Na O Dirile Sebe Kgahlanong Le Moya O Mokgethwa?

“Go na le sebe se se bakago lehu.”—1 JOHANE 5:16.

1, 2. Re tseba bjang gore go dira sebe kgahlanong le moya o mokgethwa wa Modimo go a kgonega?

“KE BE ke dutše ke tshwenywa ke kgopolo ya gore ke dirile sebe kgahlanong le moya o mokgethwa.” Mantšu ao a ngwadilwe ke mosadi yo mongwe wa kua Jeremane, gaešita le ge a be a hlankela Modimo. Na ruri Mokriste a ka dira sebe kgahlanong le moya o mokgethwa wa Modimo, goba matla a šomago?

² Ee, go dira sebe kgahlanong le moya o mokgethwa wa Jehofa go a kgonega. Jesu Kriste o itše: “Batho ba tla lebalelwa mohuta o mongwe le o mongwe wa sebe le thogako, eupša go rogaka moya go ka se lebalelwe.” (Mateo 12:31) Re lemošwa ka gore: “Ge re tlwaela go dira sebe ka boomo ka morago ga ge re hweditše tsebo e nepagetšego ya therešo, gona ga go sa na sehlabelo se sengwe bakeng sa dibe, eupša go na le tebelelo e nngwe e boifišago ya kahlolo.” (Baheberu 10:26, 27) Le gona moapostola Johane o ngwadile gore: “Go na le sebe se se bakago lehu.” (1 Johane 5:16) Eupša na yo a dirilego sebe ke yena yo a swanetšego go bona ge e ba a dirile “sebe se se bakago lehu”?

Go Itshola go Tliša Tebalelo

3. Ke’ng seo mohlomongwe se ka bolelwago ke go swabišwa ga rena ka mo go tseneletšego ke sebe seo re se dirilego?

³ Jehofa ke Moahlodi yo mogolo wa badiri ba bobe. Ee, ka moka ga rena re swanetše go ikarabela go yena, gomme o dula a dira se se lokilego. (Genesi 18:25; Baroma 14:12) Jehofa ke yena yoo a bonago ge e ba re dirile sebe se se sa lebalelwego, gomme a ka re amoga moya wa gagwe. (Psalme 51:11) Lega go le bjalo, ge e ba sebe seo re se dirilego se re swabiša e le ruri, seo se bontšha gore re ka ba re itshola e le ka kgonthe. Lega go le bjalo, boitsholo bja kgonthe ke eng?

4. (a) O ka hlalosa boitsholo bjang? (b) Ke’ng seo se tlogago se kgothatša ka mantšu a lego go Psalme 103:10-14?

⁴ Go itshola go bolela gore re fetoša boemo bja rena bja kgopolo ka bobe bjoo re bo dirilego nakong e fetilego goba ka boomo. Go ra gore re nyamišwa goba re swabišwa ke tsela ya sebe e bile re a e phema. Ge e ba re ile ra dira sebe se segolo eupša re gatile megato e nyakegago ya go bontšha gore re tloga re itshola, re ka homotšwa ke mantšu a mopsalme a rego: “Se [Jehofa] a re diraxo sôna xa se xo latiša bokxôpô, xa se xo lefeletša sebe. Ruri, botho bya xaxwe bo etša lexodimo, lè le tletlolo xa lefase; bo tiile bò ukama ba ba mmoifaxo. ’Karoxô tša rena ó di tloša mo xo rena a di iša kxolê, kxolê bo-ka Bohlabêla bò le kxolê le Bodikêla. Morêna ó šôkêlwa ba ba mmoifaxo byalo ka tata xo bana xe a xauxêla bana b’axwe. Xobane Yêna ó tseba lebopô le re lexo ka lôna, xa a lebale xe re le lerole.”—Psalme 103:10-14.

5, 6. Nea kgwekgwe ya 1 Johane 3:19-22, gomme o hlalose seo mantšu a moapostola a se bolelago.

⁵ Seo gape se kgothatšago ke mantšu a moapostola Johane a rego: “Ka se re tla tseba gore re theilwe therešong, gomme re tla kgonthiša dipelo tša rena pele ga gagwe ge e le mabapi le eng le eng yeo dipelo tša rena di re ahlolago go yona, gobane Modimo ke yo mogolo go feta dipelo tša rena gomme o tseba dilo tšohle. Baratiwa, ge e ba dipelo tša rena di sa re ahlole, gona re bolela re lokologile go Modimo; gomme se sengwe le se sengwe se re se kgopelago re se hwetša go  yena, gobane re boloka ditaelo tša gagwe e bile re dira dilo tše di kgahlišago mahlong a gagwe.”—1 Johane 3:19-22.

⁶ Re “tseba gore re theilwe therešong” ka baka la gore re bonagatša lerato la borwarre e bile ga re tlwaele go dira dibe. (Psalme 119:11) Ge re ikwa re le molato ka baka le itšego, re swanetše go gopola gore “Modimo ke yo mogolo go feta dipelo tša rena gomme o tseba dilo tšohle.” Jehofa o a re gaugela ka gobane o lemoga ‘maikwelo a rena a borutho a borwarre a se nago boikaketši,’ ntwa ya rena kgahlanong le sebe gotee le maiteko a go dira thato ya gagwe. (1 Petro 1:22) Dipelo tša rena di ka se “re ahlole” ge e ba re bota Jehofa, re bonagatša lerato la borwarre, gomme re se na molato wa go tlwaela go dira sebe ka boomo. Re tla “bolela re lokologile go Modimo” ka thapelo, gomme o tla re araba ka gobane re phetha ditaelo tša gagwe.

Ba Ile ba Dira Sebe Kgahlanong le Moya

7. Ke’ng seo se bontšhago ge e ba sebe se ka lebalelwa goba sa se lebalelwe?

⁷ Ke dibe dife tšeo di sa lebalelwego? Go araba potšišo ye, anke re eleng hloko mehlala e mengwe ya ka Beibeleng. Seo se swanetše go re homotša ge e ba re itshola eupša re dutše re nyamišwa o šoro ke diphošo tša rena tše dikgolo. Re tla bona gore ga se taba ya gore motho o dirile sebe sa mohuta mang; go e na le moo, ke taba ya maikemišetšo, boemo bja pelo gotee le gore motho o be a ikemišeditše gakaakang go dira sebe, yeo e bontšhago ge e ba sebe se ka lebalelwa goba sa se lebalelwe.

8. Baetapele ba bangwe ba bodumedi ba Bajuda ba lekgolong la pele la nywaga ba ile ba dira sebe bjang kgahlanong le moya o mokgethwa?

 ⁸ Baetapele ba bodumedi ba Bajuda ba lekgolong la pele la nywaga bao ba ilego ba ganetša Jesu Kriste o šoro ba be ba dira sebe kgahlanong le moya o mokgethwa. Ba ile ba bona moya wa Modimo o šoma go Jesu ge a be a dira mehlolo yeo e bego e godiša Jehofa. Lega go le bjalo, manaba a a Kriste a be a lebelela matla a e le a Sathane Diabolo. Go ya ka Jesu, bao ba bego ba roga moya o mokgethwa wa Modimo ka tsela yeo ba be ba dira sebe seo se bego se ka se lebalelwe “tshepedišong ye ya dilo goba go yeo e tlago go tla.”—Mateo 12:22-32.

9. Thogako ke eng, gomme Jesu o itše’ng ka yona?

⁹ Thogako ke polelo ya go thomeletša, e gobatšago goba e gobošago. Ka ge Mothopo wa moya o mokgethwa e le Modimo, go bolela kgahlanong le moya wa gagwe woo go fo swana le go bolela kgahlanong le Jehofa. Go kgetha go bolela dipolelo tše bjalo wa go se itshole ga go lebalelwe. Tiragalo yeo e dirilego gore Jesu a bolele mantšu a mabapi le sebe se bjalo e bontšha gore Jesu o bolela ka bao ba ganetšago go šoma ga moya o mokgethwa wa Modimo ka boomo. Ka baka la gore Bafarisei ba ile ba bona moya wa Jehofa o šoma go Jesu eupša ba re matla a ke a Diabolo, ba dirile sebe ka go roga moya. Ka baka leo, Jesu o ile a bolela gore: “Mang le mang yo a rogakago moya o mokgethwa a ka se ke a lebalelwa neng le neng, eupša o na le molato wa sebe sa ka mo go sa felego.”—Mareka 3:20-29.

10. Ke ka baka la’ng Jesu a ile a re Judase ke “morwa wa tshenyego”?

¹⁰ Ela hloko gape mohlala wa Judase Isikariote. O ile a phegelela tsela ya go se botege, a utswa tšhelete go tšwa lepokising leo a bego a le hlokomela. (Johane 12:5, 6) Ka morago Judase o ile a ya go babuši ba Bajuda gomme a dira dithulaganyo tša go eka Jesu ka ditsekana tše 30 tša silifera. Ee, Judase o ile a ipona molato ka morago ga tiro ye ya go eka, eupša ga se a ka a itshola bakeng sa sebe sa gagwe sa ka boomo. Ka go rialo, Judase ga a swanelegele tsogo. Ka baka leo Jesu o mmiditše “morwa wa tshenyego.”—Johane 17:12; Mateo 26:14-16.

 Ga se ba ka ba Dira Sebe Kgahlanong le Moya

11-13. Kgoši Dafida o ile a dira sebe bjang le Batseba, gomme ke kgothatšo efe yeo re ka e hwetšago go tšwa tseleng yeo Modimo a ilego a swaragana le boemo bja bona?

¹¹ Ka dinako tše dingwe, Bakriste bao ba ipobotšego sebe sa bona se segolo le go hwetša thušo ya moya go bagolo ba phuthego ba ka fo fela ba gateletšwa ke go tshwenyega ka go roba ga bona molao wa Modimo nakong e fetilego. (Jakobo 5:14) Ge e ba re tshwenyega ka tsela ye, ruri re ka holwa ke go ela hloko seo Mangwalo a se bolelago mabapi le bao ba ilego ba lebalelwa dibe tša bona.

¹² Kgoši Dafida o ile a dira sebe se segolo le Batseba, mosadi wa Uria. Ka morago ga go bona mosadi yo yo mobotse a hlapa ge a be a mo lebeletše a le marulelong a kgaufsi, Dafida o ile a laela gore a tlišwe ntlong ya gagwe gomme a ba le dikopano tša botona le botshadi le yena. Ka morago ga go botšwa gore o imile, o ile a loga maano a gore monna wa gagwe, Uria, a robale le yena bakeng sa go bipa bohlotlolo bja gagwe. Ge leano leo le be le sa atlege, kgoši e ile ya rulaganya gore Uria a bolawe ntweng. Ka morago ga moo, Batseba o ile a ba mosadi wa Dafida gomme a mmelegela ngwana yoo a ilego a hwa.—2 Samuele 11:1-27.

¹³ Jehofa o ile a swaragana le taba ya Dafida le Batseba. Modimo o ile a lebalela Dafida, mohlomongwe o ile a ela hloko dilo tše bjalo ka go itshola ga gagwe gotee le kgwerano ya Mmušo yeo e dirilwego le yena. (2 Samuele 7:11-16; 12:7-14) Batseba ka ntle le pelaelo o be a e-na le boemo bjo bo swanetšego bja go itshola, ka gobane o ile a ba le tokelo ya go ba mmago Kgoši Salomo le makgolokhukhu wa Jesu Kriste. (Mateo 1:1, 6, 16) Ge e ba re dirile sebe, re swanetše go gopola gore Jehofa o ela hloko boitsholo bja rena.

14. Bogolo bja tebalelo ya Modimo bo bonagala bjang phihlelong ya Kgoši Manase?

¹⁴ Bogolo bja tebalelo ya Jehofa gape bo bontšhwa ke phihlelo ya Kgoši Manase wa Juda. O dirile se se befilego mahlong a Jehofa. Manase o ile a tsema dialetare tša Baali, a rapela “makôkô ka moka a lexodimo,” a ba a agela medimo ya maaka dialetare ka malapeng a mabedi a tempele. O ile a fiša barwa ba gagwe ka mollo, a kgothaletša ditiro tša go dirišana le meoya, gomme a dira gore badudi ba Juda le Jerusalema ‘ba dire tše mpe tše di fetišago tša ditšhaba tšela tše Jehofa a di fedišitšego mola Baisiraele ba fihla.’ Ditemošo tšeo di bego di tlišwa ke baporofeta ba Modimo di be di hlokomologwa. Mafelelong, kgoši ya Asiria e ile ya iša Manase bothopša. Ge a le bothopša, Manase o ile a itshola gomme a tšwela pele a rapela Modimo ka boikokobetšo, yoo a ilego a mo lebalela gomme a mmušetša bogošing kua Jerusalema, moo a ilego a godiša borapedi bja therešo.—2 Koronika 33:2-17.

15. Ke tiragalo efe bophelong bja moapostola Petro yeo e bontšhago gore Jehofa ke wa tebalelo “e nntši”?

¹⁵ Nywaga-kgolo ka morago, moapostola Petro o ile a dira sebe se segolo ka go latola Jesu. (Mareka 14:30, 66-72) Lega go le bjalo, Jehofa o ile a lebalela Petro ka “tebalêlô e nntši.” (Jesaya 55:7) Ka baka la’ng? Ka gobane Petro o be a itshola e le ka kgonthe. (Luka 22:62) Go be go e-na le bohlatse bjo bo lego molaleng bja tebalelo ya Modimo ka morago ga matšatši a 50 ge Petro a be a e-ba le tokelo ya go nea bohlatse ka sebete mabapi le Jesu ka Pentekoste. (Ditiro 2:14-36) Na ruri go na le lebaka la go dumela gore Modimo a ka no se lebalele Bakriste bao ba itsholago e le ka kgonthe lehono? Mopsalme o opetše ka gore: “Xe Wene Morêna Ò latiša molato, xôna xo ka êma mang? Xobane tebalêlô e xo Wêna.”—Psalme 130:3, 4.

Go Fokotša Pelaelo ya Mabapi le Sebe

16. Modimo o lebalela ka tlase ga maemo afe?

¹⁶ Mehlala ye re sa tšwago go bolela ka yona e tla thuša go fokotša pelaelo ya rena ya ge e ba re dirile sebe kgahlanong le moya o mokgethwa. E bontšha gore Jehofa o lebalela badiradibe bao ba itsholago. Se bohlokwa kudu ke go rapela Modimo go tšwa pelong. Ge e ba re dirile sebe, re ka kgopela tebalelo motheong wa sehlabelo sa Jesu sa topollo, kgaugelong ya Jehofa, go se phethagaleng ga rena ga leabela le go tsebjeng ga rena ka tirelo ya potego. Ka ge re tseba botho bjo sa  swanelago bja Jehofa, re ka tsoma tebalelo re kgodišega gore o tla re nea yona.—Baefeso 1:7.

17. Ke’ng seo se swanetšego go dirwa ge e ba re dirile sebe gomme re tsoma thušo ya moya?

¹⁷ Go thwe’ng ge e ba re dirile sebe eupša re palelwa ke go rapela ka gobane sebe sa rena se re dirile gore re babje moyeng? Morutiwa Jakobo o ngwadile mabapi le se gore: “[Motho yo bjalo] a a bitše bagolo ba phuthego ba mo rapelele, ba mo tlotša ka makhura leineng la Jehofa. Thapelo ya tumelo e tla fodiša yo a fokolago, gomme Jehofa o tla mo tsoša. Le gona, ge e ba a dirile dibe, o tla lebalelwa.”—Jakobo 5:14, 15.

18. Ke ka baka la’ng go ntšhwa ka phuthegong go sa bolele gore sebe sa motho ke se sa lebalelwego?

¹⁸ Gaešita le ge ka dinako tše dingwe modiradibe a sa itshole gomme a tlošwa ka phuthegong, ga se gore sebe sa gagwe ke se sa lebalelwego. Paulo o ngwadile mabapi le modiradibe yo a kgaotšwego wa motlotšwa wa kua Korinthe gore: “Kgalemelo ye yeo e neilwego ke ba bantši e lekane bakeng sa motho yo bjalo, e le gore go fapana le seo bjale, le mo lebalele ka botho gomme le mo homotše, gore ka tsela e itšego motho yo bjalo a se metšwe ke go nyama ga gagwe go feta tekano.” (2 Bakorinthe 2:6-8; 1 Bakorinthe 5:1-5) Lega go le bjalo, gore ba tsošološwe moyeng, badiradibe ba swanetše go amogela thušo ya bagolo ba Bakriste ya moya yeo e theilwego Beibeleng gomme ba bontšhe gore ba itshola e le ka kgonthe. Ba swanetše go “[tšweletša] dienywa tše di swanelago boitsholo.”—Luka 3:8.

19. Ke’ng seo se ka re thušago go ba “ba phelago tumelong”?

¹⁹ Ke’ng seo se ka dirago gore re ikwe eka re dirile sebe kgahlanong le moya o mokgethwa? Go ba šedi ka tsela e feteletšego goba go fokola mmeleng e ka ba dibaki tša seo. Boemong bjo bjalo, thapelo le go khutša ka mo go oketšegilego di ka thuša. Re swanetše go ela hloko kudu gore Sathane a se ke a re nyamiša, moo re ka feleletšago re kgaoditše go hlankela Modimo. Ka ge Jehofa a sa kgahlwe ke lehu la yo kgopo, ruri ga a kgahlišwe ke go lahlegelwa le ke ge e le ofe wa bahlanka ba gagwe. Ka gona ge e ba re tšhoga gore re ka ba re dirile sebe kgahlanong le moya, re swanetše go tšwela pele re iphepa ka Lentšu la Modimo, go akaretša le dikarolo tše di kgahlišago tše bjalo ka Dipsalme. Re swanetše go tšwela pele re e-ba gona dibokeng tša phuthego gotee le go tšea karolo modirong wa go bolela ka Mmušo. Go dira bjalo go tla re thuša go ba “ba phelago tumelong” le go lokologa dipelaelong tša ge e ba re dirile sebe se sa lebalelwego.—Tito 2:2.

20. Ke go bea mabaka gofe mo go ka thušago motho go lemoga gore ga se a dira sebe kgahlanong le moya o mokgethwa?

²⁰ Motho le ge e le ofe yo a tšhogago gore a ka ba a dirile sebe kgahlanong le moya o mokgethwa a ka ipotšiša gore: ‘Na ke rogile moya o mokgethwa? Ka ge ke itshotše bakeng sa sebe sa-ka, na ga bjale ke fetošitše kgopolo ya-ka mabapi le boitsholo bjoo? Na ke dumela gore Modimo o a lebalela? Na ke mohlanogi yo a gannego tshedimošo ya moya?’ Ge e le gabotse, batho ba bjalo ba tla lemoga gore ga se ba rogaka moya o mokgethwa wa Modimo goba gore ga se bahlanogi. Ba a itshola gomme ba tšwela pele ba dumela gore Jehofa ke molebaledi. Ge e le gore go bjalo, ga se ba dira sebe kgahlanong le moya o mokgethwa wa Jehofa.

21. Sehlogo se se latelago se tla ahla-ahla dipotšišo dife?

²¹ Ruri ke tšhegofatšo go kgodišega gore ga se ra dira sebe kgahlanong le moya o mokgethwa! Lega go le bjalo, dipotšišo tše di tlago go ahla-ahlwa sehlogong se se latelago di sepedišana le taba ye. Ka mohlala, re ka ipotšiša gore: ‘Na ruri ke hlahlwa ke moya o mokgethwa wa Modimo? Na ke bonagatša dienywa tša wona bophelong bja-ka?’

[Dipotšišo tša Thuto]

[Caption on page 17]

Bao ba ilego ba re Jesu o be a dira mehlolo ka matla a Sathane ba dirile sebe kgahlanong le moya o mokgethwa wa Modimo

[Caption on page 18]

Gaešita le ge a ile a latola Jesu, Petro ga se a dira sebe se se sa lebalelwego

[Caption on page 20]

Karabo ya Gago ke Efe?

• Ke ka baka la’ng re ka re go dira sebe kgahlanong le moya o mokgethwa go a kgonega?

• Go itshola go bolela’ng?

• Ke bomang bao ba dirilego sebe kgahlanong le moya nakong ya ge Jesu a be a le mo lefaseng?

• Go ka fenywa bjang pelaelo ya gore re ka ba re dirile sebe se sa lebalelwego?