Dilo tše Pedi tše di Makatšago Kopanong e Nngwe Kua Georgia

TIRAGALO e sa lebalegego, yeo e swawago ka dilo tše pedi tše di makatšago, e ile ya direga nageng ya Georgia ka 2006. Ka matšatši a mararo, July 7 go ya go 9, Kopano ya Dihlatse tša Jehofa ya “Tlhakodišo e Kgaufsi!” e ile ya swarwa mafelong a tshelelago go dikologa naga. E be e le monyanya wa dijo tša moya woo o thabetšwego ke batho ba fetago 17 000.

Ka January 2006, go ile gwa dirwa maiteko a go hwetša lefelo le le swanetšego bakeng sa go bokana ga batho ba dikete-kete kopanong yeo e bego e tla swarwa toropong e kgolo ya Tbilisi, e lego motse-mošate wa Georgia. Mafelo a mangwe a kopano a be a tla kgokaganywa ka mogala.

Tokologo ya borapedi e be e newa ganyenyane-ganyenyane nywageng e mmalwa e fetilego kua Georgia. Ka baka leo, Dihlatse di ile tša tšwela pele di tia ganyenyane-ganyenyane go sa šetšwe kganetšo e phatlaletšego, di holofela gore lefelo la kopano le tla hwetšwa motseng-mošate. Ka tlhago batho ba Georgia ke ba botho le ba amogelago baeng. Lega go le bjalo, bahlankedi ba bangwe ba mmušo ba na le kgethollo ya bodumedi. Na ba tla lwantšha maikwelo a bona gomme ba dumelela Dihlatse di hira lefelo?

Bana babo rena ba Komiti ya Kopano ba ile ba etela mapatlelo a fapa-fapanego le diholo tše dikgolo tša dipapadi. Balaodi ba mafelo ba ile ba holofetša gore mafelo a bona a ka dirišwa eupša ba ile ba gana ge bana babo rena ba kgopela gore ba ba botše nako e swanetšego ya go ka a hira. Ka gona komiti e ile ya makala ge molaodi wa Tbilisi Philharmonic a be a dumela gore Dihlatse tša Jehofa di hire lefelo leo. Holo ya dikhonsate e hwetšwa bogareng bja toropo, moo bontši  bja ditiragalo tše bohlokwa kudu bo swarelwago gona.

E kgothaditšwe ke gore maiteko a yona mafelelong a atlegile, komiti e ile ya thoma go rulaganya kopano ya Tbilisi, gotee le dikopano tša metseng le ditoropong go dikologa naga, go akaretša Tsnori, Kutaisi, Zugdidi, Kaspi le Gori. Go ile gwa dirwa mošomo o mogolo go kgokaganya mafelo a a dikopano ka mogala bakeng sa gore lenaneo le swarwe sammaletee. Dilo ka moka di be di lokile. Ka gona, kapejana, beke pele ga kopano, balaodi ba holo ya dikhonsate ya Tbilisi Philharmonic ba ile ba phumola kwano. Ga go na lebaka leo le ilego la newa.

Selo sa Pele se se Makatšago

Ke’ng seo bana babo rena ba bego ba ka se dira ka nakwana ye e šetšego? Seo ba bego ba ka se dira e be e le gore ba boele Marneuli, motseng wa polasa wa bokgoleng bja dikhilomithara tše 40 ka ntle ga Tbilisi. Dikopano tše dintši di ile tša swarelwa moo lefelong leo la lapa la Dihlatse tša Jehofa. Lefelo leo e kile ya ba tšhemo e kgolo. Nywageng e lesome e fetilego, e be e le lefelo le nnoši leo diphuthego tša Tbilisi di bego di ka le diriša bakeng sa dikopano. Lega go le bjalo, Marneuli ke lefelo leo Dihlatse tša Jehofa di ilego tša hlaselwa o šoro ke dihlotswana tša bosenyi.

E nngwe ya ditiragalo tše e diregile ka September 16, 2000. Maphodisa a tšwago motseng wa Marneuli a ile a tswalela ditsela bakeng sa go thibela Dihlatse go fihla lefelong la kopano. Go ile gwa tla dipese tše di tletšego disenyi tšeo di eteletšwego pele ke Vasili Mkalavishvili, yo a tšeetšwego maemo a go ba moruti wa Orthodox. Ba ile ba emiša dikoloi le dipese tšeo di bego di e-ya kopanong kua Marneuli, ba gogela batho bao ba bego ba e-ya kopanong ka ntle ga dikoloi, gomme ba ba betha ka ntle le kgaugelo, mola banamedi ba bangwe ba ile ba tšeelwa dithoto tša bona, go akaretša le Dibeibele le dipuku tšeo di theilwego Beibeleng.

Lefelo la kopano kua Marneuli le lona le ile la hlaselwa ke sehlopha sa batho ba ka bago ba 60. Dihlatse tše ka bago tše 40 di ile tša gobatšwa. Ngwanabo rena yo mongwe o ile a hlabja ka thipa kgareng. Bahlasedi ba bangwe ba ile ba ntšha dithunya gomme ba thuntšhetša godimo. Yo mongwe wa bona o ile a šupa mong wa lefelo ka sethunya gomme a nyaka tšhelete le mabenyabje. Sehlopha se ile sa phuruputša ntlo ya mosadi yoo, yeo e bego e le mafelelong a lefelo leo gomme sa hula dilo tša gagwe tše bohlokwa. Ka morago ga go pšhatla mafasetere ka moka a ntlo, se ile sa fiša dipuku tšeo di theilwego Beibeleng le dipanka tšeo ka mo go kgethegilego di bego di diretšwe kopano. Go ile gwa senywa dipuku tša boima bja tone e tee le seripa. Go e na le go thibela bosenyi, maphodisa ao  a bego a le moo a ile a tšea karolo go lwantšheng Dihlatse. *

Komiti ya Kopano ga se ya gapeletšega go lebeletšana le ditlhaselo tša ntwa feela eupša gape e ile ya gapeletšega go lebeletšana le tlhohlo ya gore e tla dira bjang gore batho ba 5 000 ba lekane lefelong leo ka tlwaelo le ka lekanago batho ba ka bago ba 2 500. Bothata bjo bo be bo ka rarollwa bjang ka nako ye e kopana? Go ile gwa bonala eka ke mohlolo ge beng ba mafelo a mabedi a bapilego le leo ba boledišana le bana babo rena gomme ba ithapela go ba hirišetša ditšhemo tša bona.

Go fetola ditšhemo tšeo go ba lefelo le le swanetšego la kopano e bile mošomo o mogolo. Boemo bja leratadima bo ile bja dira gore boemo bo be thata kudu—pula e ile ya na beke ka moka ya pele ga kopano. Ditšhemo tša baagišani di be di bjetšwe ditapola gomme di be di swanetše go bunwa. Sa pele baithapi ba ile ba kgobokana go tla go epa ditapola. Ka morago ditarata di ile tša šuthišwa gomme gwa epelwa ditšhipi go dira ditente bakeng sa go šireletša batheetši letšatšing le puleng. Dipanka tše di oketšegilego di be di nyakega, gomme go ile gwa tsenywa ditlabakelo tše di oketšegilego tša medumo. Baithapi ba be ba šoma bošego le mosegare, ba bangwe ba sa robale, ba saga, ba kokotela le go phula mapolanka.

Ka moka ba be ba ipotšiša gore: “Go tla direga’ng ge pula e ka tšwela pele e ena nakong ya kopano? Na mobu o boleta wa tšhemo yeo o tla dira gore batho ba sobelele?” Mahlaka a ile a rekwa bakeng sa go a ala mobung o kolobilego. Mafelelong letšatši le ile la hlaba! Matšatšing a mararo ka moka a kopano, naga e ile ya ruthetšwa ke mahlasedi a letšatši a mabotse.

Ge batla-kopanong ba goroga, ba ile ba amogelwa ke naga e botse. Naga yeo e se nago mašata e ile ya bonala e le seswantšho sa lefase le lefsa. Ba dutše ka go iketla, batla-kopanong ba be ba dikologilwe ke mego le mehlare e mengwe ya dienywa gotee le mašemo a mahea le ditamati. Ka kua morago sethala se be se kgabišitšwe ke merara. Gantši nakong ya lenaneo, batheetši ba be ba e-kwa megogonope e lla le dikgogo tša dithole di lla ge mae a tšona a be a kgoboketšwa. Go be go e-na le mašata a mangwe a tlwaetšwego mafelong a bjalo, eupša tše e be e fo ba kopelo e bosana go bao ba tlilego kopanong. Go e na le gore e ba šitiše, batheetši ga se ba ka ba lemoga seo, ka ge ba be ba theeditše lenaneo leo le theilwego Beibeleng ka kelohloko. Lega go le bjalo, tše e be e se tšona feela ditiragalo tšeo di sa lebalegego tša kopano ye.

Selo sa Bobedi se se Makatšago

Bofelong bja lenaneo la mesong ya Labohlano, batla-kopanong ba ile ba makala ge setho sa Sehlopha se Bušago sa Dihlatse tša Jehofa, Geoffrey Jackson, se tsebatša go lokollwa ga  New World Translation of the Holy Scriptures ka se-Georgia. * Batho ba bantši bao ba bego ba maketše ba ile ba sekiša megokgo. Lapa le lengwe leo le bego le thabile le boletše gore: “Re ka se ke ra tlogela go bontšha tebogo ya rena ka mohlolo wo—mohlolo wa Jehofa. Ruri ke modiro o mogolo ka nako e kopana!”

Kgaetšedi yabo rena yeo e tšwago toropong ya Tsalendjikha, yeo e bego e theeditše lenaneo ka mogala e itše: “Nka se kgone go hlalosa lethabo leo ke ilego ka ba le lona nakong ya ge re be re amogela Beibele e feletšego. Ke rata go le leboga bakeng sa kopano ye ya moswana-noši ya matšatši a mararo. E be e tloga e le tiragalo ya histori.” Lapa le lengwe phuthegong e lego ka bodikela bja Georgia, yeo e lego mollwaneng wa Lewatle le Leso, le itše: “Go fihla ga bjale, re be re e-na le Beibele e tee feela ka lapeng, eupša ga bjale ka moka ga rena re le ba bane re na le dikopi tša rena tša New World Translation of the Holy Scriptures. Ga bjale yo mongwe le yo mongwe a ka ipalela Beibele ya gagwe.”

Lega go le bjalo, go na le dilo tšeo di sa kago tša sepela gabotse tšeo batla-kopanong ba sa kago ba di bona. Ka mohlala, le ge New World Translation of the Holy Scriptures e feletšego e gatišitšwe le go romelwa Georgia ka nako bakeng sa kopano, bahlankedi ba Lefapha la Ditlwaelo tša Setšhaba ba ile ba gana go dumelela morwalo woo o tshedišwa mollwane gore o tsene Georgia. Bana babo rena ba ile ba ipelaetša Ofising ya Moemeledi wa Setšhaba. Moemeledi wa Setšhaba o ile a kgona go dira gore Dibeibele di lokollwe nakwana pele ga ge kopano ya selete e ka thoma. O ile a ba a romela mothuši wa gagwe kopanong ya Marneuli gore a tle le dikopi tša Beibele e mpsha bakeng sa ofisi ya bona.

Go Amogela ka Borutho ke Mokgwa wa Georgia

Kopano ya selete ya Marneuli e bile selo se bohlokwa go Dihlatse tša Jehofa tša Georgia ka lebaka le lengwe. Setho sa Sehlopha se Bušago sa Dihlatse tša Jehofa se be se tšea karolo lenaneong. Batheetši ka moka ba be ba thabile kudu moo yo mongwe le yo mongwe a bego a nyaka go se amogela ka mokgwa wa setšo o borutho. Ngwanabo rena Jackson o ile a swanelwa ke go ema le go dumediša bana babo rena le dikgaetšedi diiri tše dintši pele ga kopano, nakong ya yona le ka morago ga yona, eupša o be a thabetše seo.

Morago ka 1903 bofelong bja kopano e nngwe, ngwanabo rena yo mongwe o ile a re: “Le ge ke se ne sa-ka, nka se ke ka rekiša dilo tše dibotse tšeo ke ithutilego tšona kopanong ye le ge nka fiwa ditolara tše sekete.” Ka morago ga nywaga e fetago e lekgolo, ke ka moo Dihlatse tšeo di bego di le dikopanong tše tše dikgolo di ilego tša ikwa ka gona selemong sa 2006 nageng ya Georgia.

[Mengwalo ya ka tlase]

[Lepokisi go letlakala 19]

“E Monyenyane” o Godile

[Caption on page 19]

Kua Georgia, go ile gwa phethagala mantšu a Jesaya 60:22 a rego: “E monyenyane ó tlo tšwa ba sekete; ’me mmôtlana ó tlo tšwa ’thšaba se matla. Ké Nna Morêna e ke tl’o xo dira tšeo ka pelá lebakeng la xôna.” Ka nywaga ya ka tlase ga e 20, palo ya bagoeledi ba Mmušo ba Georgia e gotše go tloga go ba 100 go ya go ba ka bago 16 000. Beke e nngwe le e nngwe bahlanka ba ba mafolofolo ba Lentšu la Modimo ba swara dithuto tša magae tša Beibele tše ka bago tše 8 000—kgonagalo e kgahlišago ya koketšego kua Georgia.

[Mothopo wa Seswantšho go letlakala 16]

Globe: Based on NASA/Visible Earth imagery

[Mmapa go letlakala 16]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

GEORGIA

Zugdidi

Kutaisi

TURKEY

RUSSIAN FEDERATION

Gori

Marneuli

ARMENIA

Kaspi

TBILISI

Tsnori

AZERBAIJAN

[Seswantšho go letlakala 16]

Sehlwa-seeme kua Tbilisi

[Diswantšho go letlakala 17]

Kopano ya Marneuli e be e kgokagantšwe le tše di lego mafelong a mangwe a mahlano ka megala

[Diswantšho go letlakala 18]

Batla-kopanong ba ile ba makala ka lethabo ge go lokollwa “New World Translation of the Holy Scriptures” e feletšego ka se-Georgia