Dipotšišo tše Tšwago go Babadi

Ke ka baka la’ng Kgoši Saulo a ile a botšiša Dafida ka morago ga ge Dafida a bolaile Goliata gore, “Wene Lesoxana! O morwa wa mang?” mola e le gore pejana Saulo o be a biditše Dafida gore e tle e be mohlokomedi wa gagwe?—1 Samuele 16:22; 17:58.

Karabo e bonolo e ka ba ya gore Saulo o be a lebetše gore Dafida ke mang ka gobane ga se ba bolela nako e telele ge ba be ba kopana la mathomo. Lega go le bjalo, se se ka se kgonege ka gobane pego yeo e begilwego go 1 Samuele 16:18-23 e bontšha gore Kgoši Saulo o be a laetše ka go lebanya gore go bitšwe Dafida gomme o ile a thoma go mo rata kudu, a mo dira morwadi wa kotse ya gagwe. Saulo o swanetše go ba a be a tlwaelane gabotse le Dafida.

Diithuti tše dingwe tša Beibele di nagana gore 1 Samuele 17:12-31 le 17:55–18:5 di ile tša ngwalwa ka morago ka gobane ditemana tše ga di tšwelele ka dikoping tše dingwe tša Septuagint ya Segerika, e lego phetolelo ya Mangwalo a Seheberu yeo e feditšwego lekgolong la bobedi la nywaga B.C.E. Lega go le bjalo, go fihlelela phetho e bjalo motheong wa dikopi tšeo tša Septuagint feela ga se ga bohlale, ka ge ditemana tše di tšwelela ka mangwalong a mangwe a amogelegago a Mangwalo a Seheberu.

Ge e le gabotse, ka go botšiša Abenere pele gomme ka morago a botšiša Dafida ka boyena, ga se gore Saulo o be a fo nyaka go tseba leina la tatago Dafida. Ka ge a bone seka se sengwe sa Dafida sa go ba motho yo a nago le tumelo e matla le sebete, yoo a sa tšwago go fenya Goliata, Saulo o be a nyaka go tseba mohuta wa motho yoo a godišitšego mošemane yo. Saulo a ka ba a be a naganne go tsenya tatago Dafida e lego Isai goba yo mongwe wa ditho tša lapa labo madireng a ntwa, ka ge sebete seo Dafida a bego a e-na le sona se be se ka hwetšwa le go bona.

Gaešita le ge 1 Samuele 17:58 e akaretša karabo e kopana feela ya Dafida ya gore, “ke morwa wa Isai, molata wa xaxo wa Betlehêma,” se se latelago se bontšha gore go ka ba go ile gwa ba le poledišano e telele. Tabeng ye, ela hloko seo se bolelwago ke C. F. Keil le F. Delitzsch, ge ba re: “Go tloga go le molaleng go tšwa polelwaneng e lego go [1 Samuele 18:1], e rego ‘ge a feditše go bolela le Saulo,’ gore Saulo o ile a tšwela pele a boledišana le yena ka ditaba tša lapa labo, ka ge mantšu a a bontšha gore go bile le poledišano e telele.”

Go tše ka moka, re ka phetha ka gore ka potšišo ya gagwe e rego, “Wene Lesoxana! O morwa wa mang?” Saulo o be a sa nyake go tseba leina la Dafida leo a bego a šetše a le tseba, eupša o be a nyaka go tseba setlogo sa Dafida.

[Seswantšho go letlakala 31]

Ke ka baka la’ng Saulo a ile a botšiša Dafida gore ke morwa wa mang?