Dithuto tše Bohlokwa Bakeng sa Bana

GLADYS o šoma sekolong kua Mendoza, Argentina. Ka letšatši le lengwe o ile a feta kgaufsi le phapoši gomme a lemoga gore morutiši o be a ruta barutwana ba gagwe ba mphato wa bone (grade 4) puku ya Puku Ya-ka ya Ditaba tša Beibele. * Gladys o ile a itsebiša go morutiši e le yo mongwe wa Dihlatse tša Jehofa gomme o ile a ithapela go mmontšha kamoo a ka holwago ke puku yeo. A kgahlilwe ke seo Gladys a mo hlaloseditšego sona, morutiši o ile a rata gore puku yeo e be karolo ya lenaneo-thuto la sekolo. Lega go le bjalo, o be a swanetše go hwetša tumelelo go balaodi ba sekolo. O ile a thabišwa ke gore ba mo dumeletše go dira bjalo.

Ka morago, lenaneong la sekolo la Letšatši la go bala Puku, morutiši o ile a abela barutwana ba gagwe go bala kgaolo ya puku pele ga barutwana-gotee le bona. Ka baka la karabelo e botse lenaneong le, morutiši o ile a laletšwa go ba seboledi lenaneong la thelebišene. Ge go be go bolelwa ka boitshwaro bja bana, moeteledi-pele wa lenaneo o ile a mmotšiša gore, “O kgona bjang go laola barutwana ba gago?” Morutiši o ile a bolela gore o be a diriša kgatišo yeo e bitšwago Puku Ya-ka ya Ditaba tša Beibele. O ile a hlalosa gore gaešita le ge a sa rute bodumedi ka phapošing ya gagwe, ka go diriša puku ye, o be a ruta ditekanyetšo tša boitshwaro tše bjalo ka tlhompho, go kgotlelela ba bangwe, botee, tirišano, go kwa le lerato. Ka moka ba ile ba dumela gore tše ke dithuto tše bohlokwa tšeo di swanetšego go rutwa bana ba banyenyane.

Na o ka rata go ruta bana ba gago ditekanyetšo tše bjalo tša boitshwaro? O ka kgopela yo mongwe wa Dihlatse tša Jehofa kopi ya puku ye e kgahlišago ya Puku Ya-ka ya Ditaba tša Beibele.

[Mongwalo wa ka tlase]