Jehofa ke Morati wa Toka

“Nna Morêna ke rata tokô.”—JESAYA 61:8

1, 2. (a) Mantšu “toka” le “go hloka toka” a ra go re’ng? (b) Beibele e re’ng ka Jehofa le ka seka sa gagwe sa toka?

TOKA e hlaloswa e le ‘seka sa go ba yo a sa bebego sefahlego, yo a se nago kgethollo, yo a dirago dilo ka go dumelelana le boitshwaro bjo bo lokilego le bjo bobotse.’ Go hloka toka go akaretša go ba yo a kgethollago, yo a bebago sefahlego, yo mobe, yo a gobatšago batho ba bangwe go sa swanela.

² Moo e nyakilego go ba nywaga e 3 500 e fetilego, Moše o ngwadile mabapi le Mmuši wa Legohle, e lego Jehofa gore: “Ditsela tša gagwe ka moka ke toka. Modimo wa potego, yoo go yena go se nago go hloka toka.” (Doiteronomio 32:4, NW) Ka morago ga nywaga-kgolo ya ka godimo ga e šupago, Modimo o ile a budulela Jesaya go ngwala mantšu a: “Nna Morêna ke rata tokô.” (Jesaya 61:8) Ke moka lekgolong la pele la nywaga, Paulo o ile a re: “Na go na le go hloka toka go Modimo? Anke go se be bjalo le gatee!” (Baroma 9:14) Gomme lekgolong lona leo la nywaga, Petro o ile a bolela gore: “Modimo ga a bebe sefahlego, eupša setšhabeng se sengwe le se sengwe motho yo a mmoifago gomme a dira go loka o a amogelega go yena.” (Ditiro 10:34, 35) Ee, “Morêna ó rata tša tokô.”—Psalme 37:28; Maleaki 3:6.

Go Hloka Toka go a Oketšega

3. Go hloka toka go thomile bjang mo lefaseng?

³ Toka ga se seka seo se lego gona lehono. Re ka ba bahlaselwa ba ditiro tša go hloka toka maemong le ge e le afe a setšhaba—lefelong la rena la mošomo, sekolong, ditirišanong tša rena le balaodi, le ka ditsela tše dingwe—gaešita le ka gae. Ke therešo gore go hloka toka mo go bjalo ga go thome lehono. Go wetše lapa la motho ge batswadi ba rena ba pele ba be ba rabela gomme ba e-ba ba hlokago molao, e le ge ba be ba tutueleditšwe ke sephedi sa moya sa lerabele seo se ilego sa fetoga Sathane Diabolo. Ruri Adama, Efa le Sathane ba bontšhitše go hloka toka ge ba be ba diriša gampe mpho e kgahlišago ya tokologo ya boikgethelo yeo Jehofa a bego a ba file yona. Ditiro tša bona tše di fošagetšego di be di tla feleletša ka go dira gore lapa ka moka la motho le tlaišege o šoro le go hwa.—Genesi 3:1-6; Baroma 5:12; Baheberu 2:14.

4. Go hloka toka go na le nako e kae e le karolo ya histori ya motho?

⁴ Nywaga e ka bago e 6 000 ga e sa le go tloga borabeleng bja kua Edene, go hloka toka go ile gwa dula go le gona bathong. Se ruri se swanetše go ba gona ka gobane Sathane ke modimo wa lefase le. (2 Bakorinthe 4:4) Ke moaketši e bile ke tatago maaka, ke mothomeletši e bile ke moganetši wa Jehofa. (Johane 8:44) O dula a dira ditiro tše šoro tša go hloka toka. Ka mohlala, bonyenyane ka baka la tutuetšo e mpe ya Sathane pele ga Meetse-fula a mehleng ya Noa, Modimo o ile a lemoga gore “bokxôpô bya batho bò xodile mo lefaseng, le tirô ka moka tša diakanyô tša dipelô tša bôná è le bobe fêla ka mehla.” (Genesi 6:5) Boemo bjo bjalo bo be bo sa dutše bo le gona le mehleng ya Jesu. O itše: “Letšatši le lengwe le le lengwe le lekanwe ke bošula bja lona,” e lego seo se rago gore mathata a lona a gateletšago, a bjalo ka go hloka toka. (Mateo 6:34) Beibele e bolela ka mo go nepagetšego gore: “Tlholo yohle e tšwela pele e tsetsela gotee gomme e e-kwa bohloko gotee go fihla bjale.”—Baroma 8:22.

5. Ke ka baka la’ng go e-na le go hloka toka mo gontši mo mehleng ya rena go feta le ge e le neng pele?

⁵ Ka baka leo, dilo tše mpe tšeo di feleletšago ka go hloka toka mo gošoro di be di dutše di direga historing ka moka ya batho. Gona bjale boemo bo mpefetše le go feta. Ka baka la’ng? Ka baka la gore tshepedišo ye ya gona bjale ya dilo yeo e sa bontšhego go boifa Modimo e bile “mehleng ya bofelo” ka nywaga-some  e mentši, gomme e e-na le “dinako tše di hlobaetšago tšeo go lego thata go lebeletšana le tšona” ge e dutše e batamela bofelo bja yona. Beibele e boletše e sa le pele gore mo nakong ye ya histori, batho e tla ba “baithati, barati ba tšhelete, ba go ipona, ba ikgogomošago, barogaki, . . . ba go se leboge, ba go se botege, ba ba se nago maikwelo a borutho a tlhago, ba ba sa ikemišetšago go amogela tumelelano le ge e le efe, bathomeletši, ba se nago boitshwaro, ba bogale, ba go se rate go loka, baeki, ba hlogo-thata, ba tletšego boikgantšho.” (2 Timotheo 3:1-5) Mekgwa e mebe e swanago le ye e lebiša ditirong tša go hloka toka tša mehuta ka moka.

6, 7. Ke go hloka toka gofe mo gogolo moo go tlaišitšego moloko wa batho mehleng ye ya rena?

⁶ Nywaga e lekgolo e fetilego e be e tletše ka go hloka toka mo gogolo kudu moo go sa kago gwa bonwa. Lebaka le lengwe ke gore nywaga yeo e be e tletše ka dintwa. Ka mohlala, bo-radihistori ba bangwe ba akanyetša gore Ntweng ya II ya Lefase e nnoši, go hwile palo-moka ya batho ba ka tlogago go ba ka bago ba dimilione tše 50 go ya go tše 60, bao bontši bja bona e lego badudi—banna, basadi le bana ba se nago molato. Ga e sa le go tloga mola ntwa yeo e felago, ba bangwe ba dimilione ba bolailwe dintweng tše di fapa-fapanego, moo le gona batho ba bantši bao ba bolawago e lego badudi. Sathane o godiša go hloka toka mo go bjalo ka gobane a befetšwe kudu, ka ge a tseba gore kgaufsinyane Jehofa o tla mo fedišetša sa ruri. Boporofeta bja Beibele bo bea taba ka tsela ye: “Diabolo o theogetše go lena a galefile kudu, ka ge a tseba gore o na le nako e kopana.”—Kutollo 12:12.

⁷ Ditshenyagalelo tša tša bohlabani tša lefase ka bophara gona bjale di dira tšhelete e ka bago diranta tše dimilione tše dikete tše 7,4 ngwaga o mongwe le o mongwe. Batho ba dimilione tše makgolo ga ba na dinyakwa tša bophelo, ka gona nagana ka botse bjoo tšhelete yeo ka moka e bego e ka bo dira ge nkabe e be e dirišetšwa dilo tše di nago le khutšo. Batho ba ka bago dimilione tše sekete ga ba na sa go iša ka maleng, mola ba bangwe ba e-na le motlalo wa  dijo. Go ya ka mothopo wa Ditšhaba tše Kopanego, bana ba ka bago ba dimilione tše tlhano ba hwa ngwaga o mongwe le o mongwe ka baka la tlala. A go hloka toka mo gokaakang! Le gona ela hloko gape batho ba hlokago molato bao ba bolawago ka go ntšhwa ga dimpa. Go akanyetšwa gore ke ba dimilione tše di tlogago go tše 40 go ya go tše 60 lefaseng ka bophara ngwaga o mongwe le o mongwe! A go hloka toka mo go tšhošago gakaakang!

8. Ke tsela efe feela yeo e ka tlišetšago moloko wa batho toka?

⁸ Babuši ba batho ga ba kgone go hwetša tharollo ya mathata a magolo ao a tlaišago moloko wa batho lehono; le gona boemo bo ka se ke bja kaonefala ka baka la maiteko a batho. Lentšu la Modimo le boletše e sa le pele gore mo mehleng ya rena “batho ba kgopo le baikgakanyi ba tla fetelela ka bobe, ba aroša e bile ba arošwa.” (2 Timotheo 3:13) Go hloka toka e tloga e le karolo ya bophelo bja ka mehla moo e lego gore batho ba ka se kgone go go tloša. Ke Modimo wa toka feela yoo a ka go fedišago. Ke yena feela yoo a ka fedišago Sathane, batemona gotee le batho ba kgopo.—Jeremia 10:23, 24.

Go Tshwenyega mo go Kwešišegago

9, 10. Ke ka baka la’ng Asafa a ile a se sa ba mafolofolo moyeng?

⁹ Nakong e fetilego, gaešita le bangwadi ba bangwe ba Beibele ba ile ba ipotšiša gore ke ka baka la eng Modimo a se a hlwa a tsena ditaba tša batho gare le go tliša toka ya kgonthe le toko. Ela hloko mohlala wa monna yo mongwe wa mehleng ya Beibele. Mantšu a ketapele a Psalme 73 a bontšha leina Asafa, e le ge mohlomongwe a šupa go rammino yo a tumilego wa Molefi wa nakong ya pušo ya Kgoši Dafida goba bo-rammino ba moloko woo Asafa e bego e le hlogo ya wona. Asafa le ditlogolo tša gagwe ba ile ba ngwala dikopelo tše dintši tšeo di bego di dirišwa borapeding bja phatlalatša. Lega go le bjalo, lebakeng le lengwe bophelong bja gagwe, mongwadi wa psalme ye o ile a se sa ba mafolofolo moyeng. O ile a bona bakgopo ba atlega  ka dilo tše di bonagalago, a ba a bona le gore gantši ba bonagala ba kgotsofalela maphelo a bona, le gore ba be ba sa be le ditla-morago tše šoro.

¹⁰ Re bala gore: “Ke pelokxolêla baipoti, kè bôna ba babe bà dula bà thabile. Xa ba na se se ba tlêmaxo; ’me mebele ya bôná e tiile, e nonne. ’Thswenyêxô tša batho ba bangwê xo bôná xa di’o; xa ba ôtlwe byalo ka ba bangwê.” (Psalme 73:2-8) Lega go le bjalo, ge nako e dutše e e-ya mongwadi yoo wa Beibele o ile a lemoga gore pono e bjalo e sa swanelago ke e fošagetšego. (Psalme 73:15, 16) Mopsalme o ile a leka go lokiša kgopolo ya gagwe, eupša o be a sa kwešiše ka mo go feletšego lebaka leo ka lona bakgopo ba bego ba bonagala ba tšwela pele ba dira bokgopo ntle le kotlo mola bao ba sekametšego go lokeng gantši ba tlaišega.

11. Mopsalme Asafa o ile a feleletša a kwešiša’ng?

¹¹ Mafelelong, monna yoo yo a botegago wa bogologolo o ile a feleletša a kwešiša pheletšo ya bakgopo—gore Jehofa o be a tla feleletša ka go lokiša ditaba. (Psalme 73:17-19) Dafida o ngwadile gore: “Letêla Morêna, O swarê ka tsela ya xaxwe, a Xo xodišê O bê mong wa naxa; O bônê xe babe ba lôba.”—Psalme 37:9, 11, 34.

12. (a) Morero wa Jehofa ka bokgopo le go hloka toka ke ofe? (b) Wena o ikwa bjang ka tharollo yeo ya bothata bja go hloka toka?

¹² Ka kgonthe, ke morero wa Jehofa go fediša bokgopo gotee le ditiro tša go hloka toka tšeo di sepedišanago le bjona mo lefaseng ka nako ya gagwe e swanetšego. Se ke selo seo gaešita le Bakriste bao ba botegago ka go se kwanantšhe ba swanetšego go dula ba ikgopotša sona. Jehofa o tla fediša bao ba ganetšanago le thato ya gagwe, gomme o tla putsa bao ba phelago ka go dumelelana le yona. “Mahlô a xaxwe a a bôna; dintaka tša xaxwe di šetša bana ba batho. Morêna ó šetša ba ba lokilexo le ba babe; xomme ó hloile ba ba rataxo bosenyi. Ó tlo ba nešetša pula ya maxala; mollô le thsêbêla, le ledimo la xo fiša . . . Xobane Morêna xa a bebe sefahloxô, ó rata tša xo loka.”—Psalme 11:4-7.

Lefase le Lefsa la Toka

13, 14. Ke ka baka la’ng toko le toka di tla ba gona lefaseng le lefsa?

¹³ Ge Jehofa a fediša tshepedišo ye ya go hloka toka ya dilo yeo e lego ka tlase ga taolo ya Sathane, O tla tšweletša lefase le lefsa la letago. Le tla laolwa ke Mmušo wa Modimo wa legodimong, woo Jesu a rutilego barutiwa ba gagwe gore ba o rapelele. Bokgopo le go hloka toka di tla tšeelwa legato ke toko le toka, ka gobane ka nako yeo thapelo e tla be e arabja ka kgopolo e feletšego: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.”—Mateo 6:10.

¹⁴ Beibele e re botša ka mohuta wa mmušo woo re ka lebelelago pele go wona, mmušo woo gona bjale batho ka moka ba dipelo tše di lokilego ba o hlologetšego. Ka nako yeo, Psalme 145:16 e tla phethagala ka mo go feletšego: “O [Jehofa Modimo] khupurolla ’atla sa xaxo, ’me ka moka tše di phelaxo O di horiša lethabô.” Go oketša moo, Jesaya 32:1 e re: “Tsebang! Xo tlo bewa kxoši [Kriste Jesu legodimong] ya xo buša ka xo loka, ya bakxôma [baemedi ba Kriste ba lefaseng] ba moahlolêlô wo o lokilexo.” Jesaya 9:6 e bolela e sa le pele mabapi le Kgoši Jesu Kriste gore: “Mmušô wó ké wa kênêlô, wa khutšô ye e sa felexo mo sedulong sa Dafida le mmušong wa xaxwe, ké wa xo tlo tía, le wa xo thêkxwa ka molaô le ka tokô, byale le mehleng ya neng le neng. Tšeo di tlo dirwa ke xo pelofala xa Morêna wa mašaba.” Na o kgona go ipona o phela ka tlase ga bobuši bjo bjalo bja toko?

15. Ke’ng seo Jehofa a tlago go se direla moloko wa batho lefaseng le lefsa?

¹⁵ Lefaseng le lefsa la Modimo, re ka se sa hlwa re e-ba le lebaka la go bolela mantšu a lego go Mmoledi 4:1 a rego: “Ka buša ka bôna  mehlakô ka moka e hlakišaxo batho fá tlase xa letšatši. Ka bôna mexôkxô ya bahlaki, bà se n’e mohomotši. Ka bôna bahlakiši ba bôná bà na le matla, bôná bà se n’e mohomotši.” Ke therešo gore ka menagano ya rena e sa phethagalago, re thatafalelwa ke go akanya ka mokgwa woo go tlago go kgahliša ka gona moo lefaseng leo le lefsa la toko. Bobe bo ka se hlwe bo e-ba gona; go e na le moo, letšatši le lengwe le le lengwe le tla tlala ka dilo tše dibotse. Ee, Jehofa o tla phošolla dilo ka moka tšeo di fošagetšego, a dira bjalo ka tsela yeo re sa kago ra nagana ka yona. Ke mo go swanetšego gakaakang gore Jehofa Modimo o buduletše moapostola Petro go ngwala gore: “Go na le magodimo a mafsa le lefase le lefsa tše re di letetšego go ya ka kholofetšo ya gagwe, gomme toko e tla aga go tšona.”—2 Petro 3:13.

16. “Magodimo a mafsa “ a hlomilwe bjang, gomme “lefase le lefsa” le rulaganywa bjang lehono?

¹⁶ Ee, ‘magodimo ao a mafsa,’ e lego mmušo wa Modimo wa legodimong woo o dirišwago ke Kriste, a šetše a hlomilwe. Bao ba tlago go ba motheo wa lekoko la “lefase le lefsa” la batho bao ba sekametšego go lokeng, ba dutše ba kgoboketšwa mo mehleng ya bofelo. Ba šetše ba bopša ke batho ba nyakilego go ba ba dimilione tše šupago, dinageng tše ka bago tše 235 le diphuthegong tše ka bago tše 100 000. Ba ba dimilione ba be ba dutše ba ithuta ka toko le tsela ya Jehofa ya toka, gomme ka baka la seo, ba thabela botee bja lefase ka bophara bjoo bo theilwego leratong la Bokriste. Botee bja bona bo tsebja kudu e bile bo bile gona ka nako e telele historing ya lefase, botee bjoo bo fetago kgole selo le ge e le sefe seo balata ba Sathane ba nago le sona. Lerato le bjalo le botee di fo ba di bonagatša seo se tlago go direga nakong e kgahlišago kudu lefaseng le lefsa la Modimo, leo go lona go tla bego go e-na le toko le toka.—Jesaya 2:2-4; Johane 13:34, 35; Bakolose 3:14.

Tlhaselo ya Sathane e tla Folotša

17. Ke ka baka la’ng tlhaselo ya mafelelo ya Sathane go batho ba Jehofa e tla folotša e le ruri?

¹⁷ Go se go ye kae Sathane le balatedi ba gagwe ba tla hlasela barapedi ba Jehofa ka maiteko a go ba fediša. (Hesekiele 38:14-23) Seo e tla ba karolo ya seo Jesu a ilego a se bitša “masetlapelo a magolo a sa kago a ba gona ga e sa le go tloga mathomong a lefase go ba go fihla gona bjale, aowa, le go ba gona a ka se sa ba gona gape.” (Mateo 24:21) Na tlhaselo ya Sathane e tla atlega? Le gatee. Lentšu la Modimo le re kgonthišetša ka gore: “Morêna ó rata tša tokô; baxauxêlwa ba xaxwe xa’ ba lahle; ó tlo ba lôtôla neng le neng. Ba ba lôbaxo ké peu ya babe. Baloki e ba beng ba naxa, ba dula mo xo yôna ka mehla le ka mehla.”—Psalme 37:28, 29.

18. (a) Modimo o tla arabela bjang tlhaselong e tlago ya Sathane kgahlanong le batho ba Gagwe? (b) Ke ka baka la’ng o holwa ke go hlahloba tsebišo ye yeo e theilwego Beibeleng ya mabapi le phenyo ya toka?

¹⁸ Tlhaselo ya Sathane le lekoko la gagwe kgahlanong le bahlanka ba Jehofa e tla ba thogako ya mafelelo. Jehofa o boletše e sa le pele ka Sakaria gore: “Yo a kgwathišago lena, o kgwathiša thaka ya leihlo [la-ka].” (Sakaria 2:8, PK) Go bjalo ka ge eka yo mongwe o kgwatha thaka ya leihlo la Jehofa ka monwana. O tla arabela le semeetseng gomme a fediša badirabobe. Bahlanka ba Jehofa ke batho bao ba tlogago ba e-na le lerato, botee, ba nago le khutšo e bile ba kwa molao mo lefaseng. Ka gona tlhaselo yeo ya go ba hlasela e tla tloga e sa ba swanele, e le go hloka toka ruri. ‘Morati yo mogolo wa toko’ a ka se kgotlelele seo. Go gata ga gagwe mogato bakeng sa bona go tla feleletša ka phedišo ya sa ruri ya manaba a batho ba gagwe, ka phenyo ya toka le ka phološo ya bao ba rapelago Modimo a nnoši wa therešo. A ditiragalo tše makatšago le tše imollago gakaakang tšeo di letšego ka pele!—Diema 2:21, 22.

O be o tla Araba Bjang?

• Ke ka baka la’ng go hloka toka go tletše gakaakaa?

• Jehofa o tla rarolla bjang bothata bja go hloka toka mo lefaseng?

• Ke’ng seo se go kgahlilego mo thutong ye mabapi le phenyo ya toka?

[Dipotšišo tša Thuto]

[Seswantšho go letlakala 23]

Bobe bo be bo aparetše pele ga Meetse-fula gomme bo a gola mo “mehleng ya bofelo”

[Seswantšho go letlakala 24]

Lefaseng le lefsa la Modimo, toka le toko di tla tšeela bokgopo legato