Bomoya bja Kgonthe—O ka bo Hwetša Bjang?

MOAPOSTOLA PAULO o ile a ngwala gore: “Keleletšo ya nama ke lehu, gomme keleletšo ya moya ke bophelo le khutšo.” (Baroma 8:6, PK) Ka mantšu ao, moapostola o be a bontšha gore go ba motho wa moya ga se feela taba ya boikgethelo goba tshekamelo ya motho. Ge e le gabotse, ke taba ya lehu le bophelo. Lega go le bjalo, ke ka kgopolo efe motho wa moya a hwetšago “bophelo le khutšo”? Go ya ka Beibele, motho yo bjalo o na le khutšo gona bjale—le yena ka noši gotee le Modimo—gomme o tla šegofatšwa ka bophelo bjo bo sa felego nakong e tlago. (Baroma 6:23; Bafilipi 4:7) Ga go makatše ge Jesu a ile a bolela gore: “Go thaba bao ba lemogago go nyaka ga bona dilo tša moya.”—Mateo 5:3.

Go bala ga gago makasine wo gona bjale go bontšha gore o kgahlegela bomoya—gomme seo ke se bohlale. Lega go le bjalo, dikgopolo tša mabapi le bomoya di fapana kudu, ka gona o ka ipotšiša gore: ‘Bomoya bja kgonthe ke eng? Gomme motho a ka bo hwetša bjang?’

“Monagano wa Kriste”

Go tlaleletša go go bontšha bohlokwa le mehola ya go sekamela dilong tša moya, moapostola Paulo o be a e-na le mo gontši mo a ka go bolelago ka seo bomoya bja kgonthe e lego sona. Paulo o ile a hlalosetša Bakriste ba motseng wa bogologolo wa Korinthe phapano magareng ga motho wa nama, ke gore, motho yoo a kgotsofatšago dikganyogo tša nama, le motho wa moya, e lego motho yoo a tšeelago dilo tša moya godimo. Paulo o ngwadile gore: “Motho wa nama ga a amogele dilo tša moya wa Modimo, gobane ke bošilo go yena.” Ka lehlakoreng le lengwe, Paulo o hlalositše gore motho wa moya o hlaolwa ka “monagano wa Kriste.”—1 Bakorinthe 2:14-16.

Go ba le “monagano wa Kriste” ge e le gabotse go bolela go ba le “boemo bja monagano bjo bo swanago le bjo Kriste Jesu a bego a e-na le bjona.” (Baroma 15:5; Bafilipi 2:5) Ka mantšu a mangwe, motho wa moya ke yoo a naganago go swana le Jesu e bile a latelago mohlala wa Gagwe. (1 Petro 2:21; 4:1) Ge monagano wa motho o dutše o swana le wa Kriste, bomoya bja gagwe bo matlafala le go feta e bile o tla ba kgaufsi kudu le go hwetša “bophelo le khutšo.”—Baroma 13:14.

Kamoo o ka Tsebago ka Gona “Monagano wa Kriste”

Lega go le bjalo, gore motho a be le monagano wa Kriste, o swanetše go thoma ka go tseba monagano woo. Ka go rialo, mogato wa pele wa go ba le bomoya ke go hwetša tsebo ka tsela ya Jesu ya go nagana. Eupša o ka hwetša bjang tsebo ka monagano wa motho yoo a phetšego mo lefaseng nywaga e 2 000 e fetilego? Ka mohlala, ge e le gabotse o tsebile bjang batho ba histori ba naga ya geno? Mohlomongwe o ba tsebile ka go bala ka bona. Ka mo go swanago, go bala histori e ngwadilwego ya Jesu ke tsela e bohlokwa ya go hwetša tsebo ka monagano wa Kriste.—Johane 17:3.

Go na le dipego tše nne tše kwagalago tša histori tšeo di bolelago ka Jesu—Diebangedi tše di ngwadilwego ke Mateo, Mareka, Luka le Johane. Go bala dipego tše ka kelohloko go tla go thuša go lemoga tsela ya Jesu ya go nagana, maikwelo a gagwe a ka gare-gare gotee le seo se bego se tutuetša ditiro tša gagwe. Ge o tšea nako o naganišiša ka seo o se balago mabapi le Jesu, o aga seswantšho-kgopolo sa mohuta wa motho yoo a bego a le yena. Gaešita le ge o šetše o itšea o le molatedi wa Kriste, go bala le go naganišiša mo go bjalo go tla go thuša go ‘tšwela pele o gola bothong bjo bo sa swanelago le tsebong ya go tseba Morena le Mophološi wa rena Jesu Kriste.’—2 Petro 3:18.

 Re dutše re gopola seo, anke re hlahlobeng ditemana tše dingwe ka Diebangeding go bona seo se dirilego gore Jesu e be motho yo bjalo wa moya. Ke moka, o ipotšiše kamoo o ka ekišago mohlala woo a o beilego.—Johane 13:15.

Bomoya le “Dienywa tša Moya”

Mongwadi wa Ebangedi Luka o boletše gore Jesu o ile a tšhollelwa moya o mokgethwa wa Modimo ge a be a kolobetšwa le gore Jesu o ile a ‘tlala moya o mokgethwa.’ (Luka 3:21, 22; 4:1) Ka morago ga moo, Jesu o ile a gatelela bohlokwa bja gore balatedi ba gagwe ba hlahlwe ke moya o mokgethwa wa Modimo, goba “matla a šomago.” (Genesi 1:2, NW; Luka 11:9-13) Ke ka baka la’ng go le bohlokwa gakaakaa? Ka gobane moya wa Modimo o na le matla a go fetoša monagano wa motho, moo o ka thomago go swana le wa Kriste. (Baroma 12:1, 2) Moya o mokgethwa o tšweletša mothong dika tše bjalo ka “lerato, lethabo, khutšo, bopelotelele, botho, bolo, tumelo, boleta [le] boitshwaro.” Dika tše—tšeo Beibele e rego ke “dienywa tša moya”—di bonagatša motho yoo ruri e lego wa moya. (Bagalatia 5:22, 23) Ka boripana, motho yo a nago le tshekamelo ya moya ke yoo a hlahlwago ke moya wa Modimo.

Jesu o ile a bonagatša dienywa tša moya bodireding bja gagwe ka moka. Dika tše bjalo ka lerato, botho le bolo di ile tša bonagala kudu tseleng yeo a bego a swara batho bao ba bego ba lebelelwa e le babotlana setšhabeng. (Mateo 9:36) Ka mohlala, ela hloko tiragalo yeo e hlaloswago ke moapostola Johane. Re bala gore: “Ge [Jesu] a dutše a feta a bona motho yo a belegwego e le sefofu.” Barutiwa ba Jesu le bona ba ile ba bona motho yoo eupša ba mo lebelela bjalo ka modiradibe. Ba ile ba botšiša gore: “Ke mang yo a dirilego sebe, na ke motho yo goba ke batswadi ba gagwe?” Baagišani ba motho yoo le bona ba ile ba mmona, eupša ba be ba fo mmona e le mokgopedi. Ba ile ba re: “Yo ke motho yo a bego a fela a dula gomme a kgopela, na ga se yena?” Lega go le bjalo, Jesu o ile a lebelela motho yoo bjalo ka motho yo a bego a tsoma thušo. O ile a bolela le motho yoo wa sefofu gomme a mo fodiša.—Johane 9:1-8.

Tiragalo ye e go botša’ng ka monagano wa Kriste? Sa pele, Jesu o be a sa hlokomologe babotlana eupša o be a ba bontšha lešoko. Sa bobedi, o be a gata mogato wa pele bakeng sa go thuša ba bangwe. Na o nagana gore o latela mohlala wo woo o beilwego ke Jesu? Na o lebelela batho ka tsela yeo Jesu a bego a ba lebelela ka yona, le go ba nea thušo yeo ba e tsomago ya go fetoša maphelo a bona gotee le go phadimiša bokamoso bja bona? Goba na o na le mokgwa wa go rata bao ba phagamego le go hlokomologa ba sego bjalo? Ge e le gore o lebelela batho ka tsela yeo Jesu a bego a ba lebelela ka yona, o tloga o latela mohlala wa Jesu.—Psalme 72:12-14.

Bomoya le Thapelo

Dipego tša Ebangedi di bontšha gore Jesu gantši o be a rapela Modimo. (Mareka 1:35; Luka 5:16; 22:41) Nakong ya bodiredi bja gagwe bja lefaseng, Jesu  o ile a beela nako ka thoko bakeng sa go rapela. Morutiwa Mateo o ngwadile gore: “Ge a phatlaladitše mašaba, [Jesu] a rotogela thabeng a nnoši gore a yo rapela.” (Mateo 14:23) Dinako tše bjalo tšeo Jesu a di feditšego a boledišana le Tatagwe wa legodimong ka setu di ile tša mo matlafatša. (Mateo 26:36-44) Lehono, batho bao ba nago le tshekamelo ya moya ka mo go swanago ba tsoma dibaka tša go boledišana le Modimo, ba tseba gore se se tla matlafatša tswalano ya bona le Mmopi le go ba thuša gore tsela ya bona ya go nagana e swane le ya Kriste ka mo go oketšegilego.

Jesu o be a e-na le go fetša nako e telele a rapela. (Johane 17:1-26) Ka mohlala, pele a kgetha banna ba 12 bao ba bego ba tla ba barutiwa ba gagwe, Jesu o ile “a tšwa a ya thabeng gore a yo rapela, gomme a fetša bošego ka moka a rapela Modimo.” (Luka 6:12) Gaešita le ge taba e se gore ba fetše bošego ka moka ba rapela, bao ba nago le tshekamelo ya moya ba latela mohlala wa Jesu. Pele ba dira diphetho tše dikgolo bophelong, ba tšea nako ba rapela Modimo, ba tsoma tlhahlo ya moya o mokgethwa ge ba dira diphetho tšeo di tlago go kaonefatša bomoya bja bona.

Dithapelong tša gagwe, Jesu o ile a bontšha maikwelo a tseneletšego ao re swanetšego go ba le ona ge re rapela. Ela hloko seo Luka a se bolelago ka tsela yeo Jesu a ilego a rapela ka yona mantšiboeng a pele ga lehu la gagwe. “Ge a le bohlokong a tšwela pele a rapela go tšwa pelong [le go feta]; gomme kudumela ya gagwe ya ba bjalo ka marothi a madi a rothela fase.” (Luka 22:44) Jesu o be a dula a rapela go tšwa pelong, eupša lebakeng le, ge a be a lebane le teko e kgolo kudu ya bophelo bja gagwe bja lefaseng, o rapetše “go tšwa pelong le go feta”—gomme thapelo ya gagwe e ile ya arabja. (Baheberu 5:7) Batho ba nago le tshekamelo ya moya ba latela mohlala wa Jesu. Ge ba lebeletšane le diteko tšeo ge e le gabotse e lego tše kgolo, ba rapela Modimo “go tšwa pelong le go feta” bakeng sa moya o mokgethwa, tlhahlo le thekgo.

Ka ge Jesu e be e le motho wa thapelo, ga go makatše ge barutiwa ba gagwe ba be ba nyaka go mo ekiša tabeng ye. Ka baka leo, ba ile ba mo kgopela ba re: “Morena, re rute go rapela.” (Luka 11:1) Ka mo go swanago, lehono, bao ba tšeelago dilo tša moya godimo gomme ba nyaka go hlahlwa ke moya wa Modimo ba latela mohlala wa Jesu wa kamoo ba rapelago Modimo ka gona. Bomoya bja kgonthe bo nyalelana le thapelo.

Bomoya le Boboledi bja Ditaba tše Dibotse

Ebangeding ya Mareka, re hwetša pego yeo go yona Jesu a fodišago batho ba bantši ba babjago gomme a dira bjalo go ba go fihla bošego. Mesong ya letšatši le le latelago ge a be a nnoši a rapela, baapostola ba gagwe ba ile ba tla gomme ba mmotša gore batho ba be ba mo nyaka, mohlomongwe ba nyaka go fodišwa. Lega go le bjalo, Jesu o ile a ba botša gore: “A re yeng go gongwe, metseng yeo e lego kgaufsi, gore ke yo bolela le moo.” Ke moka Jesu o ile a bolela lebaka: “Gobane ke tšwetše wona morero wo.” (Mareka 1:32-38; Luka 4:43) Gaešita le ge go fodiša batho go be go le bohlokwa go Jesu, go bolela ditaba tše dibotse tša Mmušo wa Modimo e be e le morero wa Jesu o mogolo.—Mareka 1:14, 15.

Lehono, go botša batho ka Mmušo wa Modimo e sa dutše e le leswao la bao ba nago le monagano wa Kriste. Jesu o laetše bohle bao ba nyakago go ba balatedi ba gagwe gore: “Ka gona, e-yang le dire batho ba ditšhaba ka moka barutiwa, . . . le ba ruta go boloka dilo tšohle  tšeo ke le laetšego tšona.” (Mateo 28:19, 20) Go oketša moo, Jesu o boletše e sa le pele gore: “Ditaba tše tše dibotse tša mmušo di tla bolelwa lefaseng ka moka le go agilwego go lona gore e be bohlatse go ditšhaba tšohle; ke moka bofelo bo tla tla.” (Mateo 24:14) Ka ge Lentšu la Modimo le bontšha gore modiro wa boboledi o dirwa ka matla a moya o mokgethwa, go tšea karolo modirong wo ka mafolofolo ke leswao la bomoya bja kgonthe.—Ditiro 1:8.

Go nyakega maiteko a kopanego a batho ba dimilione gore molaetša wa Mmušo o bolelwe bathong lefaseng ka bophara. (Johane 17:20, 21) Bao ba tšeago karolo modirong wo ga go nyakege gore ba fo ba le tshekamelo ya moya feela eupša gape ba swanetše go rulaganywa gabotse lefaseng ka bophara. Na o tseba batho bao ba latelago mohlala wa Kriste e bile ba bolela ditaba tše dibotse tša Mmušo lefaseng ka bophara?

Go Thwe’ng ka Wena?

Ke therešo gore go na le dika tše dingwe tšeo di bontšhago motho yoo ka kgonthe e lego wa moya, eupša go thwe’ng ka wena mabapi le tšeo re šetšego re boletše ka tšona? Gore o tsebe seo, ipotšiše gore: ‘Na ke bala Lentšu la Modimo, Beibele, ka mehla gomme ka naganišiša ka seo ke se balago? Na ke bonagatša dienywa tša moya bophelong bja-ka? Na ke nna monna goba mosadi wa thapelo? Na ke nyaka go tlwaelana le batho bao ba tšeago karolo boboleding bja lefaseng ka bophara bja ditaba tše dibotse tša Mmušo wa Modimo?’

Go itlhahloba ka potego go ka go thuša go bona bogolo bja bomoya bja gago. Re go kgothaletša go gata mogato o nyakegago gona bjale gore o tlalelwe ke “bophelo le Khutšo.”—Baroma 8:6; Mateo 7:13, 14; 2 Petro 1:5-11.

[Lepokisi/Seswantšho go letlakala 7]

MASWAO A BOMOYA

◆ Go rata Lentšu la Modimo

◆ Go bonagatša dienywa tša moya

◆ Go rapela ka mehla le ka potego

◆ Go boledišana le ba bangwe ka ditaba tše dibotse tša Mmušo

[Seswantšho go letlakala 5]

Beibele e go thuša go tseba “monagano wa Kriste”