Lentšu la Jehofa le a Phela

Dintlha tše Kgolo go tšwa Pukung ya Hesekiele—II

KE DECEMBER 609 B.C.E. Kgoši ya Babilona e thomile thakelelo ya yona ya mafelelo motseng wa Jerusalema. Go fihla ga bjale, molaetša wa Hesekiele o yago go mathopša a lego Babilona o theilwe tabeng e tee: go wa le go senywa ga motse wa bona o rategago, Jerusalema. Lega go le bjalo, mo lebakeng le molaetša wa boporofeta bja Hesekiele o a fetoga, o mabapi le go fedišwa ga ditšhaba tša baheitene tšeo di tlago go thaba ge masetlapelo a wela batho ba Modimo. Ge Jerusalema e be e e-wa ka morago ga dikgwedi tše 18, molaetša wa Hesekiele o bolela ka taba e nngwe gape: tsošološo ya letago ya borapedi bja therešo.

Hesekiele 25:1–48:35 e porofeta ka ditšhaba tšeo di dikologilego Isiraele le ka go phološwa ga batho ba Modimo. * Dipego di hlatlamana go ya ka nako gotee le ka tatelano ya ditaba ka ntle le yeo e lego go Hesekiele 29:17-20. Lega go le bjalo, ditemana tše tše nne ga di hlaloswe go ya ka nako eupša di sepedišana le boporofeta bjo bo lego kgahlanong le Egipita. Ka ge e le karolo ya Mangwalo a buduletšwego, puku ya Hesekiele e na le molaetša o ‘phelago le o matla.’—Baheberu 4:12.

‘NAGA YEO E TLA SWANA LE TŠHEMO YA EDENE’

(Hesekiele 25:1–39:29)

Ge a bona e sa le pele kamoo ditšhaba di arabelago ka gona ge Jerusalema e senywa, Jehofa o re Hesekiele a porofete kgahlanong le Amoni, Moaba, Edomo, Filisita, Tiro le Sidone. Egipita e tlo thopša. ‘Farao kgoši ya Egipita le lekoko la gagwe’ ba swantšhwa le sehlare sa morokwana seo se tlago go wa ka “lerumô la kxoši ya Babele.”—Hesekiele 31:2, 3, 12; 32:11, 12.

Mo e ka bago dikgwedi tše tshela ka morago ga go senywa ga Jerusalema ka 607 B.C.E., go tla mophonyokgi gomme o begela Hesekiele gore: “Motse o thopilwe.” Moporofeta ga e sa le “semuma.” (Hesekiele 33:21, 22) O swanetše go tsebatša boporofeta bja mabapi le tsošološo. Jehofa o tla ba “beêla modiši o tee wa xo [ba] diša, Dafida mohlanka [wa gagwe].” (Hesekiele 34:23) Edomo e swanetše go senywa, eupša naga yela, e lego Juda e tla swana le “thšemo ya Edene.” (Hesekiele 36:35) Nakong ya tlhaselo ya “Gogo,” Jehofa o holofetša go šireletša batho ba gagwe bao ba tsošološitšwego.—Hesekiele 38:2.

Dipotšišo tša Mangwalo di a Arabja:

29:8-12—Ke neng moo Egipita e kilego ya ba lešope ka nywaga e 40? Ka morago ga go senywa ga Jerusalema ka 607 B.C.E., mašaledi a Juda a ile a tšhabela Egipita go sa šetšwe temošo ya moporofeta Jeremia. (Jeremia 24:1, 8-10; 42:7-22) Seo ga sa ka sa ipontšha e le mogato o bohlale ka ge Nebukadinetsara a ile a lwa le Egipita gomme a e fenya. Nywaga e 40 ya go dirwa lešope ga Egipita e ka ba e tlile ka morago ga phenyo yeo. Le ge histori ya lefase e sa nee bohlatse bja gore e kile ya ba lešope, re ka kgodišega gore tiragalo ye e ile ya ba gona ka baka la gore Jehofa ke Mophethi wa boporofeta.—Jesaya 55:11.

29:18—Ke bjang ‘dihlogo ka moka di ilego tša hlobega le magetla ka moka a ilego a phumoga’? Go rakelelwa ga motse wa ka gare ga naga wa Tiro go be go le thata e bile go lapiša moo e lego gore dihlogo tša madira a Nebukadinetsara di ile tša hlobja ke go kgobolwa ke dikefa tša ona gomme magetla a ona a ile a phumoga ka ge a be a rwala dilo tša go aga meago  e metelele gotee le dibo tša thakelelo.—Hesekiele 26:7-12.

Seo re Ithutago Sona:

29:19, 20. Ka ge batho ba Tiro ba ile ba tšhabela le bontši bja mahumo a bona motseng wa bona wa sehlakahlaka, Kgoši Nebukadinetsara o ile a thopa dilo tše dinyenyane kudu moo Tiro. Le ge Nebukadinetsara e be e le mmuši wa baheitene yo a bego a ikgantšha le go inaganela, Jehofa o ile a mo putsa bakeng sa modiro wa gagwe ka go mo nea Egipita e le “meputsô ya dirá tša xaxwe.” Na ga se ra swanela go ekiša Modimo wa therešo ka go lefa mmušo makgetho bakeng sa ditirelo tšeo o re direlago tšona? Boitshwaro bja badiredi ba phagamego goba kamoo ba dirišago lekgetho ka gona ga go phumole tshwanelo ye.—Baroma 13:4-7.

33:7-9. Sehlopha sa mohlokomedi sa mehleng yeno—mašaledi a tloditšwego—le bagwera ba sona ga se ba swanela go kgaotša go bolela ditaba tše dibotse tša Mmušo le go lemoša batho ka “masetlapelo a magolo” a tlago.—Mateo 24:21.

33:10-20. Go phologa ga rena go ithekgile ka go efoga ditsela tše kgopo le go dira dilo ka go dumelelana le seo Modimo a se nyakago. Ka kgonthe, tsela ya Jehofa e ‘lokile.’

36:20, 21. Ka baka la go se phele ka tsela yeo ba bego ba swanetše go phela ka yona, ke gore, “sethšaba sa Morêna,” Baisiraele ba gobošitše leina la Modimo gare ga ditšhaba. Ga se ra swanela go ba barapedi ba Jehofa ka leina feela.

36:25, 37, 38. Paradeise ya moya yeo re e thabelago lehono e tletše ka ‘mašaba a batho ba bakgethwa.’ Ka gona, re swanetše go lwela go e boloka e hlwekile.

38:1-23. Go kgothatša gakaakang go tseba gore Jehofa o tla phološa batho ba gagwe tlhaselong ya Gogo wa naga ya Magogo! Gogo ke leina leo le ilego la newa “mmuši wa lefase le,” Sathane Diabolo, ka morago ga ge a rakilwe legodimong. Naga ya Magogo e šupa karolo ya lefaseng, e lego moo Sathane le batemona ba gagwe ba lahletšwego gona.—Johane 12:31; Kutollo 12:7-12.

“O ÊLÊ HLÔKÔ TŠOHLE TŠE KE TL’O XO XO BONTHŠA TŠÔNA”

(Hesekiele 40:1–48:35)

Ke ngwaga wa bo-14 ka morago ga ge motse wa Jerusalema o phušotšwe. (Hesekiele 40:1) Nywaga e 56 ya bothopša e sa letše ka pele. (Jeremia 29:10) Hesekiele ga bjale o kgaufsi le go ba le nywaga e 50. Ponong, o išwa nageng ya Isiraele. O botšwa gore: “Ngwan’a motho! Lebêlêla ka mahlô a xaxo, O theetšê ka ditsêbê tša xaxo, O êlê hlôkô tšohle tše ke tl’o xo Xo bonthša tšôna.” (Hesekiele 40:2-4) Hesekiele o swanetše go ba a thabile gakaakang ge a bona pono ya tempele e mpsha!

Tempele ya letago yeo Hesekiele a e bonago e-na le dikgoro tše 6, diphapoši tša go jela tše 30, Sekgethwa, Sekgethwa-kgethwa, aletare ya kota le aletare ya go fišetša dihlabelo. ‘Meetse a elago’ go tšwa tempeleng ke noka  yeo e fetogago moedi. (Hesekiele 47:1) Hesekiele gape o bona pono ya naga yeo e abetšwego meloko ya setšhaba—kabelo e nngwe le e nngwe e be e thoma ka bohlabela e e-ya ka bodikela, e e-na le naga ya bolaodi yeo e lego gare ga Juda le Benjamini. “Sekxêthwa sa Morêna” le “motse” wo o bitšwago Jehofa-Shammah di nageng yeo.—Hesekiele 48:9, 10, 15, 35, mongwalo wa tlase wa NW.

Dipotšišo tša Mangwalo di a Arabja:

40:3–47:12—Tempele ya ponong e swantšhetša eng? Tempele ye ya dikarolo tše dikgolo yeo e bonwago ke Hesekiele ponong ge e le gabotse ga se ya ka ya agwa. E be e swantšhetša tempele ya Modimo ya moya—thulaganyo ya gagwe ya borapedi bjo bo sekilego mehleng ya lehono yeo e swanago le tempele. (Hesekiele 40:2; Mika 4:1; Baheberu 8:2; 9:23, 24) Pono ya tempele e phethagatšwa nakong ya ‘mehla ya bofelo,’ ge boperisita bo mpshafatšwa. (2 Timotheo 3:1; Hesekiele 44:10-16; Maleaki 3:1-3) Lega go le bjalo, e phethagatšwa ka botlalo Paradeiseng. Tempele ya ponong e neile Bajuda ba lego bothopša kholofelo ya gore borapedi bjo bo sekilego bo tla tsošološwa le gore lapa le lengwe le le lengwe la Bajuda le tla hwetša bohwa bja naga.

40:3–43:17—Go lekanywa ga tempele go bontšha eng? Go lekanywa ga tempele ke sešupo sa gore morero wa Jehofa mabapi le borapedi bjo bo sekilego o tla phethagatšwa e le ka kgonthe.

43:2-4, 7, 9—“Ditoto tša maxoši a bôná” tšeo di bego di swanetše go tlošwa ka tempeleng e be e le eng? Go bonagala ditoto tše di be di swantšhetša medimo ya diswantšho. Babuši ba Jerusalema le batho ba yona ba be ba šilafaditše tempele ya Modimo ka medimo ya bona ya diswantšho—ge e le gabotse, ba e dira dikgoši tša bona.

43:13-20—Ke’ng seo se swantšhetšwago ke aletare yeo Hesekiele a e bonego ponong? Aletare ya seswantšhetšo e emela thato ya Modimo e tswalanywago le sehlabelo sa Jesu Kriste sa topollo. Ka baka la tokišetšo ye, batlotšwa ba hlaloswa ba lokile gomme “lešaba le legolo” e le leo le hlwekilego le go seka mahlong a Modimo. (Kutollo 7:9-14; Baroma 5:1, 2) Mohlomongwe ke ka baka leo “moxopo o moxolo wa mphiri” wa tempele ya Salomo—mogopo o mogolo wa meetse wo o bego o dirišwa ke baperisita go hlapela—o sego gona ka moo tempeleng ya ponong.—1 Dikxoši 7:23-26.

44:10-16—Sehlopha sa baperisita se swantšhetša mang? Sehlopha sa baperisita se swantšhetša e sa le pele sehlopha sa mehleng ya rena sa Bakriste ba tloditšwego. Go sekišwa ga bona go diragetše ka 1918 ge Jehofa a be a dula ka tempeleng ya gagwe ya moya bjalo ka “motološi le mosekiši.” (Maleaki 3:1-5, NW) Bao ba bego ba hlwekile goba bao ba bego ba sokologile ba be ba tla tšwela pele ka tokelo ya bona ya tirelo. Ka morago ga moo, ba be ba swanetše go šoma ka thata go dula ba “se na sepatso go tšwa lefaseng,” ka gona, ba e ba mehlala go “lešaba le legolo,” leo le swantšhetšwago ke meloko yeo e sego ya boperisita.—Jakobo 1:27; Kutollo 7:9, 10.

45:1; 47:13–48:29—“Naga” le magae di emela eng? Naga e emela lefelo leo batho ba Modimo ba dirago modiro go lona. Go sa šetšwe moo morapedi wa Jehofa a lego gona, yena yoo o nageng e tsošološitšwego ge feela a godiša borapedi bja therešo. Go arolwa ga naga go tla ba  le phethagalo ya gona ya mafelelo lefaseng le lefsa ge motho yo mongwe le yo mongwe a tla be a hwetša bohwa bja naga.—Jesaya 65:17, 21.

45:7, 16—Ke’ng seo se swantšhetšwago ke sebego sa batho go baperisita le magoši? Ka tempeleng ya moya, ka mo go kgethegilego se se swantšhetša thekgo ya moya—go thuša le go bonagatša moya wa tirišano.

47:1-5—Meetse a noka yeo e bonwago ke Hesekiele ponong a swantšhetša eng? Meetse a swantšhetša thulaganyo ya moya ya Jehofa ya bophelo ka moka, go akaretša le sehlabelo sa topollo sa Kriste Jesu gotee le tsebo yeo e hwetšwago ka Beibeleng ya go tseba Modimo. (Jeremia 2:13; Johane 4:7-26; Baefeso 5:25-27) Noka e a gola e le gore e kgone go akaretša bontši bja batho bao ba sa tšwago go amogela borapedi bja therešo. (Jesaya 60:22) Nakong ya Nywaga e Sekete noka e tla ba e ela meetse a matla kudu a bophelo gomme meetse a yona a tla akaretša kwešišo e oketšegilego e hwetšwago “mangwalong” a go phuthwa ao a tlago go bulwa ka nako yeo.—Kutollo 20:12; 22:1,2.

47:12—Dihlare tšeo di nago le dienywa di emela eng? Dihlare tša seswantšhetšo di emela tokišetšo ya Modimo ya moya ya go iša batho phethegong.

48:15-19, 30-35, mongwalo wa tlase wa NW—Motse wa ponong ya Hesekiele o swantšhetša eng? “Jehofa-Shammah” e nageng e ‘gobogilego,’ e lego se se bontšhago gore e swanetše go swantšhetša selo sa lefaseng. Motse o bonala o swantšhetša bolaodi bja lefaseng bjo bo holago bao ba tlago go bopa baloki ba “lefase le lefsa.” (2 Petro 3:13) Go ba ga wona le dikgoro ka mahlakoreng ka moka go bontšha gore o tla tsenega gabonolo. Balebeledi ba lego bathong ba Modimo ba swanetše go batamelega.

Seo re Ithutago Sona:

40:14, 16, 22, 26. Diswantšho tše di lego lebotong tšeo di betlilwego ka mehlare ya melala tšeo di lego matsenong a tempele di bontšha gore ke feela bao ba hlwekilego boitshwarong bao ba dumeletšwego go tsena. (Psalme 92:12) Se se re ruta gore borapedi bja rena bo a amogelega go Jehofa ge feela re itshwere gabotse.

44:23. Ruri re leboga tirelo yeo e dirwago ke sehlopha sa lehono sa baperisita! “Mohlanka yo a botegago le wa temogo” o etelela pele go re nea dijo tša moya tše di lego nakong tšeo di re thušago go kwešiša phapano magareng ga seo se šilafetšego le seo se hlwekilego mahlong a Jehofa.—Mateo 24:45.

47:9, 11. Tsebo—seka se bohlokwa sa meetse a seswantšhetšo—e tšwela pele e phetha modiro o mobotse kudu wa go fodiša mehleng ya rena. Go sa šetšwe moo a nwewago gona, a phediša batho moyeng. (Johane 17:3) Ka lehlakoreng le lengwe, bao ba sa amogelego meetse ao a neago bophelo ba tla ‘gafelwa go a letswai’—ba tla fedišwa ka mo go feletšego. Go bohlokwa gakaakang gore re ‘dire sohle seo re ka se kgonago go swara lentšu la therešo ka tshwanelo’!—2 Timotheo 2:15.

‘Leina La-ka le Legolo ke tla le Dira le Lekgethwa’

Ka morago ga go tlošwa ga mphapahlogo wa kgoši ya mafelelo ya lešika la Dafida, Modimo wa therešo o ile a dumelela gore go fete nako e telele pele go e-tla Yo “a swanetšwexo ke wôna.” Lega go le bjalo, Modimo ga se a ka a lahla kgwerano ya gagwe le Dafida. (Hesekiele 21:32; 2 Samuele 7:11-16) Boporofeta bja Hesekiele bo bolela ka “Dafida mohlanka wa-ka,” yo e tlago go ba “modiši” le “kxoši.” (Hesekiele 34:23, 24; 37:22, 24, 25) Yo ga se yo mongwe ge e se Jesu Kriste, a le matleng a Mmušo. (Kutollo 11:15) Jehofa o tla diriša Mmušo wa Mesia go ‘kgethagatša leina la gagwe le legolo.’—Hesekiele 36:23.

Kgaufsinyane, bao ba gobošago leina le lekgethwa la Modimo ba tla fedišwa. Eupša bao ba kgethagatšago leina leo maphelong a bona ka go rapela Jehofa ka tsela e amogelegago, ba tla hwetša bophelo bjo bo sa felego. Ka gona, anke re dirišeng gabotse meetse a bophelo ao a elago ka bontši mehleng ya rena gomme re dire gore borapedi bja therešo e be motheo wa maphelo a rena.

[Mongwalo wa ka tlase]

[Seswantšho go letlakala 9]

Tempele ya letago yeo e bonwego ke Hesekiele ponong

[Seswantšho go letlakala 10]

Noka ya bophelo yeo e bonwego ke Hesekiele ponong e swantšhetša eng?

[Mothopo]

Pictorial Archive (Nears Eastern History) Est.