“Tšwela Pele o Fenya Bobe ka Bolo”

“O se ke wa itesa o fenywa ke bobe, eupša tšwela pele o fenya bobe ka bolo.”—BAROMA 12:21.

1. Ke ka baka la’ng re ka kgodišega gore re ka fenya bobe?

NA GO a kgonega go ema ka go tia kgahlanong le batho bao ba ganetšago borapedi bja therešo o šoro? Na go a kgonega go fenya ditutuetšo tše di lekago go re bušetša lefaseng leo le sa hlomphego Modimo? Karabo ya dipotšišo tše tše pedi ke ee! Ke ka baka la’ng re rialo? Ka baka la seo moapostola Paulo a se bolelago lengwalong la gagwe le le yago go Baroma. O ngwala gore: “O se ke wa itesa o fenywa ke bobe, eupša tšwela pele o fenya bobe ka bolo.” (Baroma 12:21) Ge e ba re bota Jehofa e bile re ikemišeditše go se fenywe ke lefase, bobe bja lona bo ka se re fenye. Go feta moo, polelwana e rego “tšwela pele o fenya bobe” e bontšha gore re ka fenya bobe ge e ba re tšwela pele ntweng ya rena ya moya kgahlanong le bjona. Ke feela bao ba sa dulego ba phafogile le bao ba tlogelago go lwa bao ba tlago go fenywa ke lefase le le lebe le mmuši wa lona yo mobe, Sathane Diabolo.—1 Johane 5:19.

2. Ke ka baka la’ng re tla hlahloba dilo tše dingwe tšeo di diregilego bophelong bja Nehemia?

² Nywaga e ka bago e 500 pele ga mehla ya Paulo, mohlanka wa Modimo yo a dulago kua Jerusalema o ile a bontšha therešo ya mantšu a Paulo a mabapi le go lwa le bobe. Monna yoo wa Modimo e lego Nehemia ga se a ka a emeletšana feela le kganetšo ya batho bao ba sa boifego Modimo eupša gape o ile a fenya bobe ka botse. O ile a lebeletšana le ditlhohlo dife? O thušitšwe ke’ng gore a atlege? Re ka ekiša mohlala wa gagwe bjang? E le gore re arabe dipotšišo tšeo, anke re hlahlobeng tše dingwe tša dilo tšeo di diregilego bophelong bja Nehemia. *

3. Nehemia o be a phela boemong bja mohuta mang, gomme o ile a phetha modiro ofe?

³ Nehemia o be a šoma kgorong ya Kgoši Arithasasitha wa Peresia. Gaešita le ge Nehemia a be a phela le batho bao e sego badumedi, ga se a ka a “bopega ka sebopego sa tshepedišo . . . ya dilo” ya mehleng yeo. (Baroma 12:2) Ge go be go nyakega thušo kua Juda, o ile a gafa bophelo bja gagwe bja boiketlo, a tšea leeto le thata la go ya Jerusalema gomme a amogela modiro o mogolo wa go aga morako wa motse lefsa. (Baroma 12:1) Gaešita le ge e be e le mmušiši wa Jerusalema, Nehemia o be a šoma letšatši le letšatši a e-na le Baisiraele-gotee le yena ba “thôma xe mahuba a hlatloxa, [ba] kxaotša xe dinaledi  di bônala.” Ka baka leo, modiro wo o ile wa fetšwa ka dikgwedi tše pedi feela! (Nehemia 4:21; 6:15) Woo e be e le modiro o makatšago e le ruri, ka ge Baisiraele ba ile ba lebeletšana le mehuta e fapa-fapanego ya kganetšo nakong ya modiro wo wa go aga. Baganetši ba Nehemia e be e le bomang, gomme morero wa bona e be e le ofe?

4. Baganetši ba Nehemia ba be ba ikemišeditše’ng?

⁴ Baganetši ba bagolo e be e le Sanebalathi, Tobia le Gesema, e lego banna ba ba hlomphegago bao ba dulago kgaufsi le Juda. Ka ge e be e le manaba a batho ba Modimo, “xe ba e-kwa xore xo tlile [Nehemia] wa xo hola Ba-Isiraele, ba selekêxa ka kudu.” (Nehemia 2:10, 19) Manaba a Nehemia a be a ikemišeditše go thibela dithulaganyo tša Nehemia tša go aga, a ba a loga le maano-mabe. Na Nehemia ‘o be a tla itesa a fenywa ke bobe’?

“A Tlalwa ke Pelo, a Selekêxa Xa-xolo”

5, 6. (a) Manaba a Nehemia a ile a arabela bjang modirong wa go aga? (b) Ke ka baka la’ng Nehemia a sa ka a tšhošwa ke baganetši?

⁵ Nehemia o ile a kgothatša batho ba gabo ka sebete gore: “Eriyeng re tsošê merakô ya Jerusalêma.” Ba ile ba araba ka gore: “Eriyeng, re axê!” Nehemia o re: “Ba tiišana xo dira modirô o mobotse woo,” eupša baganetši “ba thôma xo re kwêra le xo re thsêxa, ba re: Taba yé Le e diraxo ké eng? A Le rata xo hlanoxêla kxoši?” Nehemia ga se a ka a tšhošwa ke dikwero tša bona le ditatofatšo tša maaka. O boditše baganetši ba gore: “Modimo wa lexodimo ó tlo re kxoniša; xomme rena bahlanka ba xaxwe re thomile, ’me re a axa.” (Nehemia 2:17-20) Nehemia o be a ikemišeditše go tšwela pele ka “modirô o mobotse.”

⁶ Yo mongwe wa baganetši bao, Sanebalathi, o ile “a tlalwa ke pelo, a selekêxa xa-xolo” gomme a kwera le go feta. O ile a kwera ka gore: “Ba Juda bao ba dira’ng mola ba šetše ba nôtlexile? . . . Mafsika ao a senyexilexo ka mollô a ba tlo buša ba a phediša?” Tobia le yena o ile a thoma go kwera a re: “Le phukubyê e kaxo taboxêla morakô woo wa bôná wa mafsika, e tla o xereša.” (Nehemia 4:1-3) Nehemia o ile a arabela bjang?

7. Nehemia o ile a arabela ka ditsela dife ditatofatšong tša baganetši ba gagwe?

⁷ Nehemia o ile a fo hlokomologa dikwero tše. O ile a latela taelo ya Modimo gomme a se ke a leka go itefeletša. (Lefitiko 19:18) Go e na le moo, o ile a tlogela taba ye diatleng tša Jehofa gomme a rapela ka gore: “Joo, Modimo wa rena! Kwaa se ba se bolêlaxo! Re šetše re le sekwêrô. Retološetša mašapa a bôná dihloxong tsa bôná.” (Nehemia 4:4) Nehemia o ile a bota kgonthišetšo ya Jehofa e rego: “Tefetšô ké ya-ka, le kôtlô ké ya-ka.” (Doiteronomio 32:35) Go oketša moo, Nehemia le batho ba gabo ba ile ba ‘tšwela pele ba aga morako.’ Ga se ba ka ba dumelela go arošwa. Ge e le gabotse, ba ile ba “kôpanya morakô ka moka xo fihla boxareng bya wôna, xobane sethšaba se be se dira ka mafolofolo.” (Nehemia 4:6) Manaba a borapedi bja therešo a be a paletšwe ke go thibela modiro wa go aga! Re ka ekiša Nehemia bjang?

8. (a) Re ka ekiša Nehemia bjang ge baganetši ba re latofatša ka maaka? (b) Laodiša phihlelo yeo o bilego le yona goba yeo o e kwelego yeo e bontšhago gore go se itefeletše ke gabohlale.

⁸ Lehono, baganetši sekolong, mošomong goba gaešita le ka gae ba ka re kwera le go re latofatša. Lega go le bjalo, gantši ditatofatšo tšeo tša maaka di fenywa ka go diriša molao wa motheo wa Mangwalo o rego: “Xo homola xo na le mohla wa xôna.” (Mmoledi 3:1, 7) Ka baka leo, ka go swana le Nehemia re phema go itefeletša ka mantšu a gobatšago. (Baroma 12:17) Re retologela go Modimo ka thapelo, re holofela yo a re kgonthišetšago ka gore: “Ke tla lefetša.” (Baroma 12:19; 1 Petro 2:19, 20) Ka tsela yeo, ga re dumelele baganetši ba rena gore ba re aroše modirong wa moya wo o swanetšego go phethwa lehono—go bolela ditaba tše dibotse tša Mmušo wa Modimo le go dira barutiwa. (Mateo 24:14; 28:19, 20) Nako le nako ge re tšea karolo modirong wa boboledi gomme re gana go arošwa ke kganetšo, re bontšha moya o swanago wa potego wo Nehemia a o bontšhitšego.

 ‘Re tla le Bolaya’

9. Ke mohuta ofe wa kganetšo wo manaba a Nehemia a ilego a o hloma, gomme Nehemia o ile a arabela bjang?

⁹ Ge baganetši ba borapedi bja therešo mehleng ya Nehemia ba be ba e-kwa gore “morakô wa Jerusalêma o a tsoxa,” ba ile ba tšea marumo a bona gore ba ‘tšwele motse wa Jerusalema dira.’ Bajuda ba be ba bona go ka se be le leano la go tšwa boemong bjo. Basamaria ba be ba le ka leboa, Baamoni ba le ka bohlabela, Baarabia ba le ka borwa gomme Baasidodo ba le ka bodikela. Jerusalema e be e dikologilwe; go be go bonagala baagi ba kgakgetšwe! Ba be ba swanetše go dira’ng? Nehemia o re: “Rena ra rapêla Modimo wa rena.” Manaba a ile a tšhošetša ka gore: ‘Re tla ba tsena re ba bolaye, re fediše modiro woo.’ Nehemia o ile a arabela ka go abela baagi modiro wa go šireletša motse “bà swere marumô, le dithšoša le mará.” Ke therešo gore go ya ka pono ya motho, sehlopha se senyenyane sa Bajuda se be se ka se fenye manaba ao a matla, eupša Nehemia o se kgothaditše ka gore: “Le se kê la boifa . . . Le išeng mexopolô xo Morêna e lexo e moxolo e a thšabêxaxo.”—Nehemia 4:7-9, 11, 13, 14.

10. (a) Ke’ng seo se dirilego gore dilo di fetoge ka ponyo ya leihlo go manaba a Nehemia? (b) Nehemia o ile a gata megato efe?

¹⁰ Bjale dilo di ile tša fetoga ka ponyo ya leihlo. Manaba a ile a kgaotša go hlasela. Ka baka la’ng? Nehemia o bega gore: “Morêna ó sentše morêrô wa ôna.” Lega go le bjalo, Nehemia o ile a bona gore manaba a a tšwela pele a tšhošetša. Ka baka leo, ka bohlale o ile a fetoša mokgwa wa go šoma wa baagi. Go tloga ka nako yeo go ya pele, “ba be ba dira ka seatla se sengwê, ’me ka se sengwê ba be ba swere lerumô.” Le gona Nehemia o ile a bea monna yo a bego a tla ‘letša phalafala’ ge a bona tlhaselo ya manaba e le gore a lemoše baagi. Go feta tšohle, Nehemia o ile a kgonthišetša batho ka gore: “Modimo wa rena ó tlo re hlabanêla.” (Nehemia 4:15-20) Ka ge ba be ba kgothatšegile e bile ba itokišeleditše go lebeletšana le tlhaselo, baagi ba ile ba tšwela pele ba šoma. Re ka ithuta’ng pegong ye?

11. Ke’ng seo se thušago Bakriste ba therešo gore ba emeletšane le bobe dinageng tšeo go tšona modiro wa Mmušo o thibetšwego, gomme ba fenya bjang bobe ka bolo?

¹¹ Ka dinako tše dingwe, Bakriste ba therešo ba lebeletšana le kganetšo e šoro. Ge e le gabotse, dinageng tše dingwe, baganetši ba šoro ba borapedi bja therešo ba bopa sehlopha se matla sa manaba. Ge re bolela go ya ka pono ya batho, badumedi-gotee le rena dinageng tšeo ba ka se fenye. Lega go le bjalo, Dihlatse tšeo di kgodišegile gore ‘Modimo o tla di hlabanela.’ Ka kgonthe, ke gantši bao ba tlaišwago ka baka la ditumelo tša bona ba bonago gore Jehofa o araba dithapelo tša bona le go ‘senya morero’ wa manaba a matla. Gaešita le dinageng tšeo go tšona modiro wa Mmušo o thibetšwego, Bakriste ba hwetša ditsela tša go tšwela pele ba dira boboledi bja ditaba tše dibotse. Go fo swana le ge baagi ba kua Jerusalema ba ile ba fetoša mokgwa wa bona wa go šoma, Dihlatse tša Jehofa le tšona lehono di fetoša mokgwa wa tšona wa  go nea bohlatse ka bohlale ge di hlaselwa. Ke therešo gore di phema go diriša dibetša tša kgonthe. (2 Bakorinthe 10:4) Gaešita le go tšhošetšwa ka gore ba tla gobatšwa mmeleng ga go ba dire gore ba kgaotše modiro wa bona wa boboledi. (1 Petro 4:16) Ka go fapana le seo, bana babo rena bao ba sebete le dikgaetšedi ba ‘tšwela pele ba fenya bobe ka bolo.’

“Tlaa, re Xahlanê”

12, 13. (a) Ke mokgwa ofe wo baganetši ba Nehemia ba ilego ba o diriša? (b) Ke ka baka la’ng Nehemia a ile a gana taletšo ya gore a gahlane le manaba a gagwe?

¹² Ka morago ga ge manaba a Nehemia a lemogile gore go hlasela ga ona ka go lebanya go padile, a ile a diriša mekgwa e mengwe gape e bohlale ya kganetšo. Ge e le gabotse, a ile a leka maano a mararo. Ke afe?

¹³ La pele, manaba a Nehemia a ile a leka go mo hlalefetša. A ile a mmotša gore: “Tlaa, re xahlanê motsaneng wa molaleng wa Ono.” Ono e be e le magareng ga Jerusalema le Samaria. Ka gona manaba a ile a šišinya gore Nehemia a a gahlanetše gore ba tle ba rarolle go se kwane ga bona. Nehemia o be a ka nagana gore: ‘Seo se a kwagala. Go kaone go boledišana go e na le go lwa.’ Eupša Nehemia o ile a gana. O hlalositše lebaka: “Ba be ba ntakane.” O ile a lemoga leano la bona gomme a se ke a hlalefetšwa. O boditše baganetši ba gagwe ka makga a mane gore: “Nka se kê ka foloxa ka tla, xobane modirô o ka êma xe nka o tloxêla ka theoxêla xo lena.” Maiteko a manaba a go dira gore Nehemia a kwanantšhe a ile a palelwa. O ile a lebiša tlhokomelo modirong wa go aga.—Nehemia 6:1-4.

14. Nehemia o ile a arabela bjang go balatofatši ba gagwe ba maaka?

¹⁴ La bobedi, manaba a Nehemia a ile a phetha ka go phatlalatša mabarebare a maaka, a latofatša Nehemia ka gore o “rêra xo hlanoxa” malebana le Kgoši Arithasasitha. Nehemia o ile a botšwa gape gore: “Tlaa xê, re eletšanê.” Nehemia o ile a gana gape, ka ge a be a lemoga maikemišetšo a manaba a. Nehemia o hlalositše gore: “Bôná ka moka ba be ba rata xo re thšošetša, ba re re tlo lesa modirô woo, wa se kê wa dirwa.” Lega go le bjalo, mo nakong ye Nehemia o ile a gana tatofatšo ya manaba a gagwe ka go bolela gore: “Ditaba tše O di bolêlaxo xa di’o; ké wêna O ithômetšexo tšôna ka pelong ya xaxo.” Go oketša moo, Nehemia o ile a retologela go Jehofa bakeng sa thekgo, a rapela ka gore: “Tiiša diatla tša-ka.” O be a holofela gore ka thušo ya Jehofa, o tla kgona go folodiša leano le le lebe le go tšwetša pele modiro wa go aga.—Nehemia 6:5-9.

15. Ke keletšo efe yeo e ilego ya newa ke moporofeta wa maaka, gomme ke ka baka la’ng Nehemia a sa ka a e amogela?

¹⁵ La boraro, manaba a Nehemia a ile a diriša moeki, Semaya wa Moisiraele, go leka go dira gore Nehemia a robe Molao wa Modimo. Semaya o boditše Nehemia gore: “A re kxobokaneng Ngwakong wa Modimo, re tsênê mo Ntlong-kxêthwa, re tswalêlê mejakô ya Ntlo-kxêthwa, xobane ba tlo tla ba Xo bolaya.” Semaya o boletše gore Nehemia o be a le kgaufsi le go bolawa eupša a ka phološa bophelo bja gagwe ka go iphihla ka tempeleng. Lega go le bjalo, Nehemia e be e se moperisita. O be a tla ba a dira sebe ka go iphihla ka ngwakong wa Modimo. Na o be a tla roba Molao wa Modimo ka maiteko a go phološa bophelo bja gagwe? Nehemia o arabile ka gore: “A O re . . . motho moka-nna a ka tsêna Ntlong-kxêthwa a phela? Nna nka se kê ka bá ka tsêna.” Ke ka baka la’ng Nehemia a sa ka a tanywa molabeng wo a bego a o reetšwe? Ka gobane o be a tseba gore gaešita le ge Semaya e be e le Moisiraele-gotee, “ó be a sa ka a rongwa ke Modimo.” Ge e le gabotse, moporofeta wa therešo o be a ka se ke a mo eletša gore a robe Molao wa Modimo. Gape, Nehemia ga se a ka a itumelela go fenywa ke baganetši ba babe. Nakwana ka morago ga moo, o begile gore: “Morakô o phethilwe ka la masome a mabedi a metšô e mehlano la kxwedi ya Elula; re o axile ka matšatši a masome a mahlano a metšô e mebedi.”—Nehemia 6:10-15; Numeri 1:51; 18:7.

16. (a) Re swanetše go swara bjang bao ba itirago bagwera ba rena, balatofatši le bao ba itirago bana babo rena? (b) O bontšha bjang gore o gana go kwanantšha ditumelo tša gago ka gae, sekolong goba mošomong?

¹⁶ Ka go swana le Nehemia, le rena re ka lebeletšana  le baganetši bao ba itirago bagwera ba rena, balatofatši ba maaka le batho bao ba itirago bana babo rena. Batho ba bangwe ba ka nyaka gore re kwane le bona ditabeng tše itšego. Ba ka leka go re kgodiša gore ge re ka fokotša mafolofolo a rena go se nene go hlankeleng Jehofa, re ka phegelela dipakane tša lefase ka nako e swanago. Lega go le bjalo, ka ge Mmušo wa Modimo o e-tla pele maphelong a rena, re gana go kwanantšha. (Mateo 6:33; Luka 9:57-62) Le gona baganetši ba phatlalatša ditatofatšo tša maaka kgahlanong le rena. Dinageng tše dingwe, re latofatšwa ka gore re tšhošetša Mmušo, go fo swana le ge Nehemia a ile a latofatšwa ka gore o rabela malebana le kgoši. Ditatofatšo tše dingwe di ile tša fenywa ka katlego dikgorong tša tsheko. Eupša go sa šetšwe gore mafelelo e ka ba afe maemong ao motho a lego go ona, re rapela ka kgodišego gore Jehofa o tla dira gore dilo di dirwe go ya ka thato ya gagwe. (Bafilipi 1:7) Le gona re ka ganetšwa ke bao ba itirago bahlanka ba Jehofa. Go fo swana le ge Mojuda-gotee a ile a leka go kgodiša Nehemia gore a robe Molao wa Modimo e le gore a šireletše bophelo bja gagwe, le batho bao e kilego ya ba Dihlatse bao ga bjale e lego bahlanogi ba ka leka go re tutueletša go kwanantšha ka ditsela tše di fapa-fapanego. Lega go le bjalo, re gana bahlanogi ka gobane re a tseba gore maphelo a rena a phološwa ke go boloka melao ya Modimo, e sego ke go e roba! (1 Johane 4:1) Ee, re ka fenya mohuta le ge e le ofe wa bobe ka thušo ya Jehofa.

Go Bolela Ditaba tše Dibotse go sa Šetšwe go Lebeletšana le Bobe

17, 18. (a) Ke’ng seo Sathane le batseta ba gagwe ba katanelago go se fihlelela? (b) O ikemišeditše go dira’ng, gona ka baka la’ng?

¹⁷ Lentšu la Modimo le bolela mabapi le bana babo Kriste bao ba tloditšwego gore: “Ba [fentše Sathane] ka baka la . . . lentšu la go nea bohlatse ga bona.” (Kutollo 12:11) Ka baka leo, go na le kgokagano e lebanyago magareng ga go fenya Sathane—mothopo wa bobe—le go bolela molaetša wa Mmušo. Ga go makatše ge Sathane a sa hwe matwa ge a hlasela mašaledi a batlotšwa le “lešaba le legolo” ka go gakatša kganetšo!—Kutollo 7:9; 12:17.

¹⁸ Go etša ge re bone, kganetšo e ka tla ka tsela ya tlhaselo ya mantšu goba ditšhošetšo tša gore o tla gobatšwa mmeleng goba mekgwa e mengwe ya go hlalefetša. Boemong le ge e le bofe, maikemišetšo a Sathane ke a swanago ka mehla—go thibela modiro wa boboledi. Lega go le bjalo, o tla palelwa wa go leša dihlong ka gobane batho ba Modimo, ka go ekiša Nehemia wa bogologolo, ba ikemišeditše go ‘tšwela pele ba fenya bobe ka bolo.’ Ba tla dira bjalo ka go tšwela pele ba dira boboledi bja ditaba tše dibotse go fihlela Jehofa a re go lekane!—Mareka 13:10; Baroma 8:31; Bafilipi 1:27, 28.

[Mongwalo wa ka tlase]

Na o a Gopola?

• Bahlanka ba Modimo ba ile ba lebeletšana le kganetšo efe nakong e fetilego yeo Bakriste ba lebeletšanago le yona lehono?

• Maikemišetšo a magolo a manaba a Nehemia e be e le afe, gomme maikemišetšo a manaba a Modimo ke afe lehono?

• Re fenya bobe ka bolo bjang lehono?

[Dipotšišo tša Thuto]

[Seswantšho go letlakala 29]

Dithuto Tšeo di Hwetšwago Pukung ya Nehemia

Bahlanka ba Modimo ba lebeletšana le

• dikwero

• ditšhošetšo

• bofora

Bofora bo tla ka

• bagwera ba maaka

• balatofatši ba maaka

• bao ba itirago bana babo rena

Bahlanka ba Modimo ba fenya bobe ka

• go kgomarela modiro wo ba o filwego ke Modimo

[Seswantšho go letlakala 27]

Nehemia le bašomi-gotee le yena ba tsošološa morako wa Jerusalema go sa šetšwe kganetšo e šoro

[Seswantšho go letlakala 31]

Bakriste ba therešo ba bolela ditaba tše dibotse ba sa boife