga Saulo? Go sa šetšwe gore boemo ke bofe, Baranaba o ile a se sa belaela Saulo. Ka baka leo, Saulo o ile a dula le moapostola Petro matšatši a 15.

Matšatši a Lesome-hlano le Petro

Saulo o be a hweditše taelo ya gagwe go Jesu ka go lebanya, go sa nyakege tumelelo ya motho, go etša ge a ile a gatelela go Bagalatia. (Bagalatia 1:11, 12) Eupša ka ntle le pelaelo, Saulo o ile a lemoga bohlokwa bja go tsebišwa gabotse ka  bodiredi bja Jesu. Go dula ga gagwe le Petro go be go tla nea Saulo nako e ntši ya go dira bjalo. (Luka 24:12; 1 Bakorinthe 15:3-8) Go ka direga gore Saulo o bile le dipotšišo tše dintši tšeo a ilego a di botšiša Petro le Jakobo le gona go ka direga gore ba ile ba botšiša Saulo mabapi le pono le thomo ya gagwe.

O Phološitšwe Bjang go Bagwera ba Gagwe ba Kgale?

Stefano o biditšwe Mokriste wa pele wa mohwela-tumelo. Bao Stefano a kilego a ngangišana le bona e be e le ba ba “bitšwago Sinagoge ya Balokologi, le ya Bakirene le ya Baaleksandria le ba tšwago Tsilitsia le Asia.” Bjale Saulo o be a “ngangišana le Bajuda bao ba bolelago Segerika,” a ba nea bohlatse ka sebete. Ba ile ba arabela bjang? Ba be ba nyaka go mmolaya.—Ditiro 6:9; 9:28, 29.

Mohlomongwe Saulo o be a fela a nyaka go hlalošetša batho ka diphetogo tše dikgolo bophelong bja gagwe le go fišegela go botša bagwera ba gagwe ba kgale ka Mesia. Lega go le bjalo, Bajuda ba ba bolelago Segerika ba ile ba arabela ka bogale ka ge ba be ba lebelela monna yo e le moeki.

Na Saulo o ile a lemoga bogolo bja kotsi yeo a bego a lebeletšane le yona? Re bala gore ge a be a rapela ka tempeleng, o bile le pono yeo go yona a bonego Jesu, yo a mmoditšego gore: “Akgofa o tšwe Jerusalema ka bjako, gobane ba ka se ke ba dumelelana le bohlatse bjo o bo boletšego mabapi le nna.” Saulo o arabile ka gore: “Morena, bona ka noši ba tseba gabotse gore sinagogeng e nngwe ka morago ga e nngwe ke be ke fela ke golega le go itia bao ba dumelago go wena; gomme ge madi a Stefano hlatse ya gago a be a falatšwa, nna ka noši ke be ke bile ke eme moo gomme ke dumelelana le seo.”—Ditiro 22:17-20.

Ba bangwe ba nagana gore karabo ya Saulo e bolela gore o be a lemoga kotsi. Ba bangwe ba nagana gore o be a re: ‘Ke be ke le motlaiši go swana le bona, e bile ba tseba seo. Ruri ba swanetše go tšea tshokologo ya-ka e le ya kgonthe. Mohlomongwe nka ba thuša.’ Lega go le bjalo, Jesu o be a tseba gore Bajuda bao ba be ba ka se ele hloko bohlatse bja yo ba naganago gore ke mohlanogi. O boditše Saulo gore: “Sepela, gobane ke tla go romela ditšhabeng tša kgole.”—Ditiro 22:21, 22.

Ge Bakriste-gotee ba lemoga kotsi, ba ile ba akgofišetša Saulo boema-kepeng bja Kesarea gomme ba mo romela leetong la dikhilomithara tše 500 go ya Tareso, motseng wa gabo. (Ditiro 9:30) E be e le nywaga e mmalwa pele ga ge Saulo a ka boela Jerusalema.

Go tlošwa moo ka pela e ka ba e be e le tšhireletšo phuthegong ya Bokriste. Go ba gona ga yo e kilego ya ba motlaiši e be e ka ba kotsi e kgolo. Ka morago ga ge Saulo a sepetše, “phuthego motseng wa Judea ka moka le Galilea le Samaria ya ba lebakeng la khutšo, ya agwa; gomme ge e dutše e sepela ka go boifa Jehofa le ka go homotšwa ke moya o mokgethwa, ya tšwela pele e ata.”—Ditiro 9:31.

Dithuto tša Temošo

Go swana le lekgolong la pele la nywaga, le lehono go ka tšwelela maemo ao go ona go ka nyakegago gore re diriše temogo. Ga re na lebaka la go belaela batho bao re sa ba tsebego ka tsela e sa kwagalego. Lega go le bjalo, ka dinako tše dingwe, batho ba ba gobogilego ba ile ba leka go ikhola ka batho ba Jehofa, e ka ba ka go ikhumiša goba ka go leka go senya phuthego. Lega go le bjalo, re diriša temogo e le gore re se ke ra wela molabeng wa bofora wa dihwirihwiri.—Diema 3:27; 2 Timotheo 3:13.

Karabelo ya Saulo boboleding kua Jerusalema e bontšha tsela e nngwe yeo ka yona Bakriste ba swanetšego go ba le temogo. Go nea bohlatse metseng ye re agišanego le yona goba bathong ba bangwe, go akaretša le bagwera ba kgale, go ka ba kotsi—mmeleng, moyeng goba gaešita le boitshwarong. Go nyakega temogo ge re kgetha nako ya go dira dilo le lefelo.—Diema 22:3; Mateo 10:16.

Re ka kgodišega gore ditaba tše dibotse tša Mmušo wa Modimo di tla bolelwa pele bofelo bja tshepedišo ye e kgopo bo fihla. A mohlala o mobotse gakaakang woo Saulo a o beilego tabeng ye, “a bolela ka sebete ka leina la Morena” gaešita le go bagwera ba gagwe ba kgale le manaba a kgale!—Ditiro 9:28.

[Mongwalo wa ka tlase]

[Seswantšho go letlakala 16]

Ge a fihla Jerusalema, Saulo o ile a nea bohlatse ka sebete go Bajuda ba ba bolelago Segerika