Re ka Holwa ke go Kgotlelela Tlaišego
Re ka Holwa ke go Kgotlelela Tlaišego
“Bao ba kgotleletšego re re ba thabile.”—JAKOBO 5:11.
1, 2. Ke’ng seo se bontšhago gore Jehofa o be a se a rera gore motho a tlaišege?
GA GO motho yo a tšeago gabotse yo a nyakago go tlaišega; e bile Mmopi wa rena, Jehofa Modimo, ga a nyake gore batho ba tlaišege. Se re ka se bona ge re hlahloba Lentšu la gagwe le le buduletšwego le go ela hloko seo se ilego sa direga ka morago ga go bopa ga gagwe monna le mosadi. Sa pele, Modimo o dirile monna. “Morêna Modimo a na a bopa motho, lerole la mmu; mo dinkong tša xaxwe a budulêla môya wa bophelô, motho a napa a ba môya o phelaxo.” (Genesi 2:7) Adama o be a phethagetše mmeleng le monaganong, le gona o be a ka se babje goba go hwa.
2 Go thwe’ng ka maemo a Adama a bophelo? “Morêna Modimo a dira thšemo ya Edene thokô ya Bohlabêla, ’me motho yo a mmopilexo a mmea xôna-moo. Morêna Modimo a mediša dihlare tšohle tše di kxahlišaxo xe di bônwa, tše bose xe di lewa; a di mediša mo mmung.” (Genesi 2:8, 9) Ee, Adama o be a e-na le legae le le kgahlišago kudu. Go be go se na tlaišego kua Edene.
3. Balekane ba mathomo ba batho ba be ba e-na le ditebelelo dife?
3 Genesi 2:18 e re botša gore: “Morêna Modimo a re: Xa xo botse xe motho a le nnoši; ke tlo mo dirêla modiriši e a mo lebanexo.” Jehofa o ile a bopela Adama mosadi yo a phethagetšego, a dira gore tebelelo ya go ba le bophelo bja lapa bjo bo nago le lethabo e kgonege. (Genesi 2:21-23) Beibele e tšwela pele go re botša gore: “Modimo a ba šexofatša, a bolêla le bôná a re: Tswalang Le atê, tlalang lefase, Le le fenyê.” (Genesi 1:28) Balekane ba pele ba be ba tla ba le tokelo e kgahlišago ya go katološa Paradeise ya Edene go ba go fihlela e aparetša lefase, go e dira paradeise ya lefase ka moka. Ke moka ba be ba tla ba le bana ba ba thabilego, bao ba bego ba ka se tlaišege. A mathomo a kgahlišago gakaakang!—Genesi 1:31.
Tlaišego e a Thoma
4. Go ya ka histori, ke’ng seo se lego molaleng ka moloko wa batho?
4 Lega go le bjalo, ge re lebelela boemo bja batho historing ka moka ya lapa la motho, go molaleng gore go na le moo go senyegilego gona. Dilo tše mpe di ile tša direga gomme lapa la motho le ile la tlaišega kudu. Go theoša le nywaga-kgolo, ditlogolo tša Adama le Efa ka moka di be di babja, di tšofala e bile di feleletša ka go hwa. Lefase le ganyenyane e tloga e se paradeise yeo e tletšego ka batho ba thabilego. Boemo bo hlalositšwe ka mo go nepagetšego go Baroma 8:22 ka gore: “Tlholo yohle e tšwela pele e tsetsela gotee gomme e e-kwa bohloko gotee go fihla bjale.”
5. Batswadi ba rena ba pele ba ile ba akaretšwa bjang go direng gore lapa la batho le thome go tlaišega?
5 Jehofa ga a swanela go solwa bakeng sa tlaišego e mpe ka tsela ye yeo e bilego gona go ba go fihla ga bjale. (2 Samuele 22:31) Batho ba swanetše go solwa ka tsela e itšego. “Ba dira tše di befilexo, tša bolaloxi.” (Psalme 14:1) Batswadi ba rena ba pele ba neilwe dilo ka moka e le tše dibotse mathomong. Seo ba bego ba swanetše go se dira gore ba tšwele pele e be e le gore ba kwe Modimo, eupša Adama le Efa ba ile ba kgetha go se bušwe ke Jehofa. Ka ge batswadi ba rena ba pele ba be ba hlanogetše Jehofa, ba be ba ka se sa hlwa ba phethagetše. Ba be ba tla gwahlafala go ba go fihlela ba e-hwa. Go se phethagale go ile gwa fetišetšwa go rena.—Genesi 3:17-19; Baroma 5:12.
6. Sathane o kgathile tema efe go direng gore go be le tlaišego?
6 Yo mongwe gape yoo a akaretšwago mathomong a tlaišego ka moka ke sebopiwa sa moya se ilego sa tla sa bitšwa Sathane Diabolo. O be a filwe tokologo ya boikgethelo. Lega go le bjalo, o ile a diriša bokgoni bjoo gampe ka maiteko a go hwetša borapedi. Eupša, ke Jehofa feela yoo a swanetšego go rapelwa, e sego tlholo ya gagwe. Sathane ke yena yoo a ilego a šušumeletša Adama le Efa go tsoma tsela ya go se bušwe ke Jehofa, tše e kego ba be ba tla “ba byalo ka Modimo, [ba] tseba botse le bobe.”—Genesi 3:5.
Ke Jehofa Feela yo a Nago le Tshwanelo ya go Buša
7. Mafelelo a borabele kgahlanong le Jehofa a bontšha’ng?
7 Ditla-morago tše mpe tša borabele di bontšha gore ke Jehofa feela, bjalo ka Mmuši wa Legohle, yoo a nago le tshwanelo ya go buša le gore pušo ya gagwe ke yona feela e lokilego. Nywaga-kete e fetilego e bontšhitše gore Sathane, yoo a bilego “mmuši wa lefase le,” o hlomile pušo e kgopo, e se nago toka le e šoro yeo e tlogago e sa kgotsofatše. (Johane 12:31) Pušo ya batho yeo e lego kgale e le gona le e nyamišago e lego ka tlase ga taolo ya Sathane le yona e bontšhitše gore ga ba na bokgoni bja go buša ka toko. (Jeremia 10:23) Ka go rialo, mohuta o mongwe le o mongwe wa pušo woo batho ba ka naganago ka wona ntle le wa Jehofa o tla no folotša. Histori e hlatsetše gore se ke therešo.
8. Morero wa Jehofa ke ofe ka mehuta ka moka ya mebušo ya batho, gomme o tla phethagatša morero woo bjang?
8 Bjalo ka ge Jehofa a dumeletše batho go leka go ipuša ntle le yena ka nywaga e dikete, o na le lebaka la go fediša dipušo tše bjalo mo lefaseng le go dira gore Mmušo wa gagwe o e tšeele legato. Boporofeta bja mabapi le se bo re: “Mehleng ya dikxoši tšeo [mebušo ya batho], ké mo Modimo a tl’o xo tsoša mmušô [mmušo wa gagwe wa legodimong ka diatleng tša Kriste] wo o ka se kexo wa šwalalanywa neng le neng, . . . O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.” (Daniele 2:44) Mmušo wa batemona le wa batho o tla fedišwa, gomme Mmušo wa Modimo ke wona feela woo o tlago go ba gona le go buša lefase. Kriste o tla ba Kgoši gomme o tla ba le babuši-gotee ba 144 000 bao e lego batho ba botegago bao ba tšerwego lefaseng.—Kutollo 14:1.
Go Holwa ke Tlaišego
9, 10. Jesu o ile a holwa bjang ke dilo tšeo a tlaišegilego ka tšona?
9 Ke mo go kgahlišago go hlahloba ditshwanelego tša bao ba tlago go buša Mmušong wa legodimong. Sa pele, Kriste Jesu o bontšhitše kamoo a swanelegago gabotse ka gona bakeng sa karolo ya gagwe bjalo ka Kgoši. O feditše nako e sa tsebjego a e-na le Jehofa a dira thato ya Tatagwe, bjalo ka “mohlankana w’axwe.” (Diema 8:22-31) Ge Jehofa a be a rulaganya gore a tle lefaseng, Jesu o ile a dira bjalo ka go rata. Ge a le mo o ile a lebiša tlhokomelo go botšeng ba bangwe ka bogoši le Mmušo wa Jehofa. Ka moka ga rena Jesu o re beetše mohlala o mobotse kudu ka go ikokobeletša bobuši bjoo ka mo go feletšego.—Mateo 4:17; 6:9.
10 Jesu o ile a tlaišwa, gomme mafelelong a bolawa. Nakong ya bodiredi bja gagwe, o ile a kgona go bona boemo bjo bo nyamišago bja batho bao ba bego ba mo dikologile. Na yena o ile a holwa ke go bona seo le ke go tlaišega? Ee. Baheberu 5:8 e re: “Gaešita le ge e be e le Morwa [wa Modimo], o ithutile go kwa dilong tšeo a tlaišegilego ka tšona.” Dilo tšeo di ilego tša diragalela Jesu ge a be a le mo lefaseng di dirile gore a be le kwešišo le kwelobohloko ka mo go oketšegilego. O ile a kwa boemo bja lapa la motho ka boyena. O ile a kgona go kwela bao ba tlaišegago bohloko e bile o be a ka kwešiša gakaone karolo ya gagwe ya go tla go ba phološa. Ela hloko kamoo moapostola Paulo a gatelelago se ka gona pukung ya Baheberu e rego: “O be a tlamegile go swana le ‘bana babo’ ka ditsela tšohle gore e be moperisita yo a phagamego yo a gaugelago le yo a botegago dilong tšeo di lego mabapi le Modimo, e le gore a nee sehlabelo sa poelanyo bakeng sa dibe tša batho. Gobane ka ge yena a ile a tlaišega ge a be a lekwa, o kgona go thuša bao ba lekwago.” “Moperisita yo a phagamego yo re nago le yena ga se yo a ka se kego a re kwela bohloko bofokoding bja rena, eupša ke yo a lekilwego ka ditsela tšohle go swana le rena, eupša a se na sebe. Ka gona, a re batameleng ka tokologo ya go bolela sedulong sa bogoši sa botho bjo bo sa swanelago, gore re hwetše kgaugelo le botho bjo bo sa swanelago e le gore re thušwe ka nako e swanetšego.”—Baheberu 2:17, 18; 4:14-16; Mateo 9:36; 11:28-30.
11. Dikgoši le baperisita ba tla holwa bjang ke phihlelo ya lefaseng bjalo ka babuši ba nakong e tlago?
11 Go ka bolelwa se se swanago ka ba 144 000, bao ba ‘rekilwego’ lefaseng gore e be babuši-gotee le Kriste Jesu Mmušong wa legodimong. (Kutollo 14:4) Ka moka ga bona ba belegwe e le batho mo lefaseng, ba gola lefaseng leo le tletšego tlaišego, gomme le bona ba tlaišega. Ba bantši ba ile ba tlaišwa, gomme ba bangwe ba ile ba ba ba bolawa ka baka la go dula ga bona ba botegela Jehofa le go ikemišetša go latela Jesu. Eupša ga se ba ka ‘ba hlabišwa dihlong ke bohlatse bjo bo lego mabapi le Morena wa bona, eupša ba kwešitšwe bohloko ka baka la ditaba tše dibotse.’ (2 Timotheo 1:8) Phihlelo ya bona ya lefaseng e ba dira gore ba swanelege kudu go ahlola lapa la batho ba le legodimong. Ba ithutile go ba ba kwelago bohloko ka mo go oketšegilego, ba botho le go fišegela go thuša batho.—Kutollo 5:10; 14:2-5; 20:6.
Lethabo la Bao ba Nago le Kholofelo ya go Phela Lefaseng
12, 13. Bao ba nago le kholofelo ya go phela lefaseng ba ka holwa bjang ke tlaišego?
12 Na tlaišego ya gona bjale e ka feleletša e hotše bao ba holofelago go phela ka mo go sa felego lefaseng la paradeise leo le se nago bolwetši, manyami le lehu? Bohloko le manyami ao a tlišwago ke tlaišego ke dilo tšeo di sa kgahlišego. Eupša ge re kgotlelela tlaišego e bjalo, dika tše dibotse di ka gola gwa ba gwa tšwelela le lethabo.
13 Ela hloko seo Lentšu le le buduletšwego la Modimo le se bolelago ka se: “Gaešita le ge e ba le tlaišetšwa toko, le a thaba.” “Ge e ba le gobošwa ka baka la leina la Kriste, le a thaba.” (1 Petro 3:14; 4:14) “Go thaba lena ge batho ba le goboša le go le tlaiša gomme ba aketša ka go bolela mohuta o mongwe le o mongwe wa selo se sebe kgahlanong le lena ka baka la-ka. Thabang le hlalaleng, ka ge moputso wa lena e le o mogolo magodimong.” (Mateo 5:11, 12) “Go thaba motho yo a tšwelago pele go kgotlelela moleko, gobane ge a amogelwa o tla hwetša mphapahlogo wa bophelo.”—Jakobo 1:12.
14. Barapedi ba Jehofa ba thabišwa ke tlaišego ka kgopolo efe?
14 Seo se re thabišago ruri ga se tlaišego ya kgonthe yeo re e kgotlelelago. Lethabo, goba yona kgotsofalo di tlišwa ke go tseba gore re tlaišega ka baka la ge re dira thato ya Jehofa le go latela mohlala wa Jesu. Ka mohlala, lekgolong la pele la nywaga, ba bangwe ba baapostola ba ile ba golegwa ke moka ba išwa kgorong ya tsheko ya Bajuda gomme ba solwa ka baka la go bolela ga bona ka Jesu Kriste. Ba ile ba itiwa gomme ba lokollwa. Boemo bja bona bja kgopolo e be e le bofe? Pego ya Beibele e re ba ile “ba tloga pele ga Sanhedrine, ba thabile gobane ba be ba tšerwe e le ba swanelwago ke go hlomphollwa ka baka la leina la gagwe.” (Ditiro 5:17-41) Ba be ba sa thabišwe ke go itiwa le bohloko bjoo ba bego ba bo kwa, eupša ba be ba thabišitšwe ke ge ba be ba kwešiša gore se se diregile ka baka la gore ba ile ba dula ba botegela Jehofa le go latela dikgato tša Jesu.—Ditiro 16:25; 2 Bakorinthe 12:10; 1 Petro 4:13.
15. Go kgotlelela ga rena tlaišego gona bjale go ka re thuša bjang nakong e tlago?
15 Ge e ba re lebeletšana le kganetšo le tlaišo ka boemo bjo bo nepagetšego bja kgopolo, bo tla aga kgotlelelo ka go rena. Se se tla re thuša go kgotlelela tlaišego nakong e tlago. Re bala gore: “Bana bešo, ge le gahlana le meleko e fapa-fapanego, le tšee se ka moka e le lethabo, bjalo ka ge le tseba gore boemo bjo bjo bo lekilwego bja tumelo ya lena bo tšweletša kgotlelelo.” (Jakobo 1:2, 3) Ka mo go swanago, Baroma 5:3-5 e re botša gore: “Anke re hlalaleng ge re le ditlaišegong, ka ge re tseba gore tlaišego e tšweletša kgotlelelo; kgotlelelo yona, e tšweletša boemo bjo bo amogelegago; boemo bjo bo amogelegago bjona, bo tšweletša kholofelo, gomme kholofelo ga e lebiše go nyamišweng.” Ka gona ge re kgotlelela diteko gona bjale ka baka la tsela ya Bokriste, ke gona ge re itlhama gakaone bakeng sa go kgotlelela diteko tše oketšegilego tshepedišong ye e kgopo ya dilo.
Jehofa o tla Putsa
16. Ke’ng seo Jehofa a tlago go se direla dikgoši le baperisita ba nakong e tlago bakeng sa ditlaišego tša bona?
16 Gaešita le ge re lahlegelwa ke dilo tše di bonagalago ka baka la kganetšo goba go tlaišwa ka baka la go kgomarela ga rena tsela ya Bokriste, re ka kgotsofatšwa ke go tseba gore Jehofa o tla re putsa ka mo go tletšego. Ka mohlala, Paulo o ngwaletše ba bangwe bao ba bego ba e-na le kholofelo ya go ya legodimong gore: “Le . . . [dumetše] go hulwa dilo tša lena le thabile, le tseba gore le na le leruo le lekaone le leo le dulago le le gona” bjalo ka babuši Mmušong wa Modimo. (Baheberu 10:34) Le gona akanya ka lethabo leo ba tlago go ba le lona ge ka tlase ga tlhahlo ya Jehofa le Kriste ba tšea karolo go abeleng badudi ba lefaseng le lefsa ditšhegofatšo tše kgahlišago. Mantšu a moapostola Paulo ao a yago go Bakriste ba botegago ke a therešo gakaakang, ge a re: “Ke tšea gore ditlaišego tša lebakeng la gona bjale ga se selo ge di bapišwa le letago leo le tlago go utollwa go rena.”—Baroma 8:18.
17. Ke’ng seo Jehofa a tlago go se direla bao ba nago le kholofelo ya go phela mo lefaseng bao ba mo hlankelago ka potego e sa kwanantšhego gona bjale?
17 Ka mo go swanago, go sa šetšwe seo bao ba nago le kholofelo ya go phela lefaseng ba ka lahlegelwago ke sona goba ba ka se gafago ka go rata ka baka la go hlankela Jehofa, o tla ba putsa kudu ka seo a tlago go se dira nakong e tlago. O tla ba fa bophelo bjo bo phethagetšego, e lego bophelo bjo sa felego lefaseng la paradeise. Moo lefaseng le lefsa, Jehofa “o tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.” (Kutollo 21:4) A kholofetšo e kgahlišago gakaakang! Ga go selo seo re ka se gafago ka go rata goba ka go se rate mo lefaseng la gona bjale bakeng sa Jehofa seo se ka lekanago le bophelo bjo bo kgahlišago bjoo bo sa tlago, bjoo a tlago go bo fa bahlanka ba gagwe ba botegago bao ba kgotlelelago tlaišo.
18. Jehofa o re fa kholofetšo efe e homotšago ka Lentšung la gagwe?
18 Tlaišego le ge e le efe yeo re ka swanelwago ke go e kgotlelela e ka se tsoge e šitišane le bophelo bjo bo sa felego bjoo re tlago go bo thabela lefaseng le lefsa la Modimo. Tlaišego yeo ka moka e tla tšeelwa legato ke maemo a kgahlišago lefaseng le lefsa. Jesaya 65:17, 18 e re botša gore: “Tša kxalê di ka se hlwê di tsebywa, le mo pelong ya motho di ka se hlwê di rotoxa. ’Me lena hlalalang Le fêlê Lè thabêla tše Nna ke tl’o xo di hlôla.” Ka baka leo, ngwanabo Jesu ka motswadi o tee e lego Jakobo o boletše ka mo go swanetšego gore: “Bao ba kgotleletšego re re ba thabile.” (Jakobo 5:11) Ee, ge e ba re kgotlelela tlaišego ya gona bjale ka potego, re ka holega gona bjale le nakong e tlago.
O be o tla Araba Bjang?
• Tlaišego e tlile bjang bathong?
• Tlaišego e ka hola bjang babuši le badudi ba lefaseng ba nakong e tlago?
• Ke ka baka la’ng re ka thaba gona bjale go sa šetšwe tlaišego?
[Dipotšišo tša Thuto]
[Caption on page 27]
Batswadi ba rena ba pele ba be ba letetšwe ke bokamoso bjo bo kgahlišago
[Seswantšho go letlakala 29]
Go tlaišega go thušitše Jesu ka go mo lokišeletša go ba Kgoši le Moperisita yo Mogolo yo mobotse
[Seswantšho go letlakala 31]
Baapostola ba ile ba ‘thabela gore ba be ba tšewa e le ba swanelwago ke go hlomphollwa ka baka la tumelo ya bona’