Phihlelo

Go Hlankela Jehofa—Kgodišo Le Tokelo Tše Di Sa Bapišwego

KA GE GO ANEGA ZERAH STIGERS

Monna wa-ka yo e bilego molekane yo a botegago bodireding bja nako e tletšego, o hwile ka 1938. Ke moka ke ile ka swanelwa go šala ke godiša lesea le morwa wa nywaga e lesome. Le ge ke be ke hlologela go hlankela ke le modiredi wa nako e tletšego, ke be ke tla kgona bjang? Pele ke go botša gore bjang, e re ke go botše ganyenyane ka bophelo bja-ka bja pele ga moo.

NAKWANA ka morago ga ge ke belegwe ka July 27, 1907 kua Alabama, U.S.A., batswadi ba-ka ba ile ba hudugela Georgia le nna gotee le bana bešo ba bararo. Kapejana ka morago ga moo, re ile ra ya Tennessee gomme ka morago ra ya kgaufsi le motse wa Tampa, Florida. Ka 1916 ge re be re le moo, ke ile ka bona paesekopo ya “Photo-Drama of Creation.” Intasteri ya dipaesekopo e be e sa thoma, ka gona yo mongwe le yo mongwe o ile a thabela go bogela “Photo-Drama” yeo!

Batswadi ba-ka e be e le babadi ba fišegago ba Morokami le dikgatišo tše dingwe tša Beibele. Le ge tate a be a thabela go bala dikgatišo tšeo, ka nako yeo o be a sa kopanele ka mafolofolo le Barutwana ba Beibele, ka ge Dihlatse tša Jehofa di be di bitšwa bjalo. Lega go le bjalo, mma o be a e-ya le rena bana dibokeng. Ge e le gabotse, nakwana ka morago ga ge re hudugetše Niles kua Michigan, gantši re be re tšea leeto la dikhilomithara tše fetago 16 ka setimela go ya dibokeng kua Borwa bja Bend, Indiana.

Mafelelong ka July 22, 1924, ke ile ka kolobetšwa, e le pontšho ya boineelo bja-ka go Jehofa. Kapejana ka morago ga moo, mma o ile a rulaganya  maemo a gagwe gore e tle e be mmapatši, bjalo ka ge badiredi ba nako e tletšego ba Dihlatse tša Jehofa ba be ba bitšwa bjalo. Mohlala wa gagwe o mobotse le wa babapatši ba bangwe o ile wa dira gore ke kganyoge go tsenela modiro woo.

Go Hwetša Modirišani

Ge ke be ke le kopanong e kgolo kua Indianapolis, Indiana, ka 1925, ke ile ka kopana le James Stigers yo a bego a e-tšwa Chicago. Ka yona nako yeo ke ile ka kgahlwa ke James ka ge e be e le mohlanka yo mafolofolo wa Jehofa. Ke be ke dula mo e ka bago dikhilomithara tše 160 go tloga Chicago, ka gona go be go se bonolo go etelana. Ka nako yeo, go be go e-na le phuthego e tee motseng woo o mogolo, gomme diboka di be di swarelwa ka lebatong la ka godimo la phapoši yeo e hirilwego. James o be a nngwalela gantši bakeng sa go nkgothatša moyeng. Re ile ra nyalana ka December 1926, gomme ka morago ga mo e ka bago ngwaga, ke ile ka belega morwa wa rena wa leitšibolo, e lego Eddie.

Nakwana ka morago ga moo, nna le James re ile ra thoma tirelo ya rena ya bobulamadibogo re le gotee. Re hlanketše metseng e seswai—Michigan, Louisiana, Mississippi, Dakota Borwa, Iowa, Nebraska, California le Illinois—re thabela nywaga e kgahlišago kudu ya bophelo bja rena. Ke feela ge James a be a thoma go babja moo nywaga yeo re e thabetšego re le lapa e ilego ya šitišwa.

Mathata a ditšhelete ao a bego a bakwa ke go babja ga James a ile a dira gore ka 1936 re boele Chicago go yo dula le mmatswale, yo le yena e bego e le Hlatse. Ge James a be a le kgaufsi le go fola, ke be ke imile ngwana wa bobedi e bile ke šomela $1 la letšatši ka lebenkeleng la go jela. Mmatswale yo a rategago o be a kgonthišetša gore re na la dijo tše dintši, gomme o be a sa amogele le sente yeo re bego re leka go mo leboga ka yona. O be a re hlokomela gabotse.

James o ile a babja nywaga e mebedi pele a bolawa ke bolwetši bja encephalitis, e lego go ruruga le go hwibila ga bjoko. Seo se diragetše ka July 1938. Nakong ya bolwetši bja gagwe o be a sa kgone go otlela goba go tšea karolo modirong wa ntlo le ntlo, eupša o be a diriša sebaka se sengwe le se sengwe go nea batho ba bangwe bohlatse. E le gore ke thekge ba lapa la-ka ka tša ditšhelete, ke ile ka tlogela tirelo ya nako e tletšego. Ke ile ka kgona go hwetša mešomo e fapa-fapanego, o mongwe le o mongwe o tšea nako e kopana feela.

Morwa wa rena Bobby o belegwe ka July 30, 1938, matšatši a seswai feela ka morago ga lehu la tatagwe. Lega go le bjalo, mmatswale wa-ka o ile a gana ke e-ya sepetleleng sa setšhaba. Go e na le moo, o ile a rulaganya gore ke ye sepetlele se sekaone-kaone le gore ke hlokomelwe ke ngaka ya gagwe. Go feta moo, o ile a lefelela dilo ka moka, e lego pontšho ya lerato la Bokriste yeo ke ilego ka e tšeela godimo.

Go Boela Bodireding bja Nako e Tletšego

Re ile ra tšwela pele re dula le mmatswale go fihla ge Bobby a be a e-na le nywaga ya ka godingwana ga e 2, e lego nako yeo Eddie a bego a e-na le nywaga e 12. Le ge ke be ke swanetše go fetoša dilo bakeng sa boemo bja-ka bjo bofsa, kganyogo ya-ka ya go hlankela Jehofa ka nako e tletšego e be e sa dutše e tuka. Ka 1940 kua Detroit, Michigan, ke ile ka kopana le babulamadibogo bao ba bego ba nkgothaletša go tla go bula madibogo kua Carolina Borwa. Ka gona, ke ile ka reka koloi ya Pontiac ya 1935 ka $150 gomme ka itokišeletša go ya moo. Ka 1941, ngwaga woo United States e tsenetšego Ntwa ya II ya Lefase, nna le barwa ba-ka ba babedi re ile ra ya ka borwa, gomme ke ile ka tsenela tirelo ya nako e tletšego gape.

Ge re be re hudugela Carolina Borwa, re ile ra ya motseng wa Camden pele, ka morago ra ya motseng wa Little River, gomme ra ya motseng wa Conway. Kua Conway ke ile ka reka kharabane  e nyenyane. Ke ile ka dumelelwa ke mong yo botho wa lefelo le lenyenyane la go rekiša peterole gore ke e emiše kgaufsi le lefelo la gagwe la go rekiša, ke diriše malahla a gagwe le mohlagase wa gagwe, gotee le go diriša ntlwana ya boithomelo ya moo. Nakong ya Ntwa ya II ya Lefase, go ile gwa ba le tlhaelelo ya peterole gomme ke be ke sa kgone go hwetša peterole. Ka gona ke ile ka reka paesekela ya kgale. Ka morago ka 1943, ge go be go bonala go le thata gore ke tšwele pele ke bula madibogo ka baka la go hloka tšhelete, ke ile ka laletšwa gore ke be mmulamadibogo yo a kgethegilego, gomme ke be ke hwetša tšhelete ya tebogo kgwedi le kgwedi bakeng sa go hlokomela ditshenyagalelo tša-ka. Jehofa o nthušitše kudu ka nywaga e mentši!

Go be go se na Dihlatse tše dingwe tšeo di bego di dula Conway ka nako yeo, gomme go be go le thata go nna le go bana go ya bodireding re le noši. Ka gona ke ile ka ngwala lengwalo ke kgopela mothuši wa mmulamadibogo yo a kgethegilego gomme ka 1944 ke ile ka šegofatšwa ka yo a kgahlišago—Edith Walker! Re hlanketše gotee dikabelong tše mmalwa ka nywaga e 16. Gomme se se nyamišago ke gore o ile a swanelwa ke go boela Ohio ka baka la mathata a tša maphelo.

Ditšhegofatšo tše di Gopolegago

Dilong tše dintši tšeo di sa gopolegago tšeo di ilego tša direga nywageng yeo, nka se ke ka lebala Albertha wa nywaga e 13, yo a bego a dula Conway gomme a hlokomela makgolo’agwe yo a golofetšego le dikgaetšedi tša gagwe tše pedi. O be a rata ditherešo tša Beibele tšeo ke bego ke mo ruta tšona gomme o be a nyaka go di botša ba bangwe. Le yena o ile a hlagolela lerato le le tseneletšego la tirelo ya bobulamadibogo gomme a thoma go bula madibogo ka morago ga go aloga sekolong se se phagamego ka 1950. O sa dutše a tšwela pele ka bodiredi bja nako e tletšego ka morago ga nywaga e 57!

Ka 1951, nna le Edith re ile ra abelwa go hlankela ka nakwana kua Rock Hill, Carolina Borwa, moo go bego go dula Dihlatse tše mmalwa kudu. Ka morago re ile ra hlankela Elberton, Georgia, ka nywaga e meraro. Ka morago ra boela Carolina Borwa gape, moo ke ilego ka dula gona go tloga ka 1954 go fihla ka 1962. Kua Walhalla, ke ile ka kopana le motšofadi yo mongwe, e lego mokgekolo yo a sa kgonego go kwa yo a bitšwago Nettie, yo a bego a dula a nnoši nageng ya magaeng. E le gore re tšwele pele ka thuto ya rena ya Beibele, o be a bala serapa ka kgatišong gomme ke šupa potšišo ya serapa bofelong bja letlakala gomme o be a šupa karabo serapeng.

Ge a be a sa kwešiše selo, o be a ngwala potšišo letlakaleng, gomme ke be ke ngwala karabo ka morago ga yona. Mafelelong, go rata Beibele ga Nettie go ile gwa gola kudu moo a ilego a thoma go tla dibokeng tša phuthego gotee le go tšea karolo bodireding bja ntlo le ntlo. O be a sepela a nnoši, eupša ke be ke sa sepelele kgole, gantši ke e-ba komana-madula-a-bapile ka thoko e nngwe ya tsela bakeng sa gore ge a nyaka thušo ke be kgaufsi.

Ge ke be ke sa le Walhalla, koloi ya-ka ya kgale e ile ya senyega. Ke ile ka bulegelwa ke sebaka sa go reka koloi ka $100, eupša ke be ke se na tšhelete. Ke ile ka ikgokaganya le Hlatse yeo e bego e e-na le kgwebo, gomme e ile ya nkadima $100. Nakwana ka morago ga moo, ke ile ka hwetša lengwalo leo ke bego ke se ka le letela leo le tšwago go moratho’a-ka le hlalosa gore baratho ba-ka ba hweditše gore ge tate a hlokofala o tlogetše tšhelete e nngwe ka pankeng. Ba ile ba boledišana gore ba dire eng ka yona, gomme ka moka ba ile ba kwana gore ba nthomele yona. E be e le $100.

Go Bula Madibogo le Barwa Ba-ka

Ge Eddie le Bobby e be e sa le ba banyenyane, ba be ba e-ba le nna ka mehla modirong wa go bolela ka ntlo le ntlo. Ka nako yeo, batho ka kakaretšo ba be ba sa lemalela dihlare-tagi, gomme ditutuetšo  tša boitshwaro bjo bo gobogilego e be e se tše matla go swana le lehono. Go boloka bophelo bja rena bo le bonolo le go tsepamišetša mahlo a rena modirong wa boboledi go nthušitše go phema mathata a mantši ao batswadi ba bantši ba bago le ona lehono ge ba godiša bana ba bona gore ba hlankele Jehofa.

Eddie o tsene sekolo Camden go fihlela a fetša ka mphato wa seswai, gomme ka morago ga moo o ile a nyaka go bula madibogo le nna. Re thabetše go bula madibogo gotee ka nywaga e mmalwa. Ka morago o ile a ba le kganyogo ya go hlankela ntlong-kgolo ya Dihlatse tša Jehofa kua Brooklyn, New York, moo a ilego a hlankela go tloga ka 1947 go fihla ka 1957. Ka 1958 o ile a nyala Albertha, yoo e kilego ya ba morutwana wa-ka wa Beibele gomme ba ile ba babulamadibogo ba le gotee. E bile lethabo gakaakang ge boraro bja rena re e-ya gotee Sekolong sa Tirelo ya Bobulamadibogo ka 2004!

Ke gopola letšatši le lengwe nywageng e mentši e fetilego, ke ile ka kwa Bobby yo monyenyane a kgopela Jehofa ka thapelo gore a nthuše go hwetša peterole e lekanego gore ke diriše koloi go ya dithutong tša-ka tša Beibele. Bophelong bja gagwe ka moka, Bobby o bontšhitše go rata bodiredi le go ba tirelong ya bobulamadibogo ka nywaga e mentši. Ka manyami, Bobby le yena o ile a ba le manyami ka lapeng. Ka 1970, mosadi wa gagwe o ile a hlokofala ka morago ga ge ba nyalane ka dikgwedi tše 22 feela, o hlokofetše gotee le bana ba gagwe ba mafahla ge a be a belega. Nna le Bobby ka mehla re be re dula kgaufsi le kgaufsi, gomme re be re e-na le tswalano ya kgaufsi kudu.

Re sa Bula Madibogo!

Ka 1962, ke ile ka abelwa phuthegong ya Lumberton, kua Carolina Leboa, yeo ke sa dutšego ke le go yona ka morago ga nywaga e 45. Ke ile ka tšwela pele ke otlela koloi ya-ka go fihla ge ke e-na le nywaga ya ka godimo ga e 80. Malapa a mangwe a Dihlatse ao a dulago kgaufsi a nkiša dibokeng tša phuthego le modirong wa boboledi.

Ke na le seikokotlelo sa digole sa go sepela le setulo sa digole, eupša ga ke gapeletšege go di diriša ka ge ke kgona go sepela ke sa nyake thušo. Ke leboga Jehofa ka ge ke phela gabotse mmeleng, ke feela morago bjale moo ke bilego le bothata bja mahlo. Ga ke foše diboka tša phuthego ntle le ge ke babja kudu, gomme ke sa tšwela pele ke hlankela ke le mmulamadibogo wa ka mehla yo a babjago.

Ka morago ga go thabela go hlankela ke le mmulamadibogo ka nywaga e fetago e 70, nka bolela go tšwa pelong gore Jehofa o nthušitše bophelong bja-ka ka moka. * Ke lemoga gore ga se ka ka ka ba motho yo bohlale goba yo a dirago dilo ka lebelo, eupša Jehofa o tseba seo nka se kgonago le seo nka se se kgonego. Ke leboga kudu ge a tseba gore ke a leka le gore o a ntiriša.

Ke nagana gore go hlankela Jehofa ka mo go kgonegago ka gona go bohlokwa ka ge re mo kolota dilo tšohle. Ge feela ke sa kgona, nka se kgethe go hlankela ke le selo se sengwe ntle le go ba mmulamadibogo. Ruri ye e bile tokelo e kgolo! Ke rapela gore Jehofa a ntiriše ka mo go sa felego.

[Mongwalo wa ka tlase]

[Seswantšho go letlakala 13]

Nna le monna wa-ka re dirišitše koloi ye modirong wa bobapatši

[Seswantšho go letlakala 14]

Ke e-na le barwa ba-ka ka 1941

[Seswantšho go letlakala 15]

Ke e-na le Eddie le Bobby morago bjale