Batswadi—Tlwaetšang Bana ba Lena ka Lerato

“Ditaba tša lena ka moka di direge ka lerato.”—1 BAKORINTHE 16:14.

1. Ke maikwelo afe ao batswadi ba bago le wona ge ngwana a belegwa?

BATSWADI ba bantši ba ka dumela gore go belegwa ga ngwana e ka ba e nngwe ya ditiragalo tše di kgahlišago kudu bophelong. Mma yo a bitšwago Aleah o re: “Ge ke be ke thoma go bona lesea la-ka la ngwanenyana, ke ile ka thaba kudu. Ke be ke nagana gore ke ngwana yo mobotse kudu yo ke ilego ka mmona.” Lega go bjalo, maemo a bjalo a thabišago a ka tsošetša batswadi dipelaelo. Monna wa Aleah o re: “Ke be ke tshwenywa ke taba ya ge e ba ke tla kgona go hlahla morwedi wa-ka gore a kgone go lebeletšana le diteko tša bophelo.” Batswadi ba bantši ba na le maikwelo a bjalo gomme ba lemoga bohlokwa bja go tlwaetša bana ba bona ka lerato. Lega go le bjalo, batswadi ba Bakriste bao ba nyakago go tlwaetša bana ba bona ka lerato ba lebana le mathata. A mangwe a mathata ao ke afe?

2. Batswadi ba lebeletšana le ditlhohlo dife?

² Ga bjale re phela gare-gare nakong ya bofelo bja tshepedišo ye ya dilo. Ka ge go boletšwe e sa le pele, lefase leo re phelago go lona le tletše ka batho bao ba sa bontšhego lerato. Gaešita le gare ga ditho tša lapa, batho ba ipontšha “ba se na maikwelo a borutho a tlhago” gomme ba fetogile “ba go se leboge, ba go se botege, . . . ba se nago boitshwaro [le] ba bogale.” (2 Timotheo 3:1-5) Go kopana ka mehla le batho ba bontšhago dika tše bjalo go ka tutuetša tsela yeo ditho tša malapa a Bakriste di swaranago ka yona. Go oketša moo, batswadi ba katanela go lwantšhana le tshekamelo yeo ba e abetšego ya go galefa, go bolela mantšu a kwešago bohloko ba se ba ikemišetša le go palelwa ke go dira phetho e bohlale ka dinako tše dingwe.—Baroma 3:23; Jakobo 3:2, 8, 9.

3. Batswadi ba ka godiša bana ba thabilego bjang?

³ Go sa šetšwe ditlhohlo tše, batswadi ba ka godiša bana ba thabilego le bao ba ratago Modimo. Bjang? Ka go latela keletšo ya Beibele e rego: “Ditaba tša lena ka moka di direge ka lerato.” (1 Bakorinthe 16:14) Ka kgonthe, lerato ke “setlemo se se phethagetšego sa botee.” (Bakolose 3:14) Anke re hlahlobeng dika tše tharo tša lerato, tšeo moapostola Paulo a di hlalositšego ka lengwalong la gagwe la pele leo le yago go Bakorinthe le go ahla-ahla ditsela tšeo batswadi ba ka dirišago seka se ge ba tlwaetša bana ba bona.—1 Bakorinthe 13:4-8.

Batswadi ba Swanetše go Bontšha Bopelotelele

4. Ke ka baka la’ng batswadi ba swanetše go bontšha bopelotelele?

⁴ Paulo o ngwadile gore: “Lerato le  na le bopelotelele.” (1 Bakorinthe 13:4) Polelwana ya Segerika yeo e fetoletšwego e le “bopelotelele” e bolela go se fele pelo le go diega go galefa. Ke ka baka la’ng batswadi ba swanetše go ba le bopelotelele? Ga go pelaelo gore batswadi ba bantši ba ka ba le mabaka a mantši. Ela hloko a mmalwa. Gantši bana ba dula ba kgopela dilo tšeo ba di nyakago. Le ge batswadi ba ka gana, ngwana a ka kgopela leboelela, a holofela gore o tla hwetša karabo yeo e fapanago le ya pele. Bafsa ba lego mahlalagading ba ka nyaka go nea mabaka a mantši a gore ba dumelelwe go dira selo seo batswadi ba bona ba tsebago gore ke sa bošilo. (Diema 22:15) Le gona go swana le rena ka moka, bana ba na le tshekamelo ya go bušeletša diphošo tša bona.—Psalme 130:3.

5. Batswadi ba ka thušwa ke’ng gore ba be le bopelotelele?

⁵ Ke’ng seo se ka thušago batswadi gore ba bontšhe bopelotelele gomme ba se felele bana ba bona pelo? Kgoši Salomo o ngwadile gore: “Molemoxi xa a na sebefedi.” (Diema 19:11) Batswadi ba lemoga boitshwaro bja bana ba bona ka ge ba gopola gore le bona ka nako e nngwe ba kile ba ‘bolela bjalo ka bana, ba nagana bjalo ka bana, ba eleletša bjalo ka bana.’ (1 Bakorinthe 13:11) Batswadi, na le sa gopola ge le be le tshwenya bo-mmago lena goba bo-tatago lena le nyaka gore ba le dumelele go dira dilo tša bjana? Ge le be le le bafsa bao ba lego mahlalagading, na le kile la nagana gore batswadi ba lena ba fo ba ba sa kwešiše kamoo le ikwago ka gona goba mathata a lena? Ge e ba go le bjalo, le swanetše go ba le kwešiša mabaka a bana ba lena a go itshwara ka tsela yeo ba itshwarago ka yona le a go nyaka go dula ba gopotšwa diphetho tša lena leboelela ka go se fele pelo. (Bakolose 4:6) Go bohlokwa go ela hloko gore Jehofa o boditše batswadi ba Baisiraele gore ba “tiišetšê” melao ya gagwe baneng ba bona. (Doiteronomio 6:6, 7) Lentšu la Seheberu bakeng sa “tiišetšê” le ra gore “go bušeletšwe,” “go bolelwe leboelela,” “go gatelelwe.” Se se ra gore batswadi ba ka swanelwa ke go bušeletša selo gantši pele ngwana a ka thoma go diriša melao ya Modimo. Mokgwa o swanago wa go bušeletša o nyakega gantši bakeng sa go ruta bana dithuto tše dingwe bophelong.

6. Ke ka baka la’ng motswadi yo a bontšhago bopelotelele a sa tlogelele dilo?

⁶ Lega go le bjalo, motswadi yo a bontšhago bopelotelele ga a dumelele boitaolo. Lentšu la Modimo le lemoša ka gore: “Mošemana-moipuši ó leša mm’axwe dihlong.” Ge sona seema se se bolela mabapi le go thibela ditla-morago tše bjalo se re: “Kxati le thsôlô di a hlalefiša.” (Diema 29:15) Ka dinako tše dingwe, bana ba ka nagana gore batswadi ga ba na tshwanelo ya go ba phošolla. Eupša malapa a Bakriste ga se a swanela go laolwa ka tsela ya boipušo, yeo batho ba dirago phetho ya gore ba tla bušwa goba go laolwa bjang, moo go ka thwego tsela ya batswadi ya go bea melao e ithekgile ka tumelelo ya bana. Go e na le moo, Jehofa ka ge e le Hlogo ya malapa, o nea batswadi matla a go tlwaetša le go laya bana ba bona ka lerato. (1 Bakorinthe 11:3; Baefeso 3:15; 6: 1-4) Ge e le gabotse, tayo e tswalanywa kgaufsi kudu le seka sa bobedi seo se boletšwego ke Paulo, e lego lerato.

Kamoo o ka Layago ka Lerato

7. Ke ka baka la’ng batswadi ba botho ba laya bana ba bona, gona tayo e bjalo e akaretša’ng?

⁷ Paulo o ngwadile gore “lerato le . . . botho.” (1 Bakorinthe 13:4) Batswadi bao ka kgonthe ba lego botho ba tla laya bana ba bona ka mehla. Ka go dira bjalo, ba ekiša Jehofa. Paulo o ngwadile gore: “Yo Jehofa a mo ratago o a mo laya.” Hle ela hloko gore mokgwa wa tayo wo go bolelwago ka wona ka Beibeleng ga o fo bolela feela ka go otla. O na le kgopolo ya go tlwaetša le go ruta. Morero wa tayo e bjalo ke ofe? Paulo o re, “Bao ba tlwaeditšwego ka yona e tšweletša seenywa sa khutšo, e lego toko.” (Baheberu 12:6, 11) Ge batswadi ba ruta bana ba bona ka botho go ya ka thato ya Modimo, ba ba nea sebaka sa gore e be batho ba godilego bao ba nago le khutšo le ba tsepamego. Ge  bana ba amogela “thsôlô ya Morêna,” ba a hlalefa, ba ba le tsebo gotee le temogo—dilo tše bohlokwa tšeo di phalago silifera goba gauta.—Diema 3:11-18.

8. Gantši go direga’ng ge batswadi ba palelwa ke go laya bana ba bona?

⁸ Ka lehlakoreng le lengwe, ge batswadi ba palelwa ke go laya bana ba bona, seo ga se bontšhe lerato. Jehofa o ile a budulela Salomo go ngwala gore: “Mo-hlokiša-ngwana-kxati ó mo hloile; e a mo rataxo ó tsoxêla xo mo laya.” (Diema 13:24) Bana bao ba godišitšwego ba sa laiwe ka mehla gantši ba ba majela-thoko e bile ga ba thabe. Go fapana le moo, bana ba batswadi bao ba nago le kwelobohloko eupša ba nea tayo ge go swanetše, ba hweditšwe ba šoma gabotse sekolong, ba kgona go phedišana gabotse le ba bangwe e bile ba dula ba thabile. Ka gona ke therešo gore batswadi bao ba layago bana ba bona ba bontšha gore ba a ba rata.

9. Ke’ng seo batswadi ba Bakriste ba se rutago bana ba bona, gona dinyakwa tše di swanetše go lebelelwa bjang?

⁹ Go laya bana ka tsela e botho le e lerato go akaretša’ng? Batswadi ba swanetše go botša bana ba bona ka tsela e kwešišegago seo ba se nyakago go bona. Ka mohlala, bana bao batswadi ba bona e lego Bakriste ba rutwa melao ya motheo ya Beibele go tloga boseeng, gaešita le bohlokwa bja go tšea karolo medirong e fapa-fapanego ya borapedi ba therešo. (Ekisodo 20:12-17; Mateo 22:37-40; 28:19; Baheberu 10:24, 25) Bana ba swanetše go tseba gore dinyakwa tše ga se tša swanela go robja.

10, 11. Ke ka baka la’ng batswadi ba ka theetša dikgopelo tša bana ba bona ge ba bea melao ya lapa?

¹⁰ Lega go le bjalo, ka dinako tše dingwe batswadi ba ka nyaka gore ba akaretše bana ba bona poledišanong ge ba thea melao ya lapa. Ge bafsa ba tšea karolo ge go thewa melao yeo ya lapa, ba ka ba le tshekamelo ya go e kwa. Ka mohlala, ge batswadi ba ka dira phetho ya go bea nako ya bana ya go boa gae, ba ka kgetha iri e itšego yeo bana ba swanetšego go ba ba le ka gae. Goba ba ka dumelela bana ba bona gore ba šišinye iri le gore ba hlalose lebaka la go kgetha iri yeo. Ke moka batswadi ba ka bolela iri yeo ba bonago e swanetše le go hlalosa lebaka leo ba bonago e swanetše. Ge e ba go e na le go se kwane gare ga batswadi le bana, ka ge gantši go e-ba bjalo, batswadi ba swanetše go dira’ng? Maemong a mangwe, batswadi ba ka kgetha gore ba dumelelane le ditšhišinyo tša bana ba bona ge e ba di sa thulane le melao ya motheo ya Beibele. Na se se bolela gore batswadi ba palelwa ke go phetha boikarabelo bja bona bja bolaodi?

¹¹ Go araba potšišo ye, ela hloko kamoo Jehofa a ilego a diriša matla a gagwe ka lerato ge a be a dirišana le Lota le lapa la gagwe. Ka morago ga ge ba ntšheditše Lota, mosadi wa  gagwe le barwedi ba gagwe ka ntle ga Sodoma, barongwa ba ile ba bolela le bona ba re: “Thšabêla kwa dithabeng, xore O sa tlo senyêxa.” Lega go le bjalo, Lota o ile a araba ka gore: “Aowa hlê, Mong’aka!” Ka morago Lota o ile a šišinya gore ba ye go gongwe, a re: “A k’o bônê, motse šó fá kxaufsi, wo nkaxo thšabêla xo wôna; ’me ké o monyenyane. A nke ke thšabêlê xo wôna.” Karabo ya Jehofa e bile efe? O ile a re: “Xo lokile; le tabeng yeo ke tlo Xo dumêla.” (Genesi 19:17-22) Na Jehofa o be a palelwa ke go diriša bolaodi bja gagwe? Ga go bjalo le gatee! Eupša o ile a theetša kgopelo ya Lota gomme a kgetha go mo dira ka botho tabeng ye. Ge e ba o le motswadi, na go na le dinako tšeo o theetšago dikgopelo tša bana ba gago ge o bea melao ya lapa?

12. Ke’ng seo se tla thušago ngwana gore a ikwe a šireletšegile?

¹² Ke therešo gore bana ga se ba swanela go tseba feela melao yeo eupša ba swanetše go tseba gape le dikotlo tša go roba melao yeo. Ka morago ga ge dikotlo di ahla-ahlilwe le bona e bile ba di kwešiša, melao yeo e swanetše go dirišwa. Batswadi ga ba dire dilo ka tsela e lerato ge ba dulela go botša bana ba bona gore ba tla ba otla eupša ba sa ba otle. Beibele e re: “Pelo tša bana ba batho di tlala xo dira bobe, ka xe xò diêxa kôtlô ye e ahloletšwexo disenyi.” (Mmoledi 8:11) Ke therešo gore motswadi a ka phema go nea ngwana wa gagwe kotlo pele ga batho goba pele ga bana bao ba lekanago le yena, e le gore ngwana a se ke a lewa ke dihlong. Eupša bana ba ikwa ba šireletšegile kudu e bile ba hlompha batswadi ba bona ka mo go tseneletšego le go ba rata ge ba tseba gore “Ee” ya batswadi ba bona ke ee gomme “Aowa” ke aowa—le ge seo se akaretša go otlwa.—Mateo 5:37.

13, 14. Batswadi ba ka ekiša Jehofa bjang ge ba tlwaetša bana ba bona?

¹³ Ge e ba e swanetše go ba e lerato, kotlo gotee le mokgwa woo e newago ka wona di swanetše go ba tšeo di lekanego ngwana. Pam o gopola ka gore: “Go be go nyakega gore re otle bana ba rena ba babedi ka ditsela tšeo di sa swanego. Seo se bego se šoma go yo mongwe se be se sa šome go yo mongwe.” Monna wa gagwe, Larry, o hlalosa gore: “Morwedi wa rena yo mogolo o be a phegelela go dira dilo ka tsela ya gagwe gomme go be go bonala a e-kwa feela ge a newa kotlo e thata. Lega go le bjalo, morwedi wa rena yo monyenyane o be a e-kwa ge re mmotša ka molomo gaešita le ka go fo mo lebelela.” Ka kgonthe, batswadi ba lerato ba katanela go lemoga mekgwa ya kotlo yeo e swanelago ngwana yo mongwe le yo mongwe.

¹⁴ Jehofa o beela batswadi mohlala ka ge a tseba bokgoni le bofokodi bja mohlanka yo mongwe le yo mongwe wa gagwe. (Baheberu 4:13) Go tlaleletša moo, ge a phethagatša kotlo,  Jehofa ga a be thata kudu goba go tlogelela dilo. Go e na le moo, batho ba gagwe o ba “ôtla ka molaô.” (Jeremia 30:11) Batswadi, na le tseba matla le mafokodi a bana ba lena? Na le ka kgona go diriša tsebo yeo go ba tlwaetša ka tsela e holago le e botho? Ge e ba le dira bjalo, le bontšha gore le rata bana ba lena.

Kgothaletša Poledišano e Tšwago Pelong

15, 16. Batswadi ba ka kgothaletša bjang bana ba bona go bolela therešo, gomme ke mokgwa ofe wo batswadi ba Bakriste ba hweditšego o šoma maemong a?

¹⁵ Seka se sengwe sa lerato ke gore “ga le thabele go se loke eupša le thaba le therešo.” (1 Bakorinthe 13:6) Batswadi ba ka tlwaetša bana ba bona bjang go rata se se lokilego le seo se nepagetšego? Mogato o bohlokwa ke go kgothaletša bana ba bona gore ba ba ntšhetše sa mafahleng a bona, le ge e le gore seo bana ba se bolelago se nyamiša batswadi. Ka mo go kwešišegago, batswadi ba a thaba ge bana ba bolela dilo tšeo di sepedišanago le ditekanyetšo tše di lokilego tša boitshwaro. Lega go le bjalo, ka dinako tše dingwe dipolelo tša ngwana di ka utolla gore o sekametše dilong tšeo di sa lokago. (Genesi 8:21) Batswadi ba swanetše go arabela bjang? Ka ge ngwana a boletše dipolelo tše bjalo, gantši ka tlwaelo batswadi ba tla mo phošolla e sa le semeetseng. Ge e ba batswadi ba arabela ka tsela e bjalo bana ba ka tlwaela go bolela seo ba naganago gore batswadi ba bona ba nyaka go se kwa. Ke therešo gore dipolelo tša lenyatšo di swanetše go phošollwa ka pela, eupša go na le phapano magareng ga go ruta bana kamoo ba ka bolelago ka botho le go laola seo ba se bolelago.

¹⁶ Batswadi ba ka kgothaletša bana bjang gore ba bolele maikwelo a bona ka bolokologi? Aleah, yo go boletšwego ka yena pejana, o re: “Re ile ra dira gore boemo bo kgothaletše poledišano e tšwago pelong ka go leka gore re se ke ra itshwara ka tsela e sa swanelago ge ngwana a re botša selo seo re bonago se nyamiša.” Tate yo a bitšwago Tom o re: “Re ile ra kgothaletša morwedi wa rena gore a re ntšhetše sa mafahleng a gagwe, le ge a sa dumelelane le dikgopolo tša rena. Re ile ra bona gore ka mehla ge re be re mo thibela go ntšha sa mafahleng a gagwe gomme re mo gapeletša go dira seo re se ratago, o tla gakanega gomme a ithuta go se re botše seo a se naganago. Ka lehlakoreng le lengwe, go mo theetša go ile gwa mo dira gore a re theetše.” Ka kgonthe, bana ba swanetše go kwa batswadi ba bona. (Diema 6:20) Eupša go boledišana ka bolokologi go nea batswadi sebaka sa go thuša bana ba bona go ba le bokgoni bja go nea mabaka. Vincent, e lego tatago bana ba bane, o re: “Gantši re be re boledišana ka mehola le dikotsi tša boemo bjo itšego e le gore bana ba rena ba ka kgona go bona ditla-morago tše dibotse ka bobona. Se se ile sa ba thuša go hlagolela bokgoni bja go nagana.”—Diema 1:1-4.

17. Batswadi ba ka kgonthišega ka eng?

¹⁷ Ke therešo gore ga go na motswadi yo a ka kgonago go diriša ka mo go feletšego keletšo ya Beibele ya mabapi le go godiša bana. Lega go le bjalo, o ka kgodišega gore bana ba gago ba tla leboga maiteko ao o a dirilego a go ba tlwaetša bopelo-telele, ka tsela e botho le e lerato. Ruri Jehofa o tla putsa maiteko a gago a go dira bjalo. (Diema 3:33) Lebaka la go dira maiteko ao ke gore batswadi ba Bakriste ka moka ba nyaka gore bana ba bona ba ithute go rata Jehofa kamoo le bona ba mo ratago ka gona. Batswadi ba ka kgona bjang go fihlelela pakane ye yeo e kgahlišago kudu? Sehlogo se se latelago se tla ahla-ahla tše dingwe tša ditsela tšeo ka go lebanya.

Na o a Gopola?

• Ke bjang go ba le temogo go ka thušago motswadi gore a se fele pelo?

• Lerato le tayo di tswalana bjang?

• Ke ka baka la’ng go le bohlokwa gore batswadi le bana ba boledišane ka bolokologi?

[Dipotšišo tša Thuto]

[Seswantšho go letlakala 23]

Batswadi, na le sa gopola gore go be go le bjang go ba ngwana?

[Seswantšho go letlakala 24]

Na o kgothaletša bana ba gago go bolela therešo le go bolela ka bolokologi?