“Re Arogane ka Maleme Eupša re Kopantšwe ke Lerato”

Tlhakodišo. Tokologo. Phološo. Ka nywaga-kgolo, batho ba be ba dutše ba hlologetše go imollwa mathateng le matshwenyegong. Re ka lebeletšana bjang le mathata a bophelo? Na go tla ka gwa tsoga go bile le tlhakodišo? Le gona ge e le gore go bjalo, bjang?

YEO e be e le taba ye go bego go bolelwa ka yona tlhatlamanong ya matšatši a mararo ya dikopano tša selete tšeo di ilego tša thoma ka May 2006 tšeo di rulagantšwego ke Dihlatse tša Jehofa. Sehlogo sa yona se be se re “Tlhakodišo e Kgaufsi!”

Batho ba tšwago dinageng tše di fapa-fapanego ba ile ba ya go tše senyane tša dikopano tše tša selete. Di be di swerwe ka July le August 2006, kua Prague, motse-mošate wa Repabliking ya Czech; Bratislava, motse-mošate wa Slovakia; Chorzow le Poznan, kua Poland; * gotee le ditoropong tše tlhano tša Jeremane—Dortmund, Frankfurt, Hamburg, Leipzig, le Munich. Palo-moka ya bao ba bilego gona dikopanong tše ka moka e be e feta 313 000.

Go be go le bjang dikopanong tšeo? Ke’ng seo se ilego sa begwa ka tšona? Batla-kopanong bona ba be ba ikwa bjang mafelelong a kopano?

Ditokišetšo

Baeng le Dihlatse tša moo ka mo go swanago ba be ba lebeletše pele go seo ba bego ba tseba gore e be e tla ba sebaka se se gopolegago sa dilo tša moya. Go rulaganya bodulo bjo bo lekanego bakeng sa batla-kopanong e be e le modiro o mogolo. Ka mohlala, kopanong ya Chorzow, Dihlatse tša Mapoliši di ile tša ithapela go amogela baeng ba 13 000 ba tšwago Yuropa Bohlabela. Baeng bao ba tlilego kopanong yeo ba be ba e-tšwa Armenia, Belarus, Estonia, Georgia, Kazakhstan, Kyrgyzstan, Latvia, Lithuania, Moldova, Russia, Tajikistan, Turkmenistan, Ukraine, United States le Uzbekistan.

Baeng ba bantši ba ile ba swanelwa ke go lokišeletša leeto la bona dikgwedi e sa le pele. Tatiana, moebangedi wa nako e tletšego wa kua Kamchatka, e lego pheninsuleng ya Russia yeo e lego ka leboa-bohlabela la Japane, o ile a thoma go bea tšhelete ya leeto ngwaga pele ga moo. O ile a swanelwa ke go sepela dikhilomithara tše 10 500. Sa pele, o ile a sepela ka sefofane diiri tše 5; ke moka a sepela ka setimela matšatši a nyakilego go ba a mararo gomme mafelelong a sepela diiri tše 30 ka pese go fihla Chorzow.

Ba dikete ba ile ba ithapela go šoma go lokišeletša kopano, ba dira gore mapatlelo le mafelo ao a dikologilego a be mafelo a swanetšego borapedi. (Doiteronomio 23:14) Go bolela mohlala o tee feela, kua Leipzig Dihlatse tša fao di ile tša hlwekiša lepatlelo gabotse gomme  tša holofetša go le hlwekiša gape ka morago ga kopano. Ka baka leo, bahlokomedi ba lepatlelo ba ile ba phumola molawana wa konteraka ya go hiriša woo o bego o tsoma tšhelete ya ditshenyagalelo tša go hlwekiša.

Ditaletšo

Diphuthego lefaseng ka bophara di ile tša tloga di kwala-kwatša Dikopano tša Selete tša “Tlhakodišo e Kgaufsi!” Batho bao ba bego ba tla ba gona dikopanong tše kgethegilego ba ile ba tšea karolo lesolong le ka mafolofolo. Ba ile ba tšwela pele ba kwala-kwatša kopano go ba go fihla bošegong bja letšatši la pele ga kopano. Na mafolofolo a bona a bile le mafelelo a mabotse?

Hlatse ya Mopoliši yeo e bitšwago Bogdan e ile ya kopana le mokgalabje yoo a bego a nyaka go tla kopanong eupša a ilego a bolela gore mphiwa-fela wa gagwe o monyenyane o ka se kgone go mo sepediša dikhilomithara tše 120 go ya Chorzow. Go ile gwa hwetšwa gore go tla ba le sekgoba sa motho o tee ka peseng yeo e bego e hirilwe ke phuthego ya fao. Bogdan o anega ka gore: “Re ile ra botša monna yoo gore a ka sepela le rena ntle le tefo ge a be a ka tla lefelong leo re tlago go tšewa go lona ka 5:30 mesong.” Monna yoo o ile a amogela taletšo gomme a ba gona kopanong. Ka morago o ile a ngwalela bana babo rena lengwalo, a re: “Ka morago ga go ba gona kopanong ye, ke ikemišeditše go ba monna yo mokaone.”

Kua Prague monna yo mongwe yo a bego a dula hoteleng e nngwe yeo go yona go bego go dula baeng ba tšwago Brithania o ile a botša batla-kopanong mantšiboeng a mangwe gore le yena o be a le gona kopanong letšatšing leo. Ke’ng seo se ilego sa mo šušumeletša go ya kopanong? Monna yoo o re ka morago ga go laletšwa ke bagoeledi ba lesome ditarateng tša toropo yeo, o ile a šušumeletšega go ya! O ile a kgahlega kudu e bile o be a tloga a nyaka go ithuta ka mo go oketšegilego.—1 Timotheo 2:3, 4.

Lenaneo le le Tiilego la Moya

Lenaneo le ahla-ahlile tsela yeo ka yona go ka swaraganago le mathata a fapa-fapanego. Keletšo e lebanyago ya Mangwalo e ile ya hlalosa kamoo mathata a a ka rarollwago ka gona le go kgotlelelwa.

Batho bao ba tshwenywago ke botšofadi, boemo bjo bo sa kgahlišego bja tša maphelo, le bao ba lahlegetšwego ke baratiwa ba bona ka lehu, goba mathata a mangwe a motho ka noši ba hweditše kgothatšo e tšwago Beibeleng yeo e ba thušago go ba le pono e kaone ka bophelo. (Psalme 72:12-14) Banyalani le batswadi ba kwele keletšo ya Beibele ya kamoo ba ka bago le lenyalo le le thabišago le kamoo ba ka godišago bana ba bona ka katlego. (Mmoledi 4:12; Baefeso 5:22, 25; Bakolose 3:21) Bafsa ba Bakriste—bao ba lego kotsing ya kgateletšo e sa agego ya dithaka sekolong eupša ba hwetšago keletšo ya Lentšu la Modimo ka gae le phuthegong—ba hweditše keletšo e šomago ya kamoo ba ka swaraganago le dikgateletšo tša bagwera ba bona le kamoo ba ka “[tšhabago] dikganyogo tšeo di sepedišanago le bofsa.”—2 Timotheo 2:22.

Borwarre bja Ditšhaba-tšhaba e le ka Kgonthe

Dihlatse tša Jehofa di dula di hwetša tlhahlo e botse ya Mangwalo dipokanong tša tšona. (2 Timotheo 3:16) Lega go le bjalo, seo se dirilego gore dikopano tše e be tše fapanego e be e le go tswakana le ditšhaba  tše dingwe. Dikopano tše di kgethegilego ka moka di bile le lenaneo la moya le le swanago ka maleme a mantši. Letšatšing le lengwe le le lengwe, ditho tša Sehlopha se Bušago sa Dihlatse tša Jehofa di be di nea dipolelo, gomme dipego tšeo di bego di e-tšwa dinageng tše dingwe di be di tlaleletša kgahlego e kgethegilego. Dipolelo le dipego tše di be di fetolelwa bakeng sa go hola dihlopha tšeo di bego di le gona tše di fapa-fapanego tša maleme.

Batla-kopanong ba be ba fagahletše go kopana le bana babo bona le dikgaetšedi bao ba tšwago dinageng tše dingwe. Motla-kopanong yo mongwe o boletše gore: “Go fapana ga maleme ga se gwa ka gwa tšweletša bothata le ge e le bofe. Go e-na le moo, go ile gwa tlaleletša lethabong la tiragalo yeo. Baeng ba be ba e-tšwa ditšong tše fapa-fapanego, eupša ba kopantšwe ke tumelo e swanago.” Bao ba bego ba le gona kopanong ya kua Munich ba hlalosa ka gore: “Re arogane ka maleme, eupša re kopantšwe ke lerato.” Go sa šetšwe dinaga tšeo ba tšwago go tšona goba leleme la bona, bao ba bego ba le gona ba be ba e-kwa gore ba gare ga bagwera ba kgonthe—bana babo bona ba moya le dikgaetšedi.—Sakaria 8:23.

Ditebogo

Boemo bja leratadima nakong ya kopano kua Poland bo ile bja leka boemo bja baeng bja kgopolo gotee le kgotlelelo ya bona. Ga se feela gore pula e be e e-na gantši eupša gape go be go tonya e le ruri—mo e ka bago 14°C. Ngwanabo rena yo a tšwago United States o boletše gore: “E be e le boemo bjo bo sa kgahlišego ka go fetišiša bja leratadima le thempheretšha ya tlase kudu tšeo ke ilego ka ba go tšona kopanong, gomme ga ka kwešiša bogolo bja lenaneo. Eupša bogwera bja ditšhaba-tšhaba bjo bobotse kudu, moya o kgahlišago kudu, gotee le moya wa moswananoši wa go amogela baeng di ile tša dira gore re se ke ra šetša seo. Kopano ye ruri e be e le e sa lebalegego!”

Selo seo se sa lebalegego go batla-kopanong bao ba bolelago Sepoliši e be e le tsebišo ya go lokollwa ga Insight on the Scriptures ka Sepoliši—moputso o kgahlišago wa go kgotlelela ga bona phefo le pula. Go lokollwa ga kgatišo e mpsha ya Live With Jehovah’s Day in Mind le gona go ile gwa thabiša bohle Dikopanong tša Selete tša “Tlhakodišo e Kgaufsi!”

Bontši bja bao ba bego ba le gona ba tla gopola kopano ye ka mabaka a mangwe. Kristina, kgaetšedi wa kua Czech yo a ilego a ikgafa go sepela le baeng bao ba tšwago mešo ya mawatle ba ba bego ba sepela ka pese, o a gopola: “Nakong ya ge re be re laelana, kgaetšedi yo mongwe o ile a nkiša thokwana, a nkgokarela gomme a re: ‘Ke ile ka ikwa ke hlokometšwe e le ruri! O re tlišeditše dijo madulong a rena wa ba wa re fa le meetse a go nwa. Re leboga lerato la gago la boikgafo.’” Seo a bego a bolela ka sona e be e le tokišetšo ya matena ya baeng ba tšwago mešo ya mawatle. Ngwanabo rena yo mongwe o hlalositše ka gore: “E be e le mošomo woo re sa kago ra o šoma nakong e fetilego. Mošomo woo o be o akaretša go sepediša disola tše 6 500 tša matena ka letšatši. E be e le mo go kgothatšago go bona ba bantši, go akaretša le bana, ba ithapela go thuša.”

Kgaetšedi yo a ilego kopanong Chorzow a e-tšwa Ukraine o re: “Re kgothaditšwe kudu ke lerato, tlhokomelo le seatla se se bulegilego tšeo di bontšhitšwego ke badumedi-gotee le rena. Ga re tsebe gore re leboge re re’ng.” Annika wa nywaga e seswai yo a tšwago Finland o ile a ngwalela ofisi ya lekala ya Dihlatse tša Jehofa ya Poland gore: “Kopano e be e kgahliša kudu go feta kamoo ke bego ke nagana ka gona. Ruri ke mo go kgahlišago go ba mokgatlong wa Jehofa, ka ge motho a e-na le bagwera lefaseng ka bophara!”—Psalme 133:1.

Babogedi ba a Bolela

Pele ga dikopano, baeng ba bangwe ba be ba rulaganyeditšwe maeto a go bogela naga.  Nageng ya Bavaria, baeng ba ile ba ema Diholong tša Mmušo, moo Dihlatse tša fao di ilego tša ba amogela. Mohlahli wa sehlopha se sengwe sa baeti yoo e sego Hlatse o ile a kgahlwa kudu ke go bontšhwa moo ga lerato la borwarre. Moeng yo mongwe o bega gore: “Ge re le ka peseng yeo e bego e re bušetša hoteleng ya rena, mohlahla-baeti o ile a bolela gore re be re fapana kudu le dihlopha tše dingwe tša baeti. Re be re apere gabotse, gomme ka moka re be re dirišana le bao ba bego ba etelela pele sehlopheng. Go be go se na mahlapa le tlhakatlhakano. O be a makaditšwe ke gore batho ba sa tsebanego ba ka ba bagwera kapejana ka mokgwa woo.”

Ngwanabo rena yo a bego a šoma Lefapheng la Tirelo ya Ditaba kopanong ya kua Prague o bolela gore: “Mesong ya Sontaga, tona ya maphodisa ao a bego a abetšwe go hlokomela kopano e ile ya re etela. E ile ya lemoga gore go be go rena khutšo gomme ya bolela gore ga go na seo e kago se dira. E ile ya ba ya bolela gore badudi ba fao ba kgaufsi le lepatlelo ba be ba botšiša gore lenaneo e be e le la mohuta mang. Ge e be e bolela gore ke Dihlatse tša Jehofa, ba be ba nyama, gomme tona e ba botša gore: ‘Ge nkabe batho ba be ba e-na le seripa-gare sa boitshwaro bja Dihlatse tša Jehofa, maphodisa a be a ka se sa hlwa a nyakega.’”

Ba Bantši ba Šetše ba Hlakodišitšwe!

Lentšu la Modimo, Beibele, le bjalo ka leporogo gare ditšo, leo le dirago gore Bakriste ba be le khutšo le botee. (Baroma 14:19; Baefeso 4:22-24; Bafilipi 4:7) Dikopano tše di kgethegilego tša “Tlhakodišo e Kgaufsi!” di bontšhitše therešo ya se. Dihlatse tša Jehofa di šetše di hlakodišitšwe go bontši bja matshwenyego ao a tlaišago lefase le. Go hloka kgotlelelo, pefelo, gotee le semorafo—go fo bolela ka a sego kae a mathata ao a tshwenyago batho—di nyakile di tlošitšwe ka moka gare ga tšona, gomme di lebeletše pele nakong ya ge lefase ka moka le se sa hlwa le e-na le mathata a bjalo.

Bao ba bego ba le gona dikopanong tše ba bone ka bobona botee bjo bo lego gona makgatheng a Dihlatse tše tšwago mafelong a fapa-fapanego le ditšong tše fapa-fapanego. Se se ile sa bonagala mafelelong a dikopano. Ka moka ba be ba opa magofsi, ba gokarela bagwera ba bafsa e bile ba tšea le diswantšho tša mafelelo. (1 Bakorinthe 1:10; 1 Petro 2:17) Ba thabile e bile ba kgodišegile gore tlhakodišo mathateng ka moka le tlhokomelo e kgaufsi, baeng ba boetše gae le diphuthegong ba e-na le maikemišetšo a mpshafaditšwego a go tseparela ‘lentšung la Modimo la bophelo.’—Bafilipi 2:15, 16.

[Mongwalo wa ka tlase]

[Lepokisi go letlakala 10]

Batho ba Bolelago Maleme a Masomepedi-hlano Eka ba Bolela Leleme le Tee

Dikopanong ka moka tše senyane, lenaneo le be le le ka leleme la fao. Nakong ya dikopano tša kua Jeremane, dipolelo di be di bewa le ka maleme a mangwe a 18. Le gona kua Dortmund dipolelo di be di bewa ka se-Arabia, se-Farsi, Sepotokisi, Sepaniši le ka Serussia; kua Frankfurt ka Seisemane, Sefora le ka Seserbia/se-Croatia; kua Hamburg ka se-Denmark, se-Dutch, se-Sweden le ka se-Tamil; kua Leipzig ka se-China, Sepoliši le ka se-Turkey; gomme kua Munich ka Segerika, Setaliana le ka Polelo ya Diatla ya Jeremane. Kopanong ya kua Prague dipolelo ka moka di be di bewa ka se-Czech, Seisemane le ka Serussia. Kua Bratislava lenaneo le be le swerwe ka Seisemane, se-Hungary, se-Slovakia le Polelo ya Diatla. Kua Chorzow maleme e be e le Sepoliši, Serussia, se-Ukraine le Polelo ya Diatla ya Poland. Gomme kua Poznan, e be e le Sepoliši le se-Finland.

Ge a kopana ke maleme a 25! Ee, batla-kopanong ba be ba arogane ka maleme, eupša ba kopantšwe ke lerato la bona.

[Seswantšho go letlakala 9]

Baeng ba Croatia kua Frankfurt ba be ba thabetše go hwetša “New World Translation” ka segagabo bona