Tumelo ya Mma e Fenya Masetlapelo

“Ge e le gore le bala lengwalo le, seo se bolela gore go buiwa ga-ka ga se gwa atlega le gore ga ke sa phela.”

A KE matseno a lengwalo leo le ngwadilwego ke Carmen, e lego mma wa Mokriste, leo le yago go barwedi ba gagwe ba bararo ba nywaga e 25, 19 le 16. Bjalo ka ge go diregile, go buiwa ga gagwe ga se gwa atlega gomme ka maswabi, Carmen o ile a hwa.

Go swanelwa ke go tlogela barwedi ba bararo ka tlase ga maemo a bjalo a hlomolago pelo go tloga go nyamiša e le ruri. Lega go le bjalo, tumelo ya mma yo dikholofetšong tša Jehofa e fentše masetlapelo e le ka kgonthe ka ge e ile ya mo nea khutšo ya monagano yeo e bego e le molaleng lengwalong la gagwe le le kgomago pelo. Ela hloko seo a se boditšego barwedi ba gagwe.

“Sa pele, ke rata go le botša gore ke le rata ka pelo ya-ka ka moka. . . . Le barwedi ba babotse kudu gomme ke ikgantšha ka lena.

“Ke be ke ratile gore ke tšwele pele ke e-na le lena go fihla lefaseng le lefsa la Modimo le le holofeditšwego . . . , eupša ka ge go sa kgonagale, ke mo kgopetše gore a le thuše gore le botege bjalo ka ge le le bjalo. Re kgotleletše diteko tše dintši gotee gomme Jehofa ga se a ka a re lahla le ka mohla. . . . Ka gona, tšwelang pele le bota tlhahlo yeo a e neago ka mokgatlo wa gagwe gomme le tšwele pele le thekga phuthego le bagolo. Dirang boboledi nako le nako ge le kgona gomme le rate bana babo rena ka moka.

“Go kgaogana ga rena e tla ba ga nakwana. . . . Ke kgopela gore le ntebalele diphošo ka moka tšeo ke di dirilego le dinako tšeo ka tšona ke bego ke sa le kwešiše goba ke sa kago ka le botša kamoo ke le ratago ka gona. . . . Ke a tseba gore yo mongwe le yo mongwe wa lena o na le dinyakwa tša gagwe. Jehofa o tseba seo gakaone go feta kamoo le tsebago ka gona, e bile o tla le nea dilo tšohle tšeo le di nyakago gomme o tla le putsa ka baka la dilo tšohle tšeo le di kgotleletšego.

“Le se ke la lebala pakane ya lena—bophelo lefaseng le lefsa—gomme le tšweleng pele le katanela go e fihlelela. Eka Jehofa a ka le šegofatša le go le matlafatša e le gore le ka botega go fihla bofelong. . . . Le se ke la nyama barwedi ba-ka ba rategago. Ke a le rata!”

Masetlapelo a ka wela motho le ge e le ofe ka nako le ge e le efe. Kgoši Salomo wa bogologolo o ngwadile gore: “Nako le ditiragalo tše di sa letelwago di ba wela bohle.” (Mmoledi 9:11, NW) Lega go le bjalo, bao ba nago le tumelo e tiilego go Modimo, ba ka kgodišega go swana le moapostola Paulo yo a itšego: “Ke kgodišegile gore le ge e le lehu goba bophelo . . . goba sebopiwa le ge e le sefe se sengwe di ka se kgone go re aroganya le lerato la Modimo leo le lego go Kriste Jesu Morena wa rena.”—Baroma 8:38, 39; Baheberu 6:10.