Go Tsoma Bomoya

THUTONG ya gagwe e tumilego ya Thabeng, Jesu o boletše gore: “Go thaba bao ba lemogago go nyaka ga bona dilo tša moya.” (Mateo 5:3) O ka no ba o dumelelana le mantšu ao. Batho kae le kae ba lemoga go nyakega ga bomoya bophelong gomme ba dumela gore ge bo se na go hwetšwa, bo tla ba tlišetša lethabo. Lega go le bjalo, ke’ng seo se bolelwago ke lentšu “bomoya”?

Pukuntšu e nngwe e hlalosa bomoya e le “temogo ya go nyakega ga goba go kgomarela ditekanyetšo tša bodumedi” le gore ke “seka goba boemo bja go ba motho wa moya.” Ka go rialo, dipolelwana tše bjalo ka “bomoya,” “go ba motho wa moya,” goba “go sekamela dilong tša moya” di lebelelwa e le mahlalosetša-gotee. Go hlalosa lentšu le ka mo go oketšegilego, nagana ka papišo ye: Motho yo a nago le bokgoni bja tša kgwebo go thwe o sekametše go tša kgwebo. Ka mo go swanago, motho yo a tlogago a tšeela dilo tša moya goba tša bodumedi godimo go thwe o na le tshekamelo ya moya.

Ka gona, bomoya bja kgonthe bo hwetšwa bjang? Gaešita le ge madumedi a mantši a ipolela gore a tseba tsela e dirago gore motho e be wa moya, tlhahlo yeo a e neago ke e ntši kudu go fo swana le madumedi ka bowona. Moprotestanta o bolela gore o tla phološwa sebokeng sa tsošološo. Mokhatolika o tsoma go boelanywa le Modimo Mmiseng. Mo-Buddha o katanela go hwetša tshedimošo ka go naganišiša. Mo-Hindu o katanela go lokollwa medikologong ya go tswalwa lefsa ka go itima dilo. Na ruri ba ka moka ba tseleng e lebišago bomoyeng bja kgonthe? Na go na le e nngwe ya tšona yeo e lebilego gona?

Go ba bantši, karabo ya dipotšišo tšeo ke aowa. Ba re bomoya bo bolela go “dumela ntle le go ba setho sa,” ke gore, go dumela go modingwana ntle le go ba setho sa kereke e itšego. Ba bangwe ba nagana gore bomoya ga bo bolele go ba wa bodumedi eupša bo bolela kganyogo ya go ba le khutšo ya ka gare le go ba le morero bophelong. Ba bolela gore bao ba nyakago bomoya go tloga go sa nyakege gore ba bo tsome bodumeding. Go e na le moo, seo se nyakegago ke go fo itebeledišiša, maikwelong a bona a ka gare. Mongwadi yo mongwe o re: “Bomoya bja kgonthe ke selo seo motho a se hwetšago ka gare-gare ga gagwe. Ke tsela ya gago ya go rata, go amogela le ya go dirišana le lefase le batho bao ba go dikologilego. Bo ka se hwetšwe ka kerekeng goba go dumeleng ka tsela e itšego.”

Ka mo go kwagalago, batho ba na le dikgopolo tše di fapanego kudu tša mabapi le bomoya. Dipuku tše dikete di re di bontšha tsela e išago bomoyeng bja kgonthe, eupša babadi ba tšona gantši ba šala ba sa kgotsofala e bile ba gakanegile. Lega go le bjalo, go na le puku e tee yeo e nago le tlhahlo e ka botwago ya mabapi le dilo tša moya. Ke puku yeo e bontšhago bohlatse bja gore e buduletšwe ke Modimo. (2 Timotheo 3:16) Anke re boneng seo puku yeo, e lego Beibele, e se bolelago mabapi le seo bomoya bo se bolelago le bohlokwa bja bjona.