Dipotšišo tše Tšwago go Babadi

Jesu o be a e-ra go re’ng ge a be a re mohlanka wa gagwe yo a botegago e be e tla ba wa “temogo”?

Jesu o ile a botšiša gore: “Ke mang yo ruri e lego mohlanka yo a botegago le wa temogo, yo mong wa gagwe a mmeilego gore a hlokomele ba ntlo ya gagwe, gore a ba nee dijo tša bona ka nako e swanetšego?” (Mateo 24:45) “Mohlanka” yo a neago “dijo” tša moya ke phuthego ya Bakriste ba tloditšwego ka moya. Ke ka baka la’ng Jesu a ile a ba bitša bao ba nago le temogo? *

Re ka kwešiša gakaone-kaone seo Jesu a ka bego a be a se bolela ka lentšu “temogo” go tšwa thutong yona ye ya gagwe. Ka mohlala, ge a be a bolela ka “mohlanka yo a botegago le wa temogo,” Jesu o boletše papišo ya dikgarebe tše lesome tšeo di bego di letetše gore monyadi a fihle. Dikgarebe tše di re gopotša Bakriste ba tloditšwego ba pele ga 1914 bao ba bego ba letetše ka phagahlo go fihla ga Monyadi yo mogolo, Jesu Kriste. Go dikgarebe tše tše lesome, tše tlhano di be di se na makhura a lekanego ge monyadi a fihla, gomme di paletšwe ke go ba gona monyanyeng wa lenyalo. Tše dingwe tše tlhano di ile tša ipontšha di e-na le temogo. Di be di e-na le makhura a lekanego e le gore di ka tšwela pele di bonega ge monyadi a fihla gomme di ile tša dumelelwa go tsena monyanyeng.—Mateo 25:10-12.

Ge Jesu a be a e-ba matleng a gagwe a Mmušo ka 1914, bontši bja Bakriste ba tloditšwego bo be bo letetše go yo ba le yena ka yona nako yeo legodimong. Lega go le bjalo, go be go e-na le modiro o oketšegilego wo ba bego ba swanetše go o dira mo lefaseng, gomme ba bangwe ba be ba sa itokišeletša seo. Ka go swana le dikgarebe tšeo di se nago temogo, ga se ba ka ba imatlafatša moyeng e sa le pele, gomme ba be ba se ba itokišeletša go tšwela pele e le barwadi ba seetša. Lega go le bjalo, bontši bja bona bo itshwere ka tsela e bontšhago temogo—ka bohlale le ponelo-pele—gomme bo ile bja matlafatšwa moyeng. Ge ba be ba lemoga gore ba be ba sa na le mošomo o oketšegilego wo ba swanetšego go o dira, ba ile ba ikemišetša ka lethabo go o phethagatša. Ka baka leo, ba ile ba ipontšha e le “mohlanka yo a botegago le wa temogo.”

Ela hloko gape go diriša ga Jesu lentšu “temogo” go Mateo 7:24. Jesu o itše: “Yo mongwe le yo mongwe yo a kwago dipolelo tše tša-ka gomme a di dira o tla swantšhwa le monna yo a nago le temogo, yo a agilego ntlo ya gagwe godimo ga lefsika.” Monna yo a nago le temogo o aga moago o tiilego, ka ge a lemoga gore go ka ba le ledimo. Ka mo go fapanego, monna wa lešilo o aga lešabašabeng gomme o lahlegelwa ke ntlo ya gagwe. Ka baka leo, molatedi wa Jesu yo a nago le temogo ke yo a bonago e sa le pele mafelelo a kotsi a go latela bohlale bja batho. Bohlale bja gagwe le kahlolo e botse di dira gore a thee tumelo, ditiro le dithuto tša gagwe ka go tia go seo Jesu a se rutilego. “Mohlanka yo a botegago le wa temogo” o dira se se swanago.

Le gona, ela hloko go dirišwa ga lentšu leo le fetolelwago e le “temogo” diphetolelong tše dintši tša Mangwalo a Seheberu. Ka mohlala, Farao o kgethile Josefa gore a hlokomele kabo ya dijo kua Egipita. Ye e be e le karolo ya thulaganyo ya Jehofa ya gore a nee batho ba gagwe dijo. Ke ka baka la’ng go ile gwa kgethwa Josefa? Farao o mmoditše gore: “Xa xo sa na yo mongwê wa [“temogo,” NW] le yo bohlale e a kaxo etša wêna.” (Genesi 41:33-39; 45:5) Ka mo go swanago, Beibele e re Abigaile o be a e-na le “temogo e botse.” O ile a nea motlotšwa wa Jehofa e lego Dafida gotee le banna ba gagwe dijo. (1 Samuele 25:3, 11, 18, NW) Josefa le Abigaile ba be ba ka bitšwa bao ba nago le temogo ka gobane ba lemogile thato ya Modimo gomme ba dira dilo ka bohlale le ka kahlolo e botse.

Ka baka leo, ge Jesu a be a hlalosa mohlanka yo a botegago e le yo a nago le temogo, o be a bontšha gore bao ba emelwago ke mohlanka yoo ba be ba tla bonagatša go ba le tlhaologanyo, go bona dilo e sa le pele le go ba le kahlolo e botse ka gobane ba thea tumelo, ditiro le dithuto tša bona Lentšung la Modimo la therešo.

[Mongwalo wa ka tlase]