Thuto ya Beibele e Aga Tumelo

MOEMEDI wa sehlopha sa bo-122 sa Sekolo sa Beibele sa Watchtower sa Gilead o boletše letšatšing la go aloga gore: “A tokelo e kgolo gakaakang yeo re bilego le yona ya go fetša dikgwedi tše hlano tše di fetilego re ela hloko dikgopolo tša Mmopi wa rena le go ithuta go bona dilo ka tsela yeo a di bonago ka yona.” Letšatši la March 10, 2007 e be e tla ba le le gopolegago go ditho tše 56 tša sehlopha se, tšeo ga bjale di bego di le kgaufsi le go thoma tirelo ya tšona ya boromiwa dinageng tše 26 tšeo di abetšwego go tšona.

Ka morago ga go amogela ka borutho batho ba 6 205 bao ba bego ba le gona, Theodore Jaracz, e lego setho sa Sehlopha se Bušago, o itše: “Re holofela gore lenaneo le la go aloga le tla le matlafatša moyeng le go le aga tumelong.” O ile a rola diboledi tše nne ka go latelana tšeo di bego di tla nea barutwana kgothatšo e lego nakong e theilwego Beibeleng gotee le keletšo yeo e tlago go ba thuša go atlega dikabelong tša bona tša boromiwa.

Mantšu a Kgothatšo a go Aga Tumelo ya ba Bangwe

Leon Weaver, e lego setho sa Komiti ya Lekala ya United States, o boletše ka sehlogo se se rego, “Tšwelang Pele le Dira Botse.” O ile a gopotša barutwana gore yo mongwe le yo mongwe wa bona o feditše palo-gare ya nywaga e 13 a le tirelong ya nako e tletšego, a tšwetša pele thuto ya Beibele yeo e agago tumelo. O itše: “Ke modiro o mobotse ka gobane o akaretša go phološa maphelo a batho, gomme se bohlokwa le go feta, ke modiro o mobotse ka gobane o godiša Tatago rena wa legodimong, Jehofa.” Ke moka Ngwanabo rena Weaver o ile a kgothaletša barutwana go tšwela pele ba ‘bjalela moya’ le go ‘se langwe go dira botse.’—Bagalatia 6:8, 9.

David Splane, e lego setho sa Sehlopha se Bušago, o neile dikgopotšo tše di šomago ge a be a ahla-ahla sehlogo se se rego “Kgonthišetša Gore o Dira Seo o ka se Kgonago.” Ngwanabo rena Splane o kgothaleditše baromiwa ba bafsa gore ba thome dilo gabotse kabelong ya bona ka go dira dilo tše di latelago: “E-ba le boemo bjo bo nepagetšego bja kgopolo. O se ke wa kitimela go dira diphetho. Myemyela. O se ke wa swaya diphošo. Ikokobetše, gomme o hlomphe le bana babo rena ba lefelong leo o yago go lona.” Ke moka a oketša ka gore: “Ge o fologa sefofane, dira seo o ka se kgonago, gomme eka Jehofa a ka šegofatša maoto ao a lena a mabotse ge a dutše a tliša ‘ditaba tše dibotse tša mabapi le selo se sekaone’ bathong.”—Jesaya 52:7, NW.

 Mohlahli wa Gilead e lego Lawrence Bowen o ile a ahla-ahla sehlogo se se rego, “Bohwa bjo bo Kgonthišeditšwego.” Ngwanabo rena Bowen o gopoditše barutwana gore go hlongwa ga Sekolo sa Gilead nakong ya Ntwa ya II ya Lefase go be go theilwe kholofelong e feletšego ya gore Lentšu la Jehofa la boporofeta le tla phethagala. (Baheberu 11:1; Kutollo 17:8) Go tloga ka nako yeo, Gilead e neile barutwana sebaka sa go matlafatša tumelo ya bona. Tumelo e matla e tutueletša dialoga go tšwela pele le go tsebatša therešo ka mafolofolo.

Mark Noumair, e lego mohlahli yo mongwe wa Gilead o boletše ka sehlogo se se kgahlišago se se rego, “O Nkgopotša Motho yo Mongwe.” O ile a lebiša tlhokomelo mohlaleng wa moporofeta Eliša, yo a ilego a bontšha  tumelo le sebete kabelong ya gagwe. A theile ditlhaloso tša gagwe go 1 Dikxoši 19:21, Ngwanabo rena Noumair o itše: “Eliša o be a ikemišeditše go dira diphetogo bophelong bja gagwe, go bea dikgahlego tša gagwe ka noši boemong bja bobedi le go lwela morero wa Jehofa.” O ile a reta dialoga ka ge di ile tša bonagatša moya o swanago le go di kgothaletša go tšwela pele di dira bjalo dikabelong tša tšona tše difsa.

Tumelo e Dira Gore Motho a Bolele ka Bolokologi

Ge baromiwa ba ka moso ba be ba sa dutše ba aga tumelo ya bona nakong ya ge ba be ba sa le sekolong, ba ile ba diriša gabotse mafelo-beke e le gore ba ka botša ba bangwe ditaba tše dibotse. Se se dirile gore go be le diphihlelo tše dibotse tšeo di ilego tša laodišwa le go diragatšwa karolong ya lenaneo yeo e bego e swerwe ke Wallace Liverance, e lego mohlahli yo mongwe wa Gilead. Sehlogo sa karolo ya gagwe se se rego, “Re Bontšha Tumelo ka Gona ra Bolela,” se ile sa dira gore go gopolwe mantšu a moapostola Paulo ao a hwetšwago go 2 Bakorinthe 4:13.

Ka morago ga karolo ye, Daniel Barnes le Charles Woody, e lego ditho tša lapa la Bethele, ba ile ba boledišana le bao ga bjale e lego baromiwa gotee le bao e kilego ya ba baromiwa. Ba ile ba gatelela tsela yeo Jehofa a hlokomelago le go šegofatša bao ba mo hlankelago ka potego. (Diema 10:22; 1 Petro 5:7) Moromiwa yo mongwe o hlalositše gore: “Nna le mosadi wa-ka re bone e le ka kgonthe tlhokomelo ya Jehofa ka thuto yeo re e hweditšego kua Gilead. E ile ya matlafatša tumelo ya rena e le ruri. Tumelo e bohlokwa ka gobane bahlanka ba Modimo ka moka, go akaretša le baromiwa, ba tla ba le diteko, mathata le dipelaelo.”

Tšwela Pele o Godiša Thuto ya Beibele Yeo e Agago Tumelo

E le seremo se se swanetšego sa lenaneo la go aloga, Samuel Herd, e lego setho sa Sehlopha se Bušago, o ile a boledišana le batheetši ka sehlogo se se rego “Tšwela Pele o Aga Bana Beno.” Morero wa thuto yeo barutwana ba e hweditšego e be e le ofe? Ngwanabo rena Herd o itše: “Morero wa yona e be e le go le ruta kamoo le ka dirišago maleme a lena go tumiša Jehofa, go ruta ba bangwe ditherešo tša gagwe tšhemong yeo le sa tšwago go abelwa go yona, le go agana tumelong.” Lega go le bjalo, o ile a gopotša barutwana gore leleme gape le ka godiša selo seo se sa agego. (Diema 18:21; Jakobo 3:8-10) O kgothaleditše barutwana gore ba ekiše mohlala wa Jesu ge ba diriša maleme a bona. Ka letšatši le lengwe, ge ba se na go theetša Jesu, barutiwa ba gagwe ba ile ba arabela ka gore: “Na dipelo tša rena di be di sa fse . . . ge a be a re bulela Mangwalo ka mo go feletšego?” (Luka 24:32) Ngwanabo rena Herd o itše: “Ge e ba mantšu a lena e le a agago, a tla kgoma dipelo tša bana babo lena le dikgaetšedi dikabelong tša lena.”

Ke moka dialoga di ile tša newa di-diploma tša tšona. Gomme go ile gwa balwa lengwalo la tebogo le le tšwago sehlopheng. Le be le re: “Re ikwa re e-na le boikarabelo bjo bogolo kudu bja gore re diriše seo re ithutilego sona gore re phethagatše dikabelo tša rena bjalo ka baromiwa ka potego. Ka ge re itokišeleditše go ya mafelelong a lefase, re rapelela gore maiteko a rena a feleletše ka legoa le legolo la tumišo leo le yago go Mohlahli wa rena yo Mogolo, Jehofa Modimo.” Batheetši ba ile ba arabela ka go opa magofsi. Ka kgonthe, lenaneo la go aloga le ile la aga tumelo ya bohle bao ba bego ba le gona.

[Ntlhakgolo go letlakala 17]

“Ge e ba mantšu a lena e le a agago, a tla kgoma dipelo tša bana babo lena le dikgaetšedi dikabelong tša lena.”

[Lepokisi go letlakala 15]

DIPALO-PALO TŠA SEHLOPHA

Palo ya dinaga tše di emetšwego: 9

Palo ya dinaga tšeo ba abetšwego go tšona: 26

Palo ya barutwana: 56

Palo-gare ya nywaga: 33,4

Palo-gare ya nywaga therešong: 16,8

Palo-gare ya nywaga bodireding bja nako e tletšego: 13

[Seswantšho go letlakala 16]

Sehlopha se se Alogago sa bo-122 sa Sekolo sa Beibele sa Watchtower sa Gilead

Lelokelelong le le lego ka mo tlase, methaladi e balwa go tloga ka pele go ya ka morago gomme maina a lokeleditšwe go tloga ka go le letshadi go ya go le letona mothalading o mongwe le o mongwe.

(1) Howitt, R.; Smith, P.; Martinez, A.; Pozzobon, S.; Kitamura, Y.; Laud, C. (2) Fiedler, I.; Beasley, K.; Matkovich, C.; Bell, D.; Lippincott, W. (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A.; Winn, C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R.; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.